YOSHUA katambile kusongwela vungu lia Izalele ndo mu Chifuchi cha Chilakenyo. Chino te chiteli chikalu chinji. Kashika, Yehova amukolwezele ni kumutakamisa ngwenyi: “Takama wika. Pwako ni hamu linji.” Yehova kalwezele Yoshua ngwo nyi matanga ni kwononokena Shimbi jenyi, iye te makwata yiyulo ya mana ni kufumbuka mu mulimo wenyi.—Yoshua 1:7, 8.

Tuli ha “miaka yikalu,” kashika mwono wetu newo muhasa kupwa mu yipikalo. (2 Timoteu 3:1) Nyi tunazange kufumbuka ngwe Yoshua, twatamba kukaula chiyulo chize amuhele kuli Yehova. Tunafupiwa kutanga Mbimbiliya hita tangwa ni kuzachisa yize tunatange hanga tukwate yiyulo ya mana.

Alioze amwe a kuli yetu hanji kutushi kunyingika chize mutulilongesa Mbimbiliya, hanji kutushi kuzanga kulilongesa yo. Hachino, longeso lia wika lia Mbimbiliya likwete ulemu. Muze mutanga mushete “ Eseka Kukaula Yiyulo Yino,” muwana yikuma yize muyikukwasa hanga uyuke ni kuzanga chinji longeso lia wika.

Mukwa-kwimba masamu ngwenyi: “Ungwendese kama mu jila ya shimbi je, mumu nakuwahililamo.” (Samu 119:35) Ni yena muhasa kuzanga kulilongesa Lili lia Zambi. Nyi wachilinga muupwa ni manyonga apema waze makukwasa kununga ni kulilongesa Mbimbiliya.

Chipwe ngwe ena kuuchi kusongwela vungu ngwe chize alingile Yosua, alioze ukwete yipikalo ye. Kashika ngwe Yosua, lilongesa, nawa kaula shimbi ja Liji lia Zambi. Nyi wachilinga mukakwata yiyulo ya mana ni kufumbuka ku mwono we.