1. Mumu liaka tunafupiwa usongwelo wa Yehova? Hana chilweza.

 ACHINYONGA ngwe watoka mu mushitu. Muma liacho, muli yuma yeka ni yeka yize muyihasa kukulinga upi ngwe, tushitu, tututu waze mahasa kukunehena misongo, mitondo yize yikwete ulembe, mena ni yimbunji yize muyihasa kukulemeka. Yena mulivwa kanawa nyi muopwa hamwe ni kasongo yoze unanyingika kanawa kuze kuli ponde mu chihela chacho, ni chize munuhasa kulifunga! Hashi ha musono, hali ngwe ku chihela chacho. Hali yuma yipi yize kanji-kanji, yakusa mu ponde ufulielo wetu ni usepa wetu ni Yehova. Alioze yetu tuli ni kasongo mupema—Yehova. Iye kakutusongwela ku yihela kuze kukushi ponde, ni kutuhetesa kanawa kuze tunayi—mu chifuchi chaha, muze mutukatwama ni mwono wa mutolo.

2. Kuchi Yehova akutusongwela?

² Kuchi Yehova akutusongwela? Chitangu, iye kakuchilinga kupalikila mu Liji lienyi, Mbimbiliya. Alioze, kakutongola nawa atu hanga atusongwele. Chakutalilaho, iye hanatongola “ndungo washishika; wakanyama” hanga atwehe kulia cha ku ufulielo ni kutukwasa tukwate yiyulo yipema. (Mateu 24:45) Yehova kakutongola nawa malunga akwo waze ajama hanga atusongwele. Malunga jacho kali tulayi a mbonge ni makulwana a mu yikungulwila waze akututakamisa ni kutulongesa hanga tuhase kukumba yipikalo. Twakusakwilila chinji Yehova ha chize akutusongwela kanawa ha mashimbu wano akalu muze songo kanda lichiheta! Usongwelo uno, wakutukwasa kununga ni kupwa masepa ja Yehova ni kwenda mu jila ya mwono.

3. Yika mutushimutwina ha mutwe uno?

³ Chipwe ngwe tuli ni chinyingi chino, ha mashimbu amwe muchihasa kupwa chikalu kukaula usongwelo wa Yehova, chipi-chipi nyi usongwelo wacho unakatuka kuli atu. Mumu liaka chino chakulingiwa? Chakulingiwa, mumu chiyulo chize atwaha hanji hi chize  ko te tunashimbwila. Hanji mutuhasa kunyonga ngwetu, usongwelo uze twatambula kuushi ni ulemu, nawa kuwakatukile kuli Yehova. Ha mashimbu jacho, he twatamba kufuliela chinji ngwetu, Yehova mwe unasongwela atu jenyi; nawa ngwo, kukaula usongwelo wenyi muchituyukisa ku mwono wetu. Mba tuhase kukolesa ujikijilo wetu muli Yehova, mutwe uno muutukwasa kunyingika yikuma yino, (1) chize Yehova anakasongwela atu jenyi ku shakulu, (2) chize Yehova anasongwela atu jenyi musono, ni (3) chize mutuyuka nyi twanunga ni kukaula usongwelo wenyi.

KUCHI YEHOVA ASONGWELELE A-IZALELE?

4-5. Kuchi Yehova asolwele ngwenyi, katongwele Mose hanga asongwele A-Izalele? (Tala chizulie ha chifukilo.)

⁴ Yehova kasakwile Mose hanga akwase A-Izalele kutuhuka mu Engitu. Hachino, iye yasolola kuli A-Izalele zwalala ngwenyi, katongwele Mose hanga aasongwele. Chakutalilaho, mu mwalwa, Yehova yazachisa nguji lia lelwa; ha ufuku yazachisa nguji lia kahia. (Kutuhu. 13:21) Mba ahete ni A-Izalele ku Kalunga-lwiji Muchila, Mose kakawile nguji lize liapwile ni kumusongwela. Muze A-Izalele hanyingika ngwo, A-Engitu te kanaakaula munyima, yevwa woma unji mumu kanyongene ngwe maashiha. Ayo yaputuka kunyonga ngwe Mose kalingile upi unene ha kwatwala ku Kalunga-lwiji Muchila. Alioze, Mose kakalingile upi niumwe. Yehova mwe wazangile kutwala atu jenyi ku chihela chacho, chocho yalweza Mose hanga aatwale. (Kutuhu. 14:2) Mba chino yichikwasa Yehova kusolola ndundo jenyi mu jila yalipwila.—Kutuhu. 14:26-28.

