1. Mumu liaka Chiwanyino cha Kufwa cha Yesu chili chiwanyino chilemu ha mwaka? (Luka 22:19, 20)

 KULI tuvumbi twa Yehova, Chiwanyino cha Kwiwuluka Kufwa cha Yesu chili chimwe chiwanyino chilemu ha mwaka. Chili chiwanyino chize Yesu ahanyine shimbi kuli tumbaji twenyi hanga anunge ni kuchiwuluka. (Tanga Luka 22:19, 20.) Kuli yikuma yinji yize yinatutwale kushimbwila chiwanyino chino chilemu. Tutalenu yimwe ya ku yikuma yacho.

2. Yika twakuyuka muze twakupwa ha chiwanyino cha kufwa cha Yesu?

² Chiwanyino cha kufwa cha Yesu, chakutwiwulula ulemu wa chitapo chize iye ahanyine. Chakutwiwulula nawa chize mutuhasa kusolola usakwililo wetu ha chitapo chacho. (2 Kori. 5:14, 15) Chikwo nawa, muze twakupwa ha chiwanyino chino, “twakulitakamisa” umwe ni mukwo. (Roma 1:12) Hita mwaka, mandumbu anji waze azeyele ku ufulielo, kakwiza ha chiwanyino cha kwiwuluka kufwa cha Yesu. Amwe a kuli ayo kakufuna kuli Yehova, mumu lia kwatambula ni zango. Atu anji kakuputuka kulilongesa Mbimbiliya, mumu lia yize evwile ha chiwanyino cha Yesu. Yuma yino yeswe, yakupwisa chiwanyino cha Yesu chuma chilemu ku mwono wetu!

3. Kuchi Chiwanyino cha Kufwa cha Yesu chakutununga hashi heswe? (Tala nawa chizulie.)

³ Chiwanyino chino, chakutukwasa nawa kulinunga hashi heswe. Yela ja Yehova hashi heswe, kakulikungulula ha chiwanyino chino kulita ni kunjila cha tangwa. Yetu eswe twakwivwa pande jize jakulumbununa ulemu wa ukuule, twakwimba miaso yaali, twakupalikisa mbolo ni vinyu ni kwamba ngwetu, “amene” ha kulemba cheswe chiwana chize akulingaho. Mukachi  ka maola 24, yikungulwila ya hashi heswe yakulinga chuma chimuwika. Yehova ni Yesu kakuwahilila chinji muze akutumona tunalinungu hano hashi ni kwahalisa mu mutapu uno.

4. Yihula yika mutukumbulula ha mutwe uno?

⁴ Ha mutwe uno, mutukumbululaho yihula yino: Kuchi mutuhasa kululieka mbunge yetu hakutwala ku chiwanyino cha kwiwuluka kufwa cha Yesu? Kuchi mutuhasa kukwasa akwetu hanga ayuke chinji ha chiwanyino chino? Kuchi mutuhasa kukwasa waze hanazeye ku ufulielo? Makumbululo a yihula yino matukwasa hanga tulilulieke hakutwala ku chiwanyino chino chilemu.

KUCHI MUTUHASA KULULIEKA MBUNGE YETU HAKUTWALA KU CHIWANYINO CHA KWIWULUKA KUFWA CHA YESU?

5. (a) Mumu liaka twatamba kupukuna ha ulemu wa ukuule? (Samu 49:7, 8) (b) Yika walilongesa ha chinema, Mumu Liaka Yesu Afwile?

⁵ Mutapu ulemu wa kululiekelamo mbunge yetu hakutwala ku chiwanyino chino, uli kupukuna ha ulemu wa chitapo cha ukuule wa Kristu. Kukushi chuma nichimwe chize te yetu mutuhasa kulinga hanga tulilamwine ku shili ni kufwa. (Tanga Samu 49:7, 8; tala nawa chinema, Mumu Liaka Yesu Afwile?) a Yehova katumine Yesu hano hashi hanga atulamwine ha kuhana mwono wenyi. Yize Yehova ni Yesu alingile yili yilemu chinji kuli yetu. (Roma 6:23) Nyi mutupukuna ha yize Yehova ni Yesu atulingilile, usakwililo wetu ha ukuule muwoka chinji. Tutalenu yimwe yuma yikalu yize Yehova ni Yesu atulingilile. Alioze chitangu, twatamba kunyingika ulumbunwiso wa ukuule. Ukuule yika unalumbunuka?

