1. Umwenemwene uka wanyingikine muze waputukile kulilongesa Mbimbiliya?

 SHINA unewuluka muze waputukile kulilongesa Mbimbiliya? Kota wakomokene ha kunyingika ngwe, Zambi kakwete jina. Hanji wahwimine mbunge ha kunyingika ngwe, Zambi keshi kumwesa atu lamba mu chitende cha kahia. Kota wevwile kuwaha muze walilongesele ngwo, mukamona asoko ni masepa je waze hanafu ni kutwama no hamuwika mu paraisu.

2. Kuchizako kulilongesa umwenemwene wa mu Mbimbiliya, yika walinga nawa hanga ujame ku ufulielo? (A-Efwesu 5:1, 2)

² Muze wanungine ni kulilongesa Mbimbiliya, zango lie hali Yehova yilinunga ni kukola. Zango liacho liakutwalile ukaule yize unalilongesa. Chocho yiuputuka kukwata yiyulo yipema yize yinakatuka ha shimbi ja mu Mbimbiliya. Waluliekele mwono ni yitanga ye mumu wazangile kuvwisa Zambi kuwaha. Chizechene ngwe mwana akwimbulula tato yoze wakumuzanga, ni yena yiuputuka kwimbulula Tatenu wa mu malilu.—Tanga A-Efwesu 5:1, 2.

3. Yika mutuhasa kulihula?

³ Mutuhasa kulihula ngwetu: ‘Shina haliapwila ngunazange chinji Yehova kuhiana muze naputukile kulilongesa Mbimbiliya? Hanyima lia kungupapachisa, shina ngunembulula Yehova ha yize nakunyonga ni ha yuma yize nakulinga? Shina ngunazange chinji mandumbu jami a ku ufulielo?’ Nyi zango lize wapwile nalio ku uputukilo linakekema kanda unenganyana; yuma ya mutapu au yalingiwile kuli Akwa-Kristu ku sekulu yitangu. Yesu kakeehukile, kashika ni yetu kechi kutwehuka. (Uso. 2:4, 7) Iye kananyingika ngwenyi, mutuhasa kufunyina zango lize twapwile nalio muze twaputukile kulilongesa Mbimbiliya.

4. Yika mutulilongesa ha mutwe uno?

 ⁴ Ha mutwe uno, mutulilongesaho chize mutuhasa kununga ni kukolesa zango lietu hali Yehova ni hali mandumbu jetu. Chikwo nawa, mutumona yiwape yize mutuzuka nyi mutununga ni kukolesa zango lietu hali Yehova ni hali akwetu.

5-6. Kapinda muka Paulu amwe mu mulimo wa kwambujola, mba yika yamukwashile kununga ni kuzanga Yehova?

⁵ Postolo Paulu te kakuwahilila chinji ha kulingila Yehova, alioze chino kuchakapwile chashi mashimbu eswe. Kanji-kanji, Paulu te kakulinga wenyi wa kuya kusuku, ha mashimbu jacho kulinga wenyi kuchakapwile chashi. Mu wenyi wacho, Paulu te kakupalika “mu ponde ya ngiji” ni ‘mu ponde ya yilianyi.’ Ha mashimbu amwe, akwa-kole jenyi te kakumulamba. (2 Kori. 11:23-27) Chikwo nawa, hi ha yisuho yeswe ko mandumbu apwile ni kulemesa tachi jize te akusa hanga aakwase.—2 Kori. 10:10; Fwili. 4:15.

⁶ Mba yika yakwashile Paulu kununga ni kulingila Yehova? Iye kalilongesele utu wa Yehova kupalikila mu Yisoneko ni ha yize apalikile ku mwono wenyi. Chocho yapwa ni shindakenyo ngwenyi, Yehova te kakumuzanga. (Roma 8:38, 39; Efwe. 2:4, 5) Paulu te kakuzanga chinji Yehova. Iye kasolwele zango liacho “ha kulingila asandu ni kununga ni kwalingila.”—Hepre. 6:10.

