1-2. Kapinda muka tuvumbi ashishika a Yehova mahasa kupwa nenyi?

 NYI yimwe yuma yipi muyilingiwa, mwono wetu muuhasa kwalumuka susumuku. Chakutalilaho, ndumbu Luis, a kamuwanyine ni musongo wa câncer uze kuushi kusoloka chinji. Ndotolo yamulweza ngwenyi, kapwile wika ni tukweji akehe a mwono. Monika ni mukwo-lunga te kakulinga milimo yinji mu ululikiso wa Yehova. Alioze tangwa limwe, Monika yanyingika ngwenyi mukwo-lunga yoze te mukulwana wa mu chikungulwila, kakwete mwono wa nongwena ha miaka yinji. Olivia, umwe pangi twamishi, kamulwezele hanga akatuke mu zuwo lize apwile mumu lia kakundukundu yoze te unambe kulingiwa. Muze afunyine, yawana zuwo lieswe hiliauzuka. Mwono wa mandumbu wano twatongola walumukine susumuku. Shina hiunapalika mu yuma ngwe yino? Shina hiunapalika mu yuma ya susumuku yize yalumwine mwono we?

² Chipwe ngwe twakulingila Yehova, yetu eswe twakupalika mu yipikalo ni mu misongo ngwe yize yakusoloka kuli atu eswe hano hashi. Alioze, yetu mutuhasa kupalika nawa mu ukanjiso ni mu yihungumiona yize yakukatuka kuli atu waze keshi kuzanga Yela ja Yehova. Yehova keshi kutufunga ku yipikalo yino yeswe, alioze kanalakenya ngwenyi, mapwa hamwe ni yetu hanga atukwase. (Iza. 41:10) Ni ukwaso wenyi, mutuhasa kufunga uwahililo ni kukwata yiyulo yipema ha kununga ni kushishika kuli iye muze tunapalika ha mashimbu akalu. Ha mutwe uno, mutumonaho majila awana waze Yehova akutukwashilamo muze tuli ha mashimbu akalu. Mutumona nawa yize mutuhasa kulinga hanga tuzuke ukwaso uze Yehova akutwaha.

 YEHOVA MAKUKWASA

3. Yika muyihasa kupwa yikalu kulinga muze tunapalika mu yipikalo?

³ Kapinda. Nyi twapalika mu yimwe ponde, muchihasa kupwa chikalu kunyonga kanawa ni kukwata yiyulo. Mumu liaka? Hanji mumu lia yikola yize tunevu ku mbunge ni kusakalala. Hanji mutulivwa ngwe twatoka, kutushi ni kuze tunayi. Talenu yize evwile mapangi aali waze twatongola ku uputukilo. Olivia yamba ngwenyi: “Muze kakundukundu apuzwile zuwo liami, kafa nalivwile ngwe natoka ni kwivwa yikola yinji ku mbunge.” Hakutwala ku kalimbalimba yoze amulingile kuli mukwo-lunga, Monika yamba ngwenyi: “Nahongele ni kwivwa yikola yinji ku mbunge; chapwile ni kungukalila chipwe kulinga yuma yikehe-yikehe ya hita tangwa. Chuma chize chasolokele ngwe kuchichi kulingiwa, chalingiwile kuli yami.” Kuchi Yehova analakenya kutukwasa muze mutulivwa ngwe tunatoko?

4. Kulita ni A-Fwilipu 4:6, 7, yika Yehova analakenya kutwaha?

⁴ Yize Yehova matulingila. Iye kanalakenya kutwaha yize Mbimbiliya yakuvuluka ngwo, “sambukila ya Zambi.” (Tanga A-Fwilipu 4:6, 7.) Sambukila yino, yakukwasa ni kuhwimisa mbunge ya atu waze apwa masepa ja Yehova. Sambukila yino, yahiana kunyonga cheswe nawa yikwete ndundo jinji. Shina hiunahwimi kama mbunge hanyima lia kulemba kuli Yehova? Nyi chenacho, yize wevwile ye “sambukila ya Zambi.”

