1. Yika muyitukwasa mba tukumbe woma?

 HA MASHIMBU amwe, yetu eswe twakwivwa woma. Chipwe ngwe Mbimbiliya yinatukwase kuhona kwivwa woma wa kufwa, woma wa yipanda-panda hanji woma wa kulutwe lia matangwa, nihindu tuli ha mashimbu waze kunasoloka yuma ya kuvwisa “woma,” ngwe jita, ungalwe ni misongo. (Luka 21:11) Yetu nawa mutuhasa kwivwila atu woma, ngwe manguvulu, hanji asoko jetu waze akulimika ni yetu mumu lia kuwayila Yehova. Mandumbu amwe kakusakalala chinji ha kunyonga ngwo, kechi kuhasa kukumba kapinda yoze anapalika hanji yoze makapalika kulutwe lia matangwa.

2. Yika yalingiwile kuli Ndawichi muze apwile mu mbonge ya Ngata?

² Ndawichi neye kapwile ni kwivwa woma. Chakutalilaho, muze Saulu apwile ni kumukaujola hanga amushihe, Ndawichi yachinyina ku Ngata, yimwe mbonge ya A-Filistea. Akishe, mwanangana wa ku Ngata, yanyingika ngwenyi Ndawichi kapwile kajita yoze atu apwile ni kwimbila ngwo, kashiha “makumi jenyi a tununu” twa A-Filistea. Muze Ndawichi anyingikine ngwenyi kamumona, ‘yevwa woma unji.’ (1 Samue. 21:10-12) Ndawichi kalipikalile chinji ha kunyonga ha yize te Akishe mamulinga. Yika Ndawichi alingile mba akumbe woma uze apwile ni kwivwa?

3. Kulita ni Samu 56:1-3, 11, yika Ndawichi alingile mba akumbe woma uze apwile ni kwivwa?

³ Ha Samu 56, Ndawichi kanalumbununa chize apwile ni kwivwa muze apwile mu mbonge ya Ngata. Mu Samu yacho, Ndawichi kanasolola woma uze evwile, ni kusolola nawa yize alingile mba aukumbe. Muze apwile ni kwivwa woma, Ndawichi yajikijila muli Yehova. (Tanga Samu 56:1-3, 11.) Ujikijilo wa Ndawichi muli Yehova kuwakalitokelele. Kashika ni ukwaso wa Yehova, Ndawichi yawana jila ya kuhwishilamo kapinda wenyi yize te keshi  ni kushimbwila, ha kulionga kupwa chizaluke! Hachino, shimbu Akishe ashihe Ndawichi, iye yafupa hanga chizaluke wacho atuhuke mu mbonge. Chino yichikwasa Ndawichi kulamwina mwono wenyi.— 1 Samue. 21:13–22:1.

4. Kuchi mutuhasa kukolesa ujikijilo wetu muli Yehova? Lumbununa.

⁴ Ni yetu nawa mutuhasa kukumba woma uze mutwivwa, ha kujikijila muli Yehova. Mba yika mutulinga hanga tukolese ujikijilo wetu muli Yehova, muze tunapalika mu yuma ya kukolesa woma? Tutalenu ha chilweza chino. Tunyongenu ngwe mandotolo makulweza ngwo, uli ni umwe musongo; kwivwa maliji wano muchikuvwisa woma. Alioze, muhasa kutepulula woma wacho nyi muhanjika ni ndotolo yoze wakujikijila chinji. Ndotolo wacho hanji hanauku mieji waze apwile ni musongo uze uli nawo. Iye makupajika kanawa, mulivwa ngwe kanalise mu chihela che. Makulweza nawa hanga unwe yitumbo yize hiyinauku mieji anji. Chizechene nawa, twakukolesa ujikijilo wetu muli Yehova, muze twakunyonga ha yuma yize hanatulingila, yize analingi haliapwila ni yize makatulingila kulutwe. Yino ye Ndawichi alingile. Muze mututanga maliji a Ndawichi ha Samu 56, tunyongenu chize ni yetu mutuhasa kukolesa ujikijilo wetu muli Yehova, ni kukumba woma uze twakwivwa.

YIKA YIZE YEHOVA HANALINGI?

