Tata kapwile pastor mu yingeleja Unida ya mu Canadá, hita poso yami ni mwanakwetu te kakututwala ku malongeso a mu yingeleja waze apwile ni kuhana kuli twanuke liayenga chimene. Ha ola 11 te twakuliwana eswe hanga twivwe pande mu yingeleja. Ha chingoloshi, te twakuya ku Zuwo lia Wanangana ni mama; chapwile chashi kumona kalisa watwama hakachi ka mayingeleja wano aali.

Mama yalweza yize te analilongesa kuli masepa jenyi Bob ni Marion, ayo no yatayiza umwenemwene. Ha 1958 alunga ni pwo wano hamwe ni ano atatu, yangutwala ku kukunguluka cha mbonge cha yifuchi yinji cha matangwa nake mu Nova Iorque, chambile ngwo: “Upale wa Zambi.” Musono, nakumona ngwami o kasele tachi jinji hanga angutwale mu wenyi wacho, alioze kukunguluka chacho chapwile chipema chinji kuli yami.

Ku ukweze wami, te natwama ku fazenda kuze te nakufunga yimuna, nyonga liami liapwile lia kupwa mukwa-kuuka yimuna. Mama yahanjika chikuma chacho kuli umwe mukulwana mu chikungulwila. Ni vumbi lieswe, iye yangulweza ngwenyi, tuli “ha matangwa a kusula,” kashika kuya ku shikola yinene ha miaka yinji muchihasa kupihisa usepa wami ni Yehova. (2 Timo. 3:1) Chocho, yingulitwamina kuya ku shikola yinene.

Chipwe chocho, te nakunyonga ha yize mungulinga muze nguhwisa shikola yikehe. Chipwe ngwe hita poso napwile ni kwambujola, nihindu te chishi kuzanga chinji kulinga mulimo wacho, chipwe kunyonga kupwa pionelu. Ha shimbu liacho, tata ni mwanakwo waze te hi Yela ko, yangukolweza kukalakala ku mulimo wa shimbu lieswe uze te watala ha yuma ya seguro mu Toronto. Mwanakwo ya tata kapwile ni chiteli chilemu ku mulimo wacho, chocho yingutayiza kuya ni kukalakalako.

Mu Toronto, napwile ni kukalakala ni kupalikisa mashimbu anji ni atu waze hi Yala ja Yehova ko.  Chocho, yinguputuka kupwa ni kapinda wa kuya ku kukunguluka ni kwambujola. Ku uputukilo napwile ku zuwo lia kaka yoze te hi Chela cha Yehova ko, alioze hanyima lia kufwa chenyi, yingufupa kuze te mungutwama.

Alunga ni pwo Hutchesons, waze angutwalile ku kukunguluka cha mbonge ha mwaka 1958 yapwa ngwe yisemi yami. Ayo yangusanyika hanga ngutwame no, chocho yangukwasa kukola ku ufulielo. Ha 1960, yangupapachisa hamuwika ni mwano, John. John yaputuka kukalakala ngwe pionelu, chino yichingukwasa kulihana chinji mu mulimo wa kwambujola. Mandumbu yaputuka kumona kukola chami ku ufulielo, chocho yangutongola ngupwe kasongo wa Shikola ya Milimo ya Zambi. a

Ha 1966, yingulimbata ni Randi Berge, umwe pionelu wajama yoze wazangile chinji kukalakala kuze kunafupiwa ukwaso. Kalayi wa mbonge yatukolweza tuye ni kukwasa chikungulwila cha Orillia, Ontario. Chocho yitulongeza yikwata ni kuya wenyi.

Muze twahetele mu Orillia, yinguputuka kukalakala ngwe pionelu wa shimbu lieswe hamwe ni Randi. Chocho, yinguputuka kuwahilila ngwe iye. Muze nalikolwezele hanga ngupwe pionelu mupema, yinguputuka kwivwa chiseke chize chakwiza ha kuzachisa Mbimbiliya ni kukwasa atu kunyingika umwenemwene. Chapwile chiwape chinene kukwasa alunga ni pwo mu Orillia alumune mwono wo ni kupwa tuvumbi twa Yehova.

