1. Mumu liaka chili chilemu kulianga kulilulieka shimbu kanda kulingiwa luyinda?

 KULIANGA kulilulieka muchihasa kulamwina mwono. Chakutalilaho, muze kwakulingiwa umwe luyinda, atu waze akulianga kulilulieka, kakulilamwina ni kukwasa akwo. Chimwe chizavu chize chakukwasa atu ku Europa, chinambe ngwo: “Kulilulieka kanawa muchihasa kulamwina mwono wa atu.”

2. Mumu liaka twatamba kulilulieka hakutwala ku luyinda munene? (Mateu 24:44)

² “Luyinda munene” makaputuka susumuku. (Mateu 24:21) Alioze, kulisa ni luyinda yoze wakulingiwa musono, luyinda munene twakumushimbwila. Ha miaka 2,000 kunyima, Yesu katowezele tumbaji twenyi ngwenyi, katamba kulilulieka hakutwala ku tangwa liacho. (Tanga Mateu 24:44.) Nyi twalianga kulilulieka, muchikapwa chashi kunyongonona ha mashimbu jacho akalu ni kukwasa akwetu hanga no anyongonone.—Luka 21:36.

3. Kuchi kunyongonona, keke ni zango muyitukwasa kulilulieka hakutwala ku luyinda munene?

³ Tuhengwolenu yitanga yitatu yize muyihasa kutukwasa hanga tulilulieke hakutwala ku luyinda munene. Yika mutukalinga nyi matuhungumiona mumu lia kwambujola sango ja upatwilo? (Uso. 16:21) Mutukafupiwa kunyongonona mba twononokene Yehova, ni kufuliela ngwetu matufunga. Yika mutukalinga nyi mandumbu jetu matokesa yuma yo yeswe. (Haba. 3:17, 18) Mutukafupiwa kusolola keke mba tuhase kwaha ukwaso uze anafupiwa. Yika mutukalinga muze makatulukukila kuli akwa-mavungu, mba hi chino muchitutwala tutwame ni mandumbu jetu mu chimwe chihela chikehe? (Eze. 38:10-12) Mutukafupiwa kuzanga chinji mandumbu jetu mba tukahase kupalika ha mashimbu jacho akalu.

4. Kuchi Mbimbiliya yinasolola ngwo twatamba kununga ni kunyongonona, kusolola keke ni zango?

 ⁴ Liji lia Zambi liakutukwasa hanga tununge ni kusolola yitanga ngwe, kunyongonona, keke ni zango. Luka 21:19 unambe ngwo: ‘Nyi nwanyongonona munukalamwina mwono wenu.’ A-Kolosu 3:12 unambe ngwo: ‘Zalenu keke.’ 1 A-Tesalonika 4:9, 10 unambe ngwo: ‘Zambi kakunulongesa hanga nulizange umwe ni mukwo. . . . Alioze, tunaliumbu mandumbu hanga nununge ni kuchilinga chinji kuhiana.’ Maliji wano kaasonekenene tumbaji waze te akusolola kunyongonona, keke ni zango. Chipwe chocho, ayo katambile kununga ni kusolola yitanga yacho. Ni yetu che twatamba kulinga. Kashika, chitangu mutumona chize Akwa-Kristu ku sekulu yitangu apwile ni kusolola yitanga yino. Mba hi mutumona chize mutuhasa kwimbulula tumbaji jacho ni kusolola ngwetu hitwalilulieka hakutwala ku luyinda munene.

