1, 2. (a) Chikuma chika chinene chize chinatale atu eswe? (b) Mumu liaka chili chikuma chilemu?

KULI atu anji musono, mbongo jikwete ulemu unji ku mwono wo. Ayo kakunyonga chinji hakutwala ku mbongo ni kulipikala ha chikuma chacho. Kakupalikisa mashimbu anji ni kufupa mbongo hanji kufunga mbongo jize akwete. Kuli atu akwo, chikuma chahiana ulemu chili asoko, kupwa ni mwono upema, hanji yuma yize ayo akufupa chinji ku mwono wo.

² Kuli chuma chilemu chinji kuhiana yuma yeswayi. Kukwasa wata wa Yehova. Chikuma chino chili ni ulemu unji, kashika kutwatambile kuchehuka. Alioze, nyi kutwakanyamine, mutuhasa kulihulikila wika ha milimo yetu ya tangwa ha tangwa hanji kwivwa woma hakutwala ku yipikalo yetu ni kuvulama wata wa Yehova. Nyi mutukwasa wata wa Yehova, mutuhasa kukumba yipikalo yetu ya tangwa ha tangwa, ni kukundama kuli Yehova.

3. Yika Satana ambile hakutwala ku kuyula cha Zambi?

³ Satana Ndiapu kavundumwine yimwe ha kunyingika nyi Yehova kakwete ulite wa kuyula yitangiwa yenyi. Satana kakuzanga hanga atu anyonge ngwo, Yehova Mukwa-kuyula mupi nawa ngwo keshi kutuzanga. Satana yamba ngwenyi, atu te mawahilila chinji ku mwono nyi maliyula-ene. (Uputukilo 3:1-5) Iye yamba nawa ngwenyi, kukushi mutu yoze mashishika kuli Zambi ni mbunge yeswe, nawa ngwo mutu mweswe nyi mamona lamba malituna Zambi ngwe Mwanangana. (Yombi 2:4, 5) Kashika Yehova aneche shimbu hanga chino chisoloke pundu kuli eswe ngwo atu nyi malituna Zambi ngwe Mwanangana, mwono wo kuuchi kupwa nawa ni ulemu.

4. Mumu liaka wata wa Yehova watela kukumba?

⁴ Chochene, Yehova kananyingika ngwenyi, yuma yize Ndiapu ambile hali iye yili mahuza. Mba mumu liaka aneche mashimbu hanga Satana asolole nyonga lienyi? Kumbululo linatale hali yetweswe, mu malilu ni hano hashi. (Tanga Samu 83:18.) Alama ni Eva kalitunyine chiyulo cha Yehova ngwe chize akulinga atu anji kukatuka lume ha mashimbu jo. Chino te muchihasa kutwala amwe anyonge ngwo Ndiapu kambile umwenemwene. Amu chikuma chacho chichili mu manyonga ja atu ni angelo, kashika kukuchi kuhasa kupwa sambukila yamwenemwene ni kulinunga. Alioze muze wata wa Yehova muukakumba, eswe mutukatwama mushi lia chiyulo chenyi chipema ku miaka ya mutolo. Mukukapwa sambukila mu malilu ni hashi.—A-Efwesu 1:9, 10.

5. Kuchi chikuma cha wata necho unatutale?

⁵ Wata wa Yehova muukakumba, nawa kuyula cha Satana ni cha atu kumakachonona. Kuyula cha Zambi kupalikila mu Wanangana wa Mesaya muchikapwa chingunu. Atu eswe ashishika makamona ngwo kumana atu mahasa kufunga ushishiko wo ni kukwasa wata wa Zambi ni ululi weswe. (Izaia 45:23, 24) Shina tunazange kupwa mukachi ka atu jacho ashishika? Ewa! Alioze, mba tupwemo, twatamba kunyingika ulemu wakukwasa wata wa Yehova ni mbunge yeswe.

6. Ulemu uka uli ha kukwasa wata wa Yehova?

⁶ Kukwasa wata wa Yehova chikwete ulemu unji kuhiana chiseke chize tukwete hita mutu. Alioze chino kuchalumbunukine ngwo ulamwino wetu kuushi ni ulemu hanji ngwo Yehova keshi kulihulumba hali yetu. Mba, kuchi tunachinyingika?

