1, 2. Kuchi Yehova akututakamisa mu yipikalo yetu, nawa chilakenyo chika twakuwana mu Liji lienyi?

UMWE ndumbu mukweze twamishi, kanyongene hakutwala ha mukanda 1 A-Korindu 7:28, uze wakwamba ngwo waze alimbata ‘kumakapwa ni luyinda ku mwono wo.’ Ndumbu wacho yahanjika ni umwe kashinakaji mukulwana wamu chikungulwila yoze hanambate ni kumuhula ngwenyi: “‘Luyinda’ muka mwenau, nawa kuchi munguhasa kumukumba muze mungukambata?” Shimbu kanda achikumbulula, mukulwana yalweza mukweze wacho hanga anyonge ha chuma chikwo chize postolo Paulu asonekene ngwenyi: Yehova kali “Zambi ya kulembejeka cheswe, yoze wakututakamisa mu lamba lietu lieswe,” hanji mu yipikalo.—2 A-Korindu 1:3, 4.

² Tunanyingika ngwetu Yehova, Tata yetu, kakutuzanga nawa kakututakamisa muze mutupalika mu yipikalo. Muhasa kwiwuluka ha amwe mashimbu waze akukwashile hanji  kukusongwela kupalikila mu Liji lienyi. Mutuhasa kupwa ni shindakenyo ngwetu, iye kanazange upeme hali yetu ngwe chize alingile hali tuvumbi twenyi ku shakulu.—Tanga Jeremia 29:11, 12.

3. Yihula yika mutukumbulula mu mutwe uno?

³ Kanji-kanji, chakupwa chashi kukumba lamba ni yipikalo nyi mutunyingika kuze yinakatuka. Mba mumu liaka twakupalika mu yipikalo mu ulo hanji mu usoko wetu? Nawa yilweza yika ya ku mashimbu akunyima ni ya ha mashimbu jetu yize muyitukwasa hanga tuwane utakamiso uze tunafupu? Tukumbululenu yihula yino hanga tumone chize mutuhasa kukumba yipikalo.

4, 5. Yipikalo yika lunga ni pwo mahasa kupwa nayo?

⁴ Muze Yehova atangile pwo mutangu, yamutwala kuli lunga, chocho yapwa pwo lienyi. Mba Yehova yamba ngwenyi: “Kashika lunga akahichike tato ni naye akalalaminye kuli mukwo-pwo, mba kumapwa musunya umuwika.” (Uputukilo 2:24) Tunanyingika ngwetu, yetweswe tuli yihenge. (A-Roma 3:23) Hamukunda wa chino, muze lunga ni pwo malimbata, ayo mahasa kushimbwila kupwa ni yipikalo mu ulo wo. Chakutalilaho, shimbu pwo kanda achisomboka, te kakwononokena yisemi jenyi. Alioze Liji lia Zambi linambe ngwo, pwo nyi masomboka, mukwo-lunga mapwa mwata wenyi. (1 A-Korindu 11:3) Chitangu, muchihasa kupwa chikalu kuli lunga kusongwela mukwo-pwo. Nawa muchihasa kupwa chikalu kuli pwo kutayiza usongwelo wa mukwo-lunga ngwe chize apwile ni kutayiza wa yisemi jenyi. Chikwo nawa, muze lunga ni pwo malimbata, ayo mahasa kuhona kulivwashana ni makwe jo, nawa chino muchihasa kuneha yipikalo.

⁵ Nyonga nawa chize lunga ni pwo mahasa kwivwa nyi manyingika ngwo kumapwa ni mwana. Chipwe ngwe mawahilila chinji, kanji-kanji chino nawa chakuneha kuzakalala. Mahasa kulihula nyi mwana wacho makasemuka kanawa hanji kulihulumba nyi makapwa ni mwono upema. Nawa manyingika ngwo kanafupiwa mbongo hanga amulele. Muze mwana masemuka, yisemi mafupiwa kwalumunako yimwe ku mwono wo. Pwo yoze hapwa chisemi mapalikisa mashimbu anji ni kulela mwana. Hachino, iye ni mukwo-lunga kechi kupwa nawa ni mashimbu anji akupwa hamuwika. Lunga yoze hapwa chisemi neye mapwa nawa ni yiteli yinji mu usoko. Iye katamba kusa shindakenyo ngwo mukwo-pwo hamwe ni mwana kali ni yuma yize yinafupiwa ku mwono wo.

