MUTWE WA KULILONGESA 7
MWASO 51 Twalihana Kuli Zambi!
Yika Mutuhasa Kulilongesa Hali A-Nazireu?
“Ha matangwa eswe a kulihandununa chenyi, iye musandu kuli Yehova.”—KWA. 6:8.
YIZE MUTULILONGESA
Kuchi chilweza cha A-Nazireu muchihasa kutukwasa kupwa ni hamu ni kulihana hanga tulinge yeswayo Yehova matwita mu mulimo wenyi?
1. Yika alingile tuvumbi twa Yehova ku shakulu?
SHINA wakulemesa usepa we ni Yehova? Nyi wakuchilinga, kuushi ukawe! Chize ku shakulu, atu anji kalivwile ngwe chizechene yena wakulivwa musono. (Samu 104:33, 34) Atu anji kasele tachi ni kwecha yuma yinji, mba ahase kulingila Yehova. Yino ye apwile ni kulinga A-Nazireu mu Izalele ya ku shakulu. A-Nazireu te aya? Yika mutuhasa kulilongesa ha chilweza cho?
2. (a) A-Nazireu te aya? (Kwalula 6:1, 2) (b) Mumu liaka A-Izalele amwe asakwile ene kupwa A-Nazireu?
2 Liji “Nazireu,” linakatuka mu limi lia Hepreu lize linalumbunuka ngwo, “kusakula,” “kuhandununa” hanji “kulihana.” A-Nazireu kapwile A-Izalele alihana waze te akwecha kulinga yuma yimwe, hanga alingile Yehova mu jila yalipwila. Shimbi ya Mose te yakutayiza ngwo, lunga hanji pwo mahasa kulinga chilakenyo chalipwila kuli Yehova, ha kusakula kupwa Ka-Nazireu ha amwe mashimbu. a (Tanga Kwalula 6:1, 2.) Muze Ka-Izalele umwe te akulihana mu mulimo wa Nazireu, mutu wacho apwe pwo hanji lunga, te katamba kukaula jimwe shimbi jize A-Izalele akwo katambile kujikaula. Mba mumu liaka A-Izalele amwe te akusakula kupwa A-Nazireu? Kota te kakuchilinga mumu lia kuzanga Yehova ni kumusakwilila ha yiwape yize apwile ni kuzuka.—Shimbi 6:5; 16:17.
3. Kuchi tuvumbi twa Yehova musono akusolola nyonga lizeliene lia A-Nazireu?
3 Muze “shimbi ya Kristu” yasalakanyine Shimbi ya Mose, atu ja Zambi te kechi kuhasa nawa kupwa A-Nazireu. (Ngala. 6:2; Roma 10:4) Alioze, chizechene ngwe A-Nazireu, musono tuvumbi twa Yehova kananungu ni kusolola zango linji ha kumulingila ni mbunge yo yeswe, mwono wo weswe, kunyonga cho cheswe ni tachi jo jeswe. (Marku 12:30) Muze twakuhana mwono wetu kuli Yehova, twakulinga chimwe chilakenyo. Mba tutwame kulita ni chilakenyo chacho, tunafupiwa kulinga upale wa Yehova ni kulikolweza kulinga yimwe hanji kwecha kuyilinga hanga tumuwayile. Kashika, mutumona chize te A-Nazireu akumanununa chilakenyo cho, ni chize chilweza cho chinatukwase kumanununa chilakenyo chetu cha kulihana kuli Yehova. b (Mateu 16:24) Tutalenu yilweza yacho.