5. Mu mutapu uka sambukila ya Zambi yakufunga manyonga ni mbunge yetu?

⁵ Mu mukanda wa A-Fwilipu twakutangamo nawa ngwetu, sambukila ya Zambi “muyikafunga mbunge jenu” ni “kunyonga chenu.” Liji lia Ngregu lize azachishile hano ngwo, “kufunga,” liapwile liji lize maswalale te akuzachisa hanga ahanjike hakutwala ku kufunga mbonge ahone kuyilukukila kuli akwa-kole. Atu waze te atwama mu mbonge yize afunga kanawa te kakupomba ni sambukila mumu kananyingika ngwo, maswalale kali ku mapito ni kufunga mbonge yacho. Chizechene nawa, muze sambukila ya Zambi yakufunga mbunge ni manyonga jetu, twakuhwima mbunge ni kulivwa ngwetu tuli mu ufunge upema. (Samu 4:8) Yino ye yalingiwile kuli Hana, chipwe ngwe kapinda wenyi kakahwile ha shimbu lizeliene, nihindu iye kevwile sambukila ya Zambi. (1 Samue. 1:16-18) Kashika, nyi tunahwimi mbunge chakupwa chashi kunyonga kanawa ni kukwata yiyulo yipema.

6. Yika mutuhasa kulinga mba tuzuke sambukila ya Zambi? (Tala nawa chizulie.)

⁶ Yize twatamba kulinga. Nyi unapalika mu yuma yikalu, sanyika “kafunga” hanji ngwetu, eta sambukila kuli Yehova ndo haze makuhelayo. (Luka 11:9; 1 Tesa. 5:17) Luis yoze hitwatongola, kanalumbununa yize iye ni mukwo-pwo  Ana alingile muze ndotolo aalwezele ngwenyi, iye kali wika ni tukweji akehe a mwono. Yamba ngwenyi: “Ha mashimbu ngwe wano, chakupwa chikalu kukwata yiyulo hakutwala ku uukiso ni ha yikuma yikwo nawa. Alioze, kulemba chatukwashile kupwa ni sambukila ya ku mbunge ha mashimbu jacho.” Luis ni mukwo-pwo kambile ngwo, ayo kapwile ni kulemba chinji kuli Yehova hanga aehe sambukila yize muyaahwimisa mbunge ni kwaha mana hanga akwate yiyulo yipema. Sambukila yino, ye ayo apwile nayo. Kashika, nyi unapalika ha amwe mashimbu akalu ku mwono we, nunga ni kulemba. Nyi wachilinga, muopwa ni sambukila ya Yehova yize muyifunga mbunge ni kunyonga che.—Roma 12:12.

YEHOVA MAKUKWASA UPWE NI MANYONGA ALITA

7. Kuchi mutuhasa kulivwa muze tunapalika ha mashimbu akalu?

⁷ Kapinda. Nyi tunapalika ha mashimbu akalu, mutuhasa kuputuka kunyonga ni kulinga yuma yize te kutuchi kuhasa kulinga nyi tuli kanawa. Chizechene wapwa ulungu mu kalunga-lwiji muze muli mikanya yinji, ni yetu mutuhasa kupwa ni manyonga eka ni eka muze tunapalika ha mashimbu akalu. Ana yoze hitwatongola, kanalumbununa ngwenyi, hanyima lia kufwa cha mukwo-lunga, hita ola te kakulivwa cheka. Yamba ngwenyi: “Ha mashimbu amwe, napwile ni kuhonga ku mbunge ni kunyonga ngwami te chatambile kupalika mu yuma ya mutapu au. Ha mashimbu akwo, te nakwivwa uli ni kulihula ngwami, mumu liaka mukwetu-lunga afwa?” Ana nawa kapwile ni kulivwa ukawenyi ni kwivwa uli mumu lia kuhona kulinga yuma yimwe yize te Luis akumulingila. Ha mashimbu akwo, te kakulivwa ngwe kali mu kalunga-lwiji muze muli kangonga mukolo. Kuchi Yehova mahasa kutukwasa muze tunapalika mu yuma ngwe yino?

