1, 2. Ushindakenyo uka hita umwe wa kuli yetu atamba kupwa nawo? (Tala chizulie ha uputukilo.)

NGWE chize twalilongesanga ha mutwe uze wapalika, Ndiapu kambile ngwenyi, Yehova keshi ni ulite wa kuyula atu. Iye yamba ngwenyi, Yehova keshi kuyula kanawa nawa ngwenyi atu te mapwa ni chiseke ni maliyula-ene. Kutala Satana kambile umwenemwene? Achinyonga nyi atu maliyula-ene ni kutwama ku miaka yeswe. Shina ayo te mawahilila kuhiana chize maayula kuli Zambi? Kutala te muupwa ni chiseke nyi mutwama ku miaka yeswe chakuhona kupwa mushi lia chiyulo cha Zambi?

² Kukushi niumwe yoze matukumbulwila yihula yino. Hita umwe wa kuli yetu katamba kunyonga kanawa ha yihula yacho. Nyi twachilinga, mba mutunyingika ngwetu kuyula cha Yehova chili chipema nawa ngwetu twatela kumukwasa ni mbunge yeswe. Mutuhasa kupwa ni shindakenyo yacho mumu lia yize twakutanga mu Mbimbiliya. Tutalenu yize Mbimbiliya yakwamba hakutwala ku ulite wa Yehova wa kuyula malilu ni hashi.

3. Mumu liaka Yehova ali ni ulite wakupwa Mwata?

³ Yehova mwe wika Mwata wa malilu ni hashi, mumu kali Zambi mukwa-ndundo-jeswe nawa Sakatanga. (1 Sango ja Mianangana 29:11; Yilinga 4:24) Mu umwe usolwelo mu malilu, mianangana 144,000 waze makayula hamwe ni Kristu yamba ngwo: “Yenu kunwatela, Mwene wetu kanda Zambi yetu, kutambula uhenya ni ulemu ni tachi, mumu yenu nwatangile yuma yeswe, ni mumu ha upale wenu yapwile, yatangiwile.” (Usolwelo 4:11) Yehova mwe watangile yuma yeswe, kashika, iye kali ni ulite wakutuyula yetweswe, hano hashi ni mu malilu.

4. Mumu liaka chawana chakusakula chipi ni chipema kuchishi kutwaha ulite wa kulimika ni Zambi?

⁴ Satana kakatangile chuma nichimwe. Kashika iye keshi ni ulite wa kuyula malilu ni hashi. Satana hamwe ni Alama ni Eva kahamikine muze alimikine ni wata wa Yehova. (Jeremia 10:23) Shina chawana chakusakula chipi ni chipema te muchaaha ulite wa kwehuka chiyulo cha Yehova? Ka. Chawana chakusakula chipi ni chipema chakukwasa mutu hanga asakule ni kukwata yiyulo, alioze kuchishi kuhana mutu ulite wa kulimika ni Yehova yoze watutangile. Chino chinasolola pundu ngwo, kulimika ni Zambi chili kuzachisa chipi chawana chetu chakusakula chipi ni chipema. Hachino tunafupiwa chiyulo ni usongwelo wa Yehova, mumu tuli atu.

5. Mumu liaka shimbi ja Yehova nihindu japwa jipema?

⁵ Achinyonga ha chikuma chikwo cha mumu liaka Yehova ali ni ulite wa kuyula. Iye kakuzachisa chiyulo chenyi ni ungunu weswe. Kanatulweza ngwenyi: “Yami Yehova mukwa kulinga ni utu, ni chize chinalite ni ululi hashi. Mumu Yehova kanambe ngwenyi, Nakuwahilila ni yuma yino.” (Jeremia 9:24) Yehova kafupiwile shimbi ja atu hanga jimukwase kukwata yiyulo yize yalita. Alioze, iye hanase yiyulo yize yalita. Nawa mumu lia ululi wenyi ungunu, Yehova hanahane shimbi kuli atu. Mukwa-kwimba masamu yamba ngwenyi: ‘Ululi ni upatwilo wapwa ye fundamentu ya ngunja ye.’ Kashika shimbi ni yiyulo yeswe ya Yehova yapwa yipema. (Samu 89:14; 119:128) Satana kambile ngwenyi, Yehova hi Mwata mupema ko. Chipwe chocho, Satana keshi kuhasa kuneha ululi hano hashi.

