MUTWE WA KULILONGESA 25
MWASO 7 Yehova Iye Tachi Jetu
Kanda Uvulama Ngwe Yehova kali ‘Zambi ya Mwono’
“Yehova katwama ni mwono.”—SAMU 18:46.
YIZE MUTULILONGESA
Mutumona mumu liaka chili chilemu kwiuluka mashimbu eswe ngwetu, Zambi yoze twakuwayila kali ‘Zambi ya mwono.’
1. Yika yakukwasa tuvumbi twa Zambi kununga ni kumuwayila chipwe ngwe kakupalika mu yipikalo yeka ni yeka?
MATANGWA wano tuli, Mbimbiliya ya kwavuluka ngwo matangwa akalu. (2 Timo. 3:1) Kuchizako yipikalo yize atu eswe akupalika ha mashimbu wano, tuvumbi twa Yehova kakupalika nawa mu yihungumiona ni mu ukanjiso. Mba yika yakutukwasa kununga ni kuwayila Yehova chipwe ngwe tunapalika mu lamba lino lieswe? Chuma chakutukwasa chili kunyingika ngwo, Zambi yoze twakuwayila kali ‘Zambi ya mwono.’—Jere. 10:10; 2 Timo. 1:12.
2. Yika tunanyingika hali Yehova yize yakutwaha tachi?
2 Yehova kali Mutu wamwenemwene, iye kakutukwasa muze twakupalika mu yipikalo; nawa kakufupa majila a kutukwashilamo. (2 Sango 16:9; Samu 23:4) Nyi twewuluka mashimbu eswe ngwetu, Zambi yetu kakulihulumba chinji hali yetu, nawa kakufupa kutukwasa, mutupwa ni tachi ja kukumba kapinda mweswawo masoloka ku mwono wetu. Mutumona umwenemwene wa maliji wano ku mwono wa Mwanangana Ndawichi ni tuvumbi akwo a Yehova.
3. Yika Ndawichi azangile kwamba muze ambile ngwenyi, “Yehova katwama ni mwono”?
3 Ndawichi kanyingikine kanawa Yehova ni kujikijila muli Iye. Muze apwile ni kumukaujola kuli akwa-kole, kuchingako Mwanangana Saulu, Ndawichi yalemba kuli Yehova ni kumwita ukwaso. (Samu 18:6) Muze Yehova akumbulwile kulemba chenyi ni kumukwasa, Ndawichi yamba ngwenyi: “Yehova katwama ni mwono.” (Samu 18:46) Yika Ndawichi azangile kwamba ni maliji wano? Umwe mukanda unambe ngwo, hano, Ndawichi kapwile ni kusolola ujikijilo uze apwile nawo hali Yehova, ngwenyi kali Zambi wamwenemwene, nawa ngwenyi, “iye kakukwasa tuvumbi twenyi mashimbu eswe.” Kupalikila mu yize amwene ku mwono wenyi, Ndawichi yanyingika ngwenyi, Yehova kapwile ni kumona yuma yeswe yize te yakulingiwa kuli iye ni kupwa hakamwihi hanga amukwase. Yino ye yakwashile Ndawichi mba anunge ni kulingila Yehova ni kumuhalisa.—Samu 18:28, 29, 49.
4. Yika twakuyuka muze twakumona Yehova ngwe, Zambi ya mwono?
4 Kupwa ni shindakenyo ngwetu, Yehova kali Zambi ya mwono che muchitukwasa mba tumulingile ni mbunge yeswe. Muchitukwasa nawa tupwe ni tachi ja kukumba yipikalo yize mutupalika ni kununga ni kulinga yize mutuhasa mu mulimo wenyi. Chikwo nawa, mutupwa ni usepa ukolo ni iye.
ZAMBI YA MWONO MAKUTAKAMISA
5. Yika muyihasa kutwaha tachi muze tunapalika mu yipikalo? (A-Fwilipu 4:13)
5 Nyi mutwiwuluka ngwetu, Yehova kali Zambi ya mwono, nawa kali hamuwika ni yetu hanga atukwase, mutuhasa kukumba kapinda mweswawo masoloka ku mwono wetu, chipwe munene hanji mukepe. Umwenemwene uli ngwo, kuli Yehova kukushi kapinda munene chinji kuhiana. Amu iye kali Zambi Mukwa-ndundo-jeswe, mahasa kutwaha tachi jize mutufupa. (Tanga A-Fwilipu 4:13.) Chino chakutwaha hamu lize liakutukwasa kupalika mu yipikalo. Muze twakumona ukwaso wa Yehova mu yuma yikehe-yikehe, twakupwa ni shindakenyo ngwetu, iye matukwasa mu yuma yikalu yize mutupalika.