8. Kulita ni Izaia 33:6, yika Yehova anatulakenya?

⁸ Yize Yehova matulingila. Iye kanalakenya kutukolesa ku manyonga ni ku spiritu. (Tanga Izaia 33:6.) Chakutalilaho, mu kalunga-lwiji nyi muli kangonga, kanji-kanji mikanya yakutwala ulungu sali ni sali. Mba ahase kupalika kanawa mu kapinda wacho, maulungu anji kakwasa yuma kumasesa yize yakupwa mushi lia ulungu. Yuma yacho yakukwasa ulungu hanga uchine kutekenga muze unapalika mu kangonga. Yino yakukwasa atu waze alimo alivwe kanawa ni kulinga wenyi upema. Yuma yino yakukwasa ulungu hanga uhone kutekenga, yakukalakala kanawa muze ulungu unende. Chizechene nawa, ha mashimbu a yipikalo, Yehova matukolesa ku manyonga ni ku spiritu hanga tununge ni kumulingila ni ushishiko.

9. Kuchi yikwata yetu ya kuhengwola nayo muyihasa kutukwasa kupwa ni manyonga alita? (Tala nawa chizulie.)

⁹ Yize twatamba kulinga. Muze mulivwa ngwe  unapalika mu umwe kangonga ku mwono we, linga yeswayo muhasa hanga ufunge ufulielo we ha kununga ni kulemba, kukunguluka ni kwambujola. Tunanyingika ngwetu, nyi wapalika mu yuma ya mutapu au hanji kuuchi kuhasa kulinga yuma ngwe chize wapwile ni kuyilinga. Alioze iwuluka ngwe, Yehova keshi kushimbwila hanga ulinge yuma yize kuuchi kuhasa. (Tesa ni Luka 21:1-4.) Kanda wecha kusa mashimbu a kulinga longeso lie lia wika ni kupukuna. Mumu liaka? Mumu kupalikila mu ululikiso wenyi, Yehova kakutwaha mikanda ni yinema yize yakutukwasa hanga tufunge manyonga jetu muze tunapalika ha mashimbu akalu. Mba uwane sango jacho, zachisa yikwata ya kuhengwola nayo yize yili mu limi lienu ngwe, JW Library^®, Índice ya mikanda yetu ni Chikwata cha Kuhengwola Nacho. Monika yoze hitwatongola, kanalumbununa ngwenyi, muze apwile ni kwivwa ngwe manyonga api kanambe kumusongwela te kakuzachisa yikwata ya kuhengwola nayo. Chakutalilaho, te kakuhengwola liji “ufwatulo,” “kuhona kushishika” hanji “kushishika.” Hachino, manunga ni kutanga ndo haze malivwila kanawa. Mwene yamba ngwenyi: “Muze te nakuputuka kuhengwola te nakusakalala chinji, alioze nyi nanunga ni kutanga te nakulivwa ngwami, Yehova kanangukangayika. Chino chapwile ni kungukwasa kumona ngwami, Yehova kananyingika yize ngunapalika ni kumona ukwaso wenyi.” Kumona ukwaso uno wa Yehova, muchikukwasa kufunga manyonga je muze unapalika mu umwe kangonga ku mwono we.—Samu 119:143, 144.

