Malunga amwe kakolelele ku minyachi yize akumona mapwo ngwe keshi ulemu. Chakutalilaho, Hans umwe kalayi wa mbonge mu Bolívia, yamba ngwenyi: “Malunga amwe kakolelele ku minyachi yize yakulelesa chinji mapwo ni kwamona ngwe keshi ulemu niumwe (mu putu ngwo, machismo).” b Shengxian, umwe mukulwana wa mu chikungulwila ku Taiwan, yamba ngwenyi: “Kuze natwama, malunga anji kakwamba ngwo haze hali malunga mapwo katambile kuhanjika hanji kuhana nyonga. Nyi lunga umwe mavuluka nyonga lia umwe pwo, malunga akwo keshi kumuvumbika.” Malunga amwe kakusolola kaleleso wacho hali mapwo mu majila akwo nawa.

Chinapeme kunyingika ngwo, lunga chipwe ngwe masemukina ku munyachi weswawo, nihindu mahasa kwalumuna nyonga lienyi ha chikuma chino. Iye mahasa kwecha kunyonga ngwenyi, malunga kakwete ulemu unji kuhiana mapwo. (Efwe. 4:22-24) Alioze, chino machilinga wika nyi membulula chilweza cha Yehova. Ha mutwe uno, mutumonaho chize Yehova akumona mapwo, chize mandumbu a malunga mahasa kwimbulula chilweza chenyi ni chize makulwana a mu chikungulwila mahasa kupwa chilweza chipema ha kuvumbika mapangi.

KUCHI YEHOVA AKUMONA MAPWO?

Yehova kali chilweza chingunu cha chize mutuhasa kumona mapwo. Amu ali Tata wa zango, Yehova kakuzanga ana jenyi eswe. (Yoa. 3:16) Mandumbu a mapwo waze ashishika kali ana jenyi alemu. Tutalenu majila amwe waze Yehova akusolwelamo ngwenyi, kakuzanga ni kuvumbika mapwo.

Iye keshi kwasolwela katonde. Yehova katangile malunga ni mapwo mu chifwa chenyi.  (Uputu. 1:27) Iye kakahanyine mana anji kuli malunga hanji utotombo unji kuhiana mapwo; chikwo nawa, keshi kuzanga chinji malunga kuhiana mapwo. (2 Sango 19:7) Iye katangile malunga ni mapwo ni mana amuwika akunyingika umwenemwene wa mu Mbimbiliya ni kusolola yitanga yenyi yipema. Kuli Yehova, ufulielo wa malunga ni wa mapwo uli umuwika, chipwe ngwe kali ni kutalatala cha kutwama ku miaka yeswe hano hashi hanji kuya mu malilu akapwe mianangana ni asasendote. (2 Petu. 1:1) Twamona pundu ngwetu, Yehova keshi katonde hali mapwo.

Iye kakwapanjika. Yehova kakulihulumba ha chize mapwo akulivwa ni ha yipikalo yize akupwa nayo. Chakutalilaho, iye kwevwile ni kukumbulula yilemba ya Rakele ni Hana. (Uputu. 30:22; 1 Samue. 1:10, 11, 19, 20) Yehova nawa katumine kusoneka mu Mbimbiliya sango ja malunga waze apanjikile manyonga ja mapwo. Chakutalilaho, Apalahama kakawile chiyulo cha Yehova cha kupanjika mukwo-pwo Sara. (Uputu. 21:12-14) Mwanangana Ndawichi neye kapanjikile Abigale. Umwenemwene uli ngwo, iye kalivwile ngwenyi, Yehova mwe wamutumine hanga ahanjike nenyi. (1 Samue. 25:32-35) Yesu neye kembulwile ni ungunu yitanga ya Tato ha kupanjika naye, Maria. (Yoa. 2:3-10) Yilweza yino yinasolola ngwo, jila yimwe yize Yehova akusolwelamo vumbi kuli mapwo yili ha kwapanjika.

Iye kakwajikijila. Yehova katongwele Eva hanga akwase kufunga ni kululieka hashi heswe. (Uputu. 1:28) Kuli Yehova, Alama kakapwile ni ulemu unji kuhiana Eva, alioze kapwile chikwashi chenyi. Yehova nawa katongwele aprofeta a mapwo Debola ni Hulenda hanga ahane yiyulo kuli atu jenyi, kuchingako umwe mukwa-kuyula ni mwanangana. (Kuyu. 4:4-9; 2 Mia. 22:14-20) Musono, Yehova kali ni shindakenyo ngwenyi, mandumbu jetu a mapwo mahasa kulinga mulimo weswawo matambula. Mapwo wano ashishika kali akwa-kwambujola, mapionelu ni mishionaliu. Ayo nawa kakukwasa ku mulimo wa kutunga Mazuwo a Wanangana, Mambetele ni kululieka mazuwo jacho. Amwe a kuli ayo kakukalakala ku Mbetele; akwo ku ma RTO hanji ngwetu yihela ya kulumbunwina mikanda. Mapangi wano kali ngwe chizavu cha maswalale waze Yehova akufumba hanga alinge upale wenyi. (Samu 68:11) Twamona pundu lume, kuli Yehova, mapwo keshi alelu; kakwete ulemu unji.

