1. Kuli yena, Yehova kuchi apwa?

 SHINA hiunanyongo kama chize Yehova apwa? Muze wakulemba kuli Yehova, wakunyonga ngwe iye kuchi apwa? Tunanyingika ngwetu, kutuchi kuhasa kumona Yehova, alioze Mbimbiliya yakumusolola mu majila eka ni eka. Yakumuvuluka ngwo, “tangwa ni lukepwe,” “kahia kaze kakunongesa.” (Samu 84:11; Hepre. 12:29) Mu umwe usolwelo, profeta Ezekiele yasolola Yehova ngwe kalifwa ni liwe lia safira, unengu wa kulejima ni kongolo. (Eze. 1:26-28) Mutapu uze Mbimbiliya yakulumbunwinamo Yehova, muuhasa kutuvwisa woma hanji kututwala tulivwe ngwe kutushi ulemu.

2. Mumu liaka muchihasa kupwa chikalu kukundama kuli Yehova?

² Amu kutushi kumona Yehova, muchihasa kupwa chikalu kutayiza ngwo iye kakutuzanga. Atu amwe kamwene lamba linji ku mwono, kashika kakunyonga ngwo Yehova kechi keza kaazanga. Atu jacho yisemi jo hanji te keshi kwazanga. Yehova kananyingika chize twakwivwa ni chize muchihasa kupwa chikalu kukundama kuli iye. Mba atukwase ha manyonga jacho, iye kanasolola mu Mbimbiliya ngwenyi, kali Zambi ya zango.

3. Mumu liaka chili chilemu kunyingika kanawa zango lize Yehova akwete hali yetu?

³ Liji lize linakwate kanawa ku mwono wa Yehova, lili zango. (1 Yoa. 4:8) Mbimbiliya yakwamba ngwo, Zambi iye zango. Zango lie liakusongwela yuma yeswe yize Yehova akulinga. Yehova kakwete zango linji, kashika akuzanga chipwe atu waze keshi kumuwayila. (Mateu 5:44, 45) Ha mutwe uno, mutulilongesaho chikehe hali Yehova ni ha zango lize iye akwete. Nyi twanyingika kanawa Zambi yetu, muchitukwasa hanga tumuzange.

YEHOVA KAKUTUZANGA CHINJI

4. Kuchi wakwivwa ha zango lize Yehova akwete hali yena? (Tala nawa chizulie.)

⁴ “Yehova kakwete zango linji.” (Tia. 5:11) Mu Mbimbiliya, Yehova kakulisolola ngwe umwe mama yoze ukwete zango.  (Iza. 66:12, 13) Achinyonga umwe mama yoze wakufunga kanawa mwanenyi. Ni zango lieswe, iye mamusa mu kondo, mahanjika nenyi ni maliji a zango waze mamuhwimisa mbunge. Muze malila hanji mevwa yikola, iye malinga yeswayo mahasa hanga amukwase ha yize anafupiwa. Muze tunamono lamba, mutuhasa kupwa ni shindakenyo ngwetu, Yehova kakutuzanga. Mukwa-kwimba masamu yasoneka ngwenyi: “Hakachi ka kulumbama cha manyonga jami muchima, kulembejeka che chakunguwahisa.”—Samu 94:19.

5. Yika utu wa zango lia Yehova unalumbunuka kuli yena?

⁵ Yehova kakwete utu wa zango. (Samu 103:8) Iye keshi kutwehuka ni kawashi chipwe muze mutulinga yuma yize kuyalitele. Ha yisuho yinji, A-Izalele kapwile ni kulinga yuma yize te yakuvwisa Yehova yikola ku mbunge. Chipwe chocho, muze apwile ni kulikonyeka, Yehova te kakwasolwela utu wenyi wa zango, ha kwamba ngwenyi: “Mumu wapwile wa zango liami; mulemu. Nakuzangile.” (Iza. 43:4, 5) Zango lia Yehova kulialumukine. Yetu mutuhasa kununga ni kujikijila muli iye. Chipwe ngwe mutulinga upi unene, Yehova kechi kutuhichika ukawetu. Nyi twalikonyeka ni kufuna kuli Yehova, iye manunga ni kutuzanga. Kanalakenya kutwaha “ukonekeno wakulumbama.” (Iza. 55:7) Mbimbiliya yakwamba ngwo, ukonekeno uno uli “miaka ya kuhuzuluka ya kuli Yehova.”—Yili. 3:19.