YEHOVA MAKUKWASA

10. Kuchi twakulivwa ha mashimbu amwe muze tunapalika mu yuma yipi?

¹⁰ Kapinda. Nyi wapalika mu yuma yipi ku mwono we, ha mashimbu amwe, muhasa kulivwa ngwe kuunahongo ku musunya ni ku manyonga. Muhasa kulivwa ngwe umwe mukwa-kuzomboka yoze walemana. Ku mashimbu a kunyima, yena te muhasa kuzomboka chinji, alioze haliapwila unende wika ni kuchingwinya. Hamwe muchihasa kupwa chikalu chipwe kulinga yuma yize yapwile yashi, chikwo nawa, muhasa kuhona tachi jakulinga yuma yize te wakuzanga. Chizechene ngwe Eliya, muhasa kulivwa ngwe kuuchi kuhasa kuhinduka, chuma mulinga wika chili kupomba. (1 Mia. 19:5-7) Mba yika Yehova analakenya kutulingila muze mutulivwa chocho?

11. Mutapu ukwo uka uze Yehova akutukwashilamo? (Samu 94:18)

¹¹ Yize Yehova matulingila. Iye kanalakenya ngwenyi matukwasa. (Tanga Samu 94:18.) Ngwe chizechene mukwa-kuzomboka yoze walemana akufupa ukwaso wa umwe mba aputuke  kwenda cheka, ni yetu tunafupiwa ukwaso mba tununge ni kulingila Yehova ni mbunge yeswe. Ha mashimbu jacho, Yehova kanatulweze ngwenyi: “Yami Yehova Zambi ye, ngunakukwata ku kwoko lie lia chindume; yami mwene ngunambe kuli yena ngwami, Kanda wivwa woma mungukukwasa.” (Iza. 41:13) Mwanangana Ndawichi kamwene ukwaso uno wa Yehova! Muze te anamupinjisa kuli akwa-kole jenyi, iye yalweza Yehova ngwenyi: “Kwoko lie lia chindume hiliangujikijisa.” (Samu 18:35) Mba kuchi Yehova akutukwasa?

12. Aya Yehova mahasa kuzachisa hanga atukwase muze tunanenganyana?

¹² Kanji-kanji, Yehova kakuzachisa atu akwo hanga atwehe ukwaso uze tunafupiwa. Chakutalilaho, muze Ndawichi ahongele chinji, sepa lienyi Jonata, mwe wayile ni kumutakamisa ku manyonga ni ku musunya. (1 Samue. 23:16, 17) Chizechene nawa, Yehova kazachishile Elisha hanga akwase Eliya. (1 Mia. 19:16, 21; 2 Mia. 2:2) Musono, Yehova mahasa kuzachisa asoko, masepa hanji makulwana a mu chikungulwila hanga atukwase. Alioze, muze tunapalika mu yuma yikalu, nyonga lietu liakupwa lia kulihandununa ni akwetu ni kupwa kwa ukawetu. Kulinga chino, hi chipi ko. Mba kuchi mutuhasa kuzuka ukwaso wa Yehova?

13. Yika twatamba kulinga mba tuzuke ukwaso wa Yehova? (Tala nawa chizulie.)

¹³ Yize twatamba kulinga. Sako tachi hanga wehuke manyonga akuzanga kupwa ukawe. Muze tuli ukawetu, nyonga lietu mulipwa lia kulihulikila wika ha lamba lize tunapalika ni ha chize tunevu. Kunyonga yuma ya mutapu au, muchihasa kututwala tukwate yiyulo yipi. (Yishi. 18:1) Tunanyingika ngwetu, yetu eswe nyi tunapalika mu yuma yikalu, twakufupiwa amwe mashimbu a kupwa ukawetu. Alioze kuzanga kupwa ukawetu mashimbu eswe, muchituhandununa ni atu waze Yehova mazachisa hanga atukwase ha yize tunafupiwa. Kashika, chipwe ngwe muchipwa chikalu kuchilinga ha mashimbu amwe, sako tachi hanga utayize ukwaso wa asoko je, masepa ni wa makulwana a mu chikungulwila. Mona atu wano ngwe jila yize Yehova anazachisa hanga akukwase.—Yishi. 17:17; Iza. 32:1, 2.