ECHA YUMA YIMWE HANGA ULINGILE CHINJI YEHOVA
4. Kulita ni Kwalula 6:3, 4, yuma yika te A-Nazireu keshi kulinga?
4 Tanga Kwalula 6:3, 4. A-Nazireu, te katambile kunwa walwa usasu, chipwe kulia uva ya wisu hanji kunwa meya a uva. A-Izalele akwo te mahasa kwo kunwa walwa ni kulia uva, mumu kulinga yuma yino kuchakapwile chipi. Mbimbiliya yakwamba ngwo, ‘walwa hanji vinyu yakuwahisa mbunge ya mutu,’ nawa ngwo, yili chiwape chize Yehova atuhele. (Samu 104:14, 15) Chipwe chocho, A-Nazireu te kakwecha yuma yino. c
Shina unazange kulihana chinji mu mulimo wa Yehova ngwe chize alingile A-Nazireu? (Tala maparagrafu 4-6)
5. Yika Madián ni Marcela asakwile kulinga; mba mumu liaka?
5 Chizechene ngwe A-Nazireu, ni yetu twakwecha yuma yimwe hanga tulihane chinji mu mulimo wa Yehova. Tutalenu chilweza cha Madián ni Marcela. d Mandumbu wano, kapwile ni mwono upema. Madián kapwile ni mulimo upema, nawa te katwama mu zuwo lipema chinji. Alioze, ayo kazangile kulingila chinji Yehova. Mba ahase kuchilinga, yafupa kwecha yimwe ku mwono wo. Ayo yamba ngwo: “Twaputukile kutepulula yuma yize te twakulanda, chocho yitwalukila ku zuwo likehe ni kulanjisa mashinyi jetu.” Madián ni Marcela kakafupiwille kwo kwashiwisa mwono, alioze ene kasakwile kuchilinga mumu kazangile kulingila chinji Yehova. Ayo kanawahilila chinji ha yiyulo yize akwachile.
6. Mumu liaka twakwecha hanji twakulinga yuma yimwe? (Tala nawa chizulie.)
6 Musono, tuvumbi twa Yehova kakuwahilila ha kwecha yuma yimwe hanga alingile chinji Yehova. (1 Kori. 9:3-6) Yehova keshi kutushinjila hanga twashiwise mwono; chikwo nawa, yuma yize mandumbu amwe echele hi yipi ko. Chakutalilaho, mandumbu amwe kechele milimo yize te akuzanga chinji hanji kuhichika mazuwo jo. Akwo hanatese kupwa twamishi ha mashimbu anji hanji muze mambata, mashimbula ndambu mba apwe ni ana. Eka, hanasakula kuya ni kukalakala kuze kunafupiwa ukwaso chipwe ngwe chino muchaatwala kusuku ni masepa ni asoko jo. Anji a kuli yetu, twakulinga yuma yino mumu tunazange kulingila Yehova ni mbunge yeswe. Kashika, tupwenu ni shindakenyo ngwetu, Yehova kakulemesa yuma yize twakusakula kulinga mu mulimo wenyi; yipwe yikehe hanji yinene.—Hepre. 6:10.
SAKO TACHI HANGA ULISE NI ATU AKWO
7. Mumu liaka ha mashimbu amwe chapwile chikalu A-Nazireu kumanununa chilakenyo cho? (Kwalula 6:5) (Tala nawa chizulie.)
7 Tanga Kwalula 6:5. A-Nazireu te keshi kuteula kambu. Yino yapwile yimwe jila yakusolwelamo ngwo, kanazeyela kuli Yehova ni mbunge yo yeswe. Nyi umwe Ka-Izalele masakula kupwa Ka-Nazireu ha miaka yinji, kambu jenyi te jakusuhwa chinji kuhiana. Chino te chakupwa chashi atu akwo kuchimona. Nyi atu akwo makolweza A-Nazireu hanga anunge ni kumanununa chilakenyo cho, chino chapwile ni kwakwasa anunge ni kulisa ni akwo. Alioze chaluyinda, ha mashimbu amwe mu Izalele, A-Nazireu te keshi kwavumbika chipwe kwaha ukwaso kuli A-Izalele akwo. Ha mashimbu ja profeta Amose, A-Izalele waze apwile yitanganyanyi, ‘te kakuhana walwa kuli A-Nazireu.’ Kota kapwile ni kuchilinga hanga aatwale kwehuka shimbi ya kuhona kunwa walwa. (Amo. 2:12) A-Nazireu kafupiwile kupwa ni hamu mba ahase kumanununa chilakenyo cho ni kusa tachi hanga alise ni atu akwo.