7, 8. Yika mutukazukako ha kukwasa wata Zambi?

⁷ Yehova kakuzanga chinji atu. Kwamba pundu, tukwete ulemu unji kumeso jenyi, kashika atwehele Mwanenyi hanga tuhase kuzuka mwono wa mutolo. (Yoano 3:16; 1 Yoano 4:9) Nyi Yehova kamanunwine yize atulakenya kulutwe, Satana ni waze alimika nenyi te mapwa ni umwenemwene. Mumu Satana kakwamba ngwenyi, Yehova kali mukwa-mahuza, yoze wakuswekela atu yuma yipema nawa kakuyula chipi. Waze akulimika ni Yehova keshi kulemesa yilakenyo yenyi nawa kakwamba ngwo: ‘Chilakenyo cha kwiza chenyi chilihi? Mumu chize haze tulamba twetu ayile tulo, yuma yeswe  kuyatwama chizechene ngwe yapwile chize ku uputukilo wa yitanga ya Zambi.’ (2 Petulu 3:3, 4) Alioze Yehova makamanununa yilakenyo yenyi. Iye kanasolola pundu ngwenyi, kukwasa wata wenyi muchikaneha nawa ulamwino hali waze eswe akumwononokena. (Tanga Izaia 55:10, 11.) Wata wa Yehova unakatuka ha zango. Kashika, mutuhasa kupwa ni shindakenyo ngwetu, iye manunga ni kuzanga tuvumbi twenyi ashishika ni kwaalemesa.—Kutuhuka 34:6.

⁸ Chipwe ngwe wata wa Yehova uli chikuma chilemu, nihindu kuchalumbunukine ngwo ulamwino wetu kuushi ni ulemu kuli iye. Yehova kakulihulumba chinji hali yetu. Kashika tunafupiwa kunyingika yize yahiana ulemu ni kukwasa kuyula cha Yehova ni ushishiko weswe.

9. Yika Satana ambile hakutwala kuli Yombi? (Tala chizulie ha uputukilo.)

⁹ Chili chilemu kupwa ni nyonga lialita hakutwala ku wata wa Yehova. Mutuhasa kuchinyingika ha kutanga mukanda wa Yombi, umwe wa mikanda ya Mbimbiliya yize aliangile kusoneka. Mu mukanda wacho twakutanga ngwo, Satana kambile ngwenyi, nyi Yombi mamona lamba linji, iye te kumehuka Zambi. Satana nawa yeta kuli Zambi hanga amwese Yombi lamba. Yehova te kechi kulinga chuma chamutapu au, alioze yecha hanga Satana eseke Yombi, hakumwamba ngwenyi: “Upite wenyi weswe hinausa mu kwoko lie.” (Tanga Yombi 1:7-12.) Chocho ha shimbu likehe wika, Yombi yafwisa tuvumbi twenyi nawa yatokesa upite wenyi weswe. Yamushiha ana kumi ku ponde. Satana kalingile yuma yeswayi hanga yisoloke ngwe Zambi mwe wanehene lamba liacho. (Yombi 1:13-19) Kusulaho, Satana yasa Yombi musongo upi nawa wa lwaji. (Yombi 2:7) Yuma yapihile nawa chinji, muze pwo lia Yombi ni masepa jenyi atatu, ambile yuma yize yamuvwishile yikola ku mbunge.—Yombi 2:9; 3:11; 16:2.

10. (a) Kuchi Yombi asolwele ushishiko wenyi kuli Zambi? (b) Mumu liaka Yombi afupiwile ukwaso?

¹⁰ Shina Satana kambile umwenemwene? Ka. Chipwe ngwe Yombi kamwene lamba linji, nihindu kakehukile Yehova. (Yombi 27:5) Alioze, ha limwe shimbu, Yombi yavulama yize te yahiana ulemu ni kunyonga wika hali mwene. Yanunga ni kwamba ngwenyi, kakalingile upi niumwe. Yombi nawa kanyongene ngwenyi katambile kunyingika mumu liaka te anamono lamba. (Yombi 7:20; 13:24) Hanji mutuhasa kunyingika yikola yize Yombi apwile ni kwivwa. Chipwe chocho, Yehova kanyingikine ngwenyi, iye kakapwile ni nyonga lialita, kashika amukwashile. Kuchi Yehova achilingile?