5. Kuchi Akwa-Kristu atangu ahashile kunyongonona mu yipikalo?

⁵ Akwa-Kristu atangu kafupiwile kunyongonona. (Hepre. 10:36) Ayo kapwile ni kupalika mu yipikalo ngwe yize apwile ni kupalika atu eswe ha mashimbu jacho. Alioze, o kapwile ni kapinda munji mumu lia kupwa Akwa-Kristu. Anji a kuli ayo kahungumionene hi wika ko kuli mangana A-Yunda ni kuli nguvulu wa A-Roma, alioze ni kuli asoko jo nawa. (Mateu 10:21) Mu chikungulwila, ha mashimbu amwe o katambile kusa tachi hanga ehuke manyonga a yitanganyanyi waze afupile kuhandununa mandumbu. (Yili. 20:29, 30) Chipwe chocho, Akwa-Kristu jacho kanyongonwene. (Uso. 2:3) Kuchi ahashile kuchilinga? Ayo kapwile ni kunyonga ha yilweza ya kunyongonona yize te akuwana mu Yisoneko ngwe chilweza cha Yombi. (Tia. 5:10, 11) Te kakulemba kuli Yehova hanga aehe tachi. (Yili. 4:29-31) Chikwo nawa, te kakulihulikila ha yuma yipema yize apwile ni kuzuka ku kunyongonona cho.—Yili. 5:41.

6. Yika walilongesa ha chize Merita ahashile kunyongonona mu yipikalo?

⁶ Ni yetu mutuhasa kunyongonana nyi mutununga ni kulilongesa ni kupukuna ha yilweza ya kunyongonona yize yili mu Liji lia Zambi ni mu mikanda yetu. Merita, umwe ndumbu wa pwo yoze watwama mu Albânia, che alingile mba yahasa kukumba yihungumiona ya asoko jenyi. Yamba ngwenyi: “Lusango wa Yombi yoze uli mu Mbimbiliya, kangukwachile chinji ku mbunge. Iye kamwene lamba linji, nawa te kanyingikine yoze unamumwesa lamba liacho, chipwe chocho yamba ngwenyi: ‘Ndo kufwa chami chichi kwecha ungunu wami.’ (Yombi 27:5) Yipikalo yami yapwile yikehe chinji nyi nayitesa ni ya Yombi. Kulisa ni Yombi, yami nanyingikine waze te anangunehena yipikalo yacho.”

7. Chipwe ngwe kuushi kupalika mu kapinda munene haliapwila, yika watamba kulilongesa kulinga?

⁷ Ni yetu mutuhasa kukolesa kunyongonona chetu nyi mutulemba kuli Yehova mashimbu eswe ni kumulweza yize yinatupinjisa. (Fwili. 4:6; 1 Tesa. 5:17) Hanji ha mashimbu wano kuushi kupalika mu kapinda munene. Alioze, shina wakulemba kuli Yehova ni kwita ukwaso wenyi muze unevu uli hanji muze kuwamwene yize mulinga? Nyi ukwete chako cha kwita ukwaso wa Yehova hanga ukumbe yipikalo yikehe-yikehe ya hita tangwa, che mukalinga nawa muze mukapalika mu kapinda munene kulutwe. Hachino, mukapwa ni shindakenyo ngwe Yehova kananyingika shimbu lize makukwasa ni chize machilinga.—Samu 27:1, 3.

8. Kuchi chilweza cha Mira chinatukwase kunyingika ngwetu, kunyongonona mu yipikalo musono, muchitukwasa kunyongonona mu yipikalo yize muyiza kulutwe? (Tiangu 1:2-4) (Tala nawa chizulie.)