7. Yika mutuhasa kulinga mba twokese zango lietu hali Yehova?

⁷ Mutuhasa kwokesa zango lietu hali Yehova ha kulilongesa kanawa Liji lienyi. Muze unatange Mbimbiliya, fupa kunyingika yize hita lusango anakulongesa hakutwala kuli Yehova. Lihule ngwe: ‘Kuchi lusango yono anasolola ngwo, Yehova kakunguzanga? Kuchi lusango yono anangukwase kuzanga chinji Yehova?’

8. Kuchi kulemba muchitukwasa kwokesa zango lietu hali Zambi?

⁸ Mutapu ukwo uze mutuhasa kwokeselamo zango lietu hali Yehova, uli kulemba kuli iye ni mbunge yeswe. (Samu 25:4, 5) Nyi twachilinga, Yehova makumbulula yilemba yetu. (1 Yoa. 3:21, 22) Khanh, umwe ndumbu wa pwo mu Ásia, yamba ngwenyi: “Ku uputukilo napwile ni kuzanga Yehova mumu lia yize te nakulilongesa hakutwala kuli iye. Alioze kulutwe, muze napwile ni kumona Yehova makumbulula yilemba yami; yinguputuka kumuzanga chinji kuhiana. Chino changutwalile kulinga yuma yize muyimuvwisa kuwaha.” b

9. Kuchi tunanyingika ngwetu, Timoteu te kakuzanga chinji mandumbu jenyi?

⁹ Ha kupalika cha yimwe miaka muze te hapwa Mukwa-Kristu, Paulu yanyingika umwe mukweze yoze te avuluka ngwo, Timoteu. Timoteu kapwile ni kuzanga Yehova ni atu. Paulu yalweza A-Fwilipu ngwenyi: “Chishi ni mukwo yoze wakulihana ngwe iye [Timoteu] yoze makanufunga kanawa.” (Fwili. 2:20) Hano, Paulu kakapwile ni kuhanjika ha uhashi wa Timoteu wa kululieka yuma hanji wa kuhanjika kanawa pande, alioze kahanjikile ha zango lize Timoteu apwile nalio hali mandumbu. Chochene, yikungulwila yize Timoteu apwile ni kumeneka, mandumbu te kakuzanga chinji kupwa nenyi hamuwika.—1 Kori. 4:17.

10. Kuchi Anna ni mukwo-lunga asolwele ngwo kakuzanga mandumbu jo?

¹⁰ Ni yetu twakufupa majila a kukwashilamo mandumbu jetu. (Hepre. 13:16) Talenu chilweza cha Anna yoze twatongolanga ha mutwe wapalika. Hanyima lia umwe  kakundukundu, iye ni mukwo-lunga yaya ni kumeneka amwe asoko Yela ja Yehova ku zuwo lio. Hachino, yanyingika ngwo fulumba ya zuwo lio yapihile ku kakundukundu. Ha mukunda wa chino, asoko kakapwile nawa ni mazalo apema a kuzala. Anna yamba ngwenyi: “Twanjile mazalo jo; yitwakosa ni kwakoma. Kuli yetu, yino yapwile wika yuma yikehe, alioze mutuchinunga kupwa masepa ndo musono.” Zango lize Anna ni mukwo-lunga akwete hali mandumbu jo, liaatwalile kwakwasa ha yize te anafupiwa.—1 Yoa. 3:17, 18.

11. (a) Kuchi atu waze twakulingila yuma yipema akulivwa? (b) Kulita ni Yishima 19:17, yika Yehova akulinga muze twakuzanga akwetu?

