1-2. Mu mutapu uka Mukwa-Kristu mahasa kupwa ngwe limwe zuwo lisuku? (1 A-Korindu 15:58)

 KU KUHWA cha miaka 1970, limwe zuwo lia yipatulo ya kwilu 60, yaputuka kulitunga mu Tóquio, Japão. Atu waze te akumona zuwo liacho ni kulikomoka, kapwile ni kulihula nyi kulichi kulimbuka ku minyiko yize yakulingiwa chinji mu chifuchi chacho. Yika akwa-kutunga alingile mba zuwo liacho lihone kulimbuka ku minyiko? Ayo katungile zuwo liacho hanga likole, aku nawa yalisa uhashi wa kukumba minyiko ya mavu. Akwa-Kristu kali ngwe zuwo lino lisuku. Mu mutapu uka?

² Mukwa-Kristu katamba kupwa ni yitanga yino yaali, kujikiza ni kupwa mutu mwashi. Katamba kujikiza ni kusa tachi ha kukalila shimbi ja Yehova. (Tanga 1 A-Korindu 15:58.) Iye ‘kakwononoka ni kawashi,’ nawa keshi kwecha chuma nichimwe hanga chalumune manyonga jenyi. Kapwa mutu mwashi yoze keshi maka akolo. (Tia. 3:17) Mukwa-Kristu yoze ukwete yitanga ya mutapu au, keshi kulikwachilila ha manyonga jenyi, chikwo nawa keshi kwecha atu alinge yuma chamulingila. Ha mutwe uno, mutumonaho chize mutuhasa kujikiza chakuhona kukokoloka. Mutumona nawa yuma yitano yize Satana akulinga hanga atuhongese ni chize mutuhasa kukumba yuma yacho.

3. Shimbi jika Yehova ahanyine jize jili ha Yilinga 15:28, 29?

³ Yehova wika mwe uli ni ulite wa kusela atu jenyi shimbi, nawa shimbi jacho japwa zwalala. (Iza. 33:22) Chakutalilaho, chizavu cha tusongo cha ku sekulu yitangu, chasolwele majila atatu waze mahasa kukwasa Akwa-Kristu hanga anunge ni kujikiza. (1) kwehuka kukombelela mahamba ha kuwayila wika  Yehova, (2) kulemesa manyinga ngwo kapwa asandu, (3) kwononokena shimbu ja mu Mbimbiliya jize jinakanjisa upangala ni utanji. (Tanga Yilinga 15:28, 29.) Kuchi Akwa-Kristu mahasa kwononokena Yehova ha yikuma yino yitatu?

4. Yika yakusolola ngwo twakuwayila wika Yehova? (Usolwelo 4:11)

⁴ Twakwehuka kuwayila tuponya ha kuwayila wika Yehova. Yehova kalwezele A-Izalele hanga awayile wika iye. (Shimbi 5:6-10) Muze Yesu amwesekele kuli Satana, iye yasolola pundu ngwenyi, twatamba kuwayila wika Yehova. (Mateu 4:8-10) Kashika, yetu kutushi kuwayila yizulie ni tuponya. Yetu nawa kutushi kuwayila atu. Chakutalilaho, kutushi kumona niumwe ngana wa yingeleja, hanji umwe nguvulu, mukwa-kwasa konda yoze waya lufuma, umwe yoze wakulinga yinema, hanji yoze wakwimba ngwe Zambi. Twakuwayila wika Yehova, yoze ‘watangile yuma yeswe.’—Tanga Usolwelo 4:11.