5. Ha yika Ndawichi alihulikile mba akumbe woma uze apwile ni kwivwa? (Samu 56:12, 13)

⁵ Chipwe ngwe kapwile mu ponde ya kutokesa mwono wenyi, nihindu Ndawichi yalihulikila ha yize te Yehova hanalingi. (Tanga Samu 56:12, 13.) Chino che Ndawichi alingile ku mwono wenyi weswe. Chakutalilaho, ha mashimbu amwe, iye te kakupukuna ha yitangiwa ya Yehova. Kulinga chino, te chakumukwasa kwiwuluka ngwenyi, Yehova kali mukwa-ndundo-jeswe; nawa ngwenyi kakuzanga chinji atu. (Samu 65:6-9) Iye nawa te kakupukuna ha yize Yehova hanalingila atu akwo. (Samu 31:19; 37:25, 26) Chikwo nawa, Ndawichi kapwile ni kupukuna ha yize te Yehova hanamulingila. Yehova kamufungile ni kumukwasa chize ku ukweze wenyi. (Samu 22:9, 10) Chochene, kunyonga ha yuma yino yeswe chakwashile Ndawichi kukolesa ujikijilo wenyi hali Yehova.

6. Muze muwivwa woma, yika muyikukwasa kujikijila muli Yehova?

⁶ Muze unevu woma, lihule ngwe: ‘Yika yize Yehova hanalingi?’ Sako mashimbu hanga  unyonge ha yitangiwa. Chakutalilaho, tala kanawa chize Yehova akufunga tujila ni yitemo—chipwe ngwe yuma yino kakayilingile muchifwa chenyi, nawa kuyishi kumuwayila. Yehova kakuzanga chinji kutufunga! Kunyonga ha yino yeswe, muchokesa ujikijilo wetu muli iye. (Mateu 6:25-32) Pukuna nawa ha yize Yehova hanalingila tuvumbi twenyi. Muhasa kulilongesa ha mwono wa umwe kavumbi kenyi mu Mbimbiliya, yoze wapwile ni ufulielo ukolo. Hanji kutanga sango ja ku mwono ja Yela ja Yehova ha mashimbu jetu. a Chikwo nawa, pukuna ha chize Yehova akukufunga. Yika iye alingile mba unyingike umwenemwene? (Yoa. 6:44) Kuchi akumbulwile yilemba ye? (1 Yoa. 5:14) Yuma yika yipema yize yakulingiwa ku mwono we hamukunda wa chawana cha ukuule chize Yehova atuhele?—Efwe. 1:7; Hepre. 4:14-16.

7. Kuchi lusango wa profeta Daniele, akwashile Vanessa kukumba woma uze te anevu?

⁷ Pangi Vanessa, b yoze watwama mu Haiti, kapalikile mu yuma yipi chinji. Umwe lunga mu mbonge yo, kapwile ni kumusanyika ni kumutumina mesage matangwa eswe. Iye te kakushinjila Vanessa hanga alisumbakenye nenyi. Alioze, Vanessa yamulumbunwina pundu ngwenyi, katambile kulinga chuma chacho. Lunga wacho yatesa kulinga yuma yipi hali Vanessa. Vanessa yamba ngwenyi: “Nevwile woma unji ha yize lunga wacho afupile kungulinga.” Mba kuchi ahashile kukumba woma wacho? Iye kalingile yize mahasa hanga alifunge. Umwe mukulwana mu chikungulwila, yamukwasa hanga ahanjike ni mapulisha. Chikwo nawa, yalihulikila ha chize Yehova hanafungu tuvumbi twenyi akwo kunyima. Vanessa yamba nawa ngwenyi: “Mutu mutangu yoze nanyongene kapwile Daniele. Iye kakapwile ni chitela nichimwe, alioze kapalikile mu yuma yipi chinji. Kamukongele mu wina wa ndumba, chipwe chocho Yehova yamufunga. Nechile kuli Yehova hanga ahwise kapinda yoze te ngunapalika, chocho hanyima lia kulemba chakapwile ni kwivwa nawa woma.”—Danie. 6:12-22.

YIKA YEHOVA ANALINGI HALIAPWILA?