¹¹ Nyi mututwama kanawa ni akwetu ni kwazanga, ayo mamona ngwo tunase tachi hanga twimbulule Yehova. Yetu hanji kutuchi kunyingika chize akwetu akulemesa yuma yipema yize twakwalingila. Ndumbu Khanh yoze twatongola helu, kanewuluka kanawa mandumbu waze amukwashile. Yamba ngwenyi: “Nakusakwilila chinji mandumbu waze te nakuya no mu munda. Ayo te kakwiza ni kungwanda ku zuwo; mutuya ni kulia, hanyima mba mangufunyisa ku zuwo. Haliapwila hinanyingika ngwami, yino te yakwaha mulimo unji. Yino yeswe te kakuyilinga ni zango.” Chipwe ngwe atu anji kechi kutuchichimieka ha yuma yipema yize twakwalingila, Khanh yamba hali atu waze amukwashile ngwenyi: “Ngunazange kwalingila yuma yeswe yipema yize o angulingilile, alioze kuchanyingikine nawa kuze atwama. Chipwe chocho, Yehova kananyingika, kashika nakulemba hanga Yehova aalingile yuma yize yami chichi kuhasa kulinga.” Khanh kamba umwenemwene. Yehova kakumona yuma yeswe yipema yize twakulingila akwetu chipwe ngwe yuma yacho yili yikehe-yikehe. Iye kakuyilemesa ni kuyimona ngwe kongo lize makatufweta kulutwe.—Tanga Yishima 19:17.

12. Yika mandumbu a malunga mahasa kulinga yize muyisolola ngwo, kanazange mandumbu jo mu chikungulwila? (Tala nawa yizulie.)

 ¹² Nyi uli ndumbu wa lunga, kuchi muhasa kusolwela akwenu zango ni kwakwasa? Umwe mukweze avuluka ngwo Jordan, kahulile kuli umwe mukulwana wa mu chikungulwila ha yize te malinga hanga akwase chinji mandumbu. Mukulwana yamuchichimieka ha yize te akulinga mu chikungulwila, mba yamwaha yiyulo ya yize te malinga hanga akwase chinji chikungulwila. Chakutalilaho, yamulweza hanga apwe ni kulianga kuheta ku kukunguluka ni kumeneka akwo. Chikwo nawa, yamulweza hanga apwe ni kukumbulula ha kukunguluka ni kwambujola hamuwika ni mandumbu a mu chizavu chenyi, ni kufupa majila a kukwashilamo mandumbu jenyi ha yize anafupu. Jordan yakaula yiyulo yino, hachino kuchizako kulilongesa utotombo waha, iye nawa yaputuka kuzanga chinji mandumbu jenyi. Jordan kanyingika ngwenyi, nyi ndumbu mapwa kavumbi, iye keshi kuputuka kukwasa akwo, alioze kananungu ni kwakwasa.—1 Timo. 3:8-10, 13.

13. Kuchi zango liakwashile ndumbu Christian kutayiza nawa mulimo wa ukulwana?

¹³ Mba yika mutwamba nyi kunyima wapwile kavumbi hanji mukulwana mu chikungulwila? Yehova kakwiwuluka milimo yeswe yize walingile kunyima, ni yize yakutwalile mba uyilinge. (1 Kori. 15:58) Iye nawa kakumona zango lize unanungu ni kusolola. Ndumbu Christian, kanenganyanyine chinji muze echele kukalakala ngwe mukulwana mu chikungulwila. Chipwe chocho, yamba ngwenyi: “Natesele kulinga yeswayo munguhasa hanga ngununge ni kuwayila Yehova ni kumuzanga chipwe ngwe nguli ni yiteli hanji ka.” Ha kupalika cha mashimbu, Christian yapwa nawa mukulwana mu chikungulwila. Mwene yamba ngwenyi:  “Kufunyina mulimo wa ukulwana chapwile ni kunguvwisa ndambu ya woma. Alioze nanyingikine ngwami, nyi Yehova mumu lia keke yenyi kanazange ngupwe nawa mukulwana, yino ye natamba kulinga, mumu nakumuzanga ni kuzanga mandumbu jami.”

