ATU kakuzanga kupwa ni uwahililo. Alioze ha matangwa wano akusula, hita mutu kali ni yipikalo yize yinakaliwa kuyikumba. (2 Timoteu 3:1) Atu amwe kakutokesa uwahililo wo mumu lia yihungumiona, misongo, kwaachiza ha mulimo hanji kufwisa mutu yoze azanga chinji. Akwo kakutokesa uwahililo wo mumu kwalingiwa yimwe yize yakwaazakalalisa hanji kweevwisa yinyengo. Chipwe tuvumbi twa Yehova no mahasa kuhona utakamiso, hachino hakehe-hakehe matokesa uwahililo wo. Nyi chino chinalingiwa kuli yena, kuchi muhasa kufunyina nawa uwahililo we?

Mba tukumbulule chihula chino, chitangu twatamba kunyingika chize wapwa uwahililo wamwenemwene ni chize akwetu akufunga uwahililo wo chipwe muze ali mu yipikalo. Kusulaho, mba mutumona chize mutuhasa kufunga uwahililo wetu ni kuwokesa.

Kuwahilila kuchalumbunukine wika kwivwa chiseke. Achinyonga hachino: Mutu yoze unazengewa mahasa kuliketeka. Alioze muze uzengi muumuhwa iye kechi kuliketeka nawa, hachino mahasa kunyingika ngwenyi nihindu uchili ni yipikalo yinji. Chiseke chenyi chapwanga wika cha shimbu likehe nawa te hi uwahililo wamwenemwene ko.—Yishima 14:13.

Kulisa ni yize twamba helu, uwahililo wamwenemwene wakukatuka ku mbunge muze mutuzuka hanji kushimbwila chimwe chuma chipema. Kupwa ni uwahililo chinalumbunuka kwivwa kuwaha ku mbunge chipwe mutupwa ha mashimbu apema hanji api. (1 A-Tesalonika 1:6) Kwamba pundu, mutuhasa kupihilila hamukunda wa chimwe chuma, nihindu mutununga ni kuwahilila. Chakutalilaho, apostolo kaalambile mumu lia kwambujola hakutwala kuli Yesu. Chipwe chocho, ayo “yakatuka kumeso ja akwa kuyula, nikuwahilila se Zambi yaanyonga akwa kutela kusauka mumu ha lie jina lia Yesu.” (Yilinga 5:41) Apostolo kakawahililile mumu lia yipundo, alioze mumu ayo kahashile kununga ni kushishika kuli Zambi.

Uwahililo kutushi kusemuka nawo nawa kuushi kwiza chamwijila. Mumu liaka twamba chocho? Mumu uwahililo wamwenemwene unalingi chihanda cha mihuko ya spiritu yisandu ya Zambi. Spiritu ya Zambi yakutukwasa hanga tupwe ni ‘utu waha’ uze unachingi uwahililo. (A-Efwesu 4:24; A-Ngalashia 5:22) Nawa muze tuli ni uwahililo, chino muchipwa chashi kukumba yipikalo yetu.

Yehova kazangile kumona yuma yipema yilingiwe hano hashi, hi yuma yipi ko yize yinalingiwa musono. Alioze chipwe muze atu akulinga yuma yipi, Yehova keshi kutokesa uwahililo wenyi. Mbimbiliya yinambe ngwo: “Tachi ni uwahililo watwama muma mwenyi.” (1 Sango ja Mianangana 16:27) Chikwo nawa, yuma yipema yize tuvumbi twa Yehova akulinga yakwaanehena uwahililo unji.—Yishima 27:11.

Twakwimbulula Yehova hakuhona kutokesa uwahililo wetu nyi yuma yize te tunashimbwila kuyalingiwile. Shimbu tulipikale, mutuhasa kulihulikila  ha yuma yipema yize tuli nayo haliapwila ni kushimbwila ni uhumikizo weswe yuma yipema ya kulutwe lia matangwa. *—Tala maliji mushi lia lifwo.