6. Ukuule yika unalumbunuka?

⁶ Ukuule uli ndando yize akuhana hanga akuule chimwe chuma. Lunga mutangu Alama, kapwile mungunu muze amutangile. Muze alingile shili, iye ni ana jenyi eswe yahona uhashi wa kutwama ku miaka yeswe. Mba akuule yize Alama atokesele, Yesu yahana mwono wenyi ungunu ngwe chitapo. Muze apwile hano hashi, Yesu “kakavulumwine chipwe mu kanwa lienyi, kakawanyinemo mahuza.” (1 Petu. 2:22) Muze Yesu afwile, iye kapwile mungunu ngwe chizechene apwile Alama shimbu te kanda achivulumuna. Hachino, ha kuhana mwono wenyi, iye yafweta ndando ya mwono ungunu uze Alama atokesele.—1 Kori. 15:45; 1 Timo. 2:6.

7. Lamba lika Yesu amwene muze apwile hano hashi?

⁷ Muze apwile hano hashi, Yesu kononokenene Yehova mu yuma yeswe chipwe muze chapwile chikalu kuchilinga. Yesu kapwile umwe kanuke mungunu, yisemi jenyi waze amulelele kapwile yihenge, chipwe chocho kapwile ni kwononokena. (Luka 2:51) Muze Yesu apwile mukweze, iye kakumbile yitanga ya akwo waze kota azangile kumutwala hanga ahone kwononokena yisemi jenyi, hanji kuhona kushishika kuli Yehova. Muze akolele, katambile kwehuka yeseko ya Satana, yoze wazangile hanga iye ahone kwononokena Yehova. (Mateu 4:1-11) Satana kazangile chinji Yesu alinge shili hanga ahone kuhana ukuule uze wamunehene hano hashi.

8. Yipikalo yikwo yika yize Yesu apalikile?

⁸ Mu mulimo wenyi wa kwambujola hano hashi, Yesu kapalikile mu yuma yinji yipi. Akwa-kole jenyi kapwile ni kumukaujola ni kufupa kumushiha. (Luka 4:28, 29; 13:31) Chikwo nawa, iye katambile kukumba uhenge wa tumbaji twenyi. (Marku 9:33, 34) Muze te anamusopesa, yamumwesa lamba ni kumuvwisa sonyi, mba hi ku songo yamushiha chipi. (Hepre. 12:1-3) Iye kapalikishile mashimbu jenyi a kasula hano hashi ni ukawenyi chakuhona ukwaso wa Yehova. b—Mateu 27:46.

9. Kuchi wakwivwa muze wakupukuna ha chitapo cha Yesu? (1 Petulu 1:8)

 ⁹ Pundu lume, Yesu mba ahane mwono wenyi hali yetu, kamwene lamba linji. Muze twakunyonga ha yuma yeswe yize Yesu atulingilile, chakututwala tumuzange chinji.—Tanga 1 Petulu 1:8.

10. Ndando ya mutapu uka Yehova afwetele ha ukuule?

¹⁰ Yika mutwamba hali Yehova? Yika iye alingile mba Yesu ahase kuhana ukuule? Yehova ni Yesu kali ni usepa ukolo uze watwama hakachi ka mwana ni tato. (Yishi. 8:30) Kashika, achinyonga ha yikola yize Yehova evwile muze amwene Mwanenyi hano hashi mamona lamba. Chochene, Yehova kevwile yikola yinji ha kumona Mwanenyi mamumwesa lamba ni kulitunaye.

11. Yika muyitukwasa kunyingika chize Yehova evwile muze Yesu afwile?

¹¹ Chisemi wa lunga hanji wa pwo yoze wafwisa mwana, kananyingika lamba ni yikola yize yakwiza ha kufwisa mwana. Yetu tukwete ufulielo ukolo ha ukuule, chipwe chocho, muze twakufwisa umwe twakwivwa yikola yinji ku mbunge. Yino yakutukwasa kunyingika yikola yize Yehova evwile muze amwene Mwanenyi yoze azanga mamona lamba ni kufwa ha mwaka 33 M.J. c—Mateu 3:17.

