1. Mu mutapu uka Akwa-Kristu atamba kupwa ngwe umwe mutondo? (Tala nawa chizulie.)

 CHISHIMA chimwe chakwamba ngwo: “Fuji kuyishi kumakuna mutondo uze wazeya.” Maliji wano kanasolola ngwo, mitondo yimwe mba yihetuke hanyima lia fuji yinji, yatamba kuzeya. Chizechene nawa, mba tuhase kulingila Yehova ni uwahililo, twatamba kupwa atu waze keshi kulikwachilila ha yimwe yuma muze mutupalika mu yipikalo ku mwono wetu. Mba tuhase kwijilila ni yize muyalumuka ku mwono wetu ni kuvumbika manyonga ja akwetu, chili chilemu kuhona kulikwachilila chinji ha yuma yize twakuzanga.

2. Yitanga yika muyihasa kutukwasa muze yimwe muyalumuka ku mwono wetu, mba yika mutulilongesa ha mutwe uno?

² Yetu tuvumbi twa Yehova, kutwatambile kulikwachilila ha yize twakuzanga chinji. Chikwo nawa, tunafupiwa kupwa akwa-kulikehesa ni kusolwela akwetu keke. Ha mutwe uno, mutumonaho chize yitanga yino yakwashile amwe Akwa-Kristu muze yimwe yalumukine ku mwono wo. Mutumona nawa chize yitanga yino muyihasa kutukwasa. Alioze chitangu, mutumona yize mutuhasa kulilongesa kuli Yehova ni Yesu; yilweza yipema ya atu waze keshi kulikwachilila ha yize akuzanga.

3. Kuchi tunanyingika ngwetu Yehova keshi kulikwachilila ha yize anazange?

³ Yehova kakumuvuluka ngwo “liwe” mumu kajikiza, keshi kukokoloka. (Shimbi 32:4) Chipwe chocho, iye keshi kulikwachilila ha yize anazange. Yuma hano hashi yinalumuka kafuji-fuji, alioze Yehova kakwijilila nayo ni kusa shindakenyo hanga upale  wenyi ulingiwe. Yehova katutangile mu chifwa chenyi, kashika tuli ni uhashi wa kwijilila ni yuma muze yimwe muyalumuka ku mwono wetu. Mu Mbimbiliya, twakuwanamo shimbi jize yakutukwasa kukwata yiyulo ya mana, chipwe ngwe ku mwono wetu mukusoloka kapinda mweswawo. Chilweza cha mwene Yehova ni shimbi jenyi, yakutukwasa kunyingika ngwetu chipwe ngwe iye kali “liwe,” nihindu kakwijilila ni yuma muze muyalumuka.

4. Hana chilweza chize chinasolola ngwo Yehova kapwa mutu mwashi kutwama nenyi. (Ulevi 5:7, 11)

⁴ Yuma yeswe yize Yehova akulinga yapwa yingunu nawa yakusolola ngwo, kapwa mutu mwashi kutwama nenyi. Yehova keshi kukalishila atu mbunge. Chakutalilaho, talenu yize alingile muze apwile ni kusongwela A-Izalele. Mulambu uze apwile ni kwita kuli pichi te walisa ni wa yiswale. Ha mashimbu amwe, iye te kakwecha hita mutu ahane mulambu kulita ni yize yinalingiwa ku mwono wenyi.—Tanga Ulevi 5:7, 11.

5. Hana chilweza chize chinasolola kulikesa ni keke ya Yehova.

⁵ Kulikehesa ni keke ya Yehova, yakumukwasa kuhona kulikwachilila ha manyonga jenyi. Chakutalilaho, kulikehesa cha Yehova chasolokele zwalala muze te anambe kunongesa mbonge ya Sondome. Kupalikila muli angelo, Yehova yalweza Lote, lunga washishika hanga achinyine ku milundu. Alioze, Lote yevwa woma; kazangile kuyako. Chocho yamwita hanga iye ni usoko wenyi achinyine ku Zoare, yimwe mbonge yikehe yize Yehova atesele kunongesa. Yehova kachi kalwezele Lote ngwenyi, watamba kukaula usongwelo uze ngunakwehe. Alioze shimbu achilinge, iye yakaula yize Lote amwichile, chocho yalitwamina kunongesa mbonge yacho. (Uputu. 19:18-22) Ha kupalika cha jimwe sekulu, Yehova yasolwela keke Akwa-Ninive. Iye yatuma profeta Yona hanga aalweze ngwenyi, mbonge ya Ninive ni atu eswe waze alimo mayinongesa. Alioze muze A-Ninive alikonyekene Yehova yaevwila keke, chocho yecha kunongesa mbonge yacho.—Yona 3:1, 10; 4:10, 11.