8. Shindakenyo yika Ndawichi apwile nayo? (Samu 56:8)

⁸ Chipwe ngwe Ndawichi kapwile mu ponde ya kufwa muze ayile ku mbonge ya Ngata, nihindu kakechele hanga woma umukumbe. Shimbu evwe woma, iye yanyonga ha yize te Yehova anamulingila ha shimbu liacho. Ndawichi kahashile kumona ufunge ni usongwelo wa Yehova. Iye nawa kapwile ni shindakenyo ngwenyi, Yehova kananyingika chize anevu. (Tanga Samu 56:8.) Ndawichi kapwile nawa ni masepa apema, Jonata ni Sasendote wa lutwe Ahimeleke waze amutakamishine ni kumwaha yize te anafupiwa. (1 Samue. 20:41, 42; 21:6, 8, 9) Chikwo nawa, chipwe ngwe te kanamukaujola kuli Mwanangana Saulu, nihindu Ndawichi kahashile kulilamwina. Iye kapwile ni shindakenyo ngwenyi, Yehova te kananyingika yuma yize anapalika ku mwono wenyi ni chize anevu.

9. Yika Yehova ananyingika hali hita umwe wa kuli yetu?

⁹ Muze mupalika mu yuma yize muyikuvwisa woma, iwuluka ngwe Yehova kananyingika yize unapalika ni chize unevu. Chakutalilaho, muze A-Izalele apwile mu Engitu, Yehova kakamwene wika lamba lize apwile nalio, alioze kamwene nawa “luyinda wa atu” jenyi. (Kutuhu. 3:7) Mu umwe mwaso, Ndawichi yemba ngwenyi, Yehova te kakumona “luyinda” wenyi, nawa te kananyingika “lamba lia ku mbunge” yenyi. (Samu 31:7) Chikwo nawa, muze atu ja Zambi apwile ni kumona lamba, kanji-kanji mumu lia yiyulo yipi yize te akukwata, Yehova neye te kakwivwa yikola yinji ku mbunge. (Iza.  63:9) Kashika nyi unevu woma, nyingika ngwe Yehova kananyingika chize unevu, nawa kanazange chinji kukukwasa hanga ukumbe woma wacho.

10. Mumu liaka uli ni shindakenyo ngwe Yehova kananyingika yize unapalika, nawa ngwe makukwasa kukumba kapinda mweswawo uli nenyi?

¹⁰ Nyi unapalika mu yipikalo, mba kuwahashile kumona chize Yehova anakukwase, yika muhasa kulinga? Nyi yino muyilingiwa, mwite hanga amone majila waze iye anakukwashila. (2 Mia. 6:15-17) Achinyonga ha yihula yino: Shina hiunevu pande hanji kumbululo lia umwe ndumbu mu chikungulwila lize liakutakamishine? Shina umwe mukanda, chinema hanji mwaso hiunakusangulwisa? Umwe ndumbu hanakulweze hanji kukutangila chisoneko cha utakamiso? Ha mashimbu amwe, mutuhasa kuvulama zango lize mandumbu jetu akutusolwela ni utamakiso uze twakutambula kupalikila mu Mbimbiliya. Alioze, yino yili yawana ya kukomwesa yize Yehova akutwaha. (Iza. 65:13; Marku 10:29, 30) Yawana yino yinasolola pundu ngwo, Yehova kakutuzanga chinji. (Iza. 49:14-16) Yili nawa shindakenyo yize yinasolola ngwo, twatamba kujikijila muli Yehova.

