Shina Wakuhulikila Meso Je Kuli Yehova?
“Kuli yena munguhetula meso jami; yena kuwatwama mu malilu.”—SAMU 123:1.
1, 2. Kuhulikila meso jetu kuli Yehova yika chinalumbunuka?
TULI ha ‘miaka yipi nawa yikalu chinji.’ (2 Timoteu 3:1) Kashika mwono muununga ni kukaliwa ndo haze Yehova manongesa yuma yipi ni kuneha sambukila yingunu hano hashi. Hachino, twatamba kulihula ngwetu, ‘Iya nakushimbwila hanga angukwase? Nawa usongwelo waya nakukaula?’ Mutuhasa kwamba ngwetu wa “Yehova,” nyi chenacho twakumbulula kanawa.
2 Kuhulikila meso jetu kuli Yehova yika chinalumbunuka? Nawa kuchi mutuhasa kupwa ni shindakenyo ngwetu mutununga ni kujikijila kuli Yehova, muze mutupwa mu yipikalo? Ha mashimbu anji kunyima umwe mukwa-kusoneka Mbimbiliya yalumbununa chize twatamba kulihulikila hali Yehova muze mutufupiwa ukwaso. (Tanga Samu 123:1-4.) Yamba ngwenyi, nyi twalihulikila hali Yehova mutupwa ngwe kavumbi yoze unafupu ukwaso wa mwata wenyi. Mu mulali uka? Kavumbi kakujikijila hali mwata wenyi hanga awane kulia ni ufunge. Alioze iye nawa katamba kunyingika hita shimbu yize mwata wenyi akuzanga hanga iye alinge, ni kusa tachi hanga ayilinge. Chizechene nawa, twatamba kulilongesa kanawa Liji lia Zambi hita shimbu hanga tunyingike yize Yehova anazange tulinge, ni kusa tachi hanga tuyilinge. Hachino, mutuhasa kupwa ni shindakenyo ngwetu Yehova matukwasa muze mutufupiwa ukwaso.—A-Efwesu 5:17.
3. Yika muyihasa kutulalwisa kujikijila kuli Yehova?
3 Chipwe ngwe tunanyingika ngwetu twatamba kujikijila kuli Yehova mashimbu eswe, nihindu ha mashimbu amwe mutuhasa kulalwoka. Chino che chalingiwile kuli Marta, sepa lia Yesu. Iye “kalalwokele ni milimo yinji ya kulia.” (Luka 10:40-42, NM) Nyi Marta mutu washishika kalalwokele chipwe ngwe kapwile hamwe ni Yesu, kutala chino kuchichi kuhasa kulingiwa kuli yetu? Yika muyihasa kutulalwisa kujikijila kuli Yehova? Ha mutwe uno mutulilongesaho chize yitanga ya akwetu muyihasa kutulalwisa. Ni chize mutununga ni kujikijila kuli Yehova.
UMWE LUNGA WASHISHIKA YATOKESA CHIWAPE CHENYI
4. Yika muyihasa kutukomwesa ha chize Mose ahonene kunjila mu Chifuchi cha Chilakenyo?
4 Mose te kakukaula usongwelo wa Yehova mashimbu eswe. Mbimbiliya yinambe ngwo, iye “wanyongonwene ndusu ngwe kanamono yoze keshi kumoneka.” (Tanga A-Hepreu 11:24-27.) Yinambe nawa ngwo, ‘kukwasolokele mu Izalele profeta niumwe walifwa ni Mose, yoze te Zambi anyingika meso ni meso.’ (Shimbi Yamuchiali 34:10) Alioze chipwe ngwe Mose kapwile sepa lia Yehova, nihindu kahonene kunjila mu Chifuchi cha Chilakenyo. (Kwalula 20:12) Mba upi uka iye alingile?
5-7. Yika yalingiwile ha amwe mashimbu muze A-Izalele te hatuhuka mu Engitu, nawa yika Mose alingile?
5 Muze te kanda kuchipalika tukweji aali chize haze A-Izalele atuhukile mu Engitu, ni muze te kanda achiheta ku Mulundu Sinai, chimwe chuma chipi yichilingiwa. Atu yaputuka kulinyenyeta hamukunda wa kuhona meya. Ayo yalimika ni Mose ni kumuvwila uli unji, chocho “Mose watetele kuli Yehova ngwenyi, Ngulinge kuchi ni wano atu? Anambe kungwasa mawe.” (Kutuhuka 17:4) Yehova yahana Mose usongwelo wa zwalala. Yamulweza hanga ande lukanda wenyi aye ku Horepe akalambe ku liwe. Mbimbiliya yinambe ngwo: “Chocho alingile Mose kumeso ja makulwana A-Izalele.” Meya yatuhuka, A-Izalele yanwa meya yaakuma, chocho kapalia wacho yamuhwisa.—Kutuhuka 17:5, 6.