⁵ Ha miaka 40, Mose yanunga ni kujikijila ha nguji lia lelwa hanga asongwele atu ja Zambi mu puya. a Ha shimbu limwe, Yehova yecha nguji lia lelwa lipwe helu lia mbalaka ya Mose hanga A-Izalele eswe alimone. (Kutuhu. 33:7, 9, 10) Mose te kakuhanjika ni Yehova kupalikila mu nguji liacho, hanyima mba mapalikisa usongwelo wacho kuli A-Izalele. (Samu 99:7) Chino te chakukwasa A-Izalele kumona pundu ngwo, Yehova katongwele Mose hanga aasongwele.

6. Yika A-Izalele anji alingile ha usongwelo uze Yehova apwile ni kwaha? (Kwalula 14:2, 10, 11)

⁶ Chaluyinda, A-Izalele anji kalengulwile yuma yize yapwile ni kusolola pundu ngwo, Yehova kanahanjika no kupalikila muli Mose. (Tanga Kwalula 14:2, 10, 11.) Ha yisuho yinji, ayo yalituna kutayiza ngwo, Yehova katongwele Mose hanga aasongwele. Ha mukunda wa chino, Yehova kakatayijile hanga chisemuko chacho cha A-Izalele chinjile mu Chifuchi cha Chilakenyo.—Kwa. 14:30.

7. Kuchi A-Izalele amwe asolwele ngwo, kapwile ni kujikijila ha chize Yehova te akusongwela atu jenyi? (Kwalula 14:24) (Tala nawa chizulie.)

⁷ Alioze, A-Izalele amwe kakawile usongwelo wa Yehova. Ngwe chilweza, Yehova kambile ngwenyi, “Kalemba hanangukaula liakulu,” hanji ngwetu, ni mbunge yeswe. (Tanga Kwalula 14:24.) Yehova kawahishile Kalemba ni kumwaha chihanda chize iye mwene asakwile mu Chifuchi cha Chilakenyo. (Yoshu. 14:12-14) Chisemuko cha A-Izalele chize chasulileho, necho chanungine ni kukaula usongwelo wa Yehova. Hanyima lia kufwa cha Mose, Yeshua yapwa kasongo ka A-Izalele; mba ayo yamuvumbika chinji “matangwa eswe a mwono wenyi.” (Yoshu. 4:14) Hachino, Yehova yawahisa A-Izalele ni kwatwala mu Chifuchi cha Chilakenyo.—Yoshu. 21:43, 44.

8. Lumbununa chize Yehova asongwelele atu jenyi ha mashimbu ja mianangana. (Tala nawa chizulie.)

⁸ Ha kupalika cha miaka, Yehova yasakula Akwa-Kuyula hanga asongwele atu jenyi. Kulutwe, ha mashimbu ja mianangana, Yehova yasakula aprofeta hanga asongwele atu jenyi. Mianangana waze te akushishika kuli Yehova, kapwile ni kukaula usongwelo wa aprofeta. Ngwe  chilweza, Mwanangana Ndawichi ni kulikehesa cheswe kakawile chiyulo chize amuhele kuli Natane. (2 Samue. 12:7, 13; 1 Sango 17:3, 4) Mwanangana Yehosofate, kakawile usongwelo wa profeta Jahaziele hanga akolweze A-Yunda ‘afuliele muli aprofeta a Zambi.’ (2 Sango 20:14, 15, 20) Mwanangana Hezekia muze apwile mu kapinda, kafupile ukwaso wa profeta Izaia. (Iza. 37:1-6) Muze mianangana apwile ni kukaula usongwelo wa Yehova te kakwawahisa, ni vungu lieswe te liakupwa mu ufunge upema. (2 Sango 20:29, 30; 32:22) Chasolokele zwalala ngwo, Yehova katongwele aprofeta hanga asongwele atu jenyi. Chipwe chocho, mianangana anji, kuchingako A-Izalele amwe, kalitunyine kukaula usongwelo wa aprofeta a Yehova.—Jere. 35:12-15.

