HA yisuho yimwe, atu waze asonekene Mbimbiliya te kafumunyina maliji amwe ha kusoneka liji ni liji. Tutalenu yikuma yitatu ya mumu liaka kota o alingile chocho:

Ha shimbu lize ayisonekene. Ku shakulu, A-Izalele anji kakapwile ni kopia ya yisoneko ya Shimbi jize mutu ni mutu te mazachisa. Kanji-kanji, uhashi umuwika uze apwile nawo wa kwivwa Shimbi ya Zambi, wapwile muze te akulikungulula ku tabernakulu. (Shimbi 31:10-12) Kota ha mashimbu jacho, te chashi atu kuhona kulihumikiza hanga apanjike liji lia shimbi mumu lia kumana ha maola anji mukachi ka mbunga yinene. (Nehe. 8:2, 3, 7) Hachino, mba atu ahase kwiwuluka yize te anaatangila ni kuyikaula ku mwono wo, chapwile chilemu kufunyina maliji amwe alemu. Kufunyina maliji amwe te muchipwa chilemu hanga atu ahase kwiwuluka kanawa shimbi jimwe jize japwile ni yikuma yinji.—Levi 18:4-22; Shimbi 5:1.

Chize ayisonekene. Mikanda yimwe ya Mbimbiliya, kayisoneke ngwe miaso. Tuli ni chilweza cha mukanda wa Masamu, Mwaso wa Solomone ni Lungungu wa Jeremia. Miaso yimwe yili ni maliji akufunyina, waze akusolola ulemu wa mutwe wa mwaso ni kukwasa waze anawivu ewuluke maliji jacho. Ngwe chilweza, tala maliji ali ha Samu 115:9-11: “Enu A-Izalele! Fulielenu Yehova, iye chikwashi cho kanda lukepwe wo. Enu akwa jiko lia Arone fulielenu Yehova, iye chikwashi cho kanda lukepwe wo. Enu eswe nwakuvwila woma Yehova, fulielenu Yehova, iye chikwashi cho kanda lukepwe wo.” Shina wahasa kumona chize kufunyina maliji te muchikwasa kupachikila mwaso mu manyona ni ku mbunge ya waze te mawimbi?

Yize ausonekenene. Ha mashimbu amwe, atu waze asonekene Mbimbiliya te kakufunyina maliji alemu. Ngwe chilweza, muze Yehova alweze A-Izalele hanga achine kulia manyinga, iye kalwezele Mose hanga afunyine ulemu wa chikuma chacho ha yisuho yinji. Zambi kazangile kushindakenya ngwenyi, manyinga we mwono. (Levi 17:11, 14) Kulutwe, muze apostolo ni makulwana mu Yerusaleme, asonekene ha yize te Akwa-Kristu malinga mba evwise Yehova kuwaha, hanji mba ehuke kulinga yuma yipi, cheka nawa, ayo yashindakenya ha chikuma cha kwehuka manyinga.—Yili. 15:20, 29.

Mbimbiliya yakufunyina maliji anji, alioze chino kuchalumbunukine ngwo, Yehova kanazange hanga ni yetu tupwe ni kufunyina-funyina maliji mashimbu eswe. Ngwe chilweza, Yesu kambile ngwenyi: “Muze mulemba, kanda ufunyina maliji waze ene.” (Mateu 6:7) Iye kasolwele yikuma yimwe yize mutuhasa kwita mu yilemba. (Mateu 6:9-13) Hachino, chipwe ngwe twakwehuka kufunyina maliji waze ene ha hita chisuho mutulemba, nihindu mutuhasa kutongola yuma yizeyene tunafupu mu yilemba yetu.—Mateu 7:7-11.

Kuli yuma yinji yipema yize yinasolola mumu liaka Mbimbiliya ya kufunyina maliji amwe. Yino yili yimwe ya ku majila apema waze Yehova, Longeshi yetu Munene, akutulongeselemo ha yize yakutupemena.—Iza. 48:17, 18