Ka-Nazireu yoze te wakushishika ku chilakenyo chenyi kapwile ni kusa tachi hanga alise ni atu akwo (Tala paragrafu 7)
8. Kuchi chilweza cha Benjamin chakukolweza?
8 Ni ukwaso wa Yehova, ni yetu mutuhasa kupwa ni hamu ni kusa tachi hanga tulise ni atu akwo chipwe ngwe twakwivwa-vwa sonyi. Tulalenu chilweza cha Benjamin wa miaka kumi yoze watwama mu Noruega. Mumu lia jita yize yinalingiwa mu Ucrânia, ku shikola yo yalingako chiwanyino hanga asolole ukwaso wo kuli akwa-Ucrânia. Alongi eswe katambile kwimba mwaso, ni kuzala mazalo waze apwile ni ulombo wa pandela ya Ucrânia. Mba ehuke chiwanyino chino chapwile ni kusolola zango lia chifuchi, Benjamin yamanyina ndambu kusuku, kalichingile hamuwika ni akwo. Alioze, longeshi umwe yamumona, chocho yamusanyika ngwenyi: “Benjamin, tweya kuno; yetu eswe yena tunashimbwila!” Benjamin yaya kuli longeshi, mba yahanjika ni hamu lieswe ngwenyi: “Yami chishi kulinjisa mu yuma ya mafwefwe. Kashika, chichi kuhasa kulichinga ni yenu ha chiwanyino chino. Kwamba umwenemwene, Yela ja Yehova anji kali mu mazuwo a ususu, mumu kalitunyine kuya ni kwasa jita.” Longeshi yatayiza yize amulwezele, mba yalweza Benjamin ngwenyi, nyi chocho muhasa kuya kwe kushi mulonga. Alioze masepa ja Benjamin, yaputuka kumuhula hakutwala ku yize yamukwikile kupwa hamwe no ha chiwanyino. Benjamin yevwa woma, hachino yamba kulila. Chipwe chocho, iye yalweza alongi-ni-akwo maliji waze-ene alwezele longeshi wo. Mba Benjamin yalweza yisemi jenyi ngwenyi, Yehova kamukwashile hanga akalile ufulielo wenyi.
9. Kuchi mutuhasa kuvwisa Yehova kuwaha?
9 Atu anji kakumona ngwo twalisa no mumu twakukaula shimbi ja Yehova. Twakufupiwa hamu mba tulweze akwetu ku milimo, ku shikola ni ku yihela yikwo ngwetu, tuli Yela ja Yehova. Muze yuma ya hano hashi yinayi ni kupiha chinji, muchikaliwa kutwama kulita ni shimbi ja Yehova ni kwambulwila akwetu sango jipema. (2 Timo. 1:8; 3:13) Iwulukenu mashimbu eswe ngwenu, mbunge ya Yehova yakuwahilila chinji muze twakusolola hamu ha kulisa ni atu waze keshi kumulingila.—Yishi. 27:11; Mala. 3:18.
SAKO YEHOVA HA CHIHELA CHITANGU KU MWONO WE
10. Mumu liaka chapwile chikalu kuli A-Nazireu kukaula shimbi yili ha Kwalula 6:6, 7?
10 Tanga Kwalula 6:6, 7. A-Nazireu te keshi kwatayiza hanga akundame kuli mufu. Hanji mutuhasa kunyonga ngwetu, kulinga chuma chino kuchakapwile chikalu. Alioze, chapwile chikalu kuli Ka-Nazireu nyi mafwisa umwe usoko hanji sepa. Ha mashimbu jacho, chapwile chako nyi mutu mafwa atu eswe meza ni kutwama haze hali mufu. (Yoa. 19:39, 40; Yili. 9:36-40) Alioze, A-Nazireu te katambile kukaula mianda yacho. Chipwe ngwe kapwile ni kupalika ha mashimbu akalu hanyima lia kufwisa asoko jo, nihindu A-Nazireu te kakununga ni kumanununa chilakenyo cho. Chino te chakusolola ngwo, kapwile ni ufulielo ukolo. Chochene, Yehova te kakukwasa A-Nazireu hanga ahase kupalika kanawa mu kapinda wacho.