CHIZE YEHOVA ASONGWELELE AKWA-KRISTU KU SEKULU YITANGU

9. Aya Yehova atongwele hanga asongwele Akwa-Kristu ku sekulu yitangu? (Tala nawa chizulie.)

⁹ Yehova kaputukile chikungulwila cha Akwa-Kristu ha Pentekoste ya mwaka 33 M.J. Mba kuchi iye asongwelele Akwa-Kristu jacho? Yehova katongwele Yesu ngwe mutwe wa chikungulwila. (Efwe. 5:23) Alioze, Yesu te keshi kuhanjika kuli hita kambaji hanga amulweze yize atamba kulinga. Iye katongwele apostolo ni makulwana mu Yerusaleme hanga asongwele Akwa-Kristu ku sekulu yitangu. (Yili. 15:1, 2) Chikwo nawa, yatongola makulwana hanga asongwele yikungulwila.—1 Tesa. 5:12; Titu 1:5.

10. (a) Kuchi Akwa-Kristu ku sekulu yitangu alivwile ha usongwelo uze apwile ni kutambula? (Yilinga 15:30, 31) (b) Mumu liaka kunyima, atu amwe te keshi kufuliela hali waze Yehova atongwele hanga asongwele atu jenyi? (Tala mushete, “ Amwe Kakulituna Usongwelo Uze Yehova Akutwaha Kupalikila Muli Atu”)

¹⁰ Shina Akwa-Kristu ku sekulu yitangu kanakajikijila ha chize Yehova akusongwela atu jenyi? Ewa, mumu anji a kuli ayo te kakuzanga chinji usongwelo uze apwile ni kutambula. Hachino, ayo ‘yawahilila chinji ha maliji a utakamiso’ waze apwile ni kwaha. (Tanga Yilinga 15:30, 31.) Mba, kuchi Yehova anasongwela atu jenyi musono?

CHIZE YEHOVA AKUTUSONGWELA MUSONO

11. Hana chilweza chinasolola chize Yehova akusongwela atu jenyi musono.

¹¹ Yehova kananungu ni kusongwela atu jenyi musono. Iye kakuchilinga kupalikila mu Mbimbiliya ni muli Yesu, yoze uli mutwe wa chikungulwila. Shina tuli ni yuma yize yinasolola pundu ngwo, Yehova kananungu ni kutongola atu hanga  asongwele tuvumbi twenyi? Ewa, yiliko. Ngwe chilweza, tutalenu yize yalingiwile hanyima lia mwaka 1870. Ndumbu Charles Taze Russell ni masepa jenyi waze no apwile ni kulilongesa Mbimbiliya, yahengwola ni kunyingika ngwo, mwaka 1914 te muupwa mwaka ulemu ku Wanangana wa Zambi. (Danie. 4:25, 26) Mba ahete ha chikuma chino, ayo kalilongesele chinji uprofeto wa mu Mbimbiliya. Shina Yehova kapwile ni kusongwela kuhengwola chize o alingile? Ewa, kapwile ni kuchisongwela. Ngwe chilweza, yuma yize yalingiwile hano hashi ha mwaka 1914, yasolwele pundu ngwo, Wanangana wa Zambi waputukile kuyula ha mwaka wacho. Ha mwaka wacho, jita yitangu ya hashi heswe yiyiputuka, mba kukatuka ha shimbu lize, yikuputuka kusoloka chinji misongo, minyiko ni kuhona cha yuma ya kulia. (Luka 21:10, 11) Pundu lume, Yehova katongwele malunga wano ashishika hanga asongwele atu jenyi.

12-13. Yika mandumbu alingile ha jita yamuchiali ya hashi heswe hanga ambujole chinji sango jipema?

