1-3. (a) Yika muyihasa kutukwasa mba tununge ni kushishika kuli Zambi ha mashimbu wano akasula? (b) Yika mutulilongesa ha mutwe uno?

MUSONO tuli ku songo lia matangwa akusula. Tunamono atu api kanoka chinji. Ayo “kanasoko ngwe mwambu.” (Samu 92:7) Kashika, kutushi kukomoka amu atu anji akulituna kulinga yize Zambi akwamba ngwenyi yalita. Paulu yalweza akwa-Kristu ngwenyi: “Mu uhuka pwenu ana-kemba, alioze mu kunyonga pwenu makulwana.” (1 A-Korindu 14:20) Kuchi mutuhasa kuchilinga?

² Twawana kumbululo ha chisoneko chetu cha mutwe, chinambe ngwo: “Yuma yeswe yinalumbunuka kuli waze akufupa Yehova.” (Yishima 28:5) Chino chinalumbunuka ngwo, ayo mahasa kunyingika yeswe yize yinafupiwa hanga evwise  Yehova kuwaha. Nawa mukanda wa Yishima 2:7, 9 unatulongesa ngwo, Yehova kakuhana mana kuli akwa ululi. Hachino, ayo mahasa ‘kusa chinyingi ululi, ni upatwilo, ni kulita, ni yize yeswe yipema.’

³ Noa, Daniele ni Yombi kapwile ni mana jacho a uzambi. (Ezekiele 14:14) Ni musono nawa, atu ja Zambi kakwete mana jacho. Mba yena? Shina ukwete mana a uzambi? Twatamba kunyingika kanawa yize Yehova akutwita mba tuhase kumuvwisa kuwaha. Kashika, ha mutwe uno, mutulilongesa (1) chize Noa, Daniele ni Yombi anyingikine Zambi, (2) chize kunyingika Zambi chaakwashile, ni (3) chize mutuhasa kupwa ni ufulielo ngwe wa ayo.

4. Kuchi Noa anyingikine Yehova, nawa kuchi kunyingika Zambi kanawa chamukwashile?

⁴ Kuchi Noa anyingikine Yehova? Kukatuka ha mashimu waze Alama ni Eva aputukile kupwa ni ana, atu kapwile ni kulilongesa hakutwala kuli Yehova mu majila atatu: kupalikila mu yitangiwa yenyi, kuli tuvumbi akwo a Zambi ashishika ni hakumona chize ayo ayukile hakumwononokena. (Izaia 48:18) Ha kulihulikila kanawa ha yitangiwa ya Zambi, Noa yahasa kumona ngwenyi Zambi katwamako nawa yanyingika yitanga ya Zambi. Chocho, Noa yanyingika ngwenyi, Yehova kali mukwa-ndundo nawa iye wika Zambi wamwenemwene. (A-Roma 1:20) Chikwo nawa, Noa yafuliela wika muli Zambi, ni kukolesa ufulielo wenyi muli iye.

5. Kuchi Noa anyingikine yize Zambi azangile hali atu?

⁵ Mbimbiliya yinambe ngwo, “ufulielo kuuneza ha kwivwa sango.” Chino chinalumbunuka ngwo, yuma yize twakwivwa kuli akwetu muyihasa kutukwasa hanga tupwe ni ufulielo. (A-Roma 10:17) Noa kota kevwile hakutwala kuli Yehova kuli asoko jenyi. Tato, Lameke, te kakufuliela muli Zambi nawa kasemukine shimbu te Alama kanda achifwa. (Tala chizulie ha uputukilo.) Kako kapwile Metusela. Kakuluka wenyi kapwile Yara, yoze wafwile miaka 366 muze te Noa hasemuka kulu. * (Tala maliji mushi lia lifwo.) (Luka 3:36, 37) Kota malunga jacho ni mapwo jo e alongesele Noa ngwo Yehova mwe watangile atu hanga aseme ana, kuzalisa hashi heswe ni kumuwayila. Noa kota kalilongesele nawa ngwenyi Alama ni Eva kalitunyine kwononokene Yehova mba yamona ukalu wakatukile ha chiyulo chize akwachile. (Uputukilo 1:28; 3:16-19, 24) Hachino, Noa yazanga yize alilongesele, yino yamukolwezele hanga awayile Yehova.—Uputukilo 6:9.

