1, 2. Mumu liaka tunafupiwa kunyingika chize mutukwasa waze ananenganyana? (Tala chizulie ha uputukilo.)

SUSI, yamba ngwenyi: “Ha umwe mwaka muze mwanetu afwile, twevwile yikola yinji ku mbunge.” Muze mukwo-pwo afwile susumuku, umwe ndumbu yamba ngwenyi kevwile “yikola yinji ku mwono wenyi.” Chaluyinda, atu anji kakwivwa yikola yamutapu au. Mu chikungulwila cha akwa-Kristu musono, mandumbu jetu anji keshi kushimbwila hanga atu waze azanga afwe shimbu Armagedone kanda yiza. Hanji mutu yoze wazanga mahasa kufwa, chipwe hanji unanyingika umwe yoze unanenganyana. Nyi yenayo unamono, muhasa kulihula ngwe: ‘Kuchi munguhasa kutakamisa mutu yoze unanenganyana?’

² Atu amwe kakwamba ngwo mashimbu mahasa kuwuka yilonda yeswe yize mutu ali nayo. Shina chino chakulingiwa lume mashimbu yeswe? Umwe tuliwa yamba ngwenyi: “Namona ngwami chalita kwamba ngwo, chuma chakukwasa kuwuka mutu shina chize akuzachisa mashimbu jenyi.” Mba  yilonda yize mutu ali nayo yiye, kwakupalika shimbu ni kuyikosa hanji kuyifunga kanawa. Chizechene nawa, kwakupalika shimbu ni ukwaso upema mba yikola ya ku mbunge yiye. Mba yika muyihasa kukwasa waze ananenganyana hanga atepulule yinyengo yo?

3, 4. Mumu liaka mutuhasa kupwa ni shindakenyo ngwetu Yehova kananyingika yinyengo yetu?

³ Tata yetu ya keke, Yehova, mwe wakutwaha utakamiso uze twakufupa. (Tanga 2 A-Korindu 1:3, 4.) Iye kali chilweza chinene cha keke, nawa kanalakenya atu jenyi ngwenyi: ‘Yami mwe nakunutakamisa.’—Izaia 51:12; Samu 119:50, 52, 76.

⁴ Tata yetu wa zango, neye kafwishile tuvumbi twenyi waze te azanga chinji, ngwe Apalahama, Izake, Yakomba, Mose ni Mwanangana Ndawichi. (Kwalula 12:6-8; Mateu 22:31, 32; Yilinga 13:22) Mbimbiliya yinatulweze ngwo Yehova kakushimbwila ni zango lieswe tangwa lize makahindwisa malunga jacho ashishika. (Yombi 14:14, 15) Ha shimbu liacho, ayo makevwa chiseke ni kuwahilila ni mwono ungunu. Yehova kevwile nawa yikola ku mbunge ha kufwa cha Mwanenyi mutangu. Mbimbiliya yinambe ngwo, Yesu kapwile yoze Zambi te ‘akuwahilila nenyi.’ (Yishima 8:22, 30) Yehova kevwile yikola yinji ku mbunge muze amwene Mwanenyi kanafu chitaka.—Yoano 5:20; 10:17.

5, 6. Kuchi Yehova akututakamisa?

⁵ Mutuhasa kupwa ni shindakenyo ngwetu Yehova makatukwasa. Hachino, twatamba kulemba kuli iye ni mbunge yeswe ni kumusolwela yikola ni yinyengo yize tunevu. Chili utakamiso unene ha kunyingika ngwetu, Yehova kananyingika yize twakwiva nawa kakutwaha utakamiso uze mutufupa! Mba kuchi iye akuchilinga?

⁶ Spiritu yisandu yapwa yimwe ya majila waze Yehova akututakamishilamo. (Yilinga 9:31) Yesu kalakenyene ngwenyi, Tata yetu te mahana tachi jenyi, spiritu yisandu kuli eswe waze mamwita yo. (Luka 11:13) Susi, yoze twatongola ku uputukilo, yamba ngwenyi: “Kwapwile mashimbu anji waze te nakuliumba hashi ni kulemba kuli Yehova hanga angutakamise. Hita shimbu sambukila ya Zambi te yakufunga kanawa mbunge ni manyonga jami.”—Tanga A-Fwilipu 4:6, 7.

