Shimbi jacho jakusolola ngwo chili chipi Akwa-Kristu kuzachisa mata eka ni eka hanga alipuulule kuli atu ni akwo. Nyonga ha yikuma yino:

Mwono wa atu uli usandu ku meso ja Yehova. Ndawichi, mukwa-kwimba masamu kasonekene hakutwala kuli Yehova ngwenyi: “Mumu kuli yena kwatwama lie fuji lia mwono.” (Samu 36:9) Hachino, nyi Mukwa-Kristu masakula kulipuulula mwene hanji upite wenyi, katamba kusa tachi hanga achine kupwa ni mulonga wakumwanga manyinga che kwamba ngwo, kupwa ni mulonga wa kushiha mutu.—Shimbi Yamuchiali 22:8; Samu 51:14.

Chamwenemwene chuma cheswacho mutu mazachisa hanga alipuulule muchihasa kumunehena mulonga wa manyinga. Alioze, chakupwa chashi kushiha mutu hakuzachisa uta, chipwe ngwe muchilingiwa ku ponde wika hanji chakukatuka ku mbunge. * (Tala maliji mushi lia lifwo.) Nawa, hanji chilianyi mahasa kupwa ni mwongo, alioze nyi mamona uta, yuma muyihasa kupiha chinji mumu mahasa kushiha mutu.

Muze Yesu ambile kuli tumbaji twenyi hanga ambate tutana ha ufuku uze te kanda achifwa, hi ko ngwo hanga te alifunge. (Luka 22:36, 38) Alioze, Yesu te kambile kwaha longeso lino: Tumbaji twenyi te katambile kupwa akwa-mbwanja, chipwe muze te malitakana ni mbunga yili ni mata. (Luka 22:52) Muze Petulu azachishile katana kenyi hali ngamba ya sasendote wa lutwe, Yesu yamba kuli Petulu ngwenyi: “Tomeka katana ke mu chindalo.” Mba Yesu yasa shimbi yize akwa-Kristu akukaula ndo musono, yakwamba ngwo: “Waze eswe manda katana kumakatoka ku katana.”—Mateu 26:51, 52.

Ngwe chize chinasonewa hali Mika 4:3, tuvumbi twa Zambi ‘kakwalumuna tutana two mu yikungo ya sharua, ni makunga jo kakwalumuna mu poko ja kululika najo mitondo.’ Akwa-Kristu amwenemwene kaanyingika hamukunda wa sambukila yo. Kakukaula shimbi jize Zambi aehele kupalikila muli postolo Paulu ja kuchina ‘kufwetesa niumwe yipi ha yipi’ ni kupwa “ni sambukila kuli atu eswe.” (A-Roma 12:17, 18) Chipwe ngwe Paulu kapalikile mu yihungumiona yikalu chinji, ngwe “utoji wa mihuza,” nihindu iye kakehukile shimbi ja Mbimbiliya hanga alifunge mwene. (2 A-Korindu 11:26) Alioze, iye yafuliela muli Zambi nawa kanyingikine ngwenyi, yiyulo ya mana ya mu Mbimbiliya ya kukumba “yitwa ya jita.”—Chilumbununyi 9:18.

Kuli akwa-Kristu mwono ukwete ulemu unji kuhiana yuma ya ku musunya. Tunanyingika ngwetu mwono wa mutu kuushi kukatuka “ku kulumbama cha upite wenyi.” (Luka 12:15) Kashika nyi twahanjika ni umbovu weswe kuli mwiji yoze uli ni uta nihindu kasolo kwivwa, tukaulenu usongwelo wa Yesu wakwamba ngwo: ‘Kanda nukalimika ni chingulungulu.’ Chino muchihasa kulumbunuka kumwaha cheswacho chuma mazanga. (Mateu 5:39, 40; Luka 6:29) * (Tala maliji mushi lia lifwo.) Chochene twatamba kwehuka kulisa  yetwene mu moko ja yingulungulu. Ayo hanji kechi kuhasa kupwa ni uhashi wa kutukwata nyi twakaula usongwelo wa Mbimbiliya ni kwehuka “kulizata cha mwono.” (1 Yoano 2:16) Nawa mutuhasa kulifunga nyi matunyingika kuli enyembo jetu ngwo tuli Yela ja Yehova waze akwete sambukila.—Yishima 18:10.

Akwa-Kristu kakusa vumbi kunyonga cha hita mutu. (A-Roma 14:21) Mandumbu amwe mahasa kukomoka hanji kuhukana nyi mevwa ngwo umwe ndumbu kali ni uta wakulipuulula nawo kuli atu akwo. Mutuhasa kupwa ni mukanda wa kututayiza kupwa ni uta, alioze hamukunda wakuzanga mandumbu jetu, kutuchi kuhasa kulinga chuma chize tunanyingika ngwetu muchihukanyisa mandumbu jetu.—1 A-Korindu 10:32, 33; 13:4, 5.

Akwa-Kristu katamba kupwa chilweza chipema kuli akwo. (2 A-Korindu 4:2; 1 Petulu 5:2, 3) Nyi mukwa-Kristu kali ni uta wa kulipuulula kuli atu, makulwana a chikungulwila katamba kumwaha fumbo kukatuka mu Mbimbiliya. Mba nyi manunga kupwa ni uta, iye keshi nawa chilweza chipema. Hachino, katambile kupwa ni chiteli nichimwe mu chikungulwila. Chino nawa muchihasa kulingiwa kuli mukwa-Kristu yoze wakalakala ku mulimo kuze kunafupiwa uta. Muchipwa chipema chinji nyi meseka kufupa mulimo weka. *—Tala maliji mushi lia lifwo.

Mukwa-Kristu katamba kukwata yiyulo yenyi mwene ha chize atamba kulifunga ni asoko jenyi hamwe ni upite wenyi, ni mulimo uze atamba kukalakala. Alioze muze iye malinga chino, katamba kukaula shimbi ja Mbimbiliya. Zambi yetu wa mana katwaha shimbi jino mumu kakutuzanga. Kashika Akwa-Kristu ali ni usepa upema ni Yehova mumu keshi kuzachisa uta hanga alifunge ku moko ja atu ni akwo. Ayo kananyingika ngwo nyi majikijila hali Zambi ni kukaula shimbi ja mu Mbimbiliya ku mwono wo, mapwa akufungiwa ku miaka yeswe.—Samu 97:10; Yishima 1:33; 2:6, 7.