⁸ Nyi mutunyongonona haliapwila mu yipikalo yize tunapalika ku mwono, muchikapwa  chashi kunyongonona ha luyinda munene. (Roma 5:3) Kuchi tunachinyingika? Mandumbu anji hananyingika ngwo, hita shimbu mapalika mu cheseko cha ku ufulielo, kakupwa ni tachi ja kunyongonona mu yipikalo yize muyiza kulutwe. Muze akupalika mu yipikalo mba manyongonona, ufulielo wo ha ukwaso wa Yehova wakwoka chinji. Ufulielo wacho wakwakwasa kukumba yipikalo yize muyiza kulutwe. (Tanga Tiangu 1:2-4.) Yino ye yalingiwile kuli Mira, umwe pionelu ku Albânia. Yipikalo yize apalikile kunyima yakumukwasa kununga ni kunyongonona musono. Yamba ngwenyi, ha mashimbu amwe kapwile ni kunyonga ngwe iye wika mwe unapalika mu yipikalo yinji. Alioze te kakwiwuluka yize Yehova amulingilile ha kupalika cha miaka 20, mba maliamba mwene ngwenyi: ‘Nunga ni kushishika kanda wecha miaka yeswayi ni yipikalo yize wakumba ni ukwaso wa Yehova yilitokele.’ Ni yena muhasa kupukuna ha chize Yehova akukwashile hanga unyongonone. Pwako ni shindakenyo ngwe, Yehova kakumona yisuho yeswe yize wakunyongonona, chikwo nawa, makakuyukisa. (Mateu 5:10-12) Muze luyinda munene makaputuka, mukahasa kunyingika chize munyongonona ni kununga ni kuchilinga.

9. Kuchi mandumbu a mu chikungulwila cha Andiakia ya ku Seria asolwele keke?

⁹ Talenu yize yalingiwileko muze Akwa-Kristu mu Yundeya apalikile mu kapunga. Muze mandumbu a mu chikungulwila cha Andiakia ya ku Seria evwile lusango hakutwala ku kapunga wacho, ayo yevwila keke mandumbu jo a mu Yundeya. Alioze kakasulilile wika ha kwevwila keke, ayo kalingile yimwe mumu lia keke yacho. “Yatesa mutu ni mutu kulita ni uhashi wenyi, kutuma ukwaso kuli mandumbu waze te atwama mu Yundeya.” (Yili. 11:27-30) Chipwe ngwe, mandumbu waze apwile mu kapunga kapwile kusuku chinji, Akwa-Kristu mu Andiakia katesele kukwasa mandumbu jo.—1 Yoa. 3:17, 18.

10. Kuchi mutuhasa kusolola keke muze mandumbu jetu mapalika mu umwe luyinda? (Tala nawa chizulie.)

¹⁰ Ni yetu musono mutuhasa kusolola keke muze mutunyingika ngwetu, mandumbu jetu amwe kanapalika mu luyinda. Amu twakuzanga kukwasa kawashi-washi, muchilita kuhanjika ni makulwana hanga atulweze ha yize mutuhasa kukwasa. Mutuhasa kuhana milambu hanga tukwase mulimo wa hashi heswe ni kulembela mandumbu jetu waze anapalika mu luyinda. b (Yishi. 17:17) Chakutalilaho, ha mwaka wa 2020, ululikiso watungile yizavu ya akwa-kukwasa 950 hashi eswe, hanga yikwase mandumbu waze te anafupiwa ukwaso ha mashimbu a musongo wa COVID-19. Tunasakwilila chinji mandumbu jetu waze akulihana hanga akwase mulimo uno. Mumu lia keke, ayo kakutwala yuma ya ku musunya, kuhana ukwaso wa ku ufulielo, ha mashimbu amwe kululieka hanji kutungulula mazuwo ja mandumbu ni Mazuwo a Wanangana.—Tala nawa 2 A-Korindu 8:1-4.

11. Kuchi twakuhalisa Yehova muze twakusolwela akwetu keke?

¹¹ Muze twakusolola keke kuli waze anapalika mu luyinda, atu akwo kakumona mulimo uze twakulinga. Chakutalilaho, ha mwaka 2019, kakundukundu umwe kapuzwile zuwo lia Wanangana ku Bahamas. Muze mandumbu te anatungulula zuwo liacho, ayo yahula kuli mwenya milimo yoze te hi Chela cha Yehova ko, mbongo jize meta hanga alinge umwe mulimo, iye yaalweza ngwenyi: “Yenu kunwatambile kungufweta nichimwe . . . mungunwaha yikwata ya kutunga nayo, atu waze malinga  mulimo wacho ni yize munuzachisa . . . Yino ngunayilingi wika ku ululikiso wenu. Nakukomoka chinji ha yize nwakulingila mandumbu jenu.” Atu anji hano hashi kanyingikine Yehova, alioze ayo kakumona Yela ja Yehova. Kashika twakuwahilila ha kunyingika ngwetu, muze twakusolwela akwetu keke, chino chakutwala atu akwo alilongese hali Yehova, Zambi ‘wa too ni keke.’!—Efwe. 2:4.