6, 7. Kuchi kutalatala chakolesele ufulielo wa Noa?

⁶ Kutalatala chakukolesa ufulielo. Achinyongenu ha chize ufulielo wa Noa wakolele muze anyingikine ngwenyi, jina lienyi linalumbunuka “Kuhwima” hanji “Kulembejeka,”  chino chinasolola nyonga lia kutalatala. (Uputukilo 5:29, maliji amushi lia lifwo NM.) Yehova yalweza Lameke maliji wano hakutwala kuli mwanenyi Noa ngwenyi: “Yono kumakatuwahisa ha milimo yetu ni kukilikita cha moko jetu mumu ha mavu aze Zambi washingile.” Kashika Noa yafulielele ngwenyi Zambi makalulieka yuma. Yafuliela nawa ngwenyi, umwe “munyachi” te muukawonda mutwe wa kapela ni kuneha ulamwino kuli atu ngwe chize Abele ni Enoke afulielele.—Uputukilo 3:15.

⁷ Noa kakanyingikine kanawa chilakenyo cha Zambi chili ha mukanda wa Uputukilo 3:15. Alioze kanyingikine ngwenyi uprofeto wacho te ukwete kutalatala cha kulutwe lia matangwa. Ni Enoke kambulwile sango jacho ngwenyi, Yehova makanongesa atu api. (Yundase 14, 15) Kashika, sango ja Enoke, jize mujikamanunuka ha Armagedone, jatakamishine ufulielo wa Noa ni kumwaha kutalatala!

8. Kuchi kunyingika kanawa Zambi chafungile Noa?

⁸ Kuchi chinyingi chamwenemwene cha Zambi chakwashile Noa? Hamukunda wakulilongesa hakutwala kuli Zambi, Noa yapwa ni mana a uzambi. Yino yamufungile chinji, chipi-chipi ku kulinga yuma yize te muyivwisa Yehova yinyengo. Kuchi acho? Noa kazangile kupwa sepa lia Zambi, kashika te keshi kulikata ni atu waze te keshi kufuliela muli Yehova waze nawa te akulitunaye. Kulisa ni atu jacho, Noa kakamupiangwile kuli andemoniu waze ejile hano hashi. Atu te kakukomoka andemoniu jacho a ndundo, ni kufupa kwaawayila. (Uputukilo 6:1-4, 9) Chikwo nawa, Noa kanyingikine ngwenyi Yehova kazangile hanga atu aseme ni kuzalisa hano hashi. (Uputukilo 1:27, 28) Kashika, muze andemoniu ambachile mapwo ni kusema no ana, Noa kanyingikine ngwenyi chapwile chipi. Chino yichisoloka kanawa muze ana jacho akolele ni kutatuka ni tachi kuhiana ana akwo. Chocho, Yehova yalweza Noa ngwenyi maneha sanga lia meya hanga anongese atu eswe api. Noa kafulielele ha utowezo wa Yehova, kashika atungile ulungu, chocho iye ni asoko jenyi yaalamwina.—A-Hepreu 11:7.

9, 10. Kuchi mutuhasa kupwa ni ufulilelo ngwe wa Noa?

