Postolo Paulu kanyingikine ngwenyi mahuza a Satana kapwa ponde yinene chinji. Alioze Akwa-Kristu akwo te keshi kunyingika ponde yacho. Chakutalilaho, amwe ku Korindu te kakunyonga ngwo kajama chinji mu ufulielo, nawa ngwo Satana te kechi kuhasa kwaapiangula. (1 A-Korindu 10:12) Kashika Paulu atowezele ngwenyi:

‘Ngunevu woma, kuchina ku chuma chimwe, chizechene ngwe kapela wongele Eva ni kalimbavuli kenyi, chocho mapihisa manyonga jenu ku kutuwika cha mbunge ni kulinga cha kulitumbikila kuli Kristu.’—2 A-Korindu 11:3.

Maliji a Paulu kanatulongesa ngwo kutwatambile kulijikijila yetwene. Nyi mutu mafupa kukumba jita ya mahuza a Satana, katamba kunyingika ponde yacho ni kulifunga.

Ha chikuma chino, mahuza kali sango ja ngwaza waze atu akuzachisa hanga onge akwo, hanji anyingike manyonga ni mutapu uze akulingilamo yuma. Kulita ni mukanda uze wakuhanjika hakutwala ku chikuma cha mahuza ni kushinjila atu, ngwo mahuza kali “kuhona vumbi, ponde nawa ulembekese.” Wakwamba nawa ngwo atu kakuzachisa maliji a “mahuza, kalumbanganyiso, kwonga ni kuhepwisa manyonga ja akwo.”—Propaganda e persuasão.

Sango ja mahuza jili ponde yinene, mumu hakehe-hakehe mujihasa kupiangula manyonga jetu chakuhona kuchinyingika. Mutuhasa kujitesa ni fuji yize yili ni utende yize kutuchi kuhasa kumona chipwe kwivwa vumba liawo. Vance Packard, yoze  walilongesa kunyingika manyonga ja atu yamba ngwenyi, mahuza mahasa kwalumuna yitanga yetu “chakuhona yetu kuchinyingika.” Mukwa-mana mukwo yahanjika ngwenyi, mahuza kalingishile atu kupwa ni ndako jipi ja ulianyi ni kulishiha hamukunda wa kulisa cha mavungu, ni kuliasa jita ni kulipinjisa ni akwo mumu lia kulisa cha ulembelo ni minyachi.—Facilmente conduzido—uma história da Propaganda.

Nyi atu mahasa kutwonga ha kumwanga sango ja mahuza, mba Satana aye? Iye kananyingika kanawa kupwa cha mutu chize haze amutangile. Nawa kanayulu “hashi heswe,” kashika mahasa kuzachisa chifuchi cheswacho hanga amwange sango jenyi ja mahuza. (1 Yoano 5:19; Yoano 8:44) Satana “kanapupuchisa manyonga ja atu” ni mahuza, kashika ali “mukwa kupiangula yifuchi yeswe ya hashi.” (2 A-Korindu 4:4; Usolwelo 12:9) Kuchi muhasa kwehuka mahuza jacho?

Yesu katulongesele mutapu washi wakulimikinamo ni sango ja mahuza, ngwenyi: “Kumunukanyingika umwenemwene, mba umwenemwene kumuukanutusula.” (Yoano 8:31, 32) Swalale muze ali mu jita, katamba kunyingika kuze atamba kuwana sango jamwenemwene, mumu hanji mukwa-kole wenyi mahasa kumwanga mahuza hanga amwonge. Mba kulihi muhasa kuwana sango jamwenemwene? Yehova kanatwehe umwenemwene wacho ha mukanda wenyi Mbimbiliya. Mu mukanda wacho muli yeswe yize muyikukwasa hanga ulimike ni mahuza a Satana.—2 Timoteu 3:16, 17.