5. Mumu liaka twakwononokena shimbi ya Yehova hakutwala ku ulemu wa manyinga ni mwono?

⁵ Twakwononokena shimbi ya Yehova hakutwala ku ulemu wa manyinga ni mwono. Mumu liaka? Mumu Yehova kanambe ngwenyi, manyinga we mwono, chawana chinene chize Yehova atuhele. (Levi 17:14) Muze Yehova alwezele atu hanga alie yifwo ya tushitu, iye yaalweza hanga ahone kulia manyinga. (Uputu. 9:4) Muze ahanyine shimbi kuli A-Izalele, iye yafunyina shimbi yacho. (Levi 17:10) Yehova kanakasongwela chizavu cha tusongo ku sekulu yitangu hanga alongese mandumbu ‘ehuke . . . manyinga.’ (Yili. 15:28, 29) Yetu twakwononokena shimbi yino ni mbunge yeswe muze twakukwata chiyulo cha uukiso uze mututambula. b

6. Yika twatamba kulinga mba twononokene shimbi ja Yehova jize jakukanjisa upangala?

⁶ Twakwononokena shimbi jilemu jize Yehova hanatese. (Hepre. 13:4) Paulu kanatukolweza hanga ‘tushihe’ yihanda ya mujimba wetu, chekwamba kusa tachi hanga twehuke usolo weswawo wa musunya. Twakwehuka kulinga hanji kutala yuma yize muyitutwala kulinga utanji hanji upangala. (Kolo. 3:5; Yombi 31:1) Muze twakupwa mu cheseko cha kulinga yuma yipi, twakwehuka kafuji-fuji manyonga ni yitanga yize muyihasa kupihisa usepa wetu ni Yehova.

7. Yika twatamba kulinga, mba mumu liaka?

⁷ Yehova kanashimbwila hanga ‘tumwononokene ni mbunge yeswe.’ (Roma 6:17) Yize akutulweza yili mumu lia upeme wetu, nawa kutuchi kuhasa kwalumuna shimbi jenyi. (Iza. 48:17, 18; 1 Kori. 6:9, 10) Yetu twakusa tachi hanga tuvwise Yehova kuwaha ni kusolola yitanga ngwe yize asolwele mukwa-kwimba masamu yoze wambile ngwenyi: “Hingunase mbunge yami kumanununa yiyulo ye ku miaka ya mutolo, ndusu ndo ku songo.” (Samu 119:112) Alioze, Satana kakututwala hanga tuhone kwononokena Yehova. Kuchi akuhasa kuchilinga?

8. Kuchi Satana akuzachisa yihungumiona hanga atutwale tuhone kushishika kuli Yehova?

⁸ Yihungumiona. Satana kakuzachisa yikola yize akutuvwisa ku mujimba ni ku manyonga hanga atutwale tuhone kushishika kuli Yehova. Upale wenyi uli wa ‘kutulia’ hanji ngwetu, kupihisa usepa wetu ni Yehova. (1 Petu. 5:8) Akwa-Kristu ku sekulu yitangu, kaamwesene lamba, kwalamba ni kwashiha mumu lia kuzanga kununga ni kushishika kuli Yehova. (Yili. 5:27, 28, 40; 7:54-60) Chipwe musono, Satana  machinunga ni kuzachisa yihungumiona. Twakuchimona ha chize manguvulu a mu Rússia ni mu yifuchi yikwo akulamba mandumbu jetu ni kwamwesa lamba. Mu yifuchi yinji hano hashi, akwa-kole jetu kakuhungumiona mandumbu jetu mu majila eka ni eka.

9. Chilweza chika chinasolola ngwo twatamba kukeya ni miheto ya Satana yize yahengama?

⁹ Miheto yize yahengama. Kuchizako yihungumiona yize akutumwesa, Satana nawa kakututela “miheto” yeka ni yeka hanga atwoze. (Efwe. 6:11) Tutalenu chilweza cha ndumbu Bob, yoze wapwile ni musongo uze te atamba kumupasula. Iye yalweza mandotolo ngwenyi, katambile kumusa manyinga. Ndotolo yoze wakupasula yatayiza kumupasula chakuhona kumusa manyinga. Alioze, ha ufuku muze te kanda achiheta ha tangwa lize mamupasula, ndotolo mukwo yaya ni kuhanjika ni Bob muze asoko jenyi te hatuhuka mu shipitali. Iye yamulweza ngwenyi, mandotolo kechi kumusa manyinga, alioze nyi muchilita te mahasa kupwa ni manyinga mu chihela muze mamupaswila. Kota iye kanyongene ngwenyi, Bob malumuna nyonga lienyi mumu asoko jenyi keshi hakamwihi. Alioze, Bob yanunga ni kumana nguu ni kwamba ngwenyi, yeswayo muyilingiwako chichi kutayiza kutambula manyinga.