6 Mbimbiliya yinambe ngwo, Mose kalukile chihela chacho jina lia Masa, lize linalumbunuka ngwo “Cheseko,” ni Meripa, lize linalumbunuka ngwo “Kulitachika.” Mumu liaka? “Mumu ha kulitachika cha A-Izalele, . . . o yeseka Yehova ha kwamba ngwo, Shina Yehova kwali hakachi ketu nyi shina ka?”—Kutuhuka 17:7.
7 Kuchi Yehova evwile ha yize yalingiwile ku Meripa? Iye kevwile ngwe A-Izalele kalimika ni iye hamwe ni wata wenyi, hi ni Mose wika ko. (Tanga Samu 95:8, 9.) Yuma yize A-Izalele alingile yapwile yipi chinji. Alioze Mose kalingile chuma chalita. Iye kahulikilile meso jenyi kuli Yehova ni kukaula usongwelo wenyi.
8. Yika yalingiwile kuli A-Izalele ku songo lia wenyi wo mu puya?
8 Mba yuma yika yalifwa yize yalingiwileko hakupalika cha miaka 40? A-Izalele te kali ku songo lia wenyi wo mu puya. Ayo te hakundama ku Kandeshe, hakamwihi ni njiza ya Chifuchi cha Chilakenyo. Chihela chino necho kachivulukile ngwo Meripa. * (Tala maliji mushi lia lifwo.) Mumu liaka achivulukile chocho? Mumu A-Izalele kaputukile nawa kulinyenyeta hamukunda wa kuhona meya. (Kwalula 20:1-5) Alioze ha shimbu lino, Mose yalinga uhenge unene.
9. Usongwelo uka Yehova ahanyine Mose, alioze yika Mose alingile? (Tala chizulie ha uputukilo.)
9 Mba, yika Mose alingile ha kulinyenyeta cha atu? Iye yakaula nawa usongwelo wa Yehova. Alioze ha mashimbu wano Yehova yalweza Mose ngwo kanda alamba ku liwe. Iye kalwezele Mose hanga ande lukanda wenyi, akungulule atu hakamwihi ni liwe mba hi mahanjika ku liwe. (Kwalula 20:6-8) Shina yino ye Mose alingile? Ka. Iye te kanevu uli unji, chocho yakalumukina atu ngwenyi: ‘Enu yihulia, panjikenu haliapwila. Kumanyi, tunutuhwishile meya mu liwe lino nyi?’ Mba hi yalamba ku liwe, hi kamuwika wika ko, alioze yisuho yiali.—Kwalula 20:10, 11.
Mose kakakawile usongwelo waha uze amuhele kuli Yehova
10. Kuchi Yehova evwile ha yize Mose alingile?
10 Yehova yevwa uli unji ha yize Mose alingile. (Shimbi Yamuchiali 1:37; 3:26) Mumu liaka Yehova evwile chocho? Chitela muchihasa kupwa ngwo, kota Mose kakakawile usongwelo waha uze amuhele kuli Yehova.
11. Ha kulamba ku liwe, yika Mose alingile yize yatwalile A-Izalele anyonge ngwe Yehova kakalingile chikomokeso?
11 Mukuhasa kupwa nawa chitela chikwo chize Yehova anakevwila uli. Ku Meripa yitangu, mawe jako a mikanji hanji akalu chinji. Hachino, chipwe ngwe mutu malamba ku liwe liacho ni tachi jeswajo, nihindu niumwe kechi kushimbwila hanga kutuhuke meya. Alioze ku Meripa yamuchiali, mawe jako kalisa chinji. Mawe jacho kakwaavuluka ngwo mawe a wunga. Mumu mawe a wunga kapwa alelu, kanji-kanji mu mawe jacho mwakulikunga meya ni kunjila mu mavu. Kashika atu mahasa kutaha meya ku liwe liacho nyi malitota. Hachino, muze Mose alambile ku liwe chakuhona wika kuhanjika, shina chino chatwalile A-Izalele anyonge ngwe meya katuhuka chamutuhukila hi chikomokeso cha Yehova ko? * (Tala maliji mushi lia lifwo.) Yetu kutushi ni shindakenyo.