12. Yika mutuhasa kulinga ha jimwe poso muze chiwanyino cha Yesu kanda chiputuka?

¹² Nyi muchilita, kukatuka musono lilongese hakutwala ku ukuule mu longeso lie lia wika hanji mu longeso lienu lia mu usoko. Zachisa Chikwata cha Kuhengwola Nacho (nyi chili mu limi lie) hanji mikanda yikwo hanga uwane sango jinji hakutwala ku ukuule. d Chikwo nawa, kaula katalilo wa kutanga Mbimbiliya hakutwala ku chiwanyino cha Yesu, yoze uli ha Mukanda wa Kuzachisa ha Kukunguluka—Mwono ni Mulimo Wetu. Mba ha tangwa lia chiwanyino, kanda uvulama kutala Uwayilo wa Chimene Walipwila. Nyi twalulieka mbunge yetu hakutwala ku chiwanyino cha Yesu, mutuhasa kukwasa akwetu no hanga ayuke chinji ha chiwanyino chacho.—Ezera 7:10

KWASA AKWENU HANGA NO AYUKE

13. Chuma chitangu chika twatamba kulinga hanga tukwase akwetu eze ha chiwanyino cha Yesu?

¹³ Kuchi mutuhasa kukwasa akwetu hanga no ayuke ha chiwanyino cha Yesu? Chuma chitangu chili, kwasanyika hanga tukapwe no ha chiwanyino chacho. Kuchizako atu waze twakuliwana no mu munda, mutuhasa kulinga  katalilo wa majina ja atu waze tunazange kusanyika ngwe, asoko, akwa-milimo-ni-akwetu, alongi-ni-akwetu ni atu akwo nawa. Nyi ngwe kutushi ni konvite jinji ku moko, mutuhasa kutumina atu link ya konvite yize yili ha site. Nyi twachilinga, mutusanyika atu anji hanga tukapwe no hamuwika ha chiwanyino cha Yesu.—Chilu. 11:6.

14. Mumu liaka kuhana konvite kuli mutu ku moko chili chilemu?

¹⁴ Mutu nyi mutumwaha konvite ku moko, chino muchimukwata ku mbunge. Umwe pangi kakomokene muze mukwo-lunga yoze keshi kulingila Yehova amulwezele ngwenyi, kumaya ha chiwanyino cha kwiwuluka kufwa cha Yesu. Mumu liaka pangi akomokene? Mumu mukwo-lunga te hanamusanyika ha chiwanyino cha Yesu ha yisuho yinji, alioze te keshi kuzanga kuyako. Mba yika yalingiwile kuli mukwo-lunga ha shimbu liacho? Iye katambwile konvite kuli umwe mukulwana wa mu chikungulwila yoze te anyingika, chocho yaya ha chiwanyino cha Yesu ha mwaka uze ni ha miaka yikwo yize yahachileho.

15. Yika twatamba kwiwuluka muze tunasanyika mutu ha chiwanyino cha Yesu?

¹⁵ Twatamba nawa kunyingika ngwetu, atu waze twakusanyika mahasa kupwa ni yihula yinji. Chipi-chipi, nyi achi muchipwa chisuho cho chitangu cha kuya mu Zuwo lia Wanangana. Kashika, chili chilemu kulianga kunyonga ha yihula yize matuhula ni kulilulieka hanga tuhase kwakumbulula. (Kolo. 4:6) Chakutalilaho, amwe mahasa kulihula ngwo, ‘Kukunguluka chacho kuchi muchipwa?’ ‘Muchilinga maola angahi?’ ‘Munguhasa kuzala mutapu weswawo munguzanga?’ ‘Shina natamba kufweta mba ngunjile?’ ‘Metaho mbongo?’ Muze tunasanyika umwe ha chiwanyino cha kwiwuluka kufwa cha Yesu, mutuhasa kumuhula ngwetu: “Shina uli ni chihula chize unazange hanga ngukumbulule?” Hanyima, tukumbululenu yihula yeswayo mutu wacho matuhula. Mutuhasa nawa kumusolwela yinema, Kwiwuluka Kufwa cha Yesu ni Yika Yakupwa mu Zuwo lia Wanangana?, hanga tumukwase amone chize kukunguluka chetu chapwa. Mutuhasa kuzachisa nawa longeso 28 lia mukanda, Wahilila ku  Mwono ku Miaka Yeswe! mumu hali yikuma yilemu yize muyihasa kumukwasa.