6-8. Kuchi waze alimbata akwivwa nyi keshi kusema?

⁶ Amwe waze alimbata kakwete yipikalo yikwo. Ayo kakuzanga chinji kupwa ni ana, alioze keshi kusema. Nyi pwo keshi kumita, iye kakwivwa yinyengo yinji ku mbunge. (Yishima 13:12) Mapwo aku shakulu, no kapwile ni kuzanga chinji kusomboka ni kupwa ni ana. Kashika Rakele, pwo lia Yakomba evwile yinyengo yinji muze te keshi kumita ngwe yayo. (Uputukilo 30:1, 2) Musono, mu yifuchi yimwe, atu anji kakutayiza ngwo chili chipema kupwa ni ana anji. Kanji-kanji atu kakuhula mishionaliu waze akukalakala mu yifuchi yacho ngwo, mumu liaka katwamine ni ana. Chipwe muze mishionaliu akwaalumbunwina chitela cha mumu liaka ayo keshi ni ana, nihindu  amwe kakwaamba ngwo, “Mala mutunulembela hanga limwe tangwa nupwe kama ni ana!”

⁷ Tutalenu chilweza chikwo. Umwe pangi mu Inglaterra te kakuzanga chinji kupwa ni ana. Muze anyingikine ngwenyi te keshi kumita, kevwile yinyengo yinji ku mbunge. Chocho, iye ni mukwo-lunga yafupa umwe mwana hanga amulele. Chipwe chocho, ha mashimbu amwe te kakunenganyana. Yamba ngwenyi: “Te ngunanyingika ngwami, mwana wa kulela keshi kupwa ngwe mwana wa kusema yami mwene.”

⁸ Mbimbiliya yinambe ngwo, pwo “kumamulamwina ha kusema ana.” (1 Timoteu 2:15) Alioze chino kuchalumbunukine ngwo iye makapwa ni mwono wa mutolo mumu lia kupwa ni ana. Mba, yika chinalumbunuka? Pwo kakupalikisa mashimbu anji ni kulela mwana ni kufunga zuwo lienyi. Chino muchihasa kumukwasa hanga achine kulinjisa mu yuma yambala yize kuyamutalile. (1 Timoteu 5:13) Chipwe chocho, nihindu mahasa kupwa ni yipikalo mu ulo ni mu usoko wenyi.

9. Yipikalo yika yikwo yize akumona waze alimbata?

⁹ Yipikalo yize amwe waze alimbata mahasa kupwa nayo, yili kufwa cha mutu yoze alimbata nenyi. Chipwe ngwe manyonga ngwo chino kuchichi kalingiwa kuli ayo, nihindu anji kakupalika mu yipikalo yacho yikalu. Akwa-Kristu kakwete ufulielo ukolo ha chilakenyo cha uhindukilo, nawa chino chakwaatakamisa chinji. (Yoano 5:28, 29) Tata yetu Yehova, hanatwehe yilakenyo yinji mu Liji lienyi, yize yakututakamisa muze mutupalika mu yipikalo. Haliapwila tutalenu chize amwe tuvumbi twa Yehova aatakamishine ni chize utakamiso wacho waakwashile.