6. Yika Ndawichi apalikile ku ukweze yize yakolesele ujikijilo wenyi muli Yehova?
6 Talenu yuma yaali yize yakwashile Ndawichi kujikijila chinji muli Yehova. Ku ukweze, muze apwile ni kufunga mapanga, ha yisuho yaali ursu ni ndumba yakwata mapanga ja tato. Ha yisuho yeswe yaali, Ndawichi kakawile tushitu jacho, chocho yalamwina mapanga. Alioze, Ndawichi kakanyongene ngwenyi, kalinga yuma yacho ku tachi jenyi mwene. Iye kanyingikine ngwenyi, Yehova mwe wamuhele tachi ni hamu lia kulinga chino. (1 Samue. 17:34-37) Ndawichi kakavulamine yize yalingiwile ha yisuho yino yaali. Muze apwile ni kunyonga ha yize yalingiwileko, ujikijilo wenyi muli Yehova wapwile ni kukola chinji. Mumu te kanyingika ngwenyi, Zambi ya mwono mamukwasa ha shimbu lieswalio mamufupa ku mwono wenyi.
7. Ha yika Ndawichi alihulikilile mba ahase kwasa jita ni Ngoliate?
7 Ha kupalika cha amwe mashimbu, muze Ndawichi te uchili mukweze, yaya ndo mu chilombo muze mwapwile tujita twa Izalele. Muze aheteleko, yamona ngwenyi, maswalale kapwile ni kwivwa woma unji, mumu Ngoliate, umwe chitakame wa A-Filistea te kakutomba maswalale ja Izalele. (1 Samue. 17:10, 11) Maswalale eswe yevwa woma unji, mumu kapwile ni kutala wika ha utohwe ni usuhwe wa Ngoliate ni ha yuma yize lunga wacho apwile ni kwamba. (1 Samue. 17:24, 25) Alioze, Ndawichi yalihulikila ha chuma cheka. Iye kanyingikine ngwenyi, Ngoliate te keshi kutomba wika maswalale ja Izalele, alioze te kanalimiki ni “Zambi ya mwono.” (1 Samue. 17:26) Ndawichi kanakalihulikila hali Yehova. Iye kanyingikine ngwenyi, Zambi yoze mwene wamukwashile muze apwile kafunga te mamukwasa nawa ha chikuma chino. Ndawichi kakayambashanyine ngwenyi, te mapwa ni ukwaso wa Yehova. Kashika ahashile kulimika ni Ngoliate, ngwe chize tunanyingika iye yakumba.—1 Samue. 17:45-51.
8. Yika muyitukwasa kukolesa ujikijilo wetu muli Yehova muze tunapalika mu yipikalo? (Tala nawa chizulie.)
8 Ni yetu nawa mutuhasa kukumba kapinda mweswawo nyi mutwiwuluka ngwetu, Zambi ya mwono kali hakamwihi ni yetu hanga atukwase. (Samu 118:6) Nyi mutwiwuluka yuma yize iye alingile kunyima, chino muchitukwasa kukolesa ujikijilo wetu muli Yehova. Kashika, tanga sango ja mu Mbimbiliya jize jinasolola chize Yehova akwashile tuvumbi twenyi. (Iza. 37:17, 33-37) Muhasa kutanga nawa sango ja ku mwono ja mandumbu a malunga ni a mapwo ha site yetu jw.org. Yilweza yacho yakusolola pundu chize Yehova akukwasa tuvumbi twenyi musono. Muhasa nawa kwiwuluka mashimbu waze Yehova akukwashile. Ukwaso wacho hanji hi unene ko ngwe kulimika ni ursu hanji ndumba. Alioze umwenemwene uli ngwo, Yehova kapwile hamwe ni yena. Iye mwe wakukokele hanga upwe sepa lienyi. (Yoa. 6:44) Chikwo nawa, wakuhasa kununga ni kushishika kuli Yehova mumu lia ukwaso wenyi. Hachino, lemba kuli Yehova hanga akwiulule mashimbu waze iye akumbulwile yilemba ye hanji muze apwile hamuwika ni yena ha mashimbu akalu. Kunyonga ha yuma yino, muchikukwasa kupwa ni shindakenyo ngwe, muhasa kujikijila muli Yehova mashimbu eswe.