Kwamba pundu lume, ni Satana kananyingika chino. Mba kakuzachisa yuma ya hano hashi haze iye anayulu hanga atulumbule ni kutuhongesa tuhone kutanga Mbimbiliya. Kashika, kanda wecha akwonge ku ‘unjiliji wa Ndiapu.’ (A-Efwesu 6:11, tala maliji a mushi lia lifwo) Kutwatambile kupwa wika ni chinyingi chahelu-helu cha umwenemwene ko. Alioze, twatamba kuhondangana chinji twokese chinyingi chetu cha umwenemwene. (A-Efwesu 3:18) Ngwe chize ambile Noam Chomsky “kukushi mutu yoze makumwangina umwenemwene mu wongo we. Umwenemwene chili chuma chize watamba kulifupila yena mwene.” Kashika “fupa yena mwene” “ni mbunge yeswe, ni kuhengwola mu Yisoneko ya Zambi tangwa ha tangwa.”—Yilinga 17:11.

Satana kazangile hanga unyonge kanawa ni kunyingika umwenemwene hakutwala ku sango jize wakwivwa. Mumu liaka? Mumu kuli iye kumwanga sango ja mahuza “che chashi kuzachisa” kuli  atu waze keshi “kuzanga kunyonga chinji.” (Meios de Comunicação e Sociedade no Século Vinte) Kanda utayiza chamutayijila sango jeswe jize muwivwa chakuhona kunyonga chitangu ha sango jacho. (Yishima 14:15) Zambi hanakwehe “kunyonga cha mana” ni “ndundo.”—Yishima 2:10-15; A-Roma 12:1, 2.

Sango ja mahuza mujihasa kupiangula maswalale evwe woma wa kwasa jita. Sango jacho mujihasa kwalingisa hanga alilambe ene hanji kulihandununa ni maswalale ni akwo. Umwe kapitau wa mu Alemanha kambile ngwenyi, Alemanha kaakumbile mu Jita Yitangu ya Hashi Heswe mumu lia sango ja mahuza. Iye yamba nawa ngwenyi, sango jacho je jaalingishile hanga alaluke. Satana kakuzachisa chinji jila yino hanga ahandunune akwa-Kristu ha matangwa jetu. Chakutalilaho, kakufupa kweseka kuneha mbwanja hakachi ka mandumbu jetu. Hanji kakweseka kwaalingisa hanga ahichike ululikiso wa Yehova ha kunyonga ngwo kakulingamo yuma yipi.

Kanda wecha akwonge! Kaula usongwelo wa Liji lia Zambi ni kununga kupwa hamuwika ni mandumbu je amu ufulielo. Chakutalilaho, Mbimbiliya yakutukolweza kununga “kulikonekena umwe ni mukwo” ni kuhwisa mweswawo kapinda mutupwa nenyi. (A-Kolosu 3:13, 14; Mateu 5:23, 24) Yakututoweza nawa tuhone kuhandunuka ku chikungulwila. (Yishima 18:1) Watamba kulilulieka hanga uhase kwehuka mahuza a Satana. Lihule yena mwene ngwe, tangwa lize ndumbwami angulingile yimwe yuma yipi, ‘shina yuma nalingile yevwishile kawaha Zambi nyi Satana?’—A-Ngalashia 5:16-26; A-Efwesu 2:2, 3. 

Swalale yoze keshi kwononokena kasongo kenyi kechi kuhasa kwasa kanawa jita. Hachino, akwa-kole kakuzachisa sango ja mahuza hanga maswalale ahone kufuliela muli tusongo two. Nyi tusongo malinga umwe kapalia, mukwa-kole kakutokomenya ha kapalia wacho ni kwamba ngwenyi: “Kunwatambile kujikijila muli aye!” nawa ngwo, “Kanda nwecha anunjise mu ponde!” Ni Satana neye che akulinga. Meseka kukupiangula hanga uhone kujikijila muli atu waze Yehova anazachisa hakusongwela tuvumbi twenyi.