6. Yika mukanda wa Zekaria 2:8 unatulongesa hali Yehova?

⁶ Tanga Zekaria 2:8. Yehova kakututesa ni katumba ka liso lienyi. Liso likwete ulemu unji ku mujimba wa mutu. Kashika chili ngwe Yehova kanambe ngwenyi, mweswawo manulinga upi yenu atu jami, chili ngwe kanalingi upi wa chuma chize nakulemesa chinji. Mumu lia zango lize akwete hali yetu, Yehova kakunyingika chize twakwivwa; nawa kanazange chinji kutukwasa. Muze twakumona lamba, neye kakupinda chinji. Kashika, mutuhasa kulemba kuli iye ni shindakenyo yeswe ngwetu: “Ngufunge kama ngwe katumba ka liso lie.”—Samu 17:8.

7. Mumu liaka twatamba kukolesa ujikijilo wetu ha zango lize Yehova akwete hali yetu?

⁷ Yehova kanafupu hanga tuhone kuyambashana ha zango lize akwete hali yetu. Alioze kananyingika ngwenyi mumu lia yimwe yuma yize twapalikile kunyima, mutuhasa  kuyambashana nyi kakutuzanga nyi ka. Hanji tunapalika mu yimwe yuma ha mashimbu wano, yize yineseka ujikijilo wetu ha zango lize Yehova akwete hali yetu. Mba yika muyitukwasa kununga ni kukolesa ujikijilo wetu hali Yehova? Chuma muchitukwasa chili, kwiwuluka chize Yehova akusolola zango lienyi hali Yesu, hali Akwa-Kristu akuwayisa ni hali yetu eswe.

CHIZE YEHOVA AKUSOLOLA ZANGO LIENYI

8. Mumu liaka Yesu apwile ni shindakenyo ngwenyi, Tato kakumuzanga?

⁸ Yehova ni Yesu katwamine miaka yinji mu malilu, chocho yaputuka kulizanga chinji umwe ni mukwo. Yehova kasolwele pundu ngwenyi, kakuzanga Yesu ngwe chize tunawane ha Mateu 17:5. Yehova kachi kambile wika ngwenyi: ‘Yono mwe mwanami ngunamutayiza.’ Alioze, iye kazangile hanga tunyingike zango lize akwete hali Yesu, hachino yamba ngwenyi, “Yono mwe Mwanami, nakumuzanga chinji.” Yehova te kakwivwa kuwaha ha utu wa Yesu ni ha yize alingile hanga ahane mwono wenyi ngwe ukuule. (Efwe. 1:7) Yesu kakayambashanyine ha zango lize Tato apwile nalio hali iye. Iye kapwile ni shindakenyo ha zango lia Yehova, kashika ambile ha yisuho yinji ngwenyi, Tata kakunguzanga.—Yoa. 3:35; 10:17; 17:24.

9. Maliji aka anasolola zango lize Yehova akwete hali Akwa-Kristu akuwayisa? Lumbununa. (A-Roma 5:5)

⁹ Yehova kakuzanga nawa chinji Akwa-Kristu akuwayisa. (Tanga A-Roma 5:5.) Achitalenu liji linambe ngwo, “alizukwile.” Umwe mukanda uze wakuhanjika ya Mbimbiliya, unalumbununa liji lino ngwe “meya waze anapalika hali yetu.” Maliji wano kanalumbununa kanawa zango lize Yehova akwete hali Akwa-Kristu akuwayisa! Ayo kananyingika ngwo, “Zambi kakwazanga.” (Yunda. 1) Postolo Yoano kasolwele chize te akwivwa muze asonekene ngwenyi: “Talenu zango lipwahaha lize Tata hanatusolwela, ha kutuvuluka ngwenyi ana jami.” (1 Yoa. 3:1) Shina Yehova kakuzanga wika Akwa-Kristu akuwayisa? Ka. Yuma yize alingile yakusolola ngwo yetu eswe kakutuzanga.