¹² Tunyongenu nawa ha yize yalingiwile ha jita yamuchiali ya hashi heswe. Hanyima lia kuhengwola kanawa Usolwelo 17:8, mandumbu a ku chishina chinene yanyingika ngwo, jita yacho te kuyichi kuya ndo ku Armagedone. Alioze, te mukupwa umwe ukulungunga uze muutwaha uhashi weka ni weka mu mulimo wa kwambujola. Chocho, ayo yakwata chiyulo chize chasolokele ngwe kuchishi ni ulemu ha shimbu liacho: yasa Shikola ya Ngiliate hanga afumbe mishionaliu waze te maya ni kwambujola ni kulongesa atu mu yifuchi yeka ni yeka. Mishionaliu anji kaatumine chipwe muze te kuchili jita. Chikwo nawa, ndungo wakanyama, yasa Shikola ya Mulimo b wa Zambi hanga mandumbu eswe mu chikungulwila atambule fumbo lize muliaakwasa kupwa akwambujola apema ni kulongesa kanawa. Yino yeswe yinakakwasa atu ja Zambi kulilulieka ha mulimo unene uze te muwiza kulutwe.

¹³ Nyi twatala kunyima, mutuhasa kumona zwalala ngwetu, Yehova kapwile ni kusongwela atu jenyi ha mashimbu jacho akalu. Kashika, kukatuka ha jita yamuchiali ya hashi heswe, atu ja Yehova mu yifuchi yeka ni yeka yapwa ni umwe utuswilo wa kulinga mulimo wo wa kwambujola. Kwamba pundu, mulimo uno unakwase atu anji kunyingika Yehova. Ewa, tuvumbi twa Yehova kanambujola hashi eswe.

14. Mumu liaka mutuhasa kufuliela ha usongwelo wa mu ululikiso wa Yehova ni wa makulwana a mu chikungulwila? (Usolwelo 2:1) (Tala nawa chizulie.)

¹⁴ Musono, mandumbu a mu Chizavu cha Tusongo kananungu ni kukaula usongwelo wa Yesu. Ayo kakuchilinga ha kusa shindakenyo ngwo, yiyulo yize anakwate yinalite ni yize Yesu anazange. Chikwo nawa, tulayi a mbonge ni makulwana a mu yikungulwila, kakwatongola hanga apalikise usongwelo wacho kuli mandumbu mu yikungulwila yeswe. c Makulwana a mu yikungulwila waze hanawayisa kali mu ‘kwoko lia chindume’ lia Kristu. (Tanga Usolwelo 2:1.) Ewa, tunanyingika ngwetu, makulwana wano kali yihenge, hachino kakulinga amwe tupalia. Mose ni Yoshua kahengesele ha mashimbu amwe, ni apostolo no che alingile. (Kwa. 20:12; Yoshu. 9:14, 15; Roma 3:23) Chipwe chocho, twakumona pundu ngwetu, Yesu kananungu ni kusongwela ndungo wakanyama, hamwe ni makulwana eswe a mu yikungulwila. Iye manunga ni kuzachisa malunga wano “matangwa eswe, ndo ku songo lia miaka yino.” (Mateu 28:20) Kashika, yuma yino yeswe yinatukwase kununga ni kujikijila ha usongwelo uze Yesu anatwehe kupalikila muli malunga wano.

KUKAULA USONGWELO WA YEHOVA CHAKUTUYUKISA

15-16. Yika muhasa kulilongesa hali atu waze akawile yiyulo ya Yehova?