7, 8. Mumu liaka mutuhasa kupwa ni shindakenyo ngwetu Yesu makatutakamisa?

⁷ Muze apwile hashi, Yesu kembulwile ni ungunu weswe yitanga yipema ya Tato ha yize te akuhanjika ni ha yize te akulinga. (Yoano 5:19) Yehova katumine Yesu hano hashi hanga atakamise “waze amakuka mbunge” ni “waze eswe alinyenga.” (Izaia 61:1, 2; Luka 4:17-21) Atu kanyingikine ngwo, Yesu te kanyingika kanawa lamba lio nawa te kakuzanga chinji kwaakwasa.—A-Hepreu 2:17

 ⁸ Muze Yesu te uchili mukweze, iye kota kafwishile masepa ni asoko waze te azanga chinji. Chakutalilaho, chakusoloka ngwe tato wa katumba, Yosefwe, kota kafwile muze Yesu te uchili mukweze. * (Tala maliji mushi lia lifwo.) Achinyonga ukalu uze amwene yono mukweze ha kukumba yikola yize evwile ku mbunge hamwe ni chinyengo cha naye ni mandumbu jenyi.

9. Kuchi Yesu asolwele keke muze Lazaru afwile?

⁹ Mu mulimo wenyi wa kwambujola, Yesu kasolwele ngwenyi kanyingika kanawa atu nawa te kakweevwila keke. Chakutalilaho, muze sepa lienyi Lazaru afwile, Yesu kevwile yikola yize Maria ni Marta evwile ku mbunge. Kevwile keke jinji chocho neye yaputuka kulila, chipwe ngwe te kananyingika ngwenyi mahindwisa Lazaru.—Yoano 11:33-36.

10. Kuchi mutuhasa kupwa ni shindakenyo ngwetu Yesu kananyingika chize twakwivwa ku mbunge musono?

¹⁰ Kuchi maliji autakamiso waze Yesu ambile mahasa kutukwasa musono? Mbimbiliya yakwamba pundu ngwo, Yesu kalumukine. Hakwamba ngwo: “Yesu Kristu chimuwika apwa, ni zau, ni musono, ni ndo ku miaka ya mutolo.” (A-Hepreu 13:8) Iye kamuvuluka ngwo, “Kaputu ka ulamwino” mumu hanatwehe uhashi wakupwa ni mwono wa mutolo. Yesu nawa kananyingika lamba lize hita mutu akumona nawa ‘kakuhasa kukwasa waze anaeseka.’ (Yilinga 3:15; A-Hepreu 2:10, 18) Hachino, mutuhasa kupwa ni shindakenyo ngwetu, nihindu Yesu kakwivwa yikola ku mbunge muze akumona lamba lia atu. Kananyingika yipikalo yo nawa mahasa kwaatakamisa “ha mwaka wa chikala.”—Tanga A-Hepreu 4:15, 16.

11. Yisoneko yika muyihasa kukutakamisa?

¹¹ Sango ja yinyengo ya Yesu ha kufwa cha Lazaru jili wika jimwe ja yisoneko yinji ya utakamiso yize twakuwana mu Mbimbiliya. Yino kuyishi kutukomwesa, mumu “yuma yeswayo yasonewene kunyima, yasonewene mukutufumba yetu, hanga ku uhumikizo ni kulembejeka cha Yisoneko Yisandu tukasele mbunge jetu ha chilakenyo cha Zambi.” (A-Roma 15:4) Nyi unanenganyana, ni yena muhasa kuwana utakamiso ha yisoneko yino yinasulaho:

• “Yehova katwama hehi ni waze amakuka mbunge, kakulamwina waze ali ni spiritu ya yakupihilila.” —Samu 34:18, 19.

• ‘Muze nakulipikala, yena [Yehova] wakungulembejeka ni kunguwahisa.’—Samu 94:19.

• “Mwene wetu Yesu Kristu iye mwene, ni Zambi Tata, yoze hanatuzange, yoze hanatwehe kulembejeka cha mutolo, ni kutalatala chipema ku vumbi, akahwimise mbunge jenu, akanutakamise.”—2 A-Tesalonika 2:16, 17. *—Tala maliji mushi lia lifwo.