Ha umwe wenyi mu Toronto, yinguliwana ni ndumbu Arnold MacNamara, yoze wapwile umwe wa kuli waze te akusongwela Mbetele. Iye yanguhula nyi nguzanga kukalakala ngwe pionelu walipwila. Hazehene yingukumbulula ngwami: “Nguhasa kuya kweswako, kuchizako Quebec!” Napwile ni nyonga lipi lia Quebec mumu lia yuma yize apwile ni kwamba atu a mu Canadá waze akuhanjika inglês hakutwala kuli atu a mu Quebec waze  akuhanjika francês. Ha mashimbu jacho, kwapwile chizavu cha mafwefwe cha atu waze azangile ngwo mbonge ya Quebec yitambule lipanda ku Canadá.

Ndumbu Arnold yamba ngwenyi: “Tala, Mbetele yinatumu wika pionelu alipwila ku Quebec.” Ha ola yizeyene yingutayiza, mumu nanyingikine ngwami, Randi kazangile chinji kukalakala ku Quebec. Hanyima yingumona ngwami chapwile chiyulo chipema chinji chize twakwachile ku mwono wetu.

Hanyima lia kulilongesa francês ha poso jitano, yami ni Randi hamuwika ni alunga ni pwo akwo, yituya ku Rimouski kuze ha kuhetako ndo twende kilometro 540 kukatuka ku Montreal. Te kanda tuhasa kuhanjika kanawa francês nachimwene zwalala ha chimwe kukunguluka muze te ngunatange umwe mutambi. Muze te ngunatu mutambi wa kukunguluka cha mambonge chize muchihataho, yingulumbanganyisa maliji, shimbu ngutange ngwami, mutukatambula “mandumbu a mu Áustria” yingutanga ngwami, mutukatambula “mandumbu a ku avestruja.”

Mu Rimouski, twatambwile ukwaso wa twamishi awana ni wa usoko Huberdeaus, waze apwile ni ana aali. Usoko Huberdeaus kalukalile limwe zuwo linene kuze te matwama mapionelu eswe. Mapionelu kakwashile kufweta lukeza wa zuwo liacho. Twapwile ni kusanyika zuwo liacho ngwo, zuwo litoma mumu lieswe liapwile lia ulombo utoma. Kanji-kanji, te twakutwamamo atu 12 hanji 14. Amu twapwile mapionelu alipwila, yami ni Randi te twakwambujola ha chimene ndo ha ufuku, twapwile ni kusakwilila ha kupwa ni mandumbu waze mutwambujola no chipwe ha ufuku muze kwapwile chishika chinji.

Twapwile ni usepa upema ni mapionelu jacho; ayo kapwile ngwe asoko jetu. Ha yisuho yimwe, twapwile ni kutwama ku sesa lia jiko; hakwo te twakusa mashimbu hanga eswe tuteleke hamuwika. Ndumbwetu umwe te kakwimba, kashika ha Sambata ufuku twapwile ni kwimba hamuwika ni kukina.

Atu anji mu Rimouski te kakuzanga kulilongesa Mbimbiliya. Ha kupalika cha miaka yitano wika, alongi anji a Mbimbiliya yaputuka kujama ni kwapapachisa, chocho chikungulwila yimupwa ni akwa-kwambujola 35.

Mu Quebec, twatambwile fumbo lipema lia chize twatamba kwambujola. Twamwene chize Yehova atukwashile mu munda ni ha kutwaha yuma ya ku musunya. Chikwo nawa, twalilongesele kuzanga atu a mu mbonge yacho, limi lio ni minyachi yo. Yino yiyitukwasa kuzanga nawa minyachi yikwo.—2 Kori. 6:13.

Chakuhona kushimbula, Mbetele yiyitutuma mu mbonge ya Tracadie, yize yapwile kuchivumbuko cha Nova Brunswick. Kwaluka chino chapwile chikalu, mumu te hitwalukala limwe zuwo; nawa te hinalisonekesa hanga ngukalakale ha amwe maola ha poso ngwe longeshi ku yimwe shikola. Chikwo nawa, alongi jetu amwe te hapwa akwa-kwambujola waze kanda achipapachisa; ni zuwo lietu lia Wanangana lize twapwile ni kutunga te kanda lichihwa.

