1-2. Yika yinatukwase kunyingika chize Yehova akwivwa ha mahuza waze ahanjikile hakutwala kuli iye?

 TUNYONGENU ha chikuma chino: Umwe mutu yoze wakuzanga chinji mahanjika yuma yipi hali yena. Yena unanyingika ngwe, yuma yacho yili ya mahuza, alioze atu akwo mayitayiza. Chaluyinda, ayo maputuka kumwanga mahuza jacho, mba atu akwo no maatayiza. Kuchi mulivwa? Kuuchi kulivwa kanawa nyi wakuzanga atu, nawa unazange kufunga lufuma we mupema.—Yishi. 22:1.

² Chikuma chino chinatukwase kunyingika chize Yehova alivwile, muze apihishile lufuma wenyi. Umwe wa kuli ana jenyi a spiritu, yahanjika mahuza kuli pwo mutangu, Eva. Iye yatayiza mahuza jacho. Ha mukunda wa mahuza jacho, yisemi jetu atangu, yehuka Yehova. Hachino, yapwa akwa-shili ni kufwa. Mba shili yiyilimwanga kuli yetu eswe. (Uputu. 3:1-6; Roma 5:12) Yuma yeswe yipi yize yakusoloka hano hashi ngwe kufwa, jita ni lamba, yakulingiwa mumu lia mahuza waze Satana ahanjikile mu munda wa Endene. Kuchi Yehova akwivwa ha kumona lamba lize liakwiza ku mahuza jacho? Kwamba pundu, chino chakuvwisa Yehova yikola yinji ku mbunge. Chipwe chocho, iye kalipwishile Zambi yoze wakufunga toto, alioze kananungu ni kupwa “Zambi ya sambukila.”—1 Timo. 1:11.

3. Uhashi uka tuli nawo?

³ Tuli ni uhashi wa kukwasa atu anyingike ngwo, Satana kahanjikile mahuza ha jina lia Yehova ha kwononokena maliji wano: “Halisenu jina lia Yehova.” (Samu 113:1) Twakuchilinga ha kuhanjika yuma yipema hali mutu yoze ukwete jina lino lisandu.  Shina hiwalihana hanga uchilinge? Mutuhengwola yikuma yilemu yitatu yize muyitukwasa kuhalisa jina lia Yehova ni mbunge yeswe.

YEHOVA KAKUWAHILILA MUZE TWAKUHALISA JINA LIENYI

4. Mumu liaka Yehova akuwahilila muze twakumuhalisa? Lumbununa. (Tala nawa chizulie.)

⁴ Tata yetu wa mu malilu kakuwahilila chinji muze twakuhalisa jina lienyi. (Samu 119:108) Shina chino chinalumbununa ngwo, Yehova kali ngwe atu yihenge waze akufupa hanga akwo aachichimieke mba alivwe kanawa? Ka, hi chocho ko. Tunyongenu ha chilweza chino. Umwe kanuke wa pwo makangayika tato ni kwamba ngwenyi, “Yena mwe tata mupema hashi heswe!” Tato mawahilila chinji ha yize mwanenyi amulweza. Mumu liaka? Shina mumu ngwo, iye kali chisemi yoze keshi ujikijilo wa kufupiwa wika mwanenyi amuchichimieke mba alivwe kanawa? Ka. Iye kananyingika ngwenyi, kali chisemi mupema. Alioze, mawahilila chinji ha kumona mwanenyi masolola zango ni usakwililo wenyi ha yize iye akumulingila. Kananyingika ngwenyi, yitanga yino yili ni ulemu mumu muyikakwasa mwanenyi kupwa ni uwahililo muze makola. Chizechene nawa, Tata yetu Yehova, kakuwahilila chinji muze twakumuhalisa.