11. Yika yakwashile Aida kukumba woma uze apwile ni kwivwa?

¹¹ Aida, umwe pangi yoze watwama mu Senegal, kamwene chize Yehova amukwashile ha mashimbu akalu. Amu ali mwana mutangu, yisemi jenyi te kakushimbwila hanga apwe ni mbongo jinji jize mujimukwasa ni kukwasa yisemi jenyi. Alioze, muze ashiwishile mwono ni kunjila mu mulimo wa upionelu, Aida yaputuka kuwana mbongo jikehe. Asoko jenyi yevwa uli unji, chocho yaputuka kumwamba yuma yipi. Iye yamba ngwenyi: “Nevwile woma mumu lia kuhona kukwasa yisemi jami ni chize atu te mangumona ha mukala wetu. Chipwe Yehova namulamikijine ha yuma yipi yize te yinalingiwako.” Alioze, muze Aida evwile pande jimwe ha kukunguluka, yamba ngwenyi: “Ndumbu yoze walingile pande kambile ngwenyi, chipwe ngwe tunevu yikola yeswayo ku mbunge, nihindu Yehova kanayinyingika. Ha kupalika cha mashimbu, ni ukwaso wa yiyulo ya makulwana a mu chikungulwila ni mandumbu akwo, yinguputuka nawa kwivwa zango lia Yehova hali yami. Yinguputuka kulemba kuli Yehova ni ujikijilo, nawa muze Yehova apwile ni kukumbulula yilemba yami, te nakupwa ni  sambukila ya ku mbunge.” Kulutwe, Aida yawana mulimo uze te mumukwasa kulinga upionelu ni kukwasa yisemi jenyi ni atu akwo nawa. Mba yahwisa ni maliji wano: “Haliapwila nalilongesa kujikijila muli Yehova ni mbunge yami yeswe. Nyi nevwa woma, muze nakulemba, woma wacho wakuhwa.”

YIKA YEHOVA MAKALINGA KULUTWE?

12. Kulita ni Samu 56:9, shindakenyo yika Ndawichi apwile nayo?

¹² Tanga Samu 56:9. Chisoneko chino chili nawa ni chuma chikwo chize chakwashile Ndawichi muze te anevu woma. Chipwe muze mwono wenyi wapwile mu ponde, iye kapukwine ha yize Yehova mamulingila kulutwe. Ndawichi kanyingikine ngwenyi, Yehova te mamulamwina ha ola yalita. Mumu iye kambile ngwenyi, Ndawichi te mapwa Mwanangana mu Izalele mu chihela cha Saulu. (1 Samue. 16:1, 13) Kuli Ndawichi, yuma yeswe yize Yehova alakenyene yapwile ngwe hiyamanunuka.

13. Shindakenyo yika mutuhasa kupwa nayo muli Yehova?

¹³ Yika Yehova analakenya kukulingila? Yetu kutushi kushimbwila hanga Yehova atufunge mu lamba lieswe lize mutupalika. c Chipwe chocho, kapinda mweswawo mutupwa nenyi mu chifuchi chino, mutuhasa kupwa ni shindakenyo ngwetu, Yehova makamuchiza mu chifuchi chaha. (Iza. 25:7-9) Pundu lume, Sakatanga wetu kali ni ndundo ja kuhindwisa atu waze hanafu, kuuka misongo ni kunongesa akwa-kole jetu eswe.—1 Yoa. 4:4.

14. Ha yika mutuhasa kupukuna?

¹⁴ Muze muwivwa woma, pukuna ha yize Yehova makalinga kulutwe. Nyonga ha chize mukevwa muze Satana makamwonona, muze yingulungulu makaachiza hano hashi ni kuhichikaho wika atu apema ni muze mutukapwa angunu. Chimweso chimwe ha kukunguluka cha mambonge cha 2014, chasolwele chize mutuhasa kupukuna ha kutalatala chetu. Amwe asoko kapwile ni kunyonga chize mwono muukapwa mu Paraisu. Mba yanyonga ha chize mukanda wa 2 Timoteu 3:1-5 muwalumuka ha kuutalikisa mu chifuchi chaha, ngwo: “Alioze nyingika chino ngwe, mu chifuchi chaha mumukapwa mashimbu apema chinji. Mumu atu makalizanga umwe ni mukwo, makazanga yuma ya ku ufulielo, makapwa akwa-kulikehesa, makawayila wika Yehova, makononokena yisemi jo, makapwa ni kusakwilila, akwa-ululi makazanga chinji asoko jo, makapwa ni kulivwashana ni akwo, makapwa ni kuhanjika yuma yipema hali akwo mashimbu eswe, makapwa akwa-kulihumikiza, makazanga yuma yipema, makapwa atu waze akujikijila, makazanga Zambi shimbu azange yuma ya hano hashi, makapwa ni kuwayila Zambi ni mbunge yeswe, kashika wano pwako no hamuwika.” Shina wakuhanjika ni asoko hanji ni mandumbu je hakutwala ku chize mwono muukapwa mu chifuchi chaha?