11, 12. Yika Yehova akwashile Yombi hanga anyingike? Yika Yombi alingile?

¹¹ Mutuhasa kutanga yize Yehova alwezele Yombi mu tupitulu 38 ndo 41 a mukanda wa Yombi. Yehova kakalumbunwine kuli Yombi mumu liaka apwile ni kumona lamba. Shimbu te achilinge, Yehova yazanga kumukwasa hanga anyingike chize te apwa mukehe chinji ha kulitesa ni Zambi. Iye kalongesele Yombi hanga anyingike ngwenyi, kwapwile chikuma chilemu chinji kuhiana lamba lienyi. (Tanga Yombi 38:18-21.) Yize Yehova ambile, yakwashile Yombi hanga alumune nyonga lienyi.

¹² Shina chapwile kuhona zango ha yize Yehova ahanjikile ni Yombi chipwe ngwe te kanamono lamba linji? Ka, mumu chipwe  Yombi mwene kakanyongene chocho. Yombi kapanjikile Yehova ni kulemesa chiyulo chenyi. Kashika ambile ngwenyi: “Ngunalilelesa, ngunalikonyeka mu fufuta ni uto.” (Yombi 42:1-6) Chitangu, mukweze yoze te avuluka ngwo Elihu kakwashile nawa Yombi hanga alumune nyonga lienyi. (Yombi 32:5-10) Muze Yombi hapanjika chiyulo cha zango cha Yehova, chocho yalumuna nyonga lienyi, Yehova yasolola kuli akwo ngwo iye kevwile kuwaha chinji ha kushishika cha Yombi.—Yombi 42:7, 8. 

13. Kuchi chiyulo cha Yehova chakwashile Yombi muze yipikalo yenyi yahwile?

¹³ Chiyulo cha Yehova chanungine ni kukwasa Yombi chipwe muze yipikalo yenyi yahwile. “Yehova yawahisa matangwa a Yombi akusula kuhiana a uputukilo.” Chocho, iye “yasema nawa ana a malunga shimbiali ni a mapwo atatu.” (Yombi 42:12-14) Chipwe ngwe Yombi kazangile chinji ana jacho, nihindu te kakwivwa usona wa ana waze afwile. Nawa kota Yombi kakavulamine yuma yize yalingiwile ku mwono wenyi ni kuli asoko jenyi. Nyi Yombi kanyingikine chitela cha lamba lienyi, iye kota te kakulihula ha mashimbu amwe ngwo, mumu liaka Zambi echele hanga amone lamba liacho. Nyi kapwile ni manyonga jacho, kota te kakwiwuluka yize Yehova amulwezele. Chino te chakukolweza Yombi ni kumukwasa hanga apwe ni nyonga lialita.—Samu 94:19.

14. Yika mutuhasa kulilongesa ha yize yalingiwile kuli Yombi?

¹⁴ Kupukuna ha yize yalingiwile kuli Yombi muchihasa kutukwasa hanga twalumune manyonga jetu ni kututakamisa. Mukanda wa Yombi uli chihanda cha yuma yize Yehova asonekene “mukutufumba yetu, hanga ku uhumikizo ni kulembejeka cha Yisoneko yisandu tukasele mbunge jetu ha chilakenyo cha Zambi.” (A-Roma 15:4) Yino yinatulongesa ngwo, kutwatambile kunyonga wika ha lamba lietu ha kwehuka kukwasa wata wa Yehova. Ngwe Yombi, mutusolola ngwetu tunakwasa wata wa Yehova ha  kununga ni kushishika kuli iye chipwe muze mutumona lamba.