5. Muze twakuhalisa Yehova, yuma yika twakusolola ngwetu yili ya mahuza?

⁵ Muze twakuhalisa Yehova, twakusolola nawa ngwetu, yuma yize Satana ahanjikile hali yetu yili ya mahuza. Mu mutapu uka? Iye kambile ngwenyi, kukushi mutu niumwe yoze makalila jina Yehova ni ushishiko. Kukushi niumwe, yoze nyi mamweseka manunga ni kushishika kuli Yehova. Iye kashindakenyene ngwenyi, yetu eswe lume mutuhasa kuhichika Yehova, nyi umwe matwaha chuma chipema. (Yombi 1:9-11; 2:4) Chipwe chocho, Yombi kasolwele ngwenyi, Satana kali mukwa-mahuza. Mba yika mutwamba hali yetu? Yetu eswe tuli ni uhashi wa kukwasa jina lia Yehova ni ushishiko ni kununga kumuwayila. (Yishi. 27:11) Chino chili chuma chilemu chize twatamba kulinga ku mwono wetu.

6. Kuchi mutuhasa kwimbulula Mwanangana Ndawichi ni A-Levi?

⁶ Kuzanga Yehova chakutwala atu waze ashishika ahalise jina lienyi. Mwanangana Ndawichi yasoneka ngwenyi: “Mbunge yami, fumanyisa Yehova. Yuma yeswe yili muchima liami fumanyisa jina lienyi lisandu.” (Samu 103:1) Ndawichi kanyingikine ngwenyi, kuhalisa jina lia Yehova chapwile kuhalisa Yehova mwene. Jina lia Yehova linachingi lufuma wenyi, kashika, yino yinatwiwulula yitanga yenyi  yipema ni yuma ya kukomwesa yize hanalingi. Ndawichi kazangile chinji kuhalisa jina lia Tato wa mu malilu, mumu iye kali musandu. Iye kazangile kumuhalisa ni yuma yeswe yize apwile nayo, chekwamba, ni mbunge yeswe. Chizechene nawa, A-Levi te kakulemesa chinji chiteli cho cha kuhalisa Yehova. Ayo katayijile ni kulikehesa cheswe ngwo, maliji jo te kechi kuhasa kuhalisa jina lisandu lia Yehova mu mutapu uze liatela. (Tanga Nehemia 9:5.) Kwamba pundu, kulikehesa chino chinakevwisa Yehova kuwaha.

7. Kuchi mutuhasa kuhalisa Yehova mu mulimo wa kwambujola ni ku mwono wetu wa tangwa ni tangwa?

⁷ Ni yetu nawa mutuhasa kuhalisa Yehova, ha kuhanjika hali iye ni zango ni kusolola usakwililo wetu. Muze tuli mu munda, muchilita kwiwuluka ngwetu, chikuma chilemu chili kukwasa atu hanga akundame kuli Yehova ni kunyingika ngwo, iye kali Tata yetu wa zango. (Tia. 4:8) Kuli yetu, chili kuyuka chinene ha kusolwela atu mu Mbimbiliya ngwo, Yehova kali Zambi wa zango, ululi, mana, ndundo nawa ngwo kali ni yitanga yikwo yipema. Jila yikwo ya kuhalishilamo Yehova ni kumuvwisa kuwaha, yili muze mutusa tachi hanga tumwimbulule. (Efwe. 5:1) Chino muchihasa kukwasa atu akwo amone ngwo, twalisa ni atu anji hano hashi. (Mateu 5:14-16) Muze tuli hamuwika ni atu jacho, hanji mutupwa ni uhashi wa kwalumbunwina yize twalisela ni atu akwo. Hachino, atu amwe a mbunge yipema, mahasa kuzanga kulilongesa hakutwala kuli Yehova. Nyi twahalisa Yehova mu mutapu au, iye mawahilila chinji.—1 Timo. 2:3, 4.