6. Tongola yimwe yilweza yize yinasolola ngwo Yesu kembulwile Yehova ha kupwa mwashi kutwama nenyi.

⁶ Yesu kapwile mutu mwashi kutwama nenyi, mumu kembulwile chilweza cha Yehova. Iye kamutumine hano hashi hanga ambujole wika kuli “mapanga a ku zuwo lia Izalele waze hanatoko.” Chipwe chocho, kakalikwachilile wika ha nyonga liacho; kambulwile kuli atu akwo. Chakutalilaho, tangwa limwe, umwe pwo yoze hi Ka-Yunda ko, yaliumba kuli iye hanga auke mwanyi wa pwo wapwile ni ‘ndemoniu yoze te wakumupinjisa chinji.’ Mumu lia keke, Yesu yalinga yize pwo wacho amwichile; yauka mwanenyi. (Mateu 15:21-28) Talenu chilweza chikwo. Ku uputukilo wa mulimo wenyi hano hashi, Yesu yamba ngwenyi: “Mweswawo malikala yami . . . , ni yami mungukalikalaye.” (Mateu 10:33.) Alioze Yesu kakalikalile Petulu, chipwe ngwe Petulu kalikalileye ha yisuho yitatu. Iye kanyingikine ngwenyi, Petulu kalikonyeka nawa kali lunga washishika. Hanyima lia kumuhindwisa, Yesu yasoloka kuli Petulu ni  kumulweza ngwenyi kamukonekena nawa kananungu ni kumuzanga.—Luka 24:33, 34.

7. Kulita ni A-Fwilipu 4:5, lufuma muka twatamba kupwa nenyi?

⁷ Ndo hano, twamona ngwetu Yehova ni Yesu keshi kulikwachilila wika ha manyonga jo. Mba yika mutwamba hali yetu? Yehova kanashimbwila hanga ni yetu tulinge chocho. (Tanga A-Fwilipu 4:5.) Mutuhasa kulihula ngwetu: ‘Shina akwetu kanangunyingika ngwo, ngushi kulikwachilila wika ha manyonga jami, nawa napwa mutu mwashi ha kutwama ni akwetu? Nyi ayo kakungumona ngwo napwa mutu mukalu nawa mukwa-pami? Shina nakushinjila akwetu hanga alinge yuma ngwe chize yami ngunazange? Nyi nakupanjika yiyulo ya akwetu ni kwalumuna manyonga jami?’ Nyi twapwa atu waze keshi kulikwachilila wika ha manyonga jo, chino muchisolola ngwo tunembulula Yehova ni Yesu. Tutalenu ha yuma yaali haze mutuhasa kusolola ngwetu, kutushi kulikwachilila wika ha manyonga jetu. Muze yuma muyalumuka ku mwono wetu ni muze manyonga ni yiyulo ya akwetu muyilisa ni ya yetu.

8. Yika muyitukwasa kwijilila muze yuma muyalumuka ku mwono wetu? (Tala nawa maliji mushi lia lifwo.)

⁸ Tunafupiwa kupwa atu waze akwijilila ni yuma ni kawashi muze yimwe muyalumuka ku mwono wetu. Kwalumuka chacho muchihasa kutunehena kapinda yoze te kutushi ni kushimbwila. Chakutalilaho, susumuku mutuhasa kupwa ni musongo upi, kapinda wa mbongo chipwe mbwanja mu yuma ya mafwefwe muyihasa kupinjisa mwono wetu. (Chilu. 9:11; 1 Kori. 7:31) Chipwe kutwalumuna chiteli chize tukwete muchihasa kutunehena kapinda. Chipwe ngwe mukulingiwa yeswayo, nihindu mutuhasa kwijilila ni yuma yize yalumuka ku mwono wetu ha kulinga yuma yiwana: (1) kutayiza yize yinalingiwa ku mwono wetu, (2) kulihulikila ku yuma ya kulutwe, (3) kulihulikila ha yuma yalita, ni (4) kulingila akwetu yuma. b Mutumona yilweza ya mandumbu yize yinasolola chize yuma yino muyihasa kutukwasa.