⁹ Kuchi mutuhasa kupwa ni ufulielo ngwe wa Noa? Chili chilemu kulilongesa kanawa Liji lia Zambi, kuzanga yize tunalilongesa ni kuyikaula hanga twalumune yimwe ku mwono wetu ni kukwata yiyulo yipema. (1 Petulu 1:13-15) Nyi mutulinga chocho, ufulielo ni mana a uzambi muyitufunga ku makambwila a Satana, ahone kutupiangula ku yuma yipi ya hano hashi. (2 A-Korindu 2:11) Atu anji hano hashi kazanga ungulungulu ni utanji nawa kakukaula usolo wo upi. (1 Yoano 2:15, 16) Ayo kakulengulula yuma yize yinasolola ngwo tuli kusongo lia hano hashi hapi. Nyi kutushi ni ufulielo ukolo, ni yetu mutuhasa kuputuka kunyonga chocho. Kanda tuvulama ngwetu, muze Yesu atesele mashimbu jetu  ni mashimbu ja Noa, kakahanjikile hakutwala ku ungulungulu hanji utanji, alioze kahanjikile hakutwala ku ponde liakwiza ha kulalwoka ku kuwayila Zambi.—Tanga Mateu 24:36-39.

¹⁰ Tuchilihulenu ngwetu: ‘Shina mwono wami unasolola pundu ngwo, ngunanyingika kanawa Yehova? Kutala ufulielo wami wakungukwasa ngulinge yize Yehova anambe ngwenyi yalita ni kulongesa akwetu hanga alinge yize Zambi anazange hali ayo?’ Makumbululo je ha yihula yino mahasa kukukwasa kunyingika nyi wakwenda hamwe ni Zambi ngwe chize alingile Noa.

11. (a) Yika zango lia mukweze Daniele hali Zambi linatulongesa hakutwala kuli yisemi jenyi? (b) Yitanga yika ya Daniele tunazange kwimbulula?

¹¹ Kuchi Daniele anyingikine Yehova? Yisemi ja Daniele kota e amulongesele hanga azange Yehova ni Liji lienyi. Chocho Daniele yachilinga ku mwono wenyi weswe. Chipwe muze akolele, nihindu yanunga ni kulilongesa kanawa Yisoneko yisandu. (Daniele 9:1, 2) Daniele kanyingikine kanawa Yehova. Nawa kanyingikine yeswe yize Yehova alingile hali A-Izalele. Tunachinyingika hamukunda wa kulemba chenyi cha kulikehesa chakukatuka ku mbunge yenyi chize chili ha Daniele 9:3-19. Tanga kulemba chacho, nawa pukuna. Lihule ngwe: ‘Yika kulemba chino chinangulongesa hakutwala kuli Daniele?’

12-14. (a) Kuchi Daniele asolwele mana a uzambi? (b) Kuchi Yehova awahishile Daniele ha hamu ni kushishika chenyi?

¹² Kuchi kunyingika kanawa Zambi chakwashile Daniele? Kuchakapwile chashi kuli mukweze Ka-Yunda kuwayila Zambi mu Babilonia. Chakutalilaho, Yehova kalwezele A-Yunda ngwenyi: “Wahisenu chihunda kuze hinanutuma.” (Jeremia 29:7) Alioze yaalweza apwe ni kumuwayila wika iye ni mbunge yo yeswe. (Kutuhuka 34:14) Kuchi Daniele te mwononokena shimbi jeswe jiali? Mana a uzambi kakwashile Daniele hanga anyingike ngwenyi te katamba kwononokena Yehova chitangu, mba ononokene akwa-kuyula a hano hashi. Kulakaji ja miaka kulutwe, Yesu yalongesa shimbi yiyene.—Luka 20:25.

¹³ Achinyongenu ha chize Daniele alingile muze aseleko shimbi yakwamba ngwo, niumwe mutu malembela zambi hanji mutu mukwo wakuhi, shina kuli mwanangana wika ha matangwa 30. (Tanga Daniele 6:7-10.) Kachi Daniele te manyonga ngwenyi, ‘Kushi mulonga, kali wika matangwa 30.’ Alioze, Daniele kakechele hanga shimbi ja atu jipwe jilemu kuhiana kuwayila Zambi. Daniele te mahasa kulemba kuli Zambi kuchihela cha ukawenyi. Alioze, kanyingikine ngwenyi atu anji te kakumumona matangwa eswe. Kashika, chipwe ngwe yino te muyimunehena ponde, Daniele yanunga ni kulembela haze, aku atu kanamumono, mumu te keshi kuzanga hanga atu anyonge ngwo kecha kuwayila Yehova.