YESU KAKUWAHILILA MUZE TWAKUHALISA JINA LIA YEHOVA

8. Kuchi Yesu ahalishile jina lia Yehova?

⁸ Hakachi ka yitangiwa yeswe ya mana mu malilu ni hashi, kukushi chitangiwa nichimwe chize chinanyingika kanawa Yehova kuhiana Yesu. (Mateu 11:27) Yesu kakuzanga Tato, kashika akuhalisa jina lienyi. (Yoa. 14:31) Yilemba yimwe alingile kuli Tato, ha ufuku wenyi wa kasula, yamba hakutwala ku mulimo wenyi wa kwambujola hano hashi ngwenyi: “Yami nanyingikisa jina lienu.” (Yoa. 17:26) Yika ambile kwamba ha maliji wano?

9. Chishima chika Yesu atele hanga atukwase kunyingika utu wa Yehova?

⁹ Yesu kalingile yuma yinji hi wika ko kulweza atu ngwenyi, jina lia Zambi, Yehova. A-Yunda waze Yesu apwile ni kuhanjika no, te kanyingika jina lia Zambi. Alioze Yesu yalihana mwene ‘hanga amusolole.’ (Yoa. 1:17, 18) Chakutalilaho, Yisoneko ya Hepreu yinambe ngwo: ‘Yehova, [kali] Zambi mukwa-keke, mukwa-kukonekena.’ (Kutuhu. 34:5-7) Yesu kasolwele chikuma chino zwalala ha chishima cha mwana chimwangi. Muze twakutanga ha chize chisemi wacho azombokele ni kupatwiza mwanenyi muze amumwene kusuku, ni kumukangayika ni kumukonekena ni mbunge yeswe, chakutukwasa kumona keke ni ukonekeno wa Yehova. (Luka 15:11-32) Yesu kakwashile akwo kunyingika kanawa utu wa Yehova.

10. (a) Kuchi tunanyingika ngwetu, Yesu te kakutongola jina lia Tato, nawa kazangile hanga atu achilinge? (Marku 5:19) (Tala nawa chizulie.) (b) Yika Yesu anazange hanga tulinge musono?

¹⁰ Shina Yesu kazangile hanga atu akwo no avuluke jina lia Tato? Ewa, che azangile lume. Mangana amwe a mayingeleja kapwile ni kwamba ngwo, chili kuhona vumbi kutongola jina lia Zambi. Alioze, Yesu kakechele hanga mwanda uno, uze kuushi mu Yisoneko ukwike atu kuhalisa jina lia Tato. Ha chisuho chimwe, Yesu yauka lunga wapwile ni andemoniu yoze te watwama mu chihunda cha A-Ngandara. Atu yevwila Yesu woma unji, chocho yamwita hanga atuhuke mu chihunda chacho. (Marku 5:16, 17) Chipwe chocho, Yesu kazangile hanga atu mu  chihunda chacho anyingike jina lia Zambi. Hachino, yalweza lunga yoze aukile hanga ahanjike ni atu akwo, hi ha yize ko iye amulingilile, alioze ha yize Yehova alingilile lunga wacho. (Tanga Marku 5:19.) a Ni haliapwila Yesu kanazange hanga jina lia Tato alinyingike hashi heswe. (Mateu 24:14; 28:19, 20) Muze twakulinga chihanda chetu ha chikuma chino, twakuvwisa kuwaha Mwanangana wetu, Yesu.