12. Kuchi kusolola keke musono muchitululieka ha luyinda munene? (Usolwelo 13:16, 17)

¹² Mumu liaka ha luyinda munene mutukafupiwa kusolola keke? Mbimbiliya yakusolola ngwo, waze keshi kulinga yuma ya mafwefwe, mapalika mu lamba linji musono ni ha mashimbu a luyinda munene. (Tanga Usolwelo 13:16, 17.) Mandumbu jetu mahasa kufupiwa ukwaso chipwe wa yuma yikehe-yikehe ya ku mwono. Muze Mwanangana wetu, Yesu Kristu makeza ni kupatwila atu, tunazange iye akamone ngwo, twakusolola keke ni kutusanyika hanga ‘tuhinge Wanangana.’—Mateu 25:34-40.

13. Ngwe chize anasolola ha A-Roma 15:7, kuchi Akwa-Kristu ku sekulu yitangu alitakamishine mu zango?

¹³ Ku sekulu yitangu, zango liapwile chitanga chilemu chize te chakusolola Akwa-Kristu amwenemwene. Alioze, shina chapwile chashi kuli ayo kusolola zango? Talenu kalisa yoze wapwile mukachi ka mandumbu mu chikungulwila cha Roma. Mukachi ko mwapwile A-Yunda waze akolele kulita ni shimbi ya Mose, mwapwile nawa akwa-mavungu waze akolele ha kukaula shimbi jeka. Akwa-Kristu amwe kapwile ndungo, akwo ka, eka hanji e apwile enya ndungo. Kuchi Akwa-Kristu wano ahashile kukumba kalisa yono ni kukolesa zango mukachi ko? Paulu kakolwezele mandumbu ngwenyi: “Litambulenu umwe ni mukwo.” (Tanga A-Roma 15:7.) Yika ambile kwamba ni maliji wano? Liji lia Ngregu analumbununa hano ngwo, “litambulenu,” linalumbunuka kutambula mutu hanji kumuzumbula ngwe chize twakutambula atu ku mazuwo jetu hanji kwatayiza apwe masepa jetu. Chakutalilaho, Paulu kalwezele Fwilimu ngwenyi, te katamba ‘kutambula ni zango’ Onesimu, ndungo yenyi yoze wamuchinyine. (Fwilim. 17) Akwila ni Prisila no katambwile Apolu; “yamusanyika kutenga” ni kumulumbunwina kanawa jila ya Kristu. (Yili. 18:26) Shimbu eche hanga kalisa mukachi ko aahandunune, Akwa-Kristu jacho kakumbile kalisa wacho ha kulitambula ni zango.

14. Kuchi Anna ni mukwo-lunga asolwele zango?

¹⁴ Ni yetu nawa mutuhasa kusolola zango kuli mandumbu jetu ha kulikata no ni kupalikisa no mashimbu hamuwika. Chino muchihasa kwatwala no hanga atusolwele zango. (2 Kori. 6:11-13) Talenu yize yalingiwile kuli Anna ni mukwo-lunga. Hanyima lia kutambula chiteli chaha cha mishionaliu ni kuya ku África Ocidental, musongo wa COVID-19 yiuputuka. Amu te machiheta kuze aatumine, ayo kakapwile ni uhashi wa kuliwana ni mandumbu. Yika alingile mba asolole zango? Ayo te kakusanyika mandumbu ha videoconferência hanga ahanjike no ni kwasolwela ngwo kanazange chinji kwanyingika. Mandumbu kanakawahilila chinji ha zango lize mishionaliu aasolwelele, chocho yaputuka kwasanyika ni kwatumina mesage. Mumu liaka lunga ni pwo wano asele tachi hanga anyingike mandumbu jo? Anna yamba ngwenyi: “Chichi keza kavulama yize mandumbu alingile hanga angusolwele zango hamwe ni usoko wami ha mashimbu api ni ha mashimbu apema; chilweza cho chinangukwase ni yami kusolwela akwetu zango.”