10. Chuma chika chize chinasolola zango lize Yehova akwete hali yena?

¹⁰ Chuma chika chize chinasolola ngwo, Yehova kakutuzanga chinji? Chuma chacho chili ukuule. Kupalikila mu ukuule, Yehova kakusolola ngwo kakuzanga atu eswe! (Yoa. 3:16; Roma 5:8) Iye kahanyine Mwanenyi yoze azanga hanga atufwile ni kukonekena shili yetu ni kupwa masepa jenyi. (1 Yoa. 4:10) Nyi mutupukuna ha ndando yize Yehova ni Yesu afwetele, mutunyingika kanawa zango lize ayo akwete hali yetu. (Ngala. 2:20) Ukuule kakauhanyine wika mumu lia ululi wa Yehova, alioze kauhanyine mumu lia zango. Yehova kasolwele zango lize akwete hali yetu ha kuhana Mwanenyi ngwe chitapo. Iye kechele hanga Mwanenyi amone lamba ni kutufwila.

11. Yika twalilongesa ha Jeremia 31:3?

¹¹ Ngwe chize twamona, Yehova kakusa tachi hanga asolole zango lienyi. (Tanga Jeremia 31:3.) Iye hanatusanyika kuli iye, mumu lia zango lize akwete hali yetu. (Tala nawa Shimbi Yamuchiali 7:7, 8.) Kukushi mutu chipwe chuma nichimwe chize muchihasa kutuhandununa ku zango lienyi. (Roma 8:38, 39) Kuchi wakwivwa ha zango lino lia Yehova? Tuhengwolenu Samu 23, ni kumona chize Ndawichi evwile ha zango ni ufunge wa Yehova ni chize yetu mutuhasa kwivwa yize Ndawichi evwile.

KUCHI WAKWIVWA HA ZANGO LIA YEHOVA?

12. Mu maliji akehe, yika Samu 23 yinatulongesa?

¹² Tanga Samu 23:1-6. Mu Samu 23, Ndawichi kasolwele ujikijilo wenyi ngwenyi, Yehova kakumuzanga ni kumufunga. Iye kasolwele usepa upema uze apwile nawo ni Yehova, ni  kumuvuluka ngwenyi kafunga kami. Ndawichi te kakulivwa mu ufunge upema ha kwecha Yehova hanga amusongwele. Iye te kakujikijila muli Yehova ni mbunge yeswe. Ndawichi kanyingikine ngwenyi, Yehova te mamusolwela zango matangwa eswe ku mwono wenyi. Yika yakwashile Ndawichi kupwa ni shindakenyo yacho?

13. Mumu liaka Ndawichi apwile ni shindakenyo ngwenyi, Yehova nihindu mamufunga?

¹³ “Chichi kuhona nichimwe.” Ndawichi nihindu te kakulivwa ngwenyi, Yehova kakumufunga kanawa. Iye kapwile ni yuma yeswe yize te akufupiwa. Chikwo nawa, Ndawichi kanyingikine ngwenyi Yehova kali sepa lienyi; nawa kali ni utayizo wenyi. Kashika, apwile ni shindakenyo ngwenyi, yeswayo muyilingiwa kulutwe Yehova nihindu mamufunga. Ujikijilo uze Ndawichi apwile nawo ha zango lia Yehova, wapwile ni ndundo kuhiana kusakalala cheswacho apwile ni kwivwa. Ujikijilo wacho watwalile Ndawichi kupwa ni chiseke ni kuwahilila ni yuma yize apwile nayo.—Samu 16:11.   