KUCHI MANDUMBU A MALUNGA MEMBULULA CHIZE YEHOVA AKUMONA MAPWO?

Mba unyingike nyi wakumona mapwo ngwe chize Yehova akwamona, watamba kuhengwola manyonga ni yitanga ye. Mba uchilinge, unafupiwa ukwaso. Chizechene ngwe makina ya raio-X muyihasa kusolola musongo uze uli ku mbunge ya mutu, sepa mupema ni Mbimbiliya muyikukwasa kunyingika nyi wakumona mapwo ngwe chize Yehova akwamona. Mba kuchi muhasa kutambula ukwaso wacho?

Hula umwe sepa mupema. (Yishi. 18:17) Mutuhasa kwita ukwaso kuli sepa yoze tunanyingika ngwetu, kapwa chimbovu nawa kakwete nyonga lialita, ha kumuhula ngwetu: “Kuchi wakungumona, shina nakuvumbika mandumbu a mapwo? Shina ayo kakwivwa ngwo nakwavumbika? Shina munguhasa kulinga yimwe hanga ngwalumune manyonga jami?” Nyi ngwe sepa lie makulweza yize watamba kululieka, kanda ulikalila. Shimbu ulikalile, sako tachi hanga walumune yize muyifupiwa.

Lilongese Liji lia Zambi. Jila yipema yize muyikukwasa kunyingika nyi ngwe wakuvumbika mandumbu a mapwo, yili kuzachisa Liji lia Zambi hanga uhengwole manyonga ni yitanga ye. (Hepre. 4:12) Muze twakulilongesa Mbimbiliya, twakuwanamo yilweza ya malunga waze te akuvumbika mapwo ni waze kakapwile ni kuvumbika mapwo. Mutuhasa kutesa yize o alingile ni yize yetu tunalingi. Chikwo nawa, kuchichi kulita kwanda versu yize kuyishi mu kontextu hanga tukwase nyonga lize kulialite hakutwala kuli mapwo. Chakutalilaho, 1 Petulu 3:7 unambe ngwo, lunga katamba ‘kulemesa pwo ngwe chikwachilo chilelu.’ c Shina chino chinalumbunuka ngwo, lunga kali mulemu kuhiana pwo, hanji ngwetu kali ni mana hanji utotombo unji kuhiana pwo? Ka, hi chocho ko! Tesa  maliji a Petulu ni waze ali ha A-Ngalashia 3:26-29. Versu jino jinasolola ngwo, Yehova kasakwile mapwo ni malunga hanga akayule hamuwika ni Yesu mu malilu. Nyi twalilongesa Liji lia Zambi ni kwita ukwaso kuli sepa lietu hakutwala ku chize twakumona mapwo, mutuhasa kulilongesa kuvumbika mapangi jetu.

KUCHI MAKULWANA AKUVUMBIKA MANDUMBU JETU A MAPWO?

Mandumbu mu chikungulwila mahasa kulilongesa kuvumbika mandumbu a mapwo ha kwimbulula chilweza cha makulwana a mu chikungulwila. Kuchi makulwana mahasa kupwa chilweza chipema ha chikuma chino? Tutalenu yimwe yilweza.

Ayo kakuchichimieka mandumbu a mapwo. Postolo Paulu kahichikile chilweza chipema chize makulwana mahasa kwimbulula. Ha mukanda uze asonekenene mandumbu mu chikungulwila cha Roma, iye kachichimiekene mandumbu a mapwo eka ni eka. (Roma 16:12) Muhasa kunyonga chize mapangi jacho alivwile muze atangile mukanda wacho mu chikungulwila! Chimuwika nawa, makulwana kakusa tachi hanga achichimieke mandumbu a mapwo ha yitanga yo yipema ni ha milimo yize akulingila Yehova. Chino chakukwasa mapangi amone ngwo mandumbu mu chikungulwila kakwazanga ni kwavumbika. Maliji a utakamiso a umwe mukulwana hanji e wika mandumbu jetu a mapwo anafupiwa hanga anunge ni kulingila Yehova ni ushishiko.—Yishi. 15:23

Makulwana katamba kuchichimieka mapangi ni mbunge yeswe ni kusolola pundu yize anaachichimiekena. Mumu liaka? Pangi Jessica, yamba ngwenyi: “Chakupwa chipema chinji muze umwe ndumbu akutulweza ngwenyi ‘twasakwila.’ Alioze, twakulivwa kanawa muze mandumbu akutuchichimieka ha kutongola yuma yize twakulinga. Chakutalilaho, ngwe kuchichimieka umwe mama ha chize akukwasa ana jenyi hanga apanjike kanawa  kukunguluka, hanji kuchichimieka umwe pangi yoze wakuya ni kusaka longi wa Mbimbiliya hanga eze ku kukunguluka.” Makulwana nyi machichimieka mapangi ha kutongola yuma yize akulinga, o malivwa ngwo kali chihanda cha chikungulwila nawa kali alemu.