Mu Mbimbiliya muli yilweza yinji ya atu waze afungile uwahililo wo chipwe ngwe kapwile ni yipikalo yinji. Apalahama kafungile uwahililo wenyi chipwe muze mwono wenyi wapwile mu ponde ni muze atu akwo te akumunehena milonga. (Uputukilo 12:10-20; 14:8-16; 16:4, 5; 20:1-18; 21:8, 9) Mba yika yamukwashile kufunga uwahililo? Ha kunyonga kukutalatala chenyi cha kutwama hashi haha mu chiyulo cha Mesaya. (Uputukilo 22:15-18; A-Hepreu 11:10) Yesu ngwenyi: ‘Kulwenu Apalahama wawahililile ha kunyonga kumona tangwa liami.’ (Yoano 8:56) Twakwimbulula Apalahama muze twakununga ni kunyonga ha uwahililo uze mutukapwa nawo mu paraisu.—A-Roma 8:21.

Paulu ni Saila no kapwile ni ufulielo ukolo nawa kafungile uwahililo wo chipwe ngwe kapalikile mu yipikalo yinji. Chakutalilaho, muze te haalamba ni kwaasa mu zuwo lia ususu, ayo “apwile nikulemba, nikwimba miaso kuli Zambi.” (Yilinga 16:23-25) Ayo kahashile kukumba yipikalo yo, mumu kanungine ni kunyonga hakutwala ku yilakenyo ya Zambi ya kulutwe lia matangwa. Nawa kunyingika ngwo kapwile mu yipikalo mumu lia kupwa tumbaji ja Kristu chaahele uwahililo. Twakwimbulula Paulu ni Saila muze mutwiwuluka yuma yipema yize yakwiza ha kulingila Zambi ni ushishiko weswe.—A-Fwilipu 1:12-14.

Ni musono nawa, tuli ni yilweza yinji ya mandumbu waze akufunga uwahililo wo chipwe ngwe kakupalika mu yipikalo. Chakutalilaho, mu Novembro 2013 mu Filipina mwalingiwile kakundukundu, avuluka ngwo Typhoon, yono kapuzwile mazuwo a Yela ja Yehova kuhiana 1,000. George, yoze zuwo lienyi liapuzukile mu mbonge ya Tacloban, yamba ngwenyi: “Chipwe ngwe kwalingiwile yuma yinji, nihindu mandumbu kapwile ni uwahililo. Chili chikalu kuli yami kulumbununa uwahililo uze ngunevu.” Nyi mutunyonga hakutwala ku yize Yehova akutulingila ni kumusakwilila, mutufunga uwahililo wetu chipwe muze mutumona lamba linji. Yuma yika nawa Yehova akuhana yize yakutukwasa kupwa ni uwahililo?

Chuma chinene chize chakutwaha uwahililo chili usepa uze tukwete ni Yehova. Mumu iye kali Mwanangana wamu hashi heswe. Iye kali Tata, Zambi nawa Sepa lietu!—Samu 71:17, 18.

Nawa twakuwahilila chinji kuli Yehova mumu lia mwono ni uwashi uze atuhele. (Chilumbununyi 3:12, 13) Hamukunda wa chino, mutuhasa kunyingika upale wenyi hali yetu, nawa ni chize twatamba kutwama. (A-Kolosu 1:9, 10) Alioze, atu amwe kanyingikine ulemu wa mwono. Mba asolole kanawa kulisa chino, Paulu yasoneka ngwenyi: “Yuma yize meso kayimwene, ni matwi kayivwile, kuyanjilile mu mbunge ya mutu, yenayo hanatulika Zambi hali waze akumuzanga. Alioze Zambi hanayisolola kuli yetu ku tachi ja spiritu.” (1 A-Korindu 2:9, 10) Kunyingika upale wa Yehova chakutwaha uwahililo.

Yehova kakutulingila yuma yinji. Iye hanapwisa chashi ukonekeno wa shili yetu. (1 Yoano 2:12) Hanatwehe kutalatala cha mwono wa mutolo mu paraisu, yize kwasala hakehe hanga yize. (A-Roma 12:12) Chipwe haliapwila, Yehova kanatwehe masepa anji hanga tuhase kumuwayila. Iye nawa kakutufunga ku miheto ya Satana ni andemonio jenyi. (Samu 91:11) Nyi mutununga nikunyonga ha yuma yipema yize Yehova makatwaha, mutupwa ni uwahililo unji.—A-Fwilipu 4:4.