10. Kuchi Hana amutakamishine? (Tala chizulie ha uputukilo.)

¹⁰ Tuhengwolenu yize yalingiwile kuli Hana, pwo lia Elekana. Kazangile kupwa ni ana alioze te keshi kushita. Chipwe chocho, chihalika chenyi Penina, kapwile ni ana anji. (Tanga 1 Samuele 1:4-7.) Penina te kakulenya Hana “mwaka ha mwaka” mumu liakuhona kupwa ni ana, chino te chakwokesa lamba lienyi. Nawa te chakumwaha yikola yinji ku mbunge. Yika alingile mba awane utakamiso? Iye kalembele kuli Yehova. Hana kayile ku chihela cha uwayilo nawa yalemba chinji kuli Yehova. Yeta kuli Yehova hanga amwehe mwana, nawa yafuliela ngwenyi Iye te mamukwasa. Muze hahwisa kulemba, yalivwa kanawa, “kakapwile nawa ni chinyengo kumeso.” (1 Samuele 1:12, 17, 18) Iye kanyingikine ngwenyi, Yehova te mamwaha mwana hanji kumutakamisa mu mutapu ukwo.

11. Kuchi kulemba muchihasa kututakamisa?

¹¹ Amu tuli yihenge nawa twatwama hashi hano ha Satana, nihindu, mutununga ni  kupwa ni yipikalo. (1 Yoano 5:19) Alioze tukwete ukwaso. Mutuhasa kulemba kuli Yehova, “Zambi ya kulembejeka cheswe.” Chino che alingile Hana. Iye kalwezele Yehova yize te akwivwa mu mbunge ni kufupa ukwaso wenyi. Chizechene nawa, muze tunamono lamba, twatamba kulinga yinji kuhiana kutongwola wika yipikalo yetu kuli Yehova. Tunafupiwa kuliumba kuli iye hanga atukwase ni kumulweza chize tunevu ku mbunge.—A-Fwilipu 4:6, 7.

12. Yika yakwashile Ana kupwa ni uwahililo chipwe ngwe kapwile mu yipikalo?

¹² Mutuhasa kwivwa yikola yinji ku mbunge mumu kutushi ni ana hanji kufwisa mutu yoze twazanga chinji. Alioze mutuhasa kununga ni kuwana utakamiso. Tutalenu chilweza cha Ana, yoze watwamine ha mashimbu ja Yesu. Muze te halimbata wika ha miaka shimbiali, mukwo-lunga yafwa. Nawa chinasoloka ngwe kakapwile ni mwana niumwe. Mba yika yamukwashile? Iye ‘kakakatukile ku tembele.’ Chipwe muze Ana apwile ni miaka 84, nihindu te kakuyaya mu tembele ni kulemnba ni kuwayila Yehova. (Luka 2:37) Chino chamutakamishine ni kumukwasa kupwa ni uwahililo chipwe ngwe kapwile mu yipikalo.

13. Kuchi masepa amwenemwene mahasa kutukwasa muze asoko jetu matuvwisa yinyengo ku mbunge?

¹³ Ni yetu nawa twakuwana utakamiso kuli masepa amwenemwene waze twakupwa no mu chikungulwila. (Yishima 18:24) Paula kapwile wika ni miaka yitano muze naye echele kuwayila Yehova. Paula kevwile yikola yinji ku mbunge, nawa yuma yapwile yikalu ku mwono wenyi. Alioze umwe pangi pionelu yoze avuluka ngwo Ann, yamutakamisa ni kumusolwela zango. Paula yamba ngwenyi: “Chipwe ngwe Ann kakapwile usoko wami, nihindu namwene zango lienyi ha kungukwasa. Chino changukwashile kununga ni kuwayila Yehova.” Muze naye ya Paula afunyine mu umwenemwene, chino chevwishile Paula kuwaha chinji. Ann neye kevwile kuwaha hakukwasa Paula hanga anunge ni kuwayila Yehova.