10. Mumu liaka kunyonga cha hano hashi chili ponde yinene? (1 A-Korindu 3:19, 20)

¹⁰ Kunyonga cha hano hashi. Nyi kutwakeyele, mutuhasa kwimbulula kunyonga cha atu waze keshi kwononokena shimbi ja Yehova. (Tanga 1 A-Korindu 3:19, 20.) “Mana a hano hashi,” kanji-kanji kakutwala atu apwe ni manyonga a musunya ni kwehuka kukaula shimbi ja Yehova. Akwa-Kristu amwe mu Perekamu ni mu Tayatera, kembulwile yitanga ya atu waze te atunga no, apwile ni kulinga utanji ni kuwayila mahamba. Yesu kahanyine yiyulo ya tachi ku yikungulwila yacho, mumu ayo kapwile ni kwecha mandumbu amwe malinga utanji. (Uso. 2:14, 20) Musono, kuze twatwama atu mahasa kufupa hanga twimbulule yitanga yo yipi. Asoko ni enyembo jetu mahasa kutulweza ngwo, kutwatambile kukalisa mbunge; hi chipi ko kwehuka shimbi ja Yehova. Chakutalilaho, mahasa kwamba ngwo hi chipi ko kulinga yize mujimba wetu unete, nawa ngwo, shimbi ja Yehova kujishi ni ulemu musono.

11. Mba tumane nguu, yika kutwatambile kulinga?

¹¹ Ha mashimbu amwe, mutuhasa kunyonga ngwetu, usongwelo uze Yehova akutwaha kuushi kusoloka kanawa. Hanji mutunyonga ngwetu, twatamba kulinga yuma ‘kuhiana yize yinasonewa.’ (1 Kori. 4:6) Yino ye te akulinga mangana a mayingeleja ha mashimbu ja Yesu. Ayo te kakuwezela manyonga jo ha shimbi ya Mose hanga apinjise atu. (Mateu 23:4) Yehova kakutwaha usongwelo walita kupalikila mu Liji lienyi ni mu ululikiso wenyi. Kukushi ulemu wa kuwezela yuma ha usongwelo uze iye akutwaha. (Yishi. 3:5-7) Nyi twachilinga, kutuchi kulinga yuma kuhiana yize yinasonewa chipwe kusa shimbi ha yuma yize hita ndumbu mahasa kulikwachila chiyulo.

12. Kuchi Satana akuzachisa “kwonga chamokomoko”?

¹² Sango ja mahuza. Satana kakuzachisa “kwonga chamokomoko” ni ‘yuma yamokomoko ya hano hashi’ hanga apiangule atu ni kwahandununa. (Kolo. 2:8) Ku sekulu yitangu, yino te yakuchinga malongeso waze apwile ni kukatuka ku kunyonga cha atu, malongeso ja A-Yunda waze te keshi kukatuka mu Yisoneko ni malongeso waze te akwamba ngwo, Akwa-Kristu katamba kwononokena Shimbi ya Mose. Malongeso wano te kakwonga atu mumu kapwile ni kwahandununa kuli Yehova, Chishina cha mana. Musono, Satana kakuzachisa jila ya fuji ni internet hanga  amwange sango ja mahuza jize jakukatuka kuli manguvulu a hano hashi. Yino yasoloka chinji ha mashimbu a COVID-19. c Yela ja Yehova waze akawile usongwelo uze wakatukile mu ululikiso wa Yehova, kapwile ni kuhwima mbunge kuhiana waze akawile sango ja mahuza ja akwa-hashi.—Mateu 24:45.