14. Yika walilongesa ha maliji a ndumbu Elena?

¹⁴ Tuvumbi twa Yehova kakuzanga nawa chinji atu-ni-akwo. (Mateu 22:37-39) Chakutalilaho, ndumbu Elena yoze watwama mu Geórgia, yamba ngwenyi: “Ku uputukilo, chuma chize chapwile ni kungutwala mba ngwambujole kuli atu, chapwile zango lize te ngukwete hali Yehova. Alioze, muze zango liami hali Yehova liokele, chocho yinguputuka kuzanga chinji atu. Te nakunyonga ha hita kapinda yoze atu anapalika ni ha yize muyaakwata ku mbunge muze ngwambulwila sango jipema. Muze napwile ni kunyonga chocho hali atu; te nakuzanga chinji kwakwasa.”—Roma 10:13-15.

15-16. Ngwe chize tunamono ha yizulie, yuma yika yipema yize muyihasa kulingiwa nyi mutusolwela akwetu zango?

¹⁵ Muze twakusolwela mandumbu jetu zango, atu akwo no kakuyuka ha zango liacho. Muze musongo wa COVID-19 waputukile, ndumbu Paolo ni mukwo-pwo, kakwashile mandumbu anji a mapwo tushinakaji azachise matelefone ni yisaji yikwo hanga ambujole. Umwe pangi yoze te keshi kuhasa kuzachisa telefone, kahashile kuyizachisa hanga ambujole.  Amu ahashile kukalakala nayo, chocho yasanyika asoko jenyi ha chiwanyino cha kufwa cha Yesu. Asoko jenyi makumi asambano kahashile kukunguluka ha videoconferência! Mumu lia tachi jize Paolo ni mukwo-pwo asele, chocho ndumbwetu ni asoko jenyi yayuka ha kupwa ha chiwanyino cha kufwa cha Yesu. Kulutwe, pangi wacho yasonekene Paolo ngwenyi: “Twasakwila chinji ha kukwasa tushinakaji mu chikungulwila, chichi keza kavulama chize Yehova akulihulumba hali yetu ni tachi jize nwasele hanga nutukwase.”

¹⁶ Yilweza ya mutapu au yakwasa Paolo kuwana longeso lilemu. Kalilongesa ngwenyi, zango linahiane yinyingi hanji utotombo. Yamba ngwenyi: “Kunyima napwile kalayi wa mbonge. Musono, nakumona ngwami chipwe ngwe mandumbu keshi kwiwuluka nawa pande jize napwile ni kulinga, nihindu machiwuluka yuma yize nalingile hanga ngwakwase.”

17. Nyi mutusolola zango, iya nawa mahasa kuyuka?

¹⁷ Muze twakusolwela akwetu zango, ni yetu twakuyuka mu jila yize te kutushi ni kushimbwila. Jonathan, yoze watwama mu Nova Zelândia kanatayiza nyonga liacho. Ha yimwe Sambata chingoloshi muze te kunasasaminya chinji; yamona umwe pionelu yoze te unambujola ukawenyi. Jonathan yatesa kukalakala ni ndumbu wacho, mu Sambata jize te mujihataho. Iye kakanyingikine chize yuma yipema yize te malinga muyimuyukisa mwene. Jonathan yamba ngwenyi: “Ha mashimbu jacho, yami te chishi kuzanga chinji kwambujola. Alioze, hanyima lia kumona chize pionelu wacho te akulongesa ni yize te yakwiza ku mulimo wenyi, yinguputuka kuzanga mulimo wa kwambujola. Chikwo nawa, yingupwa ni sepa mupema yoze wangukwashile kukola ku ufulielo, kuzanga mulimo wa kwambujola ni kukundama chinji kuli Yehova.”

18. Yika Yehova anazange hanga tulinge?

¹⁸ Yehova kanazange hanga yetu eswe twokese zango lietu hali iye ni hali akwetu. Ngwe chize twalilongesa ha mutwe uno, mutuhasa kukolesa zango lietu hali Yehova ha kutanga Liji lienyi ni kulipukuna ni kulemba kuli iye mashimbu eswe. Mutuhasa kusolola zango hali mandumbu jetu, ha kwakwasa ha yize anafupiwa. Nyi zango lietu mulioka, mutukundama kuli Yehova ni kuli mandumbu jetu. Chikwo nawa, usepa wacho muununga ku miaka yeswe!