11. Yika twatamba kulinga nyi tunambe kukwata yiyulo hakutwala ku yuma ya mu usoko? (Tala nawa chizulie.)
11 Yetu twakulemesa chinji chilakenyeno chetu cha kulihana kuli Yehova. Chino chakukwata ha yiyulo ni ha yitanga yetu hakutwala kuli asoko jetu. Yetu twakusa tachi hanga tukwase asoko jetu ha yize anafupiwa, alioze, kutushi kusa kulutwe yuma yize asoko jetu anafupiwa kuhiana upale wa Yehova. (Mateu 10:35-37; 1 Timo. 5:8) Ha mashimbu amwe, mutuhasa kukwata yiyulo yize asoko jetu kechi kuzanga, alioze muyivwisa Yehova kuwaha.
Shina uli ni zango lia kusa upale wa Zambi ha chihela chitangu ku mwono we chipwe ngwe uli ha mashimbu akalu? (Tala paragrafu 11) e
12. Muze te anapalika mu yihungumiona mu usoko, yika Alexandru alingile, mba yika kakalingile?
12 Tutalenu chilweza cha Alexandru ni mukwo-pwo, Dorina. Hanyima lia ayo eswe kulilongesa Mbimbiliya ha mwaka umuwika, Dorina yalitwamina, mba yazanga hanga mukwo-lunga neye eche kulilongesa. Hachino, ni vumbi lieswe mukwo-lunga yamulweza ngwenyi, kechi kwecha kulilongesa. Dorina kakazangile chiyulo chino, chocho yasa tachi hanga mukwo-lunga alitwamine kulilongesa. Alexandru yamba ngwenyi, kazangile kunyingika mumu liaka mukwo-pwo analingi chocho, chino kuchakapwile chashi kuli iye. Ha mashimbu amwe, muze te Dorina akwamba yuma yipi hali Alexandru ni kumuhona vumbi, chino te chakumutwala hanga eche kulilongesa. Chipwe chocho, Alexandru yanunga ni kusa Yehova ha chihela chitangu ku mwono wenyi, aku nawa yanunga ni kusolwela mukwo-pwo zango hamwe ni vumbi. Mumu lia chilweza chipema cha Alexandru, Dorina yaputuka kulilongesa nawa Mbimbiliya. Ha kupalika cha amwe mashimbu, yamupapachisa.—Tala chinema ha site jw.org chinambe ngwo: Alexandru ni Dorina Văcar: “Zango Uhomboloji Lili Nawo, Utu Lili Nawo” ha chikuma, “Umwenemwene Wakwalumuna Mwono.”
13. Kuchi mutuhasa kusolola zango lietu hali Yehova ni hali asoko jetu?
13 Yehova mwe watangile asoko, kashika kanazange hanga asoko jetu awahilile. (Efwe. 3:14, 15) Nyi tunazange lume kupwa ni uwahililo wamwenemwene, twatamba kulinga yuma kulita ni usongwelo wa Yehova. Kashika, nyingika ngwe Yehova kakulemesa yuma yeswe yize wakulinga hanga umuwayile ni muze wakusa tachi hanga ufunge kanawa asoko je ni kwavumbika.—Roma 12:10.
KOLWEZA AKWENU HANGA EMBULULE A-NAZIREU
14. Aya kanji-kanji twatamba kukolweza ni maliji jetu?
14 Eswe waze akusakula kuwayila Yehova musono, kanafupiwa kusa tachi hanga eche kulinga yuma yimwe mumu lia zango lio hali iye. Ha mashimbu amwe, kuchilinga hi chashi ko. Mba kuchi mutuhasa kukwasa akwetu hanga alihane chinji mu mulimo wa Yehova? Mutuhasa kwakolweza kupalikila mu maliji jetu. (Yombi 16:5) Shina mandumbu amwe mu chikungulwila chenu, kanase tachi ashiwise mwono, hanga alihane chinji mu mulimo wa Yehova? Shina unanyingika akweze waze anase tachi hanga alise ni akwo ku shikola chipwe ngwe chili chikalu kuchilinga? Shina muhasa kunyonga hali umwe ndumbu hanji longi wa Mbimbiliya, yoze unase tachi hanga anunge ni kushishika chipwe ngwe kakumuhungumiona mu usoko wenyi? Sako tachi hanga upwe ni kukolweza mandumbu jacho ni kwalweza chize wakwakomoka ha hamu lize akusolola ni ha yize yeswe akulingila Yehova.—Fwilim. 4, 5, 7.
