1, 2. Yika umwe ndumbu anyongene hali mwene, nawa yika alingile ha chikuma chacho?

ROBERTO kamupapachishile muze te uchili mukweze, alioze umwenemwene kuwakapwile chuma chilemu ku mwono wenyi. Yamba ngwenyi: “Ami te kuchishi kulinga yuma yipi, alioze kuchakapwile ni kuwahilila. Te nakusoloka ngwe najama ku ufulielo, mumu te nakukunguluka mashimbu eswe nawa ha mashimbu amwe te nakukalakala ngwe pionelu wa shimbu likehe. Alioze te nakuhona chimwe chuma ku mwono wami.”

² Roberto kakanyingikine chuma chize chapwile ni kuhona ku mwono wenyi ndo haze ambachile. Ha mashimbu amwe, iye ni mukwo-pwo te kakulinga yiheho ha kulihula yihula ya Mbimbiliya. Mukwo-pwo te kanyingika kanawa Mbimbiliya kashika chapwile chashi kukumbulula. Alioze kanji-kanji Roberto te keshi kunyingika makumbululo, chino te chakumuvwisa sonyi. Iye yamba ngwenyi: “Chapwile ngwe chanyingikine nichimwe. Yingunyonga ngwami, ‘Nyi ngunazange kupwa mwata yoze wakola ku ufulielo, natamba kulinga chimwe.’” Yalinga chocho. Yamba nawa ngwenyi: “Yinguputuka kulilongesa chinji Mbimbiliya hita  tangwa, chocho yinguputuka kukola ku ufulielo. Yingupwa ni chinyingi, nawa yingupwa ni usepa upema ni Yehova.”

3. (a) Yika mutuhasa kulilongesa ha chilweza cha Roberto? (b) Yikuma yika yilemu mutushimutwina ha mutwe uno?

³ Mutuhasa kuwana malongesa alemu ha chilweza cha Roberto. Mutuhasa kupwa ni chinyingi cha Mbimbiliya ni kuya ku kukunguluka hita shimbu hamwe ni kwambujola, alioze chino kuchalumbunukine ngwo tunakolo ku ufulielo. Hanji mutuhasa kusa tachi hanga tukole ku ufulielo, alioze muze mutulihengwola, mutumona ngwetu kuli yimwe yize mutuhasa kululieka ku ufulielo wetu. (A-Fwilipu 3:16) Ha mutwe uno, mutukumbulula yihula yilemu yitatu: (1) Yika muyitukwasa mba tunyingike nyi tunakolo ku ufulielo? (2) Kuchi mutuhasa kukola ku ufulielo? (3) Kuchi kukola ku ufulielo muchitukwasa ku mwono wetu hita tangwa?

4. Chiyulo chili ha A-Efwesu 4:23, 24 chinatale hali aya?

⁴ Muze twaputukile kuwayila Zambi, twalumwine yimwe yuma yize yakwachile ku mwono wetu weswe. Yuma yino kuyishi kuhwa muze akutupapachisa. Mbimbiliya yinatulweza ngwo: ‘Nungenu ni kupwa atu aha mu spiritu ya kunyonga chenu.’ (A-Efwesu 4:23, 24) Amu tuli yihenge, twatamba kununga ni kwalumuna yimwe ku mwono wetu. Chipwe ngwe twakuwayila Yehova ha miaka yinji, nihindu twatamba kununga ni kukolesa usepa wetu ni iye.—A-Fwilipu 3:12, 13.

5. Yihula yika muyitukwasa kunyingika nyi tunakolo ku ufulielo?

⁵ Chipwe ngwe tuli akweze hanji makulwana, nihindu twatamba kulihengwola ni mbunge yeswe. Mutuhasa kulihula ngwetu: ‘Shina nakusolola ngwami ngunakolo ku ufulielo? Kutala nakusa tachi hanga ngupwe ni kunyonga cha Kristu? Yika ndako jami jakusolola muze nakupwa ha kukunguluka? Shina yize nakuhanjika yakusolola yize nakuzanga chinji ku mwono wami? Kuchi yitanga yami ya kulilongesa, kuzala, kulipemesa, ni jila yize akunguhelamo chiyulo yakusolola utu wami? Kuchi nakulinga nyi nguli mu cheseko chakulinga chuma cha uhenge? Shina nguli mukwa-Kristu yoze wakola ku ufulielo?’ (A-Efwesu 4:13) Yihula yino muyitukwasa kunyingika nyi tunakolo lume ku ufulielo.