Yitanga yize twakusolola muze tunapalika mu yipikalo yakukwata hali Yehova (Tala maparagrafu 8-9)
9. Kuchi twakumona yipikalo yize twakupalika? (Yishima 27:11)
9 Kumona Yehova ngwe Zambi ya mwono, muchitukwasa kumona yipikalo yetu mu jila yalita. Mu mutapu uka? Muze tunapalika mu yipikalo, muchilita kwiuluka yize yahiana ulemu, mumu Satana kambile ngwenyi, nyi twapalika mu yipikalo mutuhichika Yehova. Kashika, yize mutulinga ha lamba lize tunapalika muyikwata pundu hali Yehova. (Yombi 1:10, 11; tanga Yishima 27:11.) Alioze, nyi twanunga ni kushishika kuli Yehova muze tunapalika mu yipikalo, mutusolola zango lietu hali iye ni kusolola ngwetu, Satana kali mukwa-mahuza. Mba yika mutwamba hali yena? Shina uli ku chihela kuze nguvulu akanjisa mulimo wetu, unahono mbongo, atu mu mulimo wa kwambujola keshi kukutayiza, nyi hanji unapalika mu kapinda mukwo? Nyi yino ye yinalingiwa kuli yena, nyingika ngwe yize unapalika yili umwe uhashi uze muukukwasa kuvwisa Yehova kuwaha. Alioze nyingika ngwe, Yehova kechi kwecha upalike mu yuma yize kuuchi kuhasa kukumba. (1 Kori. 10:13) Iye makwaha tachi jize mujikukwasa kunyongonona.
ZAMBI YA MWONO MAKUWAHISA
10. Yika Zambi ya mwono makalinga hali waze akumuwayila?
10 Yehova kakuwahisa waze akununga ni kushishika kuli iye. (Hepre. 11:6) Iye kakutwaha sambukila ni kutukwasa kuwahilila ni yize tuli nayo; nawa makatwaha mwono wa mutolo kulutwe lia matangwa. Yetu twakujikijila muli Yehova ni mbunge yeswe, mumu tunanyingika ngwetu, makatuwahisa; nawa ngwo kali ni ndundo ja kuchilinga. Kashika, tunungenu ni kulinga yeswayo mutuhasa hanga tumulingile ngwe chize alingile tuvumbi twenyi ku shakulu. Yino ye alingile nawa Timoteu.—Hepre. 6:10-12.
11. Yika yakwashile Timoteu kukalakala chinji mu chikungulwila? (1 Timoteu 4:10)
11 Tanga 1 Timoteu 4:10. Timoteu te kakufuliela chinji muli Zambi ya mwono, kashika alihanyine hanga alingile Yehova ni mandumbu. Kuchi achilingile? Paulu kamukolwezele hanga apwe longeshi mupema mu chikungulwila ni mu mulimo wa kwambujola. Paulu kalwezele nawa Timoteu hanga apwe chilweza chipema kuli mandumbu, a makulwana ni akweze. Timoteu katambwile yimwe yiteli yikalu yize te yinachingi kuhana yiyulo ya tachi kuli mandumbu ha yize anafupiwa, alioze te katamba kuchilinga ni zango. (1 Timo. 4:11-16; 2 Timo. 4:1-5) Atu akwo te kechi kuhasa kumona milimo yeswe yize Timoteu apwile ni kulinga chipwe kumuchichimieka ha yuma yacho. Alioze iye kanyingikine ngwenyi, mutu yoze wahiana atu eswe kapwile ni kumona mulimo uze analingi ni kumuwahisa ha mulimo wacho.—Roma 2:6, 7.
12. Yika muyihasa kukwasa makulwana a mu chikungulwila mba alihane chinji mu mulimo wo? (Tala nawa chizulie.)
12 Musono, makulwana a mu chikungulwila no mahasa kupwa ni shindakenyo ngwo, Yehova kakumona yuma yeswe yize akulinga, nawa kakulemesa milimo yacho. Kuchizako kumeneka mandumbu hanga atakamise, kulongesa ni kwambujola, makulwana anji kakukwasa mulimo wa kutunga mu ululikiso wa Yehova ni kukalakala mu yizavu yize yakukwasa kuze kwalingiwa luyinda. Akwo kakukalakala mu yizavu ya kumeneka mandumbu waze anayiji, hanji kukwasa mu yizavu ya waze atala ha yuma ya shipitali. Makulwana waze akulihana hanga alinge milimo yino, kananyingika ngwo chikungulwila chili chambala cha Yehova hi cha mutu ko. Kashika akulihana hanga alinge yize mahasa. Ayo kali ni shindakenyo ngwo, Yehova maawahisa ha yeswe yize akumulingila.—Kolo. 3:23, 24.
