AKWA-KUVUMBULA yuma yikulu kawanyine tijolo jinji mu Babilonia jize azachishile hanga atunge mbonge yacho. Kulita ni Robert Koldewey, tijolo jacho kajilingilile mu lutengo wa kahia yoze wapwile “haze lia mbonge, kuze kwapwile ulopa hanji mavu apema ni kunyi jinji jize te akuzachisa mba oche tijolo jacho.”

Akwa-Kuvumbula yuma yikulu kawanyine nawa yilayi yasolwele ngwo, tupatashi a nguvulu te kakuzachisa lutengo wacho wa kahia hanga alinge yuma yinji yipi. Paul-Alain Beaulieu, longeshi watala ha yuma ya kufula-fula ku shikola yinene ya mu Toronto, kambile ngwenyi: “Yisoneko ya A-Babilonia yakusolola ngwo, mwanangana te kakutuma tupatashi twenyi kusa mu lutengo wa kahia atu waze te akwehuka kwononokena yuma yisandu.” Chisoneko chimwe cha ha matangwa a Mwanangana Nabukanezore, chinambe ngwo: “Te kakuwika kahia, makwata atu, maashiha ni kwakonga mu kahia kacho.”

Yino yinewulula atu waze a kutanga Mbimbiliya sango jize jili ha Daniele kapitulu 3. Twakutangaho ngwo, Mwanangana Nabukanezore walingile lukaponya lia oru mu chana cha Dura, haze lia mbonge ya Babilonia. Muze akweze atatu A-Hepreu waze te avuluka ngwo, Shadrake, Meshake ni Abedenego alitunyine kufulamana ni kuwayila kaponya wacho, Nabukanezore yafuluka ni uli, yatuma kuweza kahia mu lutengo “yisuho shimbiali helu lia kahia ka matangwa akwo,” chocho yatuma kusa malunga wano atatu mu “kahia ka kulengenya.” Mungelo yaalamina ku kufwa.—Danie. 3:1-6, 19-28.

Tijolo jize awanyine mu Babilonia jinakwase nawa kusolola ngwo Mbimbiliya yili yamwenemwene. Tijolo jacho, jinji jili jakusoneka ngwo, halisenu mwanangana. Amwe a ku maliji jacho kanambe ngwo: “Nabukanezore, Mwanangana wa mu Babilonia . . . Palasiu yino natunga, yami Mwanangana Munene . . . Ana jami mayulilamo ku miaka yeswe.” Maliji wano kanalifu ni waze ali ha Daniele 4:30, haze Nabukanezore ambile ngwenyi: “Ayino, ngwami, ye Babilonia yinene yakutunga yami mwene ni ndundo jami ja ngolo yikapwe zuwo lia wanangana ni uhenya wa wanangana wami nawa.”