Shina mukwa-Kristu yoze uli ni uwahililo mahasa kuwahilila chinji kuhiana? Yesu ngwenyi: “Yino yuma hinahanjika kuli yenu, hanga uwahililo wenu ukazale too.” (Yoano 15:11) Maliji wano kanasolola ngwo mutuhasa kupwa ni  uwahililo unji. Mutuhasa kutesa uwahililo wetu ni kahia. Nyi mutuzanga hanga kahia kwoke, twatamba kuwezelaho kunyi. Tunyingikenu ngwetu: Spiritu yisandu yakutukwasa hanga tupwe ni uwahililo. Kashika nyi mutufupa kupwa ni uwahililo unji, twatamba kununga ni kwita spiritu yisandu ya Zambi mu yilemba yetu. Twatamba nawa kununga ni kupukuna ha yize tunatange mu Mbimbiliya, mumu yize yilimo kayihwimine kupalikila mu spiritu yisandu.—Samu 1:1, 2; Luka 11:13.

Chuma chikwo chize muchitwaha uwahililo unji, chili kununga ni kulinga yuma yize yakuvwisa Yehova kuwaha. (Samu 35:27; 112:1) Mumu liaka? Mbimbiliya yinambe ngwo katutangile hanga, ‘Tuvwile woma Zambi, ni kufunga shimbi jenyi, mumu henaho hasulila milimo ya mutu.’ (Chilumbununyi 12:13) Mumu katutangile hanga tulinge upale wa Zambi. Kashika nyi twanunga ni kulingila Yehova, mutupwa ni uwahililo uze unafupiwa ku mwono wetu. *—Tala maliji mushi lia lifwo.

Muze mutwokesa uwahililo wetu, mba mutupwa ni yiwape yinji. Chakutalilaho, mutuvwisa chinji Yehova kuwaha muze mutununga ni kumulingila ni uwahililo weswe chipwe mutumona yipikalo. (Shimbi Yamuchiali 16:15; 1 A-Tesalonika 5:16-18) Chikwo nawa, mumu lia uwahililo wamwenemwene uze tukwete, kutuchi kanyonga ngwetu kupwa ni upite che chikwete ulemu ku mwono. Alioze mutusa tachi hanga tufupe chitangu Wanangana wa Zambi. (Mateu 13:44) Nawa muze mutumona yuma yize yakwiza ha kulinga upale wa Yehova, mutuwahilila chinji, mutwivwa kuwaha hali yetwene, nawa mutukwasa akwetu no awahilile.—Yilinga 20:35; A-Fwilipu 1:3-5.

Chikwo nawa, uwahililo unji tukwete, wakutukwasa kupwa ni mujimba upema. Mbimbiliya yinambe ngwo: ‘Mbunge ya uwahililo yapwa yitumbo yipema.’ (Yishima 17:22) Umwe mukwa-mana hakutwala ku uwukiso ku Shikola yinene mu Nebraska Estados Unidos kambile yimwe yize yalita ni Mbimbiliya. Yamba ngwenyi: “Nyi mulikwiza ni kuwahilila ni mwono we haliapwila, muhasa kupwa ni mujimba upema kulutwe lia matangwa.”

Chipwe ngwe tuli ha mashimbu akalu, nihindu mutuhasa kupwa ni uwahililo wamwenemwene muze mututambula spiritu yisandu kupalikila mu yilemba, kulilongesa ni kupukuna ha Liji lia Zambi. Mutukapwa nawa ni uwahililo unji nyi mutunyonga ha yuma yipema yize Yehova akutwaha haliapwila, nyi mutwimbulula ufulielo wa akwetu, nawa nyi mutusa tachi hanga tulinge upale wa Zambi. Chocho mba mutumona umwenemwene wa maliji ali ha Samu 64:10 ngwo: “Akwa ululi makawahilila muli Yehova; makaswama muli iye.”