11. Yesu kalongesele tumbaji chenyi hanga alembe ha yika; nawa mumu liaka chino chili ni ulemu? (Ezekiele 36:23)

¹¹ Yesu kanyingikine ngwenyi, nyonga litangu lia Yehova lili kuhalisa jina Lienyi, ni kusolola kuli atu ngwo, yuma yize amwambile mu munda wa Endene yili ya mahuza. Kashika, alongesele tumbaji twenyi kulemba ngwenyi: “Tata yetu nuli mu malilu, jina lienu lipwe lisandu.” (Mateu 6:9) Yesu kanyingikine ngwenyi, chikuma chino te chinatale hali yitangiwa yeswe. (Tanga Ezekiele 36:23.) Kukushi chitangiwa nichimwe mu malilu ni hashi, chize chasele tachi hanga chihalise jina lia Yehova kuhiana Yesu. Alioze mulonga uka amusumine muze amukwachile kuli akwa-kole jenyi? Ayo kambile ngwo, kashililika Zambi! Kwamba pundu, Yesu kanyingikine ngwenyi, kwamba yuma yipi ha jina lisandu lia Tato chapwile shili yinene yize mutu mahasa kulinga. Kumukwata ni kumushiha hamukunda wa chitela chino, chamunehenene yikola yinji ku mbunge. Chino kota che chatwalile Yesu, mba alipikale chinji ha amwe mashimbu muze te kanda achimukwata.—Luka 22:41-44.

12. Kuchi Yesu ahalishile jina lia Tato mu jila yalita?

¹² Mumu lia kuzanga kuhalisa jina lia Tato, Yesu yamumwesa lamba, yamutuka ni kumuliongela yuma. Iye kanyingikine ngwenyi, kononokena Tato mu yuma yeswe; kwakapwile chuma nichimwe chize te mevwila sonyi. (Hepre. 12:2) Iye kanyingikine nawa ngwenyi, Satana te kanalimiki nenyi ha mashimbu jacho akalu. (Luka 22:2-4; 23:33, 34) Satana kalingile yeswe yize te mahasa hanga atwale Yesu ahone kwononokena Yehova, alioze kakahashile! Yesu kasolwele ngwenyi, Satana kali mukwa-mahuza; nawa ngwenyi, Yehova kali ni tuvumbi ashishika waze manunga ni kumuwayila chipwe ngwe mapalika mu yipikalo yeka ni yeka!

13. Kuchi muhasa kuvwisa kuwaha Mwanangana we Yesu?

 ¹³ Shina unazange kuvwisa kuwaha Mwanangana we Yesu? Nyi che unazange, nunga ni kuhalisa jina lia Yehova ha kukwasa atu akwo alilongese ha yitanga yipema ya Zambi yetu. Nyi wachilinga, acho unakaula mu ngano ja Yesu. (1 Petu. 2:21) Chizechene ngwe Yesu, ni yena muvwisa Yehova kuwaha. Kulinga chino, unasolola ngwo mukwa-kole wenyi, Satana, kali mukwa-mahuza!

MUZE TWAKUHALISA JINA LIA YEHOVA TWAKUKWASA KULAMWINA MWONO WA ATU

14-15. Yuma yika yipema yize muyihasa kulingiwa muze tunalongesa atu hakutwala kuli Yehova?

¹⁴ Muze twakuhalisa jina lia Yehova, twakukwasa kulamwina mwono wa atu. Kuchi twakuchilinga? Satana “hanapupuchisa manyonga ja waze keshi kufuliela.” (2 Kori. 4:4) Ayo kakutayiza mahuza a Satana anambe ngwo, Zambi katwamineko, Zambi katwama kusuku ni yetu; keshi kulihulumba hali atu, Zambi kali mutu mupi, kakumwesa lamba ku miaka yeswe atu waze akulinga shili. Satana kakumwanga mahuza wano, mumu kanazange kupihisa jina lia Yehova ha kukwika atu ahone kukundama kuli iye. Kashika muze twakwambujola, twakukwika Satana kumwanga mahuza jacho. Yetu twakulweza atu umwenemwene hakutwala kuli Tata yetu, ni kuhalisa jina lienyi lisandu. Yika yino yakuneha?