15. Nyi twashishika uhashi uka yipikalo muyitwaha?

¹⁵ Yize yalingiwile kuli Yombi muyihasa kututakamisa mumu yinasolola ngwo kupwa ni yipikalo kuchalumbunukine ngwo Yehova keshi kutuzanga. Yipikalo yakutwaha uhashi wakukwasa wata wa Yehova. (Yishima 27:11) Nyi mutunyongonona ni ushishiko weswe, mutuvwisa Yehova kuwaha nawa kutalatala chetu cha kulutwe muchikola. (Tanga A-Roma 5:3-5.) Yize yalingiwile kuli Yombi yinatukwase kunyingika ngwetu, Yehova kapwa “wa too ni vumbi ni keke.” (Tiangu 5:11) Nyi mutukwasa wata wa Yehova, iye makatuwahisa. Kunyingika chino muchitukwasa tupwe “ni utunu weswe ni uhomboloji hamwe ni uwahililo.”—A-Kolosu 1:11.

16. Mumu liaka twatamba kwiwuluka ngwetu kukwasa wata wa Yehova chili chilemu?

¹⁶ Chili umwenemwene ngwo, chakupwa chikalu kukwasa wata wa Yehova muze tunamono lamba ku mwono wetu. Chipwe lamba likehe mulihasa kusoloka ngwe linji nyi mutunyonga wika ha lamba liacho. Kashika twatamba kwiwuluka mashimbu eswe ulemu wa kukwasa wata wa Zambi chipwe ngwe tunamono lamba lieswalio.

17. Kuchi kuhondangana mulimo wa Yehova muchihasa kutukwasa kulihulikila ha yize yahiana ulemu?

¹⁷ Kununga ni kuhondangana mulimo wa Yehova muchihasa kutukwasa hanga tunyingike yize yikwete ulemu wahiana. Chakutalilaho, umwe pangi yoze avuluka ngwo Renee katuhukile manyinga mu wongo, chino chapwile ni kumunehena yikola yinji nawa kapwile ni kanser. Muze te ali mu shipitali, iye yambujola kuli waze te akukalakalamo, mieji-ni-akwo, ni waze apwile ni kumumeneka. Ha shimbu limwe, muze Renee te ali mu shipitali ha poso jaali ni ndambu, aye yalinga maola 80 akwambujola. Chipwe ngwe Renee kanyingikine ngwenyi kumafwa, nihindu kakavulamine yize yahiana ulemu. Kukwasa  wata wa Yehova chamwehele sambukila.

18. Yize yalingiwile kuli Jennifer, yika yinatulongesa hakutwala ku kukwasa wata wa Yehova?

¹⁸ Mutuhasa nawa kukwasa wata wa Yehova nyi mutukumba yipikalo yikehe-yikehe yize twakupwa nayo tangwa ha tangwa. Pangi yoze avuluka ngwo Jennifer kalingile matangwa atatu ku utulilo wa ndeke muze te anafuna ku mahio. Ndeke yize te maya nayo kayikwikile, chocho Jennifer yahonga nawa yalivwa ukawenyi. Iye te mahasa kuputuka kunenganyana. Alioze, Jennifer yalemba hanga Yehova amukwase kwambujola sango lipema kuli akwo waze te anashimbwila no ndeke. Chocho yambujola kuli atu anji ni kuhana mikanda yinji. Jennifer ngwenyi: “Nevwile ngwami, Yehova kanguwahishile chipwe ngwe napwile ni kuhonga nawa kangwehele tachi jize te ngunafupu hanga ngwambujole jina lienyi ha mashimbu jacho.”

19. Yika ya kukwasa kunyingika tuvumbi amwenemwene?

¹⁹ Tuvumbi twa Yehova wika e ananyingika kanawa ulemu wa wata wa Yehova. Chinyingi chacho chakwaanyingikisa ngwo kali tuvumbi amwenemwene. Kashika, yetweswe twatamba kusa tachi hanga tununge ni kukwasa wata wa Yehova.

20. Kuchi Yehova akwivwa ha yeswe yize twakulinga hanga tukwase wata wenyi?

²⁰ Yehova kakumona, nawa kakulemesa tachi jize twakusa hanga tukwase wata wenyi muze twakumuwayila ni ushishiko weswe ni kunyongonona mu yipikalo yetu. (Samu 18:25) Mutwe uze muusulaho muulumbununa mumu liaka twatamba kukalila wata wa Yehova nawa muusolola chize mutuhasa kuchilinga.