6. Yika nawa muyihasa kutukwasa kunyingika nyi tunakolo ku ufulielo?

⁶ Ha mashimbu amwe twakufupiwa ukwaso wa akwetu hanga tunyingike nyi tunakola ku ufulielo. Postolo Paulu kalumbunwine ngwo mutu wa musunya, kanyingikine ngwenyi mutapu uze mwono wenyi wapwa kuushi kwivwisa Zambi kuwaha. Alioze, mutu wakola ku ufulielo kakunyingika chize Zambi akunyonga. Iye kanyingika ngwenyi, Yehova keshi kutayiza atu waze akwete yitanga ya musunya. (1 A-Korindu 2:14-16; 3:1-3) Makulwana amu chikungulwila waze akwete nyonga  lia Kristu kakulianga kumona muze mandumbu maputuka kupwa ni yitanga ya musunya, nawa ayo kakusa tachi hanga aakwase. Nyi makulwana meza ni kutukwasa, shina mututayiza ukwaso wo ni kusa tachi hanga twalumune yitanga yetu? Nyi mututayiza ukwaso wo, mutusolola ngwetu tunafupu kununga ni kukola ku ufulielo.—Chilumbununyi 7:5, 9.

7. Kuchi tunanyingika ngwetu kupwa ni chinyingi cha Mbimbiliya kuchalumbunukine kukola ku ufulielo?

⁷ Kupwa ni chinyingi cha Mbimbiliya kuchalumbunukine ngwo tunakola ku ufulielo. Mwanangana Solomone te kanyingika kanawa Yehova, nawa maliji jenyi a mana kaasonekene mu Mbimbiliya. Alioze hakupalika cha matangwa usepa wenyi ni Yehova yipiha, chocho yahona kununga ni kushishika. (1 Mianangana 4:29, 30; 11:4-6) Mba yika tunafupiwa hanga tuwezele chinyingi chetu cha Mbimbiliya? Twatamba kununga ni kukolesa ufulielo wetu. (A-Kolosu 2:6, 7) Kuchi mutuhasa kuchilinga?

8, 9. (a) Yika muyitukwasa kukolesa ufulielo wetu? (b) Muze tunalilongesa ni kupukuna, nyonga lika twatamba kupwa nalio? (Tala chizulie ha uputukilo.)

⁸ Ku sekulu yitangu, Paulu kakolwezele akwa-Kristu hanga ‘asenye kulutwe ku ukulwana.’ (A-Hepreu 6:1) Kuchi mutuhasa kukaula chiyulo chino musono? Jila yilemu yize mutukawilamo chiyulo chino yili kulilongesa mukanda Lifunge mu Zango lia Zambi. Chino muchikukwasa kunyingika chize muzachisa shimbi ja Mbimbiliya ku mwono we. Nyi hiunalilongesa mukanda wacho, kuli nawa mikanda yikwo yize muhasa kulilongesa hanga yikukwase kukolesa ufulielo we. (A-Kolosu 1:23) Tulieswe twatamba kupukuna ha yize twakulilongesa ni kwita Yehova hanga atukwase tumone chize mutuyikaula ku mwono wetu.

⁹ Muze mutulilongesa ni kupukuna, nyonga lietu liatamba kupwa lia kukolesa zango lietu hali Yehova ha kulinga yize akuzanga ni kwononokena. (Samu 40:8; 119:97) Nawa twatamba kwehuka hita chuma chize muchitukwika kukola ku ufulielo.—Titu 2:11, 12.

10. Yika akweze atamba kulinga mba akole ku ufulielo?

¹⁰ Nyi uli mukweze, shina hi unatesa kulinga yimwe yuma ya ku spiritu ku mwono we?  Umwe ndumbu yoze wakalakala ku Mbetele kanji-kanji kakuhanjika ni akweze waze mapapachisa ha kukunguluka cha mbonge ni kwaahula hakutwala ku yuma ya spiritu yize malinga ku mwono wo. Kakumona chize anji akuli ayo akunyonga kanawa hakutwala ku yize anazange kulingila Yehova kulutwe. Amwe kakutesa kulingila Yehova mu mulimo wa shimbu lieswe hanji kuya kuze kunafupiwa ukwaso wa akwa-kwambujola. Alioze akweze amwe keshi kunyingika chize makumbulula chihula cha ndumbu wacho. Shina chino chinalumbunuka ngwo ayo kafupiwile kutesa yuma ya spiritu yize malinga ku mwono wo? Nyi uli mukweze, achilihule ngwe: ‘Shina nakuya ku kukunguluka ni kwambujola mumu lia yisemi jami? Nyi nakuchilinga mumu lia usepa uze ngukwete ni Zambi?’ Kwamba pundu, yetweswe chipwe akweze hanji makulwana twatamba kutesa yuma ya spiritu yize mutulinga ku mwono wetu. Yuma jacho muyitukwasa tukole ku ufulielo.—Chilumbununyi 12:1, 13.