¹⁴ Yehova yawahisa Daniele ha hamu ni ushishiko wenyi. Iye yalinga chikomokeso ni kulamwina Daniele kuli ndumba. Hachino, atu eswe mu Wanangana wa A-Media-Persia yanyingika Yehova!—Daniele 6:25-27.

15. Kuchi mutuhasa kupwa ni ufulielo ngwe wa Daniele?

¹⁵ Kuchi mutuhasa kupwa ni ufulielo  ngwe wa Daniele? Twatamba kutanga Liji lia Zambi mba tupwe ni ufulielo ukolo. Twatamba nawa kulinyingika kanawa. (Mateu 13:23) Tunazange kunyingika chize Yehova akunyonga ni chize akwivwa hakutwala ku yize yakulingiwa. Kashika twatamba kupukuna hakutwala ku yize twakutanga. Nawa chili chilemu kulemba mashimbu eswe, chipi-chipi muze mutupwa mu kapinda. Mutuhasa kupwa ni shindakenyo ngwetu Yehova matwaha mana ni tachi jize mutwita.—Tiangu 1:5.

16, 17. Kuchi Yombi anyingikine Yehova?

¹⁶ Kuchi Yombi anyingikine Yehova? Yombi te hi Ka-Izalele ko. Alioze Apalahama, Izake ni Yakomba te asoko jenyi, nawa Yehova kaalongesele hakutwala kuli iye ni yize te anazange hali atu. Mu majila amwe, Yombi neye kalilongesele umwenemwene wacho. (Yombi 23:12) Iye yamba kuli Yehova ngwenyi: “Nevwile ni matwi jami lufuma  wenu.” (Yombi 42:5) Ni Yehova mwene kambile ngwenyi, Yombi kalwezele akwo umwenemwene hakutwala kuli Iye.—Yombi 42:7, 8.

¹⁷ Yombi neye kanyingikine yitanga ya Yehova hakutala yitangiwa. (Yombi 12:7-9, 13) Elihu ni Yehova kazachishile yitangiwa hanga alongese Yombi anyingike chize atu apwa akehe hakwaatesa ni Zambi. (Yombi 37:14; 38:1-4) Maliji a Yehova yaakwata ku mbunge ya Yombi ni kumulingisa ambe ni kulikehesa cheswe kuli Zambi ngwenyi: “Ngunanyingika munuhasa kulinga yuma yeswe nichimwe chuma muchifuwa chize munupala kulinga.” Yawezela ko nawa ngwenyi: “Ngunalikonyeka mu fufuta ni uto.”—Yombi 42:2, 6.

18, 19. Kuchi Yombi asolwele ngwenyi te kanyingika kanawa Yehova?

¹⁸ Kuchi kunyingika kanawa Zambi chakwashile Yombi? Yombi kanyingikine kanawa shimbi ja Zambi. Kwamba pundu, iye kanyingikine Yehova, chino chamukwashile kulinga yuma yipema. Chakutalilaho, Yombi te kanyingika ngwenyi katambile kwamba ngwenyi kakuzanga Zambi nyi te keshi kuzanga akwo. (Yombi 6:14) Iye te keshi kunyonga ngwenyi kapwile mupema kuhiana akwo, alioze te kakufunga akwo ngwe asoko jenyi, apwe pichi hanji yiswale. Yombi yamba ngwenyi: ‘Yoze wangutangile hi mwenawo nawa waatangile?’ (Yombi 31:13-22) Chipwe muze Yombi apwile pichi wa ndundo, iye te keshi kulizata hanji kulimona ngwe mulemu chinji kuhiana akwo. Ndako jenyi jalisa chinji ni atu a musono waze akwete upite ni ndundo.