YEHOVA MAKUTAKAMISA

14. Yuma yika muyihasa kutuvwisa woma?

¹⁴ Kapinda. Ha mashimbu amwe, mutuhasa kupalika mu yuma yize muyituvwisa woma. Mbimbiliya yakutongola tuvumbi amwe a Yehova ashishika, waze anenganyanyine ni kwivwa woma wa akwo-kole jo ni wa yipikalo yikwo nawa. (Samu 18:4; 55:1, 5) Chizechene  nawa, muchihasa kupwa ngwe tunapalika mu yihungumiona ku shikola, ku mulimo, mu usoko wetu, hanji lume ku nguvulu. Hamwe mutuhasa kwivwa woma wa kufwa mumu lia musongo uze tuli nawo. Ha mashimbu a mutapu au, mutuhasa kulivwa ngwe kanuke yoze keshi mu ufunge upema. Mba kuchi Yehova matukwasa mu yuma ya mutapu au?

15. Shindakenyo yika tunawane ha Samu 94:19?

¹⁵ Yize Yehova matulingila. Iye matulembejeka ni kutuhwimisa mbunge. (Tanga Samu 94:19.) Samu yino hanji muyikwiwulula umwe kanuke yoze unatungumuka, kahashile kupomba mumu lia mihenyo ya vula. Mutuhasa kunyonga chisemi wa kanuke yono manjila mu chipatulo chenyi ni kumusa mu kondo ndo haze mapombela. Chipwe ngwe kanuke wacho machimona mihenyo, nihindu chisemi chenyi mamulembejeka ni kumukwasa hanga alivwe kanawa. Muze mutupalika mu yuma yize muyituvwisa woma, tunafupiwa ukwaso wa Yehova, chekwamba, kutusa mu kondo ndo haze manyonga api mahwila. Kuchi Yehova mahasa kutulembejeka?

16. Yika twatamba kulinga mba Yehova atulembejeke? (Tala nawa chizulie.)

¹⁶ Yize twatamba kulinga. Kanda ukeza kecha kupalikisa mashimbu ni Yehova ha kuhanjika nenyi ni kutanga Liji lienyi. (Samu 77:1, 12-14) Nyi muopwa ni chako cha kulinga yuma yino hita shimbu mupalika mu yipikalo, nyonga lie litangu mulipwa lia kufupa ukwaso wa Yehova. Lweza Yehova yipikalo ni woma uze unevu. Hanyima, panjika yize Yehova makulweza kupalikila mu Mbimbiliya. Nyi wachilinga, muhasa kumona chize Yehova makulembejeka. (Samu 119:28) Nyi unevu woma, muhasa kuwana utakamiso ha kutanga Yisoneko yimwe ya mu Mbimbiliya. Chakutalilaho, muhasa kutanga mukanda wa Yombi, Masamu, Yishima ni maliji a Yesu waze ali ha Mateu kapitulu 6. Kulinga chino, muchikutakamisa chinji. Nyi mulemba kuli Yehova ni kutanga Mbimbiliya, mumona utakamiso wenyi.

17. Shindakenyo yika tuli nayo?

¹⁷ Mutuhasa kujikijila muli Yehova ngwetu, matukwasa mashimbu eswe waze mutupalika mu yuma yikalu ku mwono wetu. Yehova kechi keza katuhichika ukawetu. (Samu 23:4; 94:14) Iye kanalakenya kutufunga, kutukolesa, kutukwasa ni kutulembejeka. Mukanda wa Izaia 26:3, unatwehe shindakenyo yikwo ha ukwaso wa Yehova. Unambe ngwo: “Yoze majikijisa manyonga jenyi hali yenu [Yehova], munumufunga mu uhwimino wika, mumu kananufuliela.” Kashika, fuliela muli Yehova, nawa yuka ha yuma yeswe yize iye akulinga hanga akukwase. Nyi wachilinga, mununga ni kumana nguu chipwe ha mashimbu akalu.