12. Kuchi mutuhasa kutakamisa akwetu?

¹² Atu waze ananenganyana mahasa kuwana utakamiso mu chikungulwila cha akwa-Kristu. (Tanga 1 A-Tesalonika 5:11.) Kuchi muhasa kukolesa ni kutakamisa waze ali ni “spiritu yize yamakuka”? (Yishima 17:22) Iwuluka ngwe kuli “tangwa lia kuhola, ni tangwa lia kuhanjika.” (Chilumbununyi 3:7) Umwe tuliwa yoze avuluka ngwo Dalene, yamba ngwenyi, atu waze ananenganyana katamba kusolola manyonga ni yize akwivwa ku mbunge yo. Kashika, chuma chilemu chize muhasa kulinga chili kupanjika wika chakuhona kwaapatula maliji. Junia, yoze ndumbwenyi walishihile mwene yamba ngwenyi: “Chipwe ngwe kuuchi kuhasa kunyingika pundu yikola yize anevu ku mbunge, alioze muchipema nyi mufupa kunyingika chize anevu.”

13. Yika twatamba kwiwuluka hakutwala ku yinyengo?

¹³ Twatamba kwiwuluka ngwetu, hi ko ngwo tulieswe twakwivwa ni kusolola yinyengo mu jila yimuwika. Ha mashimbu amwe chakupwa chikalu kulumbununa kuli akwetu yikola yize tunevu ku mbunge. Liji lia Zambi linambe ngwo: “Mbunge kuyinanyingika kusasaminya chayo yene; chilambala keshi kuhasa kunyingika kuwaha chamo.” (Yishima 14:10) Chipwe ngwe mutu masolola yize anevu ku mbunge, nihindu hi chashi ko kunyingika yize anafupu kwamba.

14. Yika mutuhasa kwamba hanga tutakamise waze ananenganyana?

¹⁴ Muchihasa kupwa chikalu kunyingika yize anambe umwe yoze unanenganyana. Alioze Mbimbiliya yakwamba ngwo, “limi lia mukwa mana kuliakuwuka.” (Yishima 12:18) Atu anji kakuwana maliji autakamiso ha kutanga mukanda, Muze Mafwa Mutu Yoze Wazanga. * (Tala maliji mushi lia lifwo.) Kanji-kanji chuma chilemu chize muhasa kulinga chili ‘kulila hamwe ni waze analili.’ (A-Roma 12:15) Gaby, yoze mukwo-lunga wafwile, yamba ngwenyi, kuli iye ha mashimbu amwe jila yakusolwelamo yize anevu ku mbunge yili wika kulila. Yamba nawa ngwenyi: “Kashika nakuwana utakamiso muze masepa jami malila hamwe ni yami. Ha mashimbu jacho, kuchishi kulivwa ngwe nguli ukawami mu yinyengo yami.”

15. Kuchi mutuhasa kutakamisa akwetu nyi mutumona ngwetu chili chikalu kuchilinga? (Tala nawa mushete, “Maliji Apema Autakamiso.”)

¹⁵ Nyi mumona ngwe chikalu kwamba amwe maliji autakamiso kuli mutu yoze unanenganyana, muhasa kumusonekena mukanda, hanji kumutumina mesage. Muhasa kusaho chisoneko cha utakamiso, kutongola ndako yipema yize apwile nayo mutu yoze wafwa, hanji kwiwuluka yize nwapwile ni kulinga hamuwika. Junia yamba  ngwenyi: “Kutambula amwe maliji autakamiso hanji kungusanyika hanga ngupalikise amwe mashimbu ni mandumbu, chakungukwasa chinji. Maliji jacho kakunguvwisa ngwo mandumbu kanguzanga nawa kakungunyonga.”