Kuchi muhasa kulifunga yena mwene? Sako tachi ununge kupwa mu ululikiso wa Yehova. Nunga kupwa ni mbunge ya kwononoka ni kukwasa malunga waze anasongwela atu ja Zambi, chipwe ngwe kali yihenge. (1 A-Tesalonika 5:12, 13) Yitanganyanyi ni akwa-kwonga mahasa kulukukila  chikungulwila. (Titu 1:10) Chipwe ngwe yize ayo mamba muyisoloka ngwe yamwenemwene, “kanda nulihiza nikawashi mu kunyonga chenu.” (2 A-Tesalonika 2:2) Kaulenu maliji waze Paulu ambile kuli Timoteu, ngwenyi: “Nyongonona mu yuma yize hiunalilongesa,” ni ‘kunyingika yoze wakulongeseleyo.’ (2 Timoteu 3:14, 15) Nyonga ha yuma yeswe yize yakukwaha ushindakenyo ngwe watamba pundu kufuliela kuli ndungo wamwenemwene yoze Yehova anazachisa ha miaka kulakaji hanga atulongese umwenemwene.—Mateu 24:45-47; A-Hepreu 13:7, 17.

Satana nawa meseka kukupiangula mu jila jize jakusoloka hatoma. Ha mashimbu amwe mahasa kukuvwisa woma. ‘Kunyima atu te kakuzachisa sango ja mahuza’ ja kuvwisa woma. (Facilmente conduzido—uma história da Propaganda) Philip M. Taylor, umwe longeshi wa ku Grã-Bretanha, kasonekene ngwenyi, A-Asuria te kakuzachisa sango ja mahuza evwise akwa-kole jo mwongo, hanga ahase kwaakumba. Satana neye kakuzachisa woma wa atu, mwongo wa yihungumiona ni woma wa kufwa hanga tweche kuwayila Yehova.—Izaia 8:12; Jeremia 42:11; A-Hepreu 2:15.

Kanda wecha Satana alinge chino kuli yena! Yesu yamba ngwenyi: “Kanda nuvwila woma waze akushiha mujimba, alioze kulutwe lia chize keshi nichimwe chize mahasa kulinga.” (Luka 12:4) Fuliela pundu ngwe, Yehova mafunga chilakenyo chenyi cha kukufunga, ni kukwaha ‘tachi jahiana’ ni kukukwasa kulimika ni Satana.— 2 A-Korindu 4:7-9; 1 Petulu 3:14.

Ha mashimbu waze munuhasa kuzeya hanji kwivwa woma. Alioze iwulukenu maliji a utakamiso waze Yehova ambile kuli Yoshua ngwenyi: “Kanda wivwa woma hanji mwongo, mumu Yehova Zambi ye hwali hamwe ni yena kweswako muoya.” (Yoshua 1:9) Nyi munuzakalala ku mbunge, washi-washi lembenu kuli Yehova anukwase. Pwenu ni ushindakenyo ngwenu “sambukila ya Zambi, yize yakuhiana kunyonga cheswe muyikafunga mbunge jenu ni kunyonga chenu.” Mba munupwa ni tachi ja kwehuka sango jeswe ja mahuza ja Satana.—A-Fwilipu 4:6, 7, 13.

Shina uneuluka sango ja mahuza jize kanganda wa Asuria Rabeshaka, azachishile hanga evwise woma tuvumbi twa Zambi? Iye kazangile hanga ayo atayize ngwo kukushi niumwe mahasa kwalamwina ku moko ja Asuria, chipwe lume Yehova ka. Yalionga ngwenyi Yehova mwe walwezele Asuria hanga anongese Yerusaleme. Mba kuchi Yehova akumbulwile? Yehova ngwenyi: “Kanda wivwa woma wa maliji waze wevwanga, kuli tuvumbi twa mwanangana wa Asuria angushililikanga no.” (2 Mianangana 18:22-25; 19:6) Mba Yehova yatuma mungelo wenyi umuwika yoze washihile A-Asuria 185,000 ha ufuku umuwika.

Shina hiunamono kama chimwe chinema chize chasolwele mutu yoze apwile ni kwonga chakuhona mwene kuchinyingika nyi? Hanji muwamba ngwe: ‘Kanda uitayiza! Kanakwongo wika!’ Haliapwila nyonga angelo kali ni kukulweza ngwo: “Kanda utayiza mahuza a Satana!”