¹⁹ Yombi te keshi kuzanga nichimwe chuma kupwa chilemu chinji kuli iye kuhiana Yehova. Kanyingikine ngwenyi nyi muchilingiwa, malikala ‘Zambi wamwenemwene wa mwilu.’ (Tanga Yombi 31:24-28.) Chikwo nawa, Yombi te kananyingika ngwenyi ulo wapwa chilakenyo chisandu hakachi ka lunga ni pwo. Kashika, yalishinga ngwenyi keshi kasa meso jenyi hali mwana-pwo ni nyonga lipi. (Yombi 31:1) Chino chili kukomoka, mumu Yombi kapwile ha mashimbu waze Yehova te akutayiza malunga kupwa ni mapwo anji. Kashika Yombi te mahasa kupwa ni mapwo aali nyi te mazanga. Alioze kanyingikine ngwenyi ulo utangu uze Yehova alingile wapwile wika wa lunga ni pwo, chocho Yombi yasakula kukaula shimbi yacho. * (Tala maliji mushi lia lifwo.) (Uputukilo 2:18, 24) Mba hakupalika cha miaka 1,600, Yesu yalongesa shimbi yiyene ngwenyi, kulisumbakenya ni umbachiso yapwa wika ya lunga ni pwo waze alimbata.—Mateu 5:28; 19:4, 5.

20. Kuchi kunyingika kanawa Yehova ni shimbi jenyi muchitukwasa kusakula kanawa masepa ni yiheho yetu?

²⁰ Kuchi mutuhasa kupwa ni ufulielo ngwe wa Yombi? Nihindu, twatamba kunyingika kanawa Yehova ni kwecha chinyingi chacho hanga chitusongwele ku yuma yeswe ku mwono wetu. Chakutalilaho, Mbimbiliya yinambe ngwo Yehova “kakuvwila kole yingulungulu,” kashika kutwatambile kupalikisa mashimbu hamwe ni atu waze keshi kuzanga umwenemwene. (Tanga Samu 11:5; 26:4.) Haliapwila lihule ngwe: ‘Yika yisoneko yino yaali yinangulweze ha chize Yehova akunyonga? Kuchi chino chatamba  kukwata ku yize nakumona ngwe yahiana chinji ulemu ku mwono wami? Kuchi chino chinakwata ha yize nakutala ha internet, hali masepa ni yiheho yize nakusakula?’ Makumbululo je mahasa kukukwasa hanga umone ni unanyingika kanawa Yehova. Kutwazangile hanga atupiangule ku yitanga ya hano hashi. Kashika, tunafupiwa kufumba “mana” jetu, che kwamba, kunyingika kulisa chili hakachi ka chipi ni chipema, yuma ya mana ni ya uhepuke.—A-Hepreu 5:14; A-Efwesu 5:15.

21. Yika muyitukwasa kunyingika “yuma yeswe” yize tunafupiwa hanga tuvwise Yehova kuwaha?

²¹ Noa, Daniele, ni Yombi kasele tachi hanga anyingike kanawa Yehova, kashika iye aakwashile kunyingika “yuma yeswe” yize ayo afupiwile hanga amuvwise kuwaha. Yilweza yo yinasolola ngwo kulinga yuma kulita ni usongwelo wa Yehova chakuneha yiwape ku mwono. (Samu 1:1-3) Kashika lihule ngwe, ‘Shina ngunanyingika kanawa Yehova ngwe chize Noa, Daniele ni Yombi amunyingikine?’ Kwamba pundu, musono mutuhasa kunyingika kanawa Yehova kuhiana chize amunyingikine kuli malunga wano ashishika, mumu kanatwehe sango jinji hakutwala kuli iye mwene. (Yishima 4:18) Kashika tulilongesenu kanawa Mbimbiliya. Tupukunenu kanawa ha yize tunatange. Nawa tupwenu ni kulemba twite spiritu yisandu. Nyi twalinga chocho, hashi hano hapi kuhechi kutupiangula. Alioze, mutulinga yuma ni mana a uzambi ni kukundama kuli Tata wetu wa mu malilu.—Yishima 2:4-7.