16. Jila yika yipema yize mututakamishilamo akwetu?

¹⁶ Kulemba chetu muchihasa kukwasa mandumbu waze ananenganyana. Mutuhasa kwaavuluka mu yilamba yetu chipwe kulemba hamwe no. Chipwe chocho, muchihasa kupwa chikalu kuchilinga mumu mwivwa ngwe mulila. Alioze kulemba che cha ku mbunge muchihasa kupwa ni utakamiso ukolo. Dalene yamba ngwenyi: “Ha mashimbu amwe muze mandumbu amapwo akwiza ni kungutakamisa, nakweeta nyi muchilita hanga alembe hamuwika ni yami. Ayo kaputuka kulemba, ku uputukilo kakukakajana ha kuhanjika, alioze muze manunga ni maliji, kakupwa ni tachi nawa kakulemba ni mbunge yeswe. Ufulielo wo ukolo, zango lio ni chize akulihulumba hali yami chakukolesa ufulielo wami.”

17-19. Mumu liaka twatamba kununga ni kutakamisa akwetu?

¹⁷ Hi chashi ko kunyingika pundu mashimbu waze hita mutu mapwa mu yinyengo. Muze mutu yoze twazanga mafwa, chitangu masepa ni asoko jetu anji kakwiza hanga atutakamise. Hakupalika cha mashimbu ayo kakuhiluka ku mazuwo jo, alioze waze ananenganyana, nihindu kakufupa utakamiso. Kashika twatamba kupwaho hanga twaakwase. Mbimbiliya yinambe ngwo: “Sepa lia mutu kakuzanga matangwa eswe; alioze ha tangwa lia lamba  he hakusemukina uyaya.” (Yishima 17:17) Tunafupiwa kutakamisa waze ananenganyana ndo haze malivwa kanawa.—Tanga 1 A-Tesalonika 3:7.

¹⁸ Twiwulukenu ngwetu mutu mahasa kunenganyana susumuku ha shimbu lieswalio, mumu lia yikola yize anevu ku mbunge. Chino muchihasa kulingiwa mumu lia kuheta ha mashimbu akwiwuluka yize ayo hanalingi, kwivwa yimwe miaso, foto, milimo hanji kwivwa vumba lia chimwe chuma, njimba, chipwe muze maheta ha umwe kangonde wa mwaka. Nyi tuliwa wa pwo hanji wa lunga malinga chimwe ukawenyi ha shimbu litangu, ngwe kuya ku kukunguluka cha mambonge hanji Chiwanyino cha Kwiwuluka Kufwa cha Yesu, iye mahasa kunenganyana chinji. Umwe ndumbu yamba ngwenyi: “Nanyongele ngwami tangwa litangu lia kwiwuluka umbachiso wetu mulikakala chinji, chenacho che yuma yapwile lume.” Alioze amwe mandumbu yalulieka chimwe chiwanyino hamwe ni masepa jami hanga nguhone kulivwa ukawami.”

¹⁹ Iwuluka ngwe atu waze ananenganyana kanafupiwa utakamiso hi wika ko muze mutwaasanyika ha yiwanyino. Junia yamba ngwenyi: “Kanji-kanji ukwaso ni usepa uze twakuzuka muze kutushi ha yiwanyino muyihasa kutukwasa chinji. Mashimbu jacho kakuneha utakamiso unji.” Chochene, kutuchi kuhasa kuhwisa yinhengo yo yeswe, alioze mutuhasa kutakamisa waze ananenganyana ha kwaalingila yimwe yuma. (1 Yoano 3:18) Gaby yamba ngwenyi: “Nakusakwila chinji Yehova mumu lia makulwana amu chikungulwila azango waze angukwashile kukumba yipikalo. Ayo kangukwashile kwivwa zango lia Yehova ku mwono wami.”

20. Mumu liaka yilakenyo ya Yehova yikwete utakamiso unene?

²⁰ Chili ututakamiso ha kunyingika ngwetu, Yehova, Zambi wa kutakamisa cheswe, makahwisa kunenganyana cheswe muze makahindwisa atu waze hanafu. (Yoano 5:28, 29) Zambi kanalakenya ngwenyi: ‘Makakumba kufwa ndo ku miaka ya mutolo, mba Mwene Yehova makakusumuna masoji ku meso ja atu eswe.’ (Izaia 25:8) Hachino, shimbu ‘tulile hamwe ni waze analili,’ atu eswe hano hashi ‘makawahilila hamwe ni waze anawahilila.’—A-Roma 12:15.