¹⁵ Yetu twakuyuka chinji muze twakukaula usongwelo wa Yehova. Tutalenu chilweza cha ndumbu Andy ni mukwo-pwo Robyn. Ayo kakawile chiyulo cha ndungo wakanyama hakutwala ku kwashiwisa mwono. (Tala nota ya estudo ha Mateu 6:22.) Chino yichaakwasa kukalakala mu mulimo wa kutunga mazuwo mu ululikiso wa Yehova. Robyn, yamba ngwenyi: “Ha mashimbu amwe, te twakutwama mu yipatulo yikehe-yikehe muze te kumushi chipwe chihela cha kutelekela. Chikwo nawa, nalanjishile yikwata yinji yize te nakukwata nayo foto; mulimo uze napwile ni kuzanga chinji. Nalilile muze nalanjishile makina jami a foto. Alioze chizechene ngwe Sara pwo lia Apalahama, nasele tachi hanga nguhone kutala kunyima.” (Hepre. 11:15) Mba yika Andy ni mukwo-pwo Robyn akunyonga ha yuma yino apalikile ku mwono? Robyn yanunga ni kwamba ngwenyi: “Twakuwahilila chinji ha kunyingika ngwetu, tunahane kuli Yehova yuma yeswe yize tuli nayo.” Muze twakukalakala mu ululikiso wa Yehova, chino chakutukwasa kumona chize mwono muukapwa mu chifuchi chaha. Andy neye yatayiza maliji a mukwo-pwo, ha kwamba ngwenyi: “Tunawahilila chinji ha kunyingika  ngwetu, tunase mashimbu ni tachi jetu hanga tulingile Yehova.”

¹⁶ Talenu chilweza chikwo chize chinasolola ulemu wa kukaula usongwelo wa Yehova. Hanyima lia kuhwisa shikola yikehe, Marcia yazanga kukaula chiyulo chize atambwile cha kupwa pionelu. (Mateu 6:33; Roma 12:11) Iye yamba ngwenyi: “Kanguhele uhashi wa kuya ni kulilongesa ku shikola yinene ha miaka yiwana, alioze nazangile kulingila chinji Yehova. Hachino, yingusakula kulilongesa umwe mulimo, uze te muungukwasa mu mulimo wa pionelu. Chino chili chimwe cha ku yiyulo yilemu yize hingunakwate ku mwono wami. Musono, ngunakalakala ngwe pionelu, nawa mulimo wami unangukwase kupwa ni mashimbu akukwasa ku Mbetele, ni kulinga milimo yikwo mu ululikiso wa Yehova.”

17. Yiwape yikwo yika twakuzuka muze twakukaula usongwelo wa Yehova? (Izaia 48:17, 18)

¹⁷ Ha mashimbu amwe, twakutambula yiyulo mu ululikiso wetu yize yakutufunga. Ngwe chilweza, kakututoweza hakutwala ku lamba lize liakwiza ha kuzanga yikumba ni kwehuka kulinga yuma yize muyihasa kupihisa usepa wetu ni Yehova. Kukaula yiyulo yacho chakutukwasa kumona ulemu wa kwononokena usongwelo wa Yehova. Twakupwa ni shimbi ya mbunge yitoma ni kwehuka yuma yize muyihasa kutunehena lamba. (1 Timo. 6:9, 10) Kukaula yiyulo yino, chakutukwasa kuwayila Yehova ni mbunge yeswe ni kupwa ni uwahililo hamwe ni sambukila ya ku mbunge.—Tanga Izaia 48:17, 18.

18. Mumu liaka unazange kununga ni kukaula usongwelo wa Yehova?

¹⁸ Chochene, Yehova manunga ni kutongola atu hanga akatwehe usongwelo ha luyinda munene, ni ha Kanunu ka Miaka ya kuyula cha Kristu. (Samu 45:16) Shina mutukanunga ni kukaula usongwelo uno chipwe ngwe mbunge yetu muyizanga kulinga yuma yeka? Muchikapwa chashi kukaula usongwelo weswawo Yehova makatwaha, nyi kukatuka haliapwila mutwononokena yiyulo yize iye akutwaha. Kashika, tunungenu ni kukaula usongwelo wa Yehova, uze unachingi yiyulo yeswe yize iye akutwaha kupalikila muli atu waze atongwele hanga atusongwele. (Iza. 32:1, 2; Hepre. 13:17) Nyi twakaula Yehova, Kasongo ketu mungunu, mutupwa ni shindakenyo ngwetu, iye matuchiza ku chuma cheswacho chize muchihasa kutunehena lamba ni kununga kupwa masepa jenyi ku mwono wetu weswe—ndo mu chifuchi chaha.