CHIZE MOSE ASOLWELE UHULIA
12. Chitela chikwo chika chize chalingishile Yehova mba evwile Mose ni Arone uli?
12 Mukuhasa kupwa nawa chitela chikwo chize chalingishile Yehova mba evwile Mose ni Arone uli. Mose kalwezele atu ngwenyi: ‘Kumanyi, etu, tunutuhwishile meya mu liwe lino nyi?’ Muze Mose ambile ngwenyi “Etu,” iye kota te kanaliambe mwene ni Arone. Yize Mose ambile yasolwele ngwo kahonene vumbi, mumu kakafumanyishine Yehova ha chikomokeso chacho. Mukanda wa Samu 106:32, 33 unambe ngwo: “Amwihile nawa ku meya ja Meripa, chocho chipi chejile kuli Mose mumu hali ayo. Mumu o amuvundwile mu spiritu yenyi, mba wahanjikile chize kuchalitele ni mivumbo yenyi.” * (Tala maliji mushi lia lifwo.) (Kwalula 27:14) Mose kakahanyine uhaliso watela kuli Yehova. Chocho Yehova yalweza Mose ni Arone ngwenyi: “Nwakolemene liji liami ku meya a Meripa.” (Kwalula 20:24) Yino yapwile shili yinene chinji!
13. Mumu liaka upatwilo wa Yehova hali Mose te unalite?
13 Yehova kapwile ni kushimbwila Mose ni Arone hanga asolole chilweza chipema mumu te kanasongwela atu Jenyi. (Luka 12:48) Kunyima, Yehova kambile ngwenyi A-Izalele amwe te kechi kunjila mu Chifuchi cha Chilakenyo, mumu ayo kalimikine nenyi. (Kwalula 14:26-30, 34) Kashika muze Mose ehukile usongwelo wa Yehova te chinalite, kumupatwila kufwa ngwe chize Yehova alingile hali A-Izalele akwo. Hachino, ngwe yihulia akwo, Mose neye te kechi kumwecha hanga anjile mu Chifuchi cha Chilakenyo.
CHITELA CHA MULONGA WACHO
14, 15. Yika yalingishile Mose mba ehuke usongwelo wa Yehova?
14 Yika yalingishile Mose mba ehuke usongwelo wa Yehova? Mukanda wa Samu 106:32, 33 unambe ngwo: “Amwihile nawa ku meya ja Meripa, chocho chipi chejile kuli Mose mumu hali ayo. Mumu o amuvundwile mu spiritu yenyi mba wahanjikile chize kuchalitele ni mivumbo yenyi.” Kashika chipwe ngwe A-Izalele kalimikine ni Yehova, alioze Mose mwe wevwile uli. Iye kahonene kulihumikiza, chocho yahanjika chakuhona kunyonga ha luyinda yoze te mezako.
15 Mose kahonene kujikijila muli Yehova, mumu kechele hanga yitanga yipi ya akwo yimupiangule. Ha chisuho chitangu muze atu alinyenyetele hakutwala ku meya, Mose kalingile yuma kulita ni usongwelo wa Yehova. (Kutuhuka 7:6) Alioze kota iye kahongele ni kwivwa uli, mumu A-Izalele te kakulinyenyeta ha miaka yinji. Muchihasa kupwa ngwe Mose kanyongene wika hali mwene, chakuhona kunyonga ha yize te muyihalisa Yehova.
Twatamba kununga ni kujikijila kuli Yehova ni kumwononokena mashimbu eswe
16. Mumu liaka twatamba kunyonga ha yize alingile Mose?
16 Nyi profeta washishika ngwe Mose kechele yimwe hanga yimupiangule ni kuvulumuna, chino muchihasa nawa kulingiwa kuli yetu. Te kwasala hakehe hanga Mose anjile mu Chifuchi cha Chilakenyo, ni yetu nawa kwasala hakehe hanga tunjile mu paraisu. (2 Petulu 3:13) Kwamba pundu, kutwazangile kutokesa chiwape chacho. Alioze, mba tunjile mu paraisu, twatamba kununga ni kujikijila kuli Yehova ni kumwononokena mashimbu eswe. (1 Yoano 2:17) Mba yika mutulilongesa ha uhenge wa Mose?