Twalembele kusongo lia poso yeswe ni kuya kumeneka mbonge ya Tracadie yize te yalisa chinji ni ya Rimouski. Alioze yitutayiza kuyako mumu ye te Yehova anazange hanga tulinge. Twesekele Yehova ni kumona chize iye achijile yikwiko yeswe yize twapwile nayo. (Mala. 3:10) Cheka nawa, kwaluka chino chapwile chashi kuli Randi mumu kapwile ni usepa ukolo ni Yehova, mbunge ya kulihana ni uwahililo.

 Mu chikungulwila chetu mwapwile mukulwana umuwika, Robert Ross. Iye te kakukalakala ngwe pionelu mu mbonge yacho hamwe ni mukwo-pwo Linda. Ayo katesele kutwamamo muze mwano mutangu asemukine. Chipwe ngwe kapwile ni kufunga mwano, nihindu te kakwambujola chinji ni kuzumbula ngeji; yino te yakututakamisa.

Hanyima lia kukalakala ngwe pionelu mu Tracadie ha miaka yaali, yatwaha chiteli chikwo; kututuma mu mulimo wa kalayi wa mbonge. Ha miaka yinji twapwile ni kumeneka yikungulwila ya Inglês, hi kulutwe yatutuma tumeneke yikungulwila ya Francês mu Quebec. Kalayi ketu wa mbonge mu Quebec, Léonce Crépeault, kapwile ni kuchichimieka pande jize te nakulinga. Alioze, te kakunguhula ngwenyi: “Kuchi muhasa kupemesa pande je ha kushindakenya ha yikuma yilemu?” b Ukwaso uze anguhele wangukwashile, wa kulinga pande jize mandumbu mevwe kanawa ni kukwata yikuma yilemu.

Chiteli chimwe nakwiwuluka chinji chili chize napwile nacho ha kukunguluka cha mambonge cha yifuchi yinji, mu Montreal ha 1978, chambile ngwo: “Kukumba cha Ufulielo.” Napwile ni kukalakala mu chipatulo cha kuhana kulia, kanji-kanji ha kukunguluka chacho te hakupwa atu 80,000, chikwo nawa, twatambwile usongwelo waha wa chize mutulinga mulimo wacho. Yuma yeswe yapwile yaha, yikwata, kulia ni mutapu wa kululieka yuma. Twapwile ni makina 20 akufungila yuma hanga yikekeme, ha yisuho yimwe te keshi kukalakala kanawa. Mumu lia yiheho ya kwasa konda yize apwile ni kulinga, mba tululieke yuma yeswe te twakunjila mu estádio ha mandemba shimbu kukungulula kanda chiputuka. Twapwile ni kukwachisa fornu shimbu tangwa kanda litutuka hanga tulinge café wa chimene. Te twakuhonga chinji, alioze nalilongesele yuma yinji kuli akwa-kulihana ni akwetu waze apwile ni kukalakala chinji, chipwe chocho aku mawahilila. Usepa uze twalingile ha kukunguluka chacho muchinunga ndo musono. Kuli yetu chapwile chiwape chinene kupwa ha kukunguluka chacho mu Quebec, mbonge yize mwapwile yihungumiona yinji ha miaka 1940 ni 1950.

Nalilongesele yuma yinji kuli mandumbu waze te akukalakala mu yipatulo yinene-yinene ha kukunguluka cha mambonge mu Montreal. Mwaka umwe, David Splane yoze haliapwila uli mu Chizavu cha Tusongo mwe wapwile kalayi wa kukunguluka chacho. Ha kukunguluka chikwo, yami mwe ahele chiteli chacho mba David yangukwasa chinji.