13. Mumu liaka twatamba kukeya ni yuma yize muyihasa kutulalula?

¹³ Yuma yize ya kulalula atu. Twatamba kulihulikila ha “yuma yahiana ulemu.” (Fwili. 1:9, 10) Nyi mutulinga yuma yize muyitulalula, mutuhasa kukisa tachi jize te mujitukwasa kulinga yuma yahiana ulemu. Yuma yize twakulinga ngwe kulia, kunwa, kuheha ni mulimo, muyihasa kutulalula nyi mutuyisa ha chihela chitangu ku mwono wetu. (Luka 21:34, 35) Chikwo nawa, twakumona chinji atu waze akuneha mbwanja mumu lia ulite wo ni ha yize akuhanjika manguvulu a mafwefwe. Twatamba kukeya hanga tuhone kulaluka ni yuma ya mutapu au. Mumu nyi kutwakeyele, hakehe-hakehe mutuhasa kuputuka kulinjisa mu yuma yacho. Satana kakuzachisa yuma yino hanga atutwale tuhone kulinga yize yalita kumeso ja Yehova. Tutalenu chize mutuhasa kwehuka miheto yenyi ni kununga kumana nguu ha kwononokena Yehova.

14. Yika muyitukwasa mba tununge sali lia Yehova?

¹⁴ Nyonga ha yize yakutwalile mba ulihane kuli Yehova ni kukupapachisa. Wachilingile mumu wazangile kupwa sali lia Yehova. Iwuluka yize yakukwashile kupwa ni shindakenyo ngwe, wawana umwenemwene. Wanyingikine kanawa Yehova, chocho yiuputuka kumuzanga ni kumuvumbika. Waputukile kupwa ni ufulielo, mba ufulielo wacho yiukutwala hanga ulikonyeke. Kuzanga Yehova chakukwashile kwehuka yuma yipi ni kuputuka kulinga yuma yize yakumuvwisa kuwaha. Wevwile sambukila ya ku mbunge muze wanyingikine ngwe Yehova kakukonekena shili ye. (Samu 32:1, 2) Waputukile kukunguluka ni  kulweza akwenu yuma yipema yize wapwile ni kulilongesa. Amu hiwalihana kuli Yehova ni kukupapachisa, haliapwila unende mu jila yize yakutwala ku mwono, nawa unazange kulinga yeswayo muhasa hanga ununge ni kwenda mu jila yacho.—Mateu 7:13, 14.

15. Mumu liaka chili chilemu kulilongesa Liji lia Zambi ni kupukuna ha yize tunalilongesa?

¹⁵ Lilongese Liji lia Zambi ni kupukuna ha yize unalilongesa. Miji ya mutondo nyi muyinjila chinji mu mavu, mutondo wacho wakukola. Chizechene nawa, nyi mutulilongesa chinji Liji lia Zambi ufulielo wetu muukola, chino muchitukwasa tununge ni kumana nguu muze mukulingiwa yimwe ku mwono wetu. Muze twakulilongesa Liji lia Zambi ni kupukuna ha yize tunalilongesa, twakupwa ni shindakenyo ngwetu, yize Yehova akutwita ye yipema. (Kolo. 2:6, 7) Kashika, pukuna ha chize usongwelo wa Yehova, yiyulo ni ufunge wenyi, yakwashile tuvumbi twenyi kunyima. Chakutalilaho, mu umwe usolwelo, Ezekiele kamwene umwe mungelo yoze te uneseka tembele. Usolwelo uno watakamishine Ezekiele, nawa wakutwaha malongeso alita a chize mutuhasa kukalila ni kwononokena shimbi ja Yehova hakutwala ku uwayilo walinanga. d (Eze. 40:1-4; 43:10-12) Twakuyuka nawa muze twakulilongesa ni kupukuna ha yuma yikalu ya mu Liji lia Zambi.