9. Kuchi lunga ni pwo waze apwile mu mulimo wa mishionaliu ahashile kwijilila ni yuma yize yalumukine ku mwono wo?

⁹ Tayiza yize yinalingiwa ku mwono we. Emanuele ni Francesca kaatumine mu chifuchi cheka ngwe mishionaliu. Muze aputukile kulilongesa limi liaha ni kunyingika mandumbu, musongo wa COVID-19 yiuputuka, chocho yalitwamina kupwa hamuwika ni akwo. Ha mashimbu jacho, naye ya Francesca yafwa. Kazangile chinji kupwa hamwe ni asoko jenyi, alioze mumu lia COVID-19 kahashile kuyako. Yika yakwashile Francesca kukumba kapinda wacho? Chuma chamukwashile chili yilemba yize ayo apwile ni kulinga, ha kwita mana hanga ahone kulihulumba ha yuma ya tangwa likwo. Yehova kakumbulwile yilemba yino ha shimbu lialita kupalikila mu kulia cha ku ufulielo. Chakutalilaho, ayo kawanyine utakamiso ha yize umwe ndumbu ambile ha chimwe kwihujola, ngwenyi: “Nyi mututayiza ni kawashi yize yalumuka ku mwono wetu, chino muchitukwasa kupwa ni uwahililo ni kuyuka kanawa ha mashimbu jacho.” c Ayo nawa kalumwine mutapu uze te akwambulwila ku telefone, chocho yaputuka longeso lia Mbimbiliya. Chikwo nawa, kasakwililile chinji ha ukwaso ni utakamiso wa mandumbu kuze apwile. Chakutalilaho, hita tangwa umwe pangi yoze te wakwazanga chinji kapwile ni kwatumina mesage waze ali ni Yisoneko ya mu Mbimbiliya; iye kachilingile ha mwaka wa  muundu. Kashika, nyi mututayiza yize yalumuka ku mwono wetu, mutuwahilila chinji ha kulinga yuma kulita ni yize tunapalika ku mwono.

10. Kuchi umwe pangi anakejilila ni yize yalumukine ku mwono wenyi?

¹⁰ Tala kulutwe ni kulihulikila ha yuma yalita. Pangi Christina wa ku Romênia yoze watwama ku Japão, kevwile yikola ku mbunge muze ayikile chikungulwila cha limi lia inglês muze te akuya. Alioze, kakanungine ni kunyonga wika ha chikuma chacho. Shimbu alihulikile ha chikuma chacho, iye yaya mu chikungulwila cha limi lia Japonês; yalinga yize te mahasa ha kwambujola mu limi liacho. Iye yeta kuli mukwa-mulimo-ni-mukwo hanga amukwase kulilongesa limi lia Japonês ni kulihanjika kanawa. Yeta pwo wacho azachise Mbimbiliya ni mukanda Wahilila ku Mwono ku Miaka Yeswe! hanga amulongese limi lia Japonês; pwo wacho yatayiza. Chahiana ulemu hi wika ko ngwo Christina yaputuka kuhanjika limi lia Japonês, alioze pwo wacho neye yaputuka kuzanga umwenemwene. Nyi twecha kunyonga chinji ha yuma ya kunyima ni kulihulikila ha yuma yalita, mutunyingika ngwetu yuma yize yalumuka susumuku ku mwono wetu, muyihasa kutunehena yiwape yize te kutushi ni kushimbwila.