15. Kuchi mandumbu amwe akukwasa mandumbu jo waze ali mu mulimo wa shimbu lieswe?
15 Ha mashimbu amwe, mutuhasa kukwasa mandumbu waze ali mu mulimo wa shimbu lieswe. (Yishi. 19:17; Hepre. 13:16) Yino ye alingile umwe ndumbu wa pwo kashinakaji yoze watamwa mu Sri Lanka. Iye kamuwezelele mbongo jize akutambula hanyima lia kwecha kukalakala mumu lia ushinakaji, chocho yazanga kukwasa mandumbu aali a mapwo mapionelu waze apwile ni kapinda wa mbongo, hanga ahase kununga mu mulimo wo. Hachino, yatesa ha hita kakweji kwakwasa hanga afwete telefone yize te akuzachisa. Ndumbwetu kasolwele chitanga chipema chinji!
16. Yika mutuhasa kulilongesa hali A-Nazireu?
16 Chochene, twalilongesa yuma yinji ha chilweza cha A-Nazireu. Alioze, chilakenyo cha A-Nazireu chinatulongesa chimwe chuma chilemu hali Tata yetu, Yehova. Iye kananyingika ngwenyi, yetu tunazange kumuvwisa kuwaha; nawa ngwenyi, tuli ni mbunge ya kumulingila ha kumanununa chilakenyo chetu cha kulihana kuli iye. Iye kakutulemesa ha kutwaha uhashi wa kusakula kumusolwela zango. (Yishi. 23:15, 16; Marku 10:28-30; 1 Yoa. 4:19) Chilakenyo cha A-Nazireu chinasolola ngwo, Yehova kakumona yuma yeswe yize twakumulingila ni mbunge yeswe; nawa kakutuzanga chinji ha mulimo uze twakumulingila. Kashika, mutusa tachi hanga tununge ni kulingila Yehova ni mbunge yeswe.
KUCHI MUNUHASA KUKUMBULULA?
-
Mu mutapu uka A-Nazireu apwile ni hamu ni kulihana hanga alingile chinji Yehova?
-
Kuchi mutuhasa kukolweza akwetu musono hanga embulule A-Nazireu?
-
Chilakenyo chize A-Nazireu te akulinga, yika chinatulongesa hali Yehova?
MWASO 124 Tupwenu Akwa-Kwononoka
a Chipwe ngwe A-Nazireu amwe kaasakwile kuli Yehova mwene, A-Izalele anji waze apwile A-Nazireu, ene e asakwile kulingila Yehova mu mulimo wacho.—Tala mushete, “ A-Nazireu Waze Yehova Mwene Asakwile.”
b Ha mashimbu amwe, mikanda yetu yakutesa A-Nazireu ni mandumbu waze ali mu mulimo wa shimbu lieswe. Alioze mutwe uno, muusolola chize yetu eswe waze hitunalihane kuli Yehova mutuhasa kwimbulula A-Nazireu.
c Kanji-kanji, chakusoloka ngwe A-Nazireu kakapwile ni mulimo ukwo, hanji chiteli chikwo chize te chakutala ha chilakenyo cho.
d Tala chikuma ha site jw.org, chinambe ngwo, “Yetu Twazangile Kwashiwisa Mwono” ha chikuma, “Yakulitakana Nayo ya Yela ja Yehova.”
e ULUMBUNWISO WA CHIZULIE : Ka-Nazireu kali mu zuwo ku chipatulo cha kwilu, kanatale chize anayi ni kufunda usoko wenyi yoze wafwa. Mumu lia chilakenyo chize alingile kuli Yehova, iye katambile kukundama kuli mufu.