16. Yihula yika mahasa kutuhula kuli atu waze akwiza ha chiwanyino cha Yesu?

¹⁶ Hanyima lia kukunguluka, atu anji waze twasanyikine mahasa kupwa ni yihula yinji yize mafupiwa makumbululo. Ayo mahasa kulihula ngwo: Mumu liaka niumwe kalile mbolo chipwe kunwa vinyu, hanji mumu liaka atu akehe wika e alia? Ayo mahasa kulihula nawa ha unji wa yisuho yize twakulinga chiwanyino cha kwiwuluka kufwa cha Yesu. Hanji mafupa kunyingika nawa nyi kukunguluka cheswe cha Yela ja Yehova che chakupwa. Chipwe ngwe yikuma yino yimwe kakuyilumbununa ha pande ja chiwanyino cha Yesu, mutu hanji mazanga kunyingika yuma yinji. Chikuma chili ha site jw.org chinambe ngwo, “Mumu Liaka Yela ja Yehova Akwiwuluka Chiwanyino cha Mwene cha Ufuku mu Jila Yalisa?” muchihasa kutukwasa kukumbulula yihula yize mutu mapwa nayo. Tunazange kulinga yeswayo mutuhasa, shimbu chiwanyino cha Yesu kanda chiputuka, muze tuliho ni muze muchihwa, hanga tukwase waze eswe anazange kuzuka “mwono wa mutolo” ayuke chinji ha chiwanyino chacho.—Yili. 13:48.

KWASA MANDUMBU WAZE HANAZEYE KU UFULIELO

17. Kuchi makulwana a mu chikungulwila mahasa kukwasa mandumbu waze hanazeye ku ufulielo? (Ezekiele 34:12, 16)

¹⁷ Makulwana a mu chikungulwila, kuchi munuhasa kukwasa mandumbu waze hanazeye ku ufulielo ha mashimbu a chiwanyino cha Yesu? Munuchilinga ha kusolola ngwo, nwakulihulumba chinji hali ayo. (Tanga Ezekiele 34:12, 16.) Muze chiwanyino kanda chiputuka, senu tachi hanga nuhanjike ni mandumbu anji waze hanazeye ku ufulielo. Alwezenu pundu ngwo, mandumbu mu chikungulwila kakwazanga; nawa ngwo yenu nunazange kwakwasa ha yeswe yize mafupiwa. Asanyikenu ha chiwanyino cha Yesu, nyi meza atambulenu kanawa. Hanyima lia chiwanyino, nungenu ni kukwasa mandumbu ni mapangi wano ha yize mafupiwa hanga afune kuli Yehova.—1 Petu. 2:25.

18. Kuchi yetu eswe mu chikungulwila mutuhasa kukwasa mandumbu waze hanazeye ku ufulielo? (A-Roma 12:10)

 ¹⁸ Kuchi yetu eswe mu chikungulwila mutuhasa kukwasa mandumbu waze hanazeye ku ufulielo muze maya ha chiwanyino cha Yesu? Mutuhasa kuchilinga ha kwatambula ni zango, umbovu ni vumbi. (Tanga A-Roma 12:10.) Twiwulukenu ngwetu kuli mandumbu wano chapwile ni kwakalila kwiza ku kukunguluka. Hanji te kakwivwa woma wa chize mandumbu maatambula muze meza mu Zuwo lia Wanangana. e Kashika, kanda twamba yuma yize muyaevwisa sonyi hanji muyaevwisa yikola ku mbunge. (1 Tesa. 5:11) Mandumbu wano a malunga ni a mapwo, kakuzanga Yehova ngwe chizechene ni yetu twakumuzanga. Tunazange chinji kupwa no hamuwika ha chisuho chino hanga tuwayile Yehova!—Samu 119:176; Yili. 20:35.

19. Yika twakuyuka muze twakwiwuluka kufwa cha Yesu?

¹⁹ Twakusakwilila chinji ha chize Yesu atulwezele hanga tupwe ni kwiwuluka kufwa chenyi hita mwaka ni kunyingika ulemu wacho. Muze twakuchilinga, yetu ni atu eswe waze twakupwa no hamuwika twakuyuka chinji. (Iza. 48:17, 18) Chakutalilaho, zango lietu hali Yehova ni hali Yesu liakwoka chinji. Twakupwa ni uhashi wa kusolola usakwililo wetu ha yize o atulingilile, ni kulinunga ni mandumbu jetu. Twakupwa ni uhashi wa kukwasa atu akwo nawa hanga alilongese hakutwala ku ukuule ni kupwa ni kutalatala cha kuzuka yiwape yize Yehova anatulakenya. Kashika, tusenu tachi hanga tulilulieke hakutwala ku chiwanyino chino chilemu ha mwaka—Chiwanyino cha Kwiwuluka Kufwa cha Yesu!