KANDA WECHA YITANGA YA AKWENU YIKUVULUMWISE
17. Kuchi mutuhasa kulihumikiza muze tuli ni ufwatulo?
17 Kanda twecha kulihumikiza muze tuli ni ufwatulo. Ha mashimbu amwe ni yetu twakupalika mu yuma yacho ha yisuho yinji. Alioze Mbimbiliya yinambe ngwo: ‘Kanda twecha kulinga kanawa; mumu ha mwaka wacho kumutukacha nyi kutwakokolokele.’ (A-Ngalashia 6:9; 2 A-Tesalonika 3:13) Nyi chuma hanji mutu matuvwisa uli hita shimbu, shina twakunyonga shimbu kanda tuchihanjika? Kutala nyi tunevu uli twakuhwima mbunge? (Yishima 10:19; 17:27; Mateu 5:22) Muze akwetu matusosomba, twatamba kusa tachi hanga ‘tulisekule ku utenu’ hanji kukunjika yuma yacho mu moko ja Yehova. (Tanga A-Roma 12:17-21.) Maliji wano yika analumbunuka? Kanalumbunuka ngwo shimbu twivwe uli, twatamba kukunjika yuma mu moko ja Yehova ni kushimbwila ni uhomboloji shimbu lize mwene mayilulieka. Nyi mutufupa kufunyisa upi ni upi chakuhona kujikijila kuli Yehova, acho tunamuhona vumbi.
18. Yika twatamba kwiwuluka ha kukaula usongwelo?
18 Tukaulenu kanawa usongwelo waha. Shina twakukaula ni ushishiko weswe usongwelo waha uze Yehova akutwaha? Kutwatambile kununga ni kulinga yuma ngwe chize te twakuyilinga ku mashimbu akunyima. Alioze, twatamba kukaula kawashi-washi usongwelo waha uze Yehova anatwehe kupalikila mu ululikiso wenyi. (A-Hepreu 13:17) Chikwo nawa, twatamba kukanyama hanga ‘tuhone kwecha manyonga jetu ahiane yuma yize yinasonewa.’ (1 A-Korindu 4:6) Muze mutukaula kanawa usongwelo wa Yehova, acho tunanungu ni kujikijila kuli iye.
Yika twatamba kulilongesa ha yize Mose alingile mumu lia uhenge wa akwo? (Tala paragrafu 19)
19. Yika twatamba kulinga mba uhenge wa akwetu uhone kupihisa usepa wetu ni Yehova?
19 Kanda twecha uhenge wa akwetu hanga upihise usepa wetu ni Yehova. Nyi twanunga ni kujikijila kuli Yehova, kutuchi kapihisa usepa wetu ni iye hanji kwivwa uli ha yize akwetu malinga. Ngwe Mose, chino chili chilemu chinji chipi-chipi nyi tukwete chimwe chiteli mu ululikiso wa Zambi. Chochene, hita umwe wa kuli yetu katamba kusa tachi ni kwononokena Yehova hanga akamulamwine. (A-Fwilipu 2:12) Alioze, nyi tukwete yiteli, Yehova mashimbwila yuma yinji hali yetu. (Luka 12:48) Kashika nyi twakuzanga lume Yehova, nichimwe kuchichi katutalingisa hanji kuhwisa zango lize tukwete hali iye.—Samu 119:165; A-Roma 8:37-39.
20. Yika twatamba kulinga?
20 Tuli ha matangwa api nawa akalu chinji. Kashika chili chilemu kuli yetu kununga ni kujikijila kuli Yehova, yoze “watwama mu malilu,” mba tunyingike yize iye anazange hanga tulinge. Kashika, kutwatambile kwecha yitanga ya akwetu hanga yipihise usepa wetu ni Yehova. Yize yalingiwile kuli Mose yatwaha longeso lilemu chinji. Shimbu tulihulikile ha uhenge wa akwetu, twatamba kusa ‘meso jetu ha kutala kuli Yehova Zambi yetu ndo matwivwila vumbi.’—Samu 123:1, 2.
^ kax. 8 Meripa yino yalisa ni Meripa yize yili hakamwihi ni Refwindimi (hanji Refime) yize te akuvuluka nawa ngwo Masa. Hachino, yihela yino yeswe yaali te kakuyivuluka ngwo Meripa mumu henaho A-Izalele alitachikile hanji kulinyenyeta.—Tala mapa mu Apendice B3 mu Mbimbiliya ya Yisoneko Yisandu. (Apêndice B3 na Tradução do Novo Mundo da Bíblia Sagrada.)
^ kax. 11 Umwe mukwa-mana hakutwala ku Mbimbiliya yamba ngwenyi, kulita ni chako cha A-Yunda, yihulia jacho kanyongene ngwo kwakalingiwile chikomokeso nichimwe, mumu Mose kanyingikine ngwenyi mu liwe liacho mwapwile meya. Kashika ayo azangile hanga Mose alinge chikomokeso chacho ha liwe likwo. Ewa, chino chili wika chako cho.
^ kax. 12 Tala “Yihula Ya Waze Akutanga Mikanda Yetu” ha Kaposhi wa Kutalila, wa 15 Outubro 1987. (A Sentinela 15 de Outubro 1987, “Perguntas dos Leitores.”)