6. Chikuma chika chinasolola ngwo Yehova kali ni ulite wa kuyula?

⁶ Chikuma chikwo cha mumu liaka Yehova ali ni ulite wa kuyula chili ngwo, iye kali ni chinyingi ni mana akufunga malilu ni hashi. Twakuyimwena ha ndundo jize ahanyine kuli Mwanenyi hanga awuke misongo yize mbuki te keshi kuhasa kuyiwuka. (Mateu 4:23, 24; Marku 5:25-29) Chipwe ngwe yuma yacho kuli yetu yapwa yikomokeso, alioze kuli Yehova kuyakapwile yikomokeso. Aye kananyingika chize mujimba wa mutu wapwa, kashika mahasa kuwuka musongo weswawo mutu mapwa nawo. Iye nawa mahasa kuhindwisa atu waze hanafu nawa kali ni ndundo ja kukinda kakundukundu hanji kangonga.

7. Mu mutapu uka Yehova ali mukwa-mana kuhiana atu eswe hano hashi ha Satana?

 ⁷ Hashi hano ayula kuli Satana kuhechi kuhasa kupwa sambukila mu chimwe chifuchi hanji mu yifuchi yinji. Yehova wika mwe uli ni mana akuneha sambukila hano hashi. (Izaia 2:3, 4; 54:13) Twakwivwa ngwe postolo Paulu muze ambile ngwenyi: “Mana ni yinyingi ya Zambi, kuyajondoka nikulumbama ngwe upite! Upatwilo wenyi keshi kuhasa kuunyonga weswe! Majila jenyi keshi kuhasa kuafunjika eswe!”—A-Roma 11:33.

8. Kuchi wakwivwa ha chize Yehova akuyula?

⁸ Ngwe chize twamona, Mbimbiliya yinasolola pundu ngwo Yehova mwe uli ni ulite wa kuyula. Yinasolola nawa mumu liaka ali mukwa-kuyula mupema. Chikuma chikwo chili ngwo iye kakuyula ni zango. Twakukundama kuli iye muze mutunyonga ha chize apwa “mukwa keke, mukwa vumbi, makoke kutenuka, wakulumbama ni utu wa zango ni umwenemwene.” (Kutuhuka 34:6) Zambi kakutulemesa ni kutusa vumbi. Iye kakutufunga kanawa kuhiana chize yetwene mutuhasa kulifunga. Ndiapu kambile ngwenyi, Yehova kakuswekela tuvumbi Twenyi yuma yipema, alioze wano kali mahuza. Mumu Zambi hanahane Mwanenyi wa wika hanga tupwe ni kutalatala cha mwono wa mutolo.—Tanga Samu 84:11; A-Roma 8:32.

9. Kuchi tunanyingika ngwetu, Zambi kakutufunga mutu ni mutu?

⁹ Yehova kakuzanga atu jenyi eswe ngwe chizavu. Alioze iye nawa kakulihulumba chinji hali mutu ni mutu. Achinyonga ha yize yalingiwile ku shakulu. Ha miaka kulakaji atatu, Yehova yazachisa akwa-kuyula hanga asongwele vungu lienyi ni kwaakwasa kukumba jita ni akwa-kole jo. Ha mashimbu jacho eswe, Yehova nihindu te kakulihulumba hali mutu ni mutu. Umwe wa kuli atu jacho te pwo yoze avuluka ngwo Rute. Aye te hi Ka-Izalele ko, alioze kahichikile yuma yeswe hanga apwe kavumbi wa Yehova. Chocho, Yehova yamuwahisa ha kuwaha lunga ni kupwa ni mwana. Alioze kuhiana yino yeswe, mwana wa Rute yalinga chihanda mu usoko muze mwejile Mesaya. Yehova nawa yatuma kusoneka sango ja mwono wa Rute mu Mbimbiliya, mu mukanda uze ukwete jina lienyi. Rute muze makamuhindwisa ni kunyingika yuma yeswayi kumakawahilila chinji.—Rute 4:13; Mateu 1:5, 16.

10. Mumu liaka mutuhasa kwamba ngwetu kuyula cha Yehova hi chikalu ko?

¹⁰ Yehova keshi kuyula ni mbunge yikalu. Kashika waze akumwononokena akuchilinga ni mbunge yeswe hamwe ni chiseke. (2 A-Korindu 3:17) Ndawichi yamba kuli Yehova ngwenyi: “Uhenya ni ulamba watwama kumeso jenyi; tachi ni uwahililo watwama muma mwenyi.” (1 Sango ja Mianangana 16:7, 27) Mukwa-kwimba masamu Etane yasoneka ngwenyi: “Kawaha atu waze ananyingika liji lia kuwaha. Kakwenda mu pangu lia meso ja yena Yehova. Kakuwahilila mu jina lie tangwa lieswe nganganga. Kakuanangamisa mu ululi we.”—Samu 89:15, 16.