16. Kuchi kufuliela muli Yehova ni mbunge yeswe chafungile Bob? (Samu 112:7)

¹⁶ Kolesa mbunge ye. Mwanangana Ndawichi kambile ngwenyi, kechi keza kecha kuwayila Yehova, muze embile ngwenyi: “Zambi, mbunge yami yinakolo.” (Samu 57:7) Ni yetu nawa mutuhasa kukolesa mbunge yetu ha kufuliela muli Yehova ni mbunge yeswe. (Tanga Samu 112:7.) Tutalenu chilweza cha Bob yoze twatongola helu. Muze mandotolo ambile ngwo, ayo mapwa ni manyinga hakamwihi hanji maafupa muze anamupasula, chakuhona kunyonga kaali yaalweza ngwenyi, nyi munweseka kungusa manyinga mungutuhuka mu shipitali yino. Kulutwe, Bob yamba ngwenyi: “Chakayambashanyine ha chiyulo chize te ngunakwate chipwe kwivwa woma wa yize te muyilingiwako.”

17. Yika twalilongesa ha chilweza cha ndumbu Bob? (Tala nawa chizulie.)

 ¹⁷ Ndumbu Bob kahashile kumana nguu, mumu kaliangile kukwata chiyulo cha yize malinga muze maya ku shipitali. Chitangu, iye kazangile hanga chiyulo chenyi chivwise Yehova kuwaha. Chamuchiali, kalilongesele kanawa Mbimbiliya ni mikanda yetu ha yize yakwamba hakutwala ku ulemu wa manyinga ni mwono. Chamuchitatu, kapwile ni shindakenyo ngwenyi, kukaula usongwelo wa Yehova che muchimuyukisa ku mwono. Ni yetu nawa mutuhasa kukolesa mbunge yetu chipwe ngwe mutupalika mu kapinda mweswawo.

18. Yika chilweza cha Mbarake chinatulongesa ha kujikijila muli Yehova? (Tala chizulie ha chifukilo.)

¹⁸ Jikijila muli Yehova. Talenu chize Mbarake ayukile mumu lia kujikijila ha usongwelo wa Yehova. Ha mashimbu jacho, A-Izalele te keshi nawa ni uhashi wa kwasa jita mumu chipwe mata kakapwile no. Alioze, Yehova yalweza Mbarake hanga aye ni kwasa jita ni Sisera, mwata wa tujita twa A-Kanana waze apwile ni mata anji. (Kuyu. 5:8) Profeta wa pwo Debola, yalweza Mbarake aye ku chihela chize kushi milundu hanga ase jita ni Sisera hamwe ni matemba jenyi a jita 900. Chapwile chashi kuli A-Kanana kwashila jita ha chihela chize kuheshi milundu mumu lia matemba waze apwile no. Chipwe chocho, Mbarake yononokena shimbi ya Yehova. Muze maswalale te anapalumuka ku mulundu Tabore, Yehova yanokesa vula munji, chocho matemba a tujita twa Sisera yapatama mu malowa, mba Yehova yakwasa Mbarake kukumba Sisera. (Kuyu. 4:1-7, 10, 13-16) Chizechene nawa, Yehova matukwasa kukumba nyi mutujikijila muli iye ni ha usongwelo uze akutwaha kupalikila mu ululikiso wenyi.—Shimbi 31:6.

19. Mumu liaka unazange kununga ni kujikiza chakuhona kukokoloka?

¹⁹ Amu tuli hano hashi hapi, mutununga ni kwasa jita hanga tujikize chakuhona kukokoloka. (1 Timo. 6:11, 12; 2 Petu. 3:17) Twatamba kusa tachi hanga tuhone kukokoloka mumu lia yihungumiona, miheto ya Satana yize yahengama, kunyonga cha atu waze keshi kwononokena shimbi ja Yehova, sango ja mahuza ni yuma yize yakulalwisa atu. (Efwe. 4:14) Shimbu tukokoloke, tunungenu ni kumana nguu, ha kuzanga Yehova ni kwononokena shimbi jenyi. Chikwo nawa, tunafupiwa kupwa atu ashi hanji ngwetu atu waze keshi maka akolo. Ha mutwe uze muuhataho, mutumona chize Yehova ni Yesu ali yilweza yipema ha chikuma chino.