11. (a) Yika twatamba kulinga mba tukole ku ufulielo? (b) Chilweza chika cha mu Mbimbiliya chize mutuhasa kwimbulula?

¹¹ Muze mutumona haze mutuhasa kululieka, twatamba kuputuka kwalumuna yitanga yetu. Chino chikwete ulemu mumu chinalumbunuka mwono hanji kufwa. (A-Roma 8:6-8) Yehova keshi kushimbwila hanga tupwe angunu, nawa kakutwaha spiritu yenyi yisandu hanga yitukwase. Chipwe chocho, twatamba kununga ni kusa tachi yetwene. Ndumbu John Barr, yoze te wamu Chizavu cha Tusongo, shimbu limwe yahanjika ha Luka 13:24 ni kwamba ngwenyi: “Atu anji kakuhengesa  mumu keshi kusa tachi hanga anunge ni kujama.” Twatamba kupwa ngwe Yakomba, yoze walilambile ni umwe mungelo chakuhona kuhonga ndo haze amuwahishile. (Uputukilo 32:26-28) Chipwe ngwe kulilongesa Mbimbiliya muchihasa kutwivwisa kuwaha, nihindu kutwatambile kumona Mbimbiliya ngwe mukanda wa yiheho. Twatamba kusa tachi hanga tuwane umwenemwene ulemu uze muutukwasa ku mwono.

12, 13. (a) Yika muyitukwasa kukaula A-Roma 15:5? (b) Kuchi chilweza ni chiyulo cha Petulu muyihasa kutukwasa? (c) Yika muhasa kulinga mba ukole ku ufulielo? (Tala mushete “ Yize Muhasa Kulinga Mba Ukole ku Ufulielo.”)

¹² Nyi twasa tachi hanga tukole ku ufulielo, spiritu yisandu muyitukwasa hanga twalumune kunyonga chetu. Nyi twachilinga, hakehe-hakehe mutupwa ni kunyonga cha Kristu. (A-Roma 15:5) Spiritu yisandu muyihasa kutukwasa hanga tukumbe usolo upi ni kupwa ni yitanga yize yakuvwisa Zambi kuwaha. (A-Ngalashia 5:16, 22, 23) Nyi mutunyingika ngwetu, twakulihulikila wika ha kufupa upite hanji kuheha, kutwatambile kuhonga. Twatamba kununga ni kwita spiritu yisandu kuli Yehova hanga yitukwase kulihulikila ku yuma yize yalita. (Luka 11:13) Twiwulukenu chilweza cha postolo Petulu. Iye kakapwile ni kunyonga mashimbu eswe ngwe Kristu. (Mateu 16:22, 23; Luka 22:34, 54-62; A-Ngalashia 2:11-14) Alioze kakahongele, chocho Yehova yamukwasa. Hakehe-hakehe Petulu yaputuka kunyonga ngwe Kristu. Ni yetu mutuhasa kuchilinga.

¹³ Kulutwe Petulu yatongola yimwe yitanga yize muyitukwasa. (Tanga 2 Petulu 1:5-8.) Tunafupiwa kusa tachi hanga tupwe ni yitanga ngwe, kulihumikiza, kunyongonona, zango lia undumbu, zango, ni yitanga yikwo yipema. Hita tangwa mutuhasa kulihula ngwetu, ‘Chitanga chika natamba kupwa nacho musono chize muchingukwasa kukola ku ufulielo?’

14. Kuchi kukola ku ufulielo chakukwata ku mwono wetu?

¹⁴ Nyi mutunyonga ngwe Kristu, chino muchitukwasa ku mulimo, ku shikola, chize mutuhanjika, ni chize mutukwata yiyulo hita tangwa. Yiyulo yetu muyisolola ngwo tunase tachi hanga twimbulule Kristu. Nyi twakola ku ufulielo, kutuchi kulinga nichimwe chize muchipihisa usepa wetu ni Yehova. Muze mutupwa mu cheseko cha kulinga chuma chipi, ufulielo wetu muutukwasa kuchehuka. Shimbu kanda tuchikwata chimwe chiyulo, twatamba kuhwima mbunge ni kulihula ngwetu: ‘Shimbi jika ja Mbimbiliya mujihasa kungukwasa ha chikuma chino? Nyi te Kristu, kachi yika alinga ha chikuma chino? Shina chino nyi nachilinga muchivwisa Yehova kuwaha?’ Wano e manyonga twatamba kupwa no. Kashika tutalenu ha yimwe yuma yize mutuhasa kusolola kunyonga chacho. Ha hita chuma, tutalenu shimbi ya Mbimbiliya yize muyihasa kutukwasa hanga tukwate yiyulo ya mana.