11. Kuchi mutuhasa kupwa ni shindakenyo ngwetu wata wa Yehova uli upema?

 ¹¹ Nyi twapukuna chinji ha upeme wa Yehova, mutupwa ni ushindakenyo ungunu ngwetu kuyula chenyi chili chipema. Twakwivwa ngwe mukwa-kwimba masamu wambile kuli Zambi ngwenyi: ‘Tangwa limuwika mu zuwo lie liahiana kanunu kweswako.’ (Samu 84:10) Yehova mwe watutangile, kashika kananyingika kanawa yuma yize muyitwaha chiseke ku mwono. Iye kakutwaha yuma yeswe yize twakufupa ku mwono. Chuma cheswacho Yehova akutwita hanga tulinge, chili mumu lia upeme wetu. Chipwe ngwe yuma yacho muyifupiwa kwalumuna yimwe ku mwono wetu, nihindu mutukawahilila nyi mutwononokena Yehova.—Tanga Izaia 48:17.

12. Chikuma chika chilemu chize chakutukwasa kukalila wata wa Yehova?

¹² Twakutanga mu Mbimbiliya ngwo kusongo lia Kanunu ka Miaka ya Kuyula cha Kristu, amwe makalimika ni wata wa Yehova. (Usolwelo 20:7, 8) Yika muyikaalingisa mba alinge chocho? Ha shimbu liacho, Ndiapu makalinga yuma yize muyikatwala atu kukulinga yuma ya kuzo. Yino ye iye akulinga mashimbu eswe. Iye kota makalingisa atu hanga anyonge ngwo mahasa kutwama ku miaka yeswe chakuhona kwononokena Yehova. Manyonga wano keshi kuhasa kupwa amwenemwene. Alioze twatamba kulihula ngwetu, ‘Shina mungutayiza mahuza amutapu au?’ Nyi pundu lume twakuzanga Yehova nawa tuli ni shindakenyo ngwetu, kali mutu mupema nawa ngwetu mukwa-kuyula mupema wa malilu ni hashi, mahuza amutapu au matuvwisa kuzelwoka. Mutukazanga wika kutwama mushi lia chiyulo cha Yehova yoze wa kuyula ni zango.

13. Kuchi twakukwasa wata wa Zambi muze twakwimbulula yitanga yenyi?

¹³ Ngwe chize twamona, Yehova kali ni ulite wa kuyula, nawa kuyula chenyi chapwa chipema. Kashika twatamba kukwasa wata wenyi ni mbunge yeswe. Twakukwasa wata wacho muze twakushishika kuli Yehova ni kwimbulula yitanga yenyi. Nyi twasa tachi hanga tupwe ni yitanga yize Yehova akuzanga, mutusolola ngwetu twakuzanga kuyula chenyi nawa twakuchikwasa.—Tanga A-Efwesu 5:1, 2.

14. Kuchi makulwana amu yikungulwila ni miata amu usoko mahasa kwimbulula Yehova?

¹⁴ Twakulilongesa mu Mbimbiliya ngwetu, Yehova mashimbu eswe kakuzachisa ndundo jenyi ni zango. Kashika, miata amu usoko ni makulwana amu yikungulwila waze akukwasa wata wa Yehova kakumwimbulula hanga achine kupwa akalu hanji kwendejela akwo. Postolo Paulu kasele tachi hanga embulule Zambi ni Mwanenyi. (1 A-Korindu 11:1) Iye kakapwile ni kuvwisa akwo sonyi hanji kwaashinjila hanga alinge yuma yize te yalita. Shimbu alinge chocho, iye te kakwaakolweza ni zango lieswe hanga alinge yuma yize te yalita. (A-Roma 12:1; A-Efwesu 4:1; Fwilimu 8-10) Ha kulinga chino, Paulu yembulula Yehova. Nyi mutusolwela akwetu zango, chino muchisolola ngwo twakukwasa wata wa Yehova.

¹⁵ Twakukwasa nawa wata wa Yehova ha kulivwashana ni kuvumbika atu waze iye akuhana yiteli. Chipwe kutushi kunyingika kanawa hanji kutayiza chiyulo chize ayo akwata, nihindu muchilita kununga ni kwaakwasa.  Atu waze keshi kuwayila Yehova keshi kulinga chocho, alioze yetu twakuchilinga muze twakutayiza Yehova ngwe Mwata wetu. (A-Efwesu 5:22, 23; 6:1-3; A-Hepreu 13:17) Hachino, twakuwahila ku mwono, mumu Zambi kanazange yuma yipema hali yetu.