14. Kuchi twakuyuka muze mututakamisa akwetu?

 ¹⁴ Nyi twapalikisa mashimbu anji ha kulingila akwetu yuma yipema, mutuvulama yipikalo yetu. Chakutalilaho, mapangi anji waze hanasomboka ni waze kanda achisomboka, kanyingika ngwo, muze mambujola sango lipema lia Wanangana kuli akwo, ayo kanakalakala hamwe ni Yehova ni kulinga upale wenyi. Chino chakwaevwisa kuwaha. Kwamba umwenemwene, yetweswe mutuhasa kukwasa akwetu ha kwambujola no hamwika sango lipema. Nawa muze mutulingila mandumbu ni mapangi jetu yuma yipema, chino muchitukwasa ku kundama kuli ayo. (A-Fwilipu 2:4) Chino che alingile postolo Paulu. Iye kafungile akwo ‘ngwe mama yoze unalele kanawa  ana jenyi.’ Paulu nawa kamutakamishine ni kumukolweza kuli mandumbu jenyi ‘ngwe tata ni ana jenyi.’—Tanga 1 A-Tesalonika 2:7, 11, 12.

¹⁵ Kuchi mutuhasa kutakamisa asoko mu chikungulwila chetu? Ha mashimbu amwe, asoko waze aha mu chikungulwila, mahasa kutwita hanga tulongese ana jo hakutwala kuli Yehova hanji kwaalongesa Mbimbiliya. Chipwe chocho, Mbimbiliya yinambe ngwo, Yehova hanahane kuli yisemi chiteli chakulongesa ni kufumba ana jo. (Yishima 23:22; A-Efwesu 6:1-4) Chipwe ngwe amwe kutwita ukwaso ha mashimbu amwe, nihindu chili chilemu yisemi kulongesa ana jo. Yisemi katamba kuhanjika ni ana jo mashimbu yeswe.

16. Yika twatamba kunyingika muze tunakwase ana jambala?

¹⁶ Nyi umwe chisemi matwita hanga tulongese mwanenyi Mbimbiliya, chili chipema kunyingika ngwetu kutushi ni chiyulo hali mwanenyi ngwe chize iye ali nacho. Ha mashimbu amwe mutuhasa kulilongesa Mbimbiliya ni mwana yoze yisemi jenyi keshi mu umwenemwene. Muze tunalilongesa ni ana jambala, muchilita kwaalongesela ku zuwo lio haze hali yisemi jo hanji umwe mukulwana chipwe kwaalongesela ha mbunga. Nyi twalinga chocho, kutuchi kulingisa atu hanga anyonge yuma yipi hali yetu. Hakupalika cha mashimbu, hanji yisemi ene mazanga kulongesa ana jo hakutwala kuli Yehova.

17. Kuchi ana mahasa kutakamisa akwo mu usoko wo?

¹⁷ Akweze waze hanalilongesa kuzanga Yehova mahasa kutakamisa ni kukolweza asoko jo. Kuchi mahasa kuchilinga? Ha kuvumbika yisemi jo ni kukalakala hanga aakwase ku yize yinafupiwa ku mwono wo. Chikwo nawa, nyi ana manunga ni kushishika kuli Yehova, chino chakutakamisa asoko jo eswe. Muze Sanga lia Meya te kanda liza, Lameke te kakuwayila Yehova. Iye yamba hakutwala kuli mwanenyi Noa ngwenyi: “Yono kumakatuwahisa ha milimo yetu ni kukilikita cha moko jetu mumu ha mavu aze Zambi ashingile.” Uprofeto wacho wamanunukine muze Yehova achijile shingo hano hashi, hakupalika cha Sanga lia Meya. (Uputukilo 5:29; 8:21) Musono, ana waze ananungu ni kushishika kuli Yehova, mahasa nawa kutakamisa asoko jo. Ayo mahasa kukwasa eswe mu usoko hanga anyongonone mu yipikalo haliapwila ni kulutwe lia matangwa.

18. Yika muyitukwasa hanga tunyongonone mu lamba lieswalio mutumona?

¹⁸ Tuvumbi twa Yehova musono kakuwana utakamiso kupalikila mu yilemba, kupukuna ha yilweza ya mu Mbimbiliya, ni ha usepa uze akwete ni mandumbu jo amu ufulielo. (Tanga Samu 145:18, 19.) Tunanyingika ngwetu, Yehova kali hamwe ni yetu hanga atutakamise mashimbu eswe, nawa makatukwasa hanga tukumbe yipikalo yeswayo mutuhasa kupwa nayo!