Ayo kakupanjika mandumbu a mapwo. Makulwana waze alikehesa kananyinga ngwo, hi ayo wika ko akwete yiyulo yipema. Ayo kakwita yiyulo kuli mapangi ni kwapanjika ni uhumikizo weswe muze anahanjika. Hachino, mapangi kakulivwa ngwo kakwavumbika, makulwana no kakuyuka chinji. Mu mutapu uka? Geraldo, umwe mukulwana yoze wakalakala ku Mbetele, yamba ngwenyi: “Yami hinanyingika ngwami, kwita yiyulo kuli mapangi chakungukwasa kulinga kanawa mulimo wami. Kanji-kanji, ayo kakulinga kanawa milimo yimwe ha miaka yinji kuhiana mandumbu a malunga.” Mu chikungulwila, mapangi anji kali mapionelu, kashika o kananyingika kanawa atu mu ngiza ya chikungulwila. Bryan, umwe mukulwana, yamba ngwenyi: “Mapangi jetu mahasa kukwasa chinji ululikiso, kashika tunafupiwa kuyuka ha utotombo ni yitanga yo yipema!”

Mukulwana yoze ukwete mana keshi kulengulula yiyulo ya mapangi. Mumu liaka? Edward, umwe mukulwana yamba ngwenyi: “Chiyulo hanji chinyingi cha umwe pangi muchihasa kutukwasa kunyingika kanawa chimwe chikuma ni kumona chize akwetu anevu.” (Yishi. 1:5) Chipwe ngwe mukulwana kechi kukaula nyonga hanji chiyulo cha pangi, nihindu katamba kumusakwilila ni kumuchichimieka ha nyonga liacho.

Ayo kakufumba mandumbu a mapwo. Makulwana kakufupa uhashi hanga afumbe mapangi. Chakutalilaho, ayo mahasa kulongesa mapangi chize masongwela kukunguluka cha kuya mu munda nyi kuheshi niumwe ndumbu wa kupapachisa. Ayo nawa mahasa kwalongesa kukalakala ni yikwata ni makina hanga akwase ku mulimo wa kutunga ni wa kululieka mazuwo a mu ululikiso wa Yehova. Ku Mbetele, tulayi kakufumba mapangi kulinga milimo yeka ni yeka ngwe kululieka yimwe yize yinapiha, kulanda yuma, kutala ha mbongo, ku ma computador ni ku yuma yikwo nawa. Muze makulwana akufumba mapangi, kakwamona ngwo mahasa kulinga yuma yacho ni kwajikijila.

Mapangi anji kakuzachisa fumbo lize akwaha kuli makulwana hanga no akwase akwo. Chakutalilaho, mapangi amwe kakuzachisa fumbo lize akwaha ku mulimo wa kutunga hanga akwase akwo hakutungulula mazuwo jo hanyima lia umwe luyinda. Akwo waze akutambula fumbo lia kwambujola ha mbunga kakukwasa mapangi akwo hanga alinge mulimo wacho. Kuchi mapangi jetu akulivwa hakutwala kuli makulwana waze akusa mashimbu hanga aafumbe? Pangi Jennifer, yamba ngwenyi: “Muze nakalakalile mu mulimo wa kutunga limwe Zuwo lia Wanangana umwe kalayi wa mu chizavu yangufumba. Iye kamwene mulimo uze nalingile mba yanguchichimieka ha chino. Nazangile kukalakala nenyi mumu nalivwile ngwami nguli mulemu.”

TUMONENU MANDUMBU A MAPWO NGWE ASOKO JETU

Twakuzanga mapangi jetu ngwe chizechene Yehova akwazanga! Kashika, twatamba kwamona ngwe asoko jetu. (1 Timo. 5:1, 2) Twakuzanga chinji kulingila Yehova hamwe ni mapangi wano. Chakupema chinji muze akulivwa ngwo twakwazanga ni kwafunga. Pangi Vanessa, yamba ngwenyi: “Nakusakwilila chinji ha kupwa mu ululikiso wa Yehova muze munazala too ni mandumbu waze akungutakamisa.” Pangi umwe mu Taiwan, yamba ngwenyi: “Nakusakwilila chinji Yehova ni ululikiso wenyi ha kulemesa yetu mapwo ni kulihulumba ha manyonga jetu. Chino chakukolesa ufulielo wami ni kungukolweza kulemesa chiwape chami cha kulinga chihanda mu ululikiso wa Yehova.”

Yehova kakuwahilila chinji muze akumona mandumbu a malunga masa tachi hanga avumbike mandumbu a mapwo ngwe chizechene iye akwavumbika! (Yishi. 27:11) Benjamin, umwe mukulwana mu Escócia, yamba ngwenyi: “Akwa-hashi keshi kulemesa mapwo, kashika nyi umwe pwo meza mu Zuwo lia Wanangana tunazange hanga amone ngwenyi yetu twalisa.” Kashika, yetu yeswe tusenu tachi hanga twimbulule Yehova ha kuzanga mandumbu jetu a mapwo ni kwasolwela vumbi lize atela.—Roma 12:10.