15. Kuchi twakukwasa kuyula cha Yehova ha kuvumbika waze akwete yiteli?

16. Kuchi yiyulo yize twakukwata muyihasa kusolola ngwo tunakwase wata wa Zambi?

¹⁶ Mutuhasa nawa kukwasa wata wa Yehova ha yiyulo yize twakukwata ku mwono wetu. Yehova keshi kutwaha shimbi yazwalala ha hita chuma chize mutulinga ku mwono wetu. Alioze iye kakutulweza chize akunyonga. Chino chakutukwasa hanga tunyingike yize twatamba kulinga. Chakutalilaho, Yehova keshi kuhana akwa-Kristu katalilo wa chize atamba kuzala ni chize katambile kuzala. Shimbu alinge chocho, iye kanalumbununa ngwo twatamba kupwa atu a homboka ni kulilemesa ngwetu tuli Yela jenyi. (1 Timoteu 2:9, 10) Iye kakuzanga hanga tunyonge chize yiyulo yetu muyihasa kutwa ku mwono wa akwetu. (1 A-Korindu 10:31-33) Nyi mutukwata yiyulo yize yinakatuka ha manyonga ja Yehova, mutusolola ngwetu twakumuzanga nawa twakukwasa wata wenyi.

17, 18. Kuchi waze alimbata akusolola ngwo kanakwase wata wa Yehova?

¹⁷ Tutalenu mutapu umwe uze akwa-Kristu waze alimbata mahasa kukwashilamo wata wa Yehova. Atu waze alimbata hanji keshi kuhasa kupwa ni mwono ngwe uze  ayo apwile ni kunyonga. Ayo mahasa kupwa ni yipikalo yinji mu ulo wo. Nyi chino muchilingiwa, ayo mahasa kuyuka ha kunyonga chize Yehova te akufunga vungu lia Izalele ku shakulu. Yehova kalitesele mwene ngwe lunga lia atu jenyi. (Izaia 54:5; 62:4) Chipwe chocho, A-Izalele kehukile Yehova ha mashimbu anji. Usepa wacho wapwile ngwe ulo uze uli ni yipikalo. Alioze Yehova te keshi kulipupwisa kwecha vungu lia Izalele. Shimbu achilinge, iye te kakwaakonekena mashimbu eswe ni kumanununa yilakenyo yize alingile hali ayo.—Tanga Samu 106:43-45.

¹⁸ Akwa-Kristu alimbata waze akuzanga Yehova kakufupa kumwimbulula. Chipwe mapwa ni yipikalo mu ulo wo, ayo keshi kufupa yiyulo yize kuyakatukile mu Mbimbiliya hanga alilakule. Ayo kananyingika ngwo Yehova kakulemesa shingo lia ulo nawa kanazange hanga lunga ni pwo “akalinunge” umwe ni mukwo. Utanji we wika anasolola mu Mbimbiliya ngwo muuhasa kutwala atu waze alimbata kukulilakula ni kufupa kumbata hanji ku somboka cheka. (Mateu 19:5, 6, 9) Muze akwa-Kristu masa tachi hanga afunge ulo wo, chino muchisolola ngwo kanakwase wata wa Yehova.

19. Yika twatamba kulinga nyi twalinga upi?

¹⁹ Yetweswe tuli yihenge, nawa ha mashimbu amwe twakulinga yuma yize yakuvwisa Yehova chinyengo. Iye kanachinyingika, kashika atwehele ukuule. Hachino nyi twalinga upi, twatamba kwita kuli Yehova hanga atukonekene. (1 Yoano 2:1, 2) Shimbu twivwe wika chinyengo ha upi uze twalinga, mutuhasa kuwana longeso ha upi wacho. Tunazange kukundama kuli Yehova, yoze makatukonekena ni kutukwasa hanga tulivwe kanawa ni kununga ni kumuwayila.—Samu 103:3.

20. Mumu liaka twatamba kukwasa wata wa Yehova musono?

²⁰ Mu paraisu, atu eswe makaayula kuli Yehova nawa makalilongesa majila jenyi a ululi. (Izaia 11:9) Alioze, chipwe haliapwila mutuhasa kulilongesa chize iye akunyonga ni chize iye anazange hanga tulinge yuma. Kwasala hakehe, niumwe kechi kahamika nawa hakutwala ku kuyula cha Zambi. Kashika tusenu tachi hanga tukwase wata wa Yehova ha kumwononokena, kumuwayila ni ushishiko weswe, ni kumwimbulula mu yuma yeswe yize mutulinga ku mwono wetu.