¹⁵ Umwenemwene wa mu Liji lia Zambi ukwete ndundo jinji. Muze twakulongesa atu hakutwala kuli Yehova ni chize iye apwa, twakumona chimwe chuma cha kukomwesa. Yihwahwi yize Satana akusa mu meso ja atu, yakukatuka ni kuputuka kumona kanawa yitanga ya Tata yetu wa zango. Ayo kakukomoka ha ndundo ja Yehova jize kujishi musulo. (Iza. 40:26) Kakulilongesa kujikijila muli iye, mumu lia ululi wenyi ungunu. (Shimbi 32:4) Ayo kakulilongesa yuma yinji ha mana jenyi. (Iza. 55:9; Roma 11:33) Chikwo nawa, kakuwana utakamiso muze akulilongesa ngwo, Yehova kali Zambi ya zango. (1 Yoa. 4:8) Muze o akusa tachi hanga akundame kuli Yehova, chino chakwakwasa kukolesa kutalatala cho cha kutwama ku miaka yeswe. Kashika, tuli ni chiwape chinene cha kukwasa atu hanga akundame kuli Yehova! Muze twakuchilinga, twakulipwisa “akwa-milimo-ni-akwo” a Yehova.—1 Kori. 3:5, 9.

16. Kuchi atu amwe akwivwa muze akunyingika jina lia Zambi? Hana yilweza.

 ¹⁶ Chuma chitangu chize mutuhasa kulongesa atu chili kwalweza ngwo, jina lia Zambi, Yehova. Kulinga chino, muchihasa kukwata ku mbunge ya mutu yoze unazange kunyingika Zambi. Chakutalilaho, Aaliyah b kamulelele mu usoko uze kuushi kufuliela muli Kristu. Alioze, iye te keshi kuwahilila chinji mu uwayilo wacho, nawa te keshi kulivwa hakamwihi ni Zambi. Yino yeswe yalumukine muze aputukile kulilongesa ni Yela ja Yehova. Mu longeso lienyi, iye yaputuka kumona Zambi ngwe Sepa lienyi, ni kukomoka muze anyingikine ngwenyi, jina lia Zambi hanalichiza mu Mbimbiliya jinji ni kusamo yisanyiko ngwe Mwene. Kunyingika jina lia Yehova chalumwine mwono wenyi. Iye yamba ngwenyi: “Sepa liami mupema kali ni jina!” Yika azukile ku mwono wenyi? Yamba nawa ngwenyi: “Haliapwila nguli ni sambukila ya ku mbunge, nawa nakulivwa ngwami ngukwete ulemu.” Umwe ngimba avuluka ngwo Steve, kamulelele mu mutapu uze kuwalitele mu yingeleja ya A-Yunda. Iye kakazangile nawa kuya mu yingeleja niyimwe, mumu lia kalimba-limba yoze amwene. Alioze hanyima lia kufwa cha naye, yatayiza longeso lia Mbimbiliya kuli Yela ja Yehova. Muze alilongesele hakutwala ku jina lia Zambi, chino yichimukwata chinji ku mbunge. Yamba ngwenyi: “Yami te kanda nguchililongesa kama hakutwala ku jina lia Zambi. Chino chili chisuho chitangu chize nanyingika ngwami, Zambi kali mutu wamwenemwene! Haliapwila hinanyingika ngwami, nawana umwe Sepa wamwenemwene.”

17. Mumu liaka unazange kununga ni kuhalisa jina lia Yehova? (Tala nawa chizulie.)

¹⁷ Muze wakutuhuka mu munda, shina wakulongesa atu jina lisandu lia Yehova? Wakwakwasa amone yitanga yenyi yipema? Kulinga chino, muchisolola ngwo unahalisa jina lia Zambi. Nunga ni kuhalisa jina lisandu lia Yehova ha kukwasa atu hanga amunyingike kanawa. Nyi wachilinga, mukwasa kulamwina mwono wa atu; mukaula mu ngano ja Mwanangana wetu, Yesu Kristu. Chahiana yeswe, muvwisa kuwaha Tata yetu wa zango, Yehova. Kashika, nunga ni “kuhalisa jina lia Yehova ku miaka yeswe ya mutolo!”—Samu 145:2.