11. Kuchi umwe lunga ni pwo ahashile kukumba kapinda wa mbongo?

¹¹ Lingila akwetu yuma. Pwo ni lunga waze atwama mu chifuchi chize mulimo wetu uli wa kukanjisa, kaputukile kupwa ni kapinda wa mbongo, muze chifuchi cho chanjilile mu kapinda wa mbongo. Kuchi ahashile kwijilila ni kapinda wacho? Chitangu, ayo kashiwishile mwono. Hachino, shimbu anunge ni kulihulikila ha kapinda wacho, o yatesa kulihana chinji mu mulimo wa kwambujola hanga akwase akwo. (Yili. 20:35) Ndumbu yamba ngwenyi: “Kulihana chinji mu mulimo wa kwambujola, chatukwasa kuhona kupalikisa mashimbu anji ha kunyonga ha yuma yize kuyalitele; chatukwasa nawa kulihulikila ha upale wa Yehova.” Muze yuma muyalumuka ku mwono wetu, twatamba kunyingika ngwetu chili chilemu kununga ni kukwasa akwetu, chipi-chipi kupalikila mu mulimo wa kwambujola.

12. Kuchi chilweza cha Paulu muchihasa kutukwasa ha kwalumuna lusango muze tuli mu munda?

¹² Mu mulimo wa kwambujola, twatamba kwalumuna lusango kulita ni atu waze mutuhanjika no. Atu waze twakuwanamo, kali a ku yihela yeka ni yeka, nawa kakuya mu mayingeleja alisa. Paulu te kakuhasa kwalumuna lusango kulita ni atu waze anahanjika no, ni yetu mutuhasa kumwimbulula. Yesu katongwele Paulu ngwe ‘postolo wa akwa-mavungu.’ (Roma 11:13) Paulu kambulwile kuli A-Yunda, A-Ngresia, atu waze alongoloka, akwa-kulikehesa, miata ni atu akwo nawa. Mba ahase kukwata ku mambunge ja atu wano eswe, Paulu ‘kalipwishile yuma yeswe kuli atu eswe.’ (1 Kori. 9:19-23) Iye te kakufupa kunyingika kuze atu jacho anakatuka ni yize akufuliela, mba malumuna lusango kulita ni mwono wo. Ni yetu nawa mutuhasa kululieka mulimo wetu wa kwambujola nyi mutunyonga ha yize atu anafupiwa ni kwalumuna lusango.

13. Ponde yika anatongola ha 1 A-Korindu 8:9, yize mutuhasa kwehuka ni mutulemesa manyonga ja akwetu?

¹³ Kuhona kulikwachilila chinji ha manyonga yetu, muchitukwasa kulemesa manyonga ja akwetu. Chakutalilaho, mandumbu amwe a mapwo kakuzanga kulilembula kumeso, akwo ka. Mandumbu akwo kakuzanga kunwa walwa ukehe, alioze akwo keshi kuzanga kunwa chipwe ukehe. Yetu eswe tunazange kupwa ni mijimba yipema, alioze twakusakula mutapu walisa wa kuyifunga. Kashika nyi mutunyonga ngwetu, yize yetu twakulinga mashimbu eswe yalita, ni kushinjila akwetu hanga akaule manyonga jetu, mutuhasa kutalingisa akwetu ni kuhandununa  mandumbu mu chikungulwila. Kutwazangile hanga yuma ya mutapu au yilingiwe! (Tanga 1 A-Korindu 8:9; 10:23, 24) Mututala ha yuma yaali yize yinasolola ngwo, nyi twakaula shimbi ja mu Mbimbiliya mutupwa ni nyonga lialita ni kukwasa mandumbu hanga apwe ni sambukila.

14. Yika twatamba kunyingika muze mututesa mazalo waze mutuzala ni chize mutulilulieka?

¹⁴ Mazalo ni kululieka cha kambu. Yehova kakatuhele mutapu umuwika wa mazalo waze twatamba kuzala, alioze kanatwehe shimbi jize jakutukwasa ha chikuma chacho. Twatamba kuzala mazalo waze mahalisa Yehova, ahomboka, alita, nawa waze anasolola “mana.” (1 Timo. 2:9, 10; 1 Petu. 3:3) Kutwazangile kuzala mazalo waze matwala atu hanga atutaletale. Chikwo nawa, shimbi ja mu Mbimbiliya mujihasa kukwasa makulwana a mu chikungulwila hanga achine kusa shimbi ja chize mandumbu atamba kuzala ni kululieka kambu. Chakutalilaho, makulwana a chimwe chikungulwila kazangile kukwasa amwe mandumbu waze aputukile kuteula kambu jize akwa-hashi akuteula, jihi alioze ja kulilimba-limba. Kuchi makulwana te mahasa kukwasa akweze wano chakuhona kusa shimbi? Kalayi wa mbonge yakwasa makulwana alweze mandumbu jacho ngwo: “Nyi uli kulutwe unalongesa, mba atu waze unalongesa malihulikila ha chize uli, hi ha yize ko unalongesa, yino yinasolola ngwo mutapu uze wakuzala ni kulilulieka kuwalitele.” Maliji wano kakwashile kuhwisa kapinda wacho chakuhona kusa shimbi. d