15. Yika yakwashile Tanja kukumba woma uze apwile ni kwivwa?

¹⁵ Tanja, umwe pangi ku Macedónia ya ku norte, kakumbile woma uze apwile ni kwivwa mumu lia kupukuna ha yiwape ya kulutwe lia matangwa. Yisemi jenyi kakazangile hanga iye alilongese Mbimbiliya, chocho yaputuka kumuhungumiona chinji. Iye yamba ngwenyi: “Yuma yize te nakuvwila woma, yalingiwile ku mwono wami. Hanyima lia hita kukunguluka, mama te kakungulamba. Yisemi jami kambile ngwo, ni napwa Chela cha Yehova mangushiha.” Hachino, Tanja yamuhuma ku zuwo. Yika alingile? Iye yanunga ni kwamba ngwenyi: “Nalihulikilile ha chize mungukawahilila ku miaka yeswe nyi mungusakula kushishika kuli Yehova. Nanyongene nawa ha chize Yehova makanguwahisa mu chifuchi chaha, mumu lia kwecha kulinga yuma yimwe musono ni chize makachiza yuma yeswe  yipi.” Tanja kananungu ni kushishika kuli Yehova. Ni ukwaso wa Yehova, iye kawanyine chihela cha kutwama. Musono, Tanja kalimbata ni umwe ndumbu washishika, eswe aali kanawahilila ha kulingila Yehova mu mulimo wa shimbu lieswe.

KOLESA UJIKIJILO WE MULI YEHOVA MUSONO

16. Yika muyitukwasa kupwa ni hamu muze mutumona kumanunuka cha maliji ali ha Luka 21:26-28?

¹⁶ Ha mashimbu a luyinda munene, atu “kumakalezumuka ni woma.” Alioze tuvumbi twa Yehova, makanunga ni kumana nguu hamwe ni hamu. (Tanga Luka 21:26-28.) Mumu liaka kutuchi kevwa woma? Mumu tunalilongesa kujikijila muli Yehova. Tanja yoze twatongola helu, kambile ngwenyi, yipikalo yize apalikile, yamukwashile kukumba yuma yikwo yikalu. Mwene yamba ngwenyi: “Nalilongesa ngwami, Yehova mahasa kutukwasa kunyongonona mu kapinda mweswawo mutupwa nenyi ni kutuwahisa. Ha mashimbu amwe, muchihasa kusoloka ngwe atu akwo kanasongwela yuma yeswe ku mwono wetu, alioze umwenemwene uli ngwo, ayo kakulinga wika yize Yehova akwecha hanga alinge. Hachino, chipwe ngwe kapinda umwe moka chinji, nihindu tangwa limwe mahwa.”

17. Kuchi chisoneko cha mwaka 2024 muchitukwasa? (Tala chizulie ha chifukilo.)

¹⁷ Musono kuli yuma yinji yize muyihasa kutuvwisa woma. Alioze chizechene ngwe Ndawichi, kutwazangile kwecha hanga woma utusongwele. Chisoneko cha mwaka 2024, chili kulemba chize Ndawichi alingile ngwenyi: “Muze mungwivwa woma mungukufuliela yena.” (Samu 56:3) Mukanda umwe uze wakulumbununa Mbimbiliya, wambile ha chisoneko chino ngwo: “Ndawichi te keshi kunyonga chinji ha yuma yize yapwile ni kumuvwisa woma chipwe ha yipikalo yenyi, alioze te kakujikijila hali yoze mamulamwina.” Kashika, nyonga ha chisoneko cha mwaka uno ha tukweji a kulutwe, chipi-chipi muze mupalika mu yuma yize muyikuvwisa woma. Sako mashimbu hanga upukune ha yize Yehova hanalingi, ha yize analingi musono, ni ha yize makalinga kulutwe. Hachino, chizechene ngwe Ndawichi ni yena mukahasa kwamba ngwe: “Muli Zambi hingunase ufulielo wami chichi kevwa woma.”—Samu 56:4.