15, 16. Kuchi kunyonga ngwe Kristu muchitukwasa kukwata chiyulo cha mana (a) ha kusakula mutu yoze mulimbata nenyi? (b) ha kusakula masepa jetu?

¹⁵ Kusakula mutu yoze mulimbata nenyi. Shimbi ya Mbimbiliya yili ha 2 A-Korindu 6:14, 15. (Tanga.) Hano, Paulu kasolwele pundu ngwenyi, atu akola ku ufulielo kalisa chinji ni mutu wa musunya hanji ukwete manyonga a utu. Ayo keshi kunyonga yuma mu mutapu umuwika. Mba kuchi shimbi yino muyikukwasa kusakula mutu yoze mulimbata nenyi?

¹⁶ Kusakula masepa jetu. Shimbi ya Mbimbiliya  yili ha 1 A-Korindu 15:33. (Tanga.) Yinasolola ngwo, mutu wakola ku ufulielo keshi kulikata ni atu waze mahasa kupihisa ufulielo wenyi. Achinyonga chize muhasa kukaula shimbi yino mu mutapu walisa. Chakutalilaho, kuchi shimbi yino muyikukwasa hanga ukwate yiyulo hakutwala ku chikuma cha kupwa ni masepa ha internet? Kuchi shimbi yino muyikukwasa kunyingika nyi muheha yiheho ha internet ni atu waze wanyingikine?

17-19. Kuchi kupwa mutu wakola ku ufulielo muchitukwasa (a) kwehuka yuma yangwaza? (b) kunyingika yize twatamba kusa kulutwe ku mwono wetu? (c) kuhwisa kapinda mukachi ketu?

¹⁷ Yuma yize yakupihisa ufulielo wetu. Tunawane utowezo ulemu ha A-Hepreu 6:1. (Tanga.) ‘Yitanga yika ya kufwa’ yize twatamba kwehuka? Yino yili yuma yangwaza yize kuyishi kutukwasa hanga tukole ku ufulielo. Utowezo uno hakutwala ku yitanga ya kufwa muyitukwasa hanga tukumbulule yihula yino: ‘Shina yuma yino ngunambe kulinga yakuyukisa nyi yili yangwaza? Kutala natamba kulinjisa mu yuma yacho? Mumu liaka chatambile kulichinga ni atu waze anafupu kululieka yuma hano hashi?’

¹⁸ Kupwa ni nyonga lia kulinga yuma ya ku spiritu. Mu Longeso lia ha Mulundu, Yesu kanatwehe chiyulo chipema hakutwala ku yize yatamba kupwa ha chihela chitangu ku mwono wetu. (Mateu 6:33) Mumu mutu wakola ku ufuielo kakusa Wanangana wa Zambi kulutwe ku mwono wenyi. Shimbi yino muyitukwasa hanga tukumbulule yihula yino: ‘Shina munguya ku shikola yinene muze nguhwisa shikola yikehe? Kutala mungutayiza mulimo uze muungupinjisa ku ufulielo?’

¹⁹ Kuhona kulivwashana. Chiyulo cha Paulu kuli akwa-Kristu amu Roma muchihasa kutukwasa muze mutuhona kulivwashana ni akwetu. (A-Roma 12:18) Twakwimbulula Kristu ha kusa tachi hanga tupwe ni “sambukila kuli atu eswe.” Yitanga yika twakusolola nyi twahona kulivwashana ni akwetu? Shina chakupwa chikalu kutayiza manyonga ja akwetu? Kutala katunyingika ngwe mutu yoze wakuneha sambukila?—Tiangu 3:18.

20. Mumu liaka unazange kukola ku ufulielo?

²⁰ Yilweza yino yasolola chize shimbi ja Mbimbiliya mujihasa kutukwasa hanga tukwate yiyulo yize muyisolola ngwo, spiritu yisandu ya Zambi yinatusongwela. Nyi mutukola ku ufulielo mutupwa ni uwahililo unji ku mwono wetu. Roberto yoze hitwatongola kulu, yamba ngwenyi: “Muze te hi napwa ni usepa upema ni Yehova, yingupwa lunga nawa chisemi mupema. Yingupwa ni uwahililo mu usoko wami.” Nyi twasa tachi hanga tukole ku ufulielo, mutupwa ni yiwape yinji. Mutuwahilila ku mwono wetu haliapwila, nawa kulutwe lia matangwa mutukazuka “mwono wamwenemwene.”—1 Timoteu 6:19.