 Ha 2011, muze te hitwalinga miaka 36 mu mulimo wa kalayi, yangusanyika hanga ngukalakale ngwe longeshi wa Shikola ya Makulwana a mu Chikungulwila. Ha miaka yaali wika mu chiteli chino, twapombele ha mihela 75, alioze tachi jetu kujalitokelele. Kusongo lia hita poso ku shikola, makulwana kapwile ni kuwahilila ni kusakwilila ha kumona chize Chizavu cha Tusongo chakulihulumba ha ufulielo wo.

Kulutwe yangusakula nawa hanga ngupwe longeshi wa Shikola ya Akwa-Kwambujola Wanangana. Kanji-kanji, alongi te kakuhonga chinji mumu lia katalilo mulemu yoze apwile nenyi. Kutwama maola shimbiali hita tangwa hanga aalongese, kulinga yize te akwatuma ku shikola ha maola atatu hita ufuku ni kululieka yihanda yiwana hanji yitano hita poso. Yami ni longeshi mukwo, twapwile ni kulumbunwina alongi ngwetu ayo mahasa wika kulinga yino yuma yeswe ni ukwaso wa Yehova. Nakwiuluka mashimbu eswe chize alongi apwile ni kukomoka ha kunyingika ngwo nyi majikijila wika kuli Yehova mahasa kulinga yuma yeswe. Ayo kahashile kulinga yuma yinji kuhiana yize apwile ni kunyonga.

Kulihulumba chize mama asolwele hali akwo, chatwalile alongi jenyi kusenya kulutwe, ni kukwasa chipwe tata kwalumuna nyonga lienyi hakutwala ku umwenemwene. Ha kupalika cha matangwa atatu chize haze mama afwile, twakomokene ha kumona tata kanayi ku kukunguluka mu Zuwo lia Wanangana hanga apanjike pande ja mbunga, iye yanunga ni kukunguluka ha miaka 26. Tata kakamupapachishile, alioze makulwana kangulwezele ngwo hita poso iye kapwile mutu mutangu kuheta ku kukunguluka.

Mama kapwile chilweza chipema kuli yami ni kuli anakwetu atatu. Ayo eswe hamwe ni malunga jo kananungu ni kuwayila Yehova ni ushishiko. Aali kanakalakala ku Mbetele, umwe ku Portugal, mukwo ku Haiti.

Haliapwila, yami ni Randi tunakalakala ngwe mapionelu alipwila mu Hamilton, Ontário. Muze twapwile mu mulimo wa kumeneka yikungulwila, te twakuzanga kuya hamwe ni mandumbu ni kumeneka alongi jo ni kusongwela malongeso a Mbimbiliya. Haliapwila tunawahilila ha kupwa ni alongi jetu a Mbimbiliya ni kumona chize anakolo ku ufulielo. Mu chikungulwila chaha muze tuli, tuli hakamwihi ni mandumbu jetu, nawa twakutakama chinji ha kumona chize Yehova akukwasa hita umwe wa kuli ayo ha mashimbu api ni apema.

Muze twakutala kunyima, twakuhasa kumona zango lize atu anji akutusolwela. Kashika ni yetu twakusa tachi hanga tusolwele akwetu “zango” ni kwatakamisa ha kulihana cho mu mulimo wa Yehova. (2 Kori. 7:6, 7) Chakutalilaho, umwe mama ni mwanenyi wa lunga ni wa pwo te kanakalakala mu mulimo wa shimbu lieswe. Yinguhula mukwo lunga ngwami, hiunanyongo kama kupwa pionelu, iye yamba ngwenyi: “Yami ngunakwase mapionelu atatu kuno ku zuwo.” Mba yingumuhula nawa ngwami: “Shina ukwaso uze wakuhana unahiana ukwaso uze Yehova akwaha?” Yingumulweza ngwami ni iye te mahasa kupwa ni uwahililo uze asoko jenyi ali nawo. Ha kupalika cha tukweji asambano neye yapwa pionelu.

Yami ni Randi mutununga ni kuhanjika ha yitanga yipema ya Yehova ku yisemuko yize muyizaho, chikwo nawa, tunashimbwila ngwetu no mapwa ni uwahililo ngwe uze yetu twapwa nawo mu mulimo wa Yehova.—Samu 71:17, 18.