Zambi ya mwono makuwahisa ha milimo yize unakilikita mu chikungulwila (Tala maparagrafu 12-13)
13. Kuchi Yehova akwivwa ha tachi jize twakusa hanga tumulingile?
13 Hi mandumbu eswe ko makalakala ngwe makulwana a mu chikungulwila. Alioze yetu eswe, mutuhasa kuhana chimwe kuli Yehova. Zambi yetu kakuwahilila chinji muze twakulinga yize mutuhasa hanga tumuwayile. Iye kakumona milambu yize twakuhana hanga tukwase milimo yize yinalingiwa hashi heswe, chipwe ngwe milambu yacho yili yikehe-yikehe. Kakuwahilila chinji muze twakusa tachi hanga tukumbe sonyi ni muze twakuzundula kwoko hanga tuhane kumbululo ha kukunguluka, iye nawa kakuwahilila muze twakuvulama upi uze akwetu akutulinga ni kwakonekena. Chipwe mulivwa ngwe kuuchi kuhasa kulinga yuma yinji mu mulimo wa Yehova, muhasa kupwa ni shindakenyo ngwe, iye kakulemesa yuma yeswe yize wakulinga. Iye kakukuzanga chinji ha yize wakumulingila, kashika makakuwahisa.—Luka 21:1-4.
NUNGA HAKAMWIHI NI ZAMBI YA MWONO
14. Kuchi kukolesa usepa wetu ni Yehova chakutukwasa kushishika kuli iye? (Tala nawa chizulie.)
14 Muchipwa chashi kuli yetu kununga ni kushishika kuli Yehova, nyi mutumumona ngwe mutu wamwenemwene. Yino ye yalingiwile kuli Yosefwe. Iye kalitunyine kulinga utanji, mumu kanyingikine ngwenyi, chino muchivwisa Yehova chinyengo. (Uputu. 39:9) Nyi tunazange Yehova apwe mutu wamwenemwene kuli yetu, twatamba kusa mashimbu hanga tuhanjike nenyi mu yilemba ni kulilongesa Liji lienyi. Nyi twachilinga, usepa wetu ni iye muukola tangwa ha tangwa. Chizechene ngwe Yosefwe, nyi mutupwa ni usepa ukolo ni Yehova kutuchi kulinga chuma chize muchimuvwisa yikola ku mbunge.—Tia. 4:8.
Kukundama kuli Yehova muchikukwasa kununga ni kushishika kuli iye (Tala maparagrafu 14-15)
15. Yika mutuhasa kulilongesa ha yize yalingiwile kuli A-Izalele mu puya? (A-Hepreu 3:12)
15 Atu waze akuvulama ngwo Yehova kali Zambi ya mwono, chakupwa chashi kulihandununa nenyi. Talenu yize yalingiwile kuli A-Izalele muze apwile mu puya. Ayo kanyingikine ngwo, Yehova katwama ko, alioze yaputuka kuyambashana nyi chamwenemwene te Yehova maafunga. Yahula ngwo: “Shina Yehova kwali hakachi ketu nyi shina ka?” (Kutuhu. 17:2, 7) Hachino, yalimika ni Zambi. Yetu kutwazangile kulinga yuma yize ayo alingile ha kwehuka Yehova.—Tanga A-Hepreu 3:12.
16. Yika muyihasa kusa ufulielo wetu mu cheseko?
16 Hi chashi ko kununga ni usepa upema ni Yehova hano hashi tuli. Atu anji kakwamba ngwo, Zambi katwamine ko. Chikwo nawa, chakusoloka ngwe atu waze keshi kuzanga Zambi kali ni mwono upema. Kumona yuma ya mutapu au, muchihasa kusa ufulielo wetu mu cheseko. Tunanyingika ngwetu, kutuchi keza kamba ngwetu, Zambi katwamine ko. Alioze mutuhasa kuputuka kuhamika ngwo, iye kechi kutukwasa muze mukusoloka ukalu umwe. Mutu yoze wasonekene Samu 73, kapalikile mu yuma ya mutapu au. Atu waze apwile ni kutungano te keshi kwononokena shimbi ja Yehova; chipwe chocho kapwile ni mwono upema. Hachino, iye yaputuka kuyambashana nyi te chili lume chilemu kununga ni kulingila Yehova.—Samu 73:11-13.
17. Yika muyitukwasa mba tununge ni kukundama kuli Yehova?
17 Yika yakwashile mukwa-kwimba masamu alumune manyonga jenyi? Iye kapukwine ha yize te muyilingiwa hali waze akuvulama Yehova. (Samu 73:18, 19, 27) Kanyongene nawa ha yiwape yize yakwiza ha kulingila Yehova. (Samu 73:24) Ni yetu mutuhasa kunyonga ha yiwape