Shina watanga mitwe ya Tuposhi eswe a mwaka uno? Tala nyi muhasa kukumbulula yihula yino:

Yika yinasola ngwo Yehova kali chilweza chingunu cha chize mutuhasa kumona mapwo?

Iye keshi kusolwela mapwo katonde, keshi kuzanga chinji malunga kuhiana mapwo. Zambi kakwapanjika, kakulihulumba ha chize mapwo akulivwa ni ha yipikalo yize akupwa nayo. Iye nawa kakwajikijila ha kwaha mulimo wenyi.—w24.01, mafwo 15-16.

Kuchi mutuhasa kukaula majili ali ha A-Efwesu 5:7 anambe ngwo: “Kanda nulikata no”?

Postolo Paulu te kanatutoweza hanga tweche kulikata ni atu waze keshi kukaula shimbi ja Zambi. Utowezo wacho kuwatalile wika hali masepa waze mutulimona no meso ni meso, alioze ni ha internet nawa hanji ngwetu rede social.—w24.03, mafwo 22-23.

Kuchi mutuhasa kulifunga ku sango ja mahuza?

Twatamba kukanyama ni sango jize jakwiza kuli masepa jetu jize kujishi shindakenyo, ni yitanganyanyi waze akusweka utu wo wamwenemwene ni kulionga ngwe kanazange sango jipema.—w24.04, lifwo 12.

Yuma yika tunanyingika ni yize kutwanyingikine hakutwala ku chize Yehova makapatwila Mwanangana Solomone, atu waze afwile mu Sondome ni Ngomora ni waze afwile ha sanga lia meya?

Yetu kutwanyingikine nyi Yehova kapatwilile atu jacho ku unongeso wa mutolo. Alioze tunanyingika ngwetu, Yehova kananyingika yuma yeswe, nawa kapwa mukwa-keke.—w24.05, mafwo 3-4.

Shindakenyo yika twakupwa nayo muze Mbimbiliya yakuvuluka Yehova ngwe “Liwe” (Shimbi 32:4)

Yehova iye uchinyino wetu. Mutuhasa kumujikijila mashimbu eswe ngwetu mamanununa yilakenyo yenyi. Iye keshi kwalumuka, maliji wano kanasolola ngwo, Yehova kechi kwalumuna mutapu wenyi wa kulingilamo yuma chipwe upale wenyi.—w24.06, mafwo 26-28.

Yize Muyikukwasa Kwijilila mu Chikungulwila Cheka

Fuliela muli Yehova ngwe iye makukwasa ngwe chize akwashile tuvumbi twenyi kunyima. Kanda utesa chikungulwila chize wapwile ni chikungulwila chize walukila. Lihane ukwase chikungulwila chize walukila ni kusa tachi hanga upwe ni masepa aha.—w24.07, mafwo 26-28.

Malongeso aka twawana ha yishima yitatu ya Yesu yili ha Mateu 25?

Chishima cha mapanga ni pembe chakusolola ngwo, twatamba kupwa atu a ululi nawa ashishika. Ha chishima cha ana-mapwo yikanyame ni yihepuke chakusolola ngwo, twatamba kupwa akulilulieka ni kulawola. Chishima cha talentu chakusolola ngwo, twatamba kupwa yikilikita.—w24.09, mafwo 20-24.

Kuchi wapwile usuhwe wa senge lia tembele ya Solomone?

Ha 2 Sango ja Mianangana 3:4 yivungo yimwe yikulu yakwamba ngwo, senge liapwile lia “mbandu 120” hanji ngwetu, metro 53 ya chizundamo. Alioze, yivungo yikwo yavumbi yakwamba ngwo, senge liapwila ni “mbandu 20” hanji ngwetu, kuheta ku metro 9 ya usuhwe. Ulumbunwiso uno unalite ni mipimbo ya yikalakala ya tembele.—w24.10, mafwo 31.

Yika chinalumbunuka kavumbi kupwa “Lunga wa pwo umuwika”? (1 Timo. 3:12)

Chinalumbunuka ngwo kali lunga wa pwo umuwika, katambile kulinga utanji hanji upangala. Katamba kushishika kuli mukwo-pwo, chakuhona kusolola zango lia ulo kuli mapwo eka.—w24.11, mafwo 19.

Mumu liaka mutuhasa kwamba ngwetu, Yoano 6:53 kuushi kuhanjika ha yize te atu malinga ha Chiwanyino cha Mwene cha Ufuku?

Yoano 6:53 unasolola ulemu wa kulia mujimba wa Yesu ni kunwa manyinga jenyi. Yesu kahanjikile maliji wano ha mwaka 32 M.J. ku Ngalileya, kuli A-Yunda waze te anafupiwa kufuliela muli iye. Alioze, Chiwanyino cha Mwene cha Ufuku kachilingile mu Yerusaleme ha kupalika cha mwaka umuwika. Ha shimbu liacho, Yesu te kanahanjika ni waze makayula nenyi mu malilu.—w24.12, mafwo 10-11.