15. Shimbi jika ja mu Mbimbiliya jize mujitukwasa muze tunambe kukwata chiyulo cha kuuka mujimba wetu? (A-Roma 14:5)

¹⁵ Kufunga mujimba wetu. Hita Mukwa-Kristu, katamba kutesa chize mafunga mujimba wenyi. (Ngala. 6:5) Muze Mukwa-Kristu masakula umwe uukiso, shimbi ja mu Mbimbiliya jize atamba kunyonga, jili jize jakukanjisa manyinga ni uukiso wa yipanda-panda. (Yili. 15:20; Ngala.  5:19, 20) Kuchizako yino, hita Mukwa-Kristu kali ni ulite wa kusakula uukiso uze matambula. Amwe kakufupa wika uukiso mu mashipitali a undele. Alioze, akwo kakuzanga kunwa kwo yitumbo ya mafwo yize avuluka ngwo, yitumbo ya atu alaa. Kashika, twatamba kuvumbika chiyulo cha hita ndumbu ha uukiso uze mwene asakula, chipwe ngwe mututayiza uukiso wacho hanji ka. Hachino, twatamba kwiwuluka yikuma yino: (1) Wanangana wa Zambi wika we mukahwisa misongo yeswe ya atu. (Iza. 33:24) (2) Hita Mukwa-Kristu katamba kupwa ni shindakenyo ha yize mwene ananyongo ngwenyi muyimukwasa. (Tanga A-Roma 14:5.) (3) Kanda tupatwila akwetu ha yiyulo yize akukwata, chipwe kupwa liwe lize muliahukanyisa, ka. (Roma 14:13) (4) Akwa-Kristu kakusolola zango nawa kananyingika ngwo, kulinunga cha chikungulwila chili chilemu kuhiana manyonga jo ene. (Roma 14:15, 19, 20) Nyi mutwiwuluka yikuma yino mashimbu eswe, mutupwa ni usepa upema ni mandumbu jetu ni kukwasa chikungulwila chipwe ni sambukila.

16. Kuchi makulwana a mu chikungulwila akusolola ngwo keshi maka akolo mukachi ko? (Tala nawa yizulie.)

¹⁶ Makulwana katamba kupwa chilweza chipema ha kuhona kupwa akwa maka akolo. (1 Timo. 3:2, 3) Chakutalilaho, mukulwana wa mu chikungulwila katambile kushimbwila ngwe manyonga jenyi hanji yiyulo yenyi yeswe ayitayize, mumu ngwo iye mwe mukulwana hakachi ka makulwana akwo. Iye kananyingika ngwenyi, spiritu ya Yehova muyihasa kukwasa mukulwana mweswawo hanga ambe yimwe yize muyikwasa kukwata chiyulo chalita. Nyi makulwana anji matayiza chiyulo chize kuchalimikine ni shimbi ja mu Mbimbiliya, mukulwana yoze keshi maka akolo makwasa chiyulo chacho, chipwe ngwe kali ni nyonga lialisa.

17. Yika mutuyuka nyi twapwa atu waze keshi maka akolo?

¹⁷ Akwa-Kristu waze keshi maka akolo kakutambula yiwape yinji. Chakutalilaho, twakupwa ni usepa upema ni mandumbu jetu ni kukwasa chikungulwila hanga chilinunge. Twakuwahilila ni kupwa ni uhashi wa kunyingika mandumbu a ku minyachi yeka, nawa waze akwete yitanga yalisa. Chikwo nawa, chili kukomoka kunyingika ngwo chipwe ngwe tukwete kalisa yono, yetu eswe twakuwayila Yehova hamuwika ni kulinunga. Chahiana yeswe, chili chiwape kunyingika ngwo tunembulula Yehova yoze wapwa mwashi kutwama ni akwo nawa keshi maka akolo.