15. Yika walilongesa hali Vanessa hakutwala ku kuzanga mandumbu jetu eswe?

¹⁵ Yetu eswe tuli mu yikungulwila muze muli mandumbu a ku minyachi yeka ni yeka, nawa akwete utu walisa. Mutuhasa kuzanga chinji  mandumbu wano eswe, ha kulihulikila ha yitanga yo yipema. Vanessa, umwe ndumbu wa pwo mu Nova Zelândia, te keshi kuhasa kutwama ni mandumbu amwe mu chikungulwila cho. Hachino, shimbu ehuke mandumbu waze apwile ni kusolola yitanga yize te yakumuvwisa kupihia, iye yasa tachi hanga apwe ni kupalikisa no mashimbu anji hamuwika. Kulinga chino, chamukwashile kumona yize Yehova akuzanga muli mandumbu jacho. Yamba ngwenyi: “Chize haze mukwetu-lunga apwile kalayi wa mbonge, chocho yituputuka kupalikisa mashimbu ni mandumbu waze akwete yitanga yalisa. Haliapwila nakuhasa kutwama no kanawa; nakuzanga chinji kalisa wacho. Yehova neye kakuzanga kalisa yono, mumu atu waze akukoka mu ululikiso wenyi kalisa.” Muze twakulilongesa kumona akwetu ngwe chize Yehova akwamona, acho twakusolola ngwetu twakwazanga.—2 Kori. 8:24.

16. Mumu liaka ha luyinda munene mutukafupiwa kuzanga chinji mandumbu jetu eswe? (Tala nawa chizulie.)

¹⁶ Ha luyinda munene, mutukafupiwa chinji kuzanga mandumbu jetu eswe. Kuchi Yehova makatufunga muze luyinda munene maputuka? Tutalenu yize Yehova atumine tuvumbi twenyi kulinga muze aalukukilile kuli A-Babilonia. “Tweyenu atu jami, njilenu mu yipatulo yenu, nukaliajile ni mapito jenu. Swamenu kashimbu ndo ufwatulo hiwapalika.” (Iza. 26:20) Ha mashimbu a luyinda munene, usongwelo uno muuhasa kutala ni hali yetu. “Yipatulo” muyihasa kulumbunuka yikungulwila. Ha luyinda munene, Yehova makatulamwina nyi mutununga ni kulivwashana ni mandumbu jetu. Kashika, tunafupiwa kusa tachi haliapwila hi wika ko ha kulengulula uhenge wa mandumbu jetu, alioze ni kwazanga ni mbunge yeswe. Yuma yino hanji ye mutukafupiwa kulinga mba akatulamwine!

17. Nyi twalilulieka haliapwila, yika mutukahasa kulinga ha luyinda munene?

¹⁷ Muze ‘tangwa lia Yehova’ mulikeza, mashimbu jacho makakaliwa kuli atu eswe. (Zefa. 1:14, 15) Tuvumbi twa Yehova no makamona lamba. Alioze nyi twalilulieka haliapwila, mutukahasa kuhwima mbunge ni kukwasa akwetu. Mutukanyongonona mu yuma yeswayo mutupalika ku mwono. Muze mandumbu jetu makapalika mu lamba, mutukaasolwela keke ha kwakwasa ha yize makafupiwa. Chikwo nawa, nyi mutuzanga mandumbu jetu musono, muchikapwa chashi kwasolwela zango liacho kulutwe. Yehova makatwaha mwono wa mutolo mu chifuchi chize kumuchikapwa luyinda wa chisemewa ni yipikalo yeswe. Yuma yino muyikapwa ya kunyima.—Iza. 65:17.