14. Kuchi Yehova akutufunga?

¹⁴ Yehova kakutufunga ni zango, chipi-chipi muze tunapalika mu yipikalo. Claire, a yoze wakukalakala ku Mbetele ha miaka kuhiana 20, kevwile yikola yinji ku mbunge muze asoko jenyi apalikile mu yipikalo yeka ni yeka. Tato kayijile musongo wa kalepa, ndumbwenyi wa pwo yamusolola mu chikungulwila, asoko jenyi yapwa nawa ni kapinda wa mbongo, chocho yaatambula zuwo. Kuchi Yehova aafungile? Claire yamba ngwenyi: “Yehova kafungile asoko jami ha kupwa ni yuma yize te anafupiwa ha hita tangwa. Ha yisuho yinji, Yehova kapwile ni kutwaha yuma yize te kutushi ni kushimbwila! Hita shimbu, nakunyonga  ha chize Yehova angufungile ni kufunga asoko jami, kashika chichi keza kavulama mashimbu jacho. Chino chakungukwasa kununga ni kulingila Yehova ni uwahililo, muze yipikalo yikwo yakusoloka ku mwono wami.”

15. Yika yakwashile Ndawichi kuhuzuluka ku mbunge? (Tala nawa chizulie.)

¹⁵ “Kakuhuzulula mbunge yami.” Ha mashimbu amwe, Ndawichi te kakuhonga ku mbunge mumu lia lamba ni yipikalo yize apwile ni kupalika. (Samu 18:4-6) Chipwe chocho, zango ni ufunge wa Yehova, yapwile ni kumuhuzulula ku mbunge. Chapwile ngwe Yehova kanatwale Ndawichi ku chihela chipema, ku sesa lia meya a uhwimino. Chino te chakukwasa Ndawichi kupwa ni tachi ni kununga kulingila Yehova ni uwahililo.—Samu 18:28-32.

16. Kuchi zango lia Yehova liakukuhuzulula?

¹⁶ Ni musono nawa, twakuhasa kukumba yipikalo ni ukwaso wa Yehova. Ngwe chize Mbimbiliya yinambe, tuli ni mwono mumu lia utu wa zango lia Yehova. (Lungu. 3:22; Kolo. 1:11) Tutalenu chilweza cha Rachel. Iye kevwile yikola yinji ku mbunge muze mukwo-lunga amuhichikile ni kuhichika Yehova ha mashimbu a musongo wa COVID-19. Yika Yehova alingile hanga amukwase? Mwene yamba ngwenyi: “Yehova kalingile yuma yinji hanga ngulivwe ngwami kakunguzanga. Iye katumine masepa anji hanga eze ni kungutwamisa, kungunehena kulia ni kungutumina mesage ni mikanda ya utakamiso, kungusehesa ni kungwiwulula ngwo, Yehova kali hehi ni yami hanga angufunge. Nakusakwilila chinji Yehova ha kungwaha usoko uno unene uze ukwete zango.”

17. Mumu liaka Ndawichi te keshi kwivwila “woma wa chipi nichimwe”?

¹⁷ “Chichi kwivwa woma wa chipi nichimwe; mumu yena uli hamwe ni yami.” Ndawichi kapwile ni akwa-kole anji a ndundo. Chocho ha yisuho yinji, yapwa mu ponde ya kutokesa mwono wenyi. Chipwe chocho, kapwile ni kulivwa mu ufunge upema, mumu lia zango lia Yehova. Iye kapwile ni kulivwa ngwe Yehova kali hamwe nenyi mashimbu eswe, chino te chakumuhuzulula mbunge. Kashika ahashile kwimba ngwenyi: “[Yehova] wangupulwile ku woma wami weswe.” (Samu 34:4) Ha mashimbu amwe, Ndawichi kapwile ni kwivwa woma unji, chipwe chocho te kakuhasa kuukumba mumu kanyingikine ngwenyi, Yehova kakumuzanga.

18. Kuchi kunyingika ngwo Yehova kakutuzanga muchihasa kututakamisa muze tunevu woma?

¹⁸ Kuchi tunanyingika ngwetu, Yehova kakutuzanga  ni kutwaha tachi muze tunapalika mu yipikalo? Susi, umwe pionelu, kanatulweze chize iye ni mukwo-lunga evwile muze mwano alishihile. Yamba ngwenyi: “Nyi chuma chipi muchilingiwa ku mwono we, chino muchikwata chinji hali yena ni kukuvwisa woma ngwo yuma yikwo yipi muyilingiwa. Alioze zango lia Yehova liatukwashile kulivwa ngwetu, tuli mu ufunge upema.” Rachel yoze twatongola helu, yamba ngwenyi: “Ha umwe ufuku, napwile ni kunenganyana ni kusakalala hamwe ni woma. Yinguputuka kulila ni kulemba kuli Yehova ni liji mwilu. Ha ola yizeyene, yinguhuzuluka ku mbunge ngwe chizechene mama akulinga hali mwanenyi wa kemba, chocho yingupomba. Ami chichi keza kavulama mashimbu jacho.” Tasos, umwe mukulwana wa mu chikungulwila, kalingile miaka yiwana mu zuwo lia ususu mumu lia kulituna mulimo wa uswalale. Kuchi amwene zango lia Yehova ku mwono wenyi? Yamba ngwenyi: “Yehova kanguhele yuma yinji yize te ngunafupiwa, yino yangutwalile kujikijila chinji muli iye. Chipwe ngwe napwile mu zuwo lia ususu, nihindu Yehova kangukwashile kuwahilila kupalikila mu spiritu yenyi yisandu. Chino changukwashile kumona ngwami, muze te nakujikijila chinji muli Yehova te nakuhasa kumona kanawa zango lienyi hali yami. Chocho yinguputuka kukalakala ngwe pionelu wa shimbu lieswe muze te nguli mu zuwo lia ususu.”

NUNGA NI KUKUNDAMA KULI ZAMBI YETU WA ZANGO

19. (a) Kuchi kunyingika ngwo Yehova kakutuzanga chakukwata ha yize mutwita mu yilemba yetu? (b) Chisoneko chika chakuhanjika ha zango lia Yehova chize chakukukwata ku mbunge? (Tala mushete, “ Yisoneko yize Yakutukwasa Kwivwa Zango lia Yehova.”)

¹⁹ Yilweza yeswe yize twamona ha mutwe uno, yinasolola pundu ngwo, Yehova “Zambi ya zango” kali hamwe ni yetu! (2 Kori. 13:11) Iye kakulihulumba hali hita umwe wa kuli yetu. Mutuhasa kupwa ni shindakenyo ngwetu, ‘utu wa zango lienyi unatujingilika.’ (Samu 32:10) Nyi mutupukuna ha chize Yehova akutusolwela zango, mutukundama chinji kuli iye ni kumumona ngwe mutu wamwenemwene ku mwono wetu. Mutuhasa kulemba kuli Yehova ha ola yeswayo ni kumulweza chize tunafupiwa zango lienyi. Chikwo nawa, mutuhasa kulweza Yehova yuma yeswe yize yinatupikala ni shindakenyo ngwetu matwivwa ni kutukwasa.—Samu 145:18, 19.

20. Kuchi zango lia Yehova liakutukwasa kukundama kuli iye?

²⁰ Ngwe chizechene twakuzanga kwota kahia muze kuli chishika, tunazange nawa kukundama ku zango lia Yehova. Chipwe ngwe zango lia Yehova likwete ndundo jinji, nihindu liakutuhwimisa mbunge. Kashika, azulula mbunge ye hanga wivwe zango lia Yehova ku mwono we. Muze mutwivwa zango liacho, yetu eswe mutuhasa kwamba ngwetu: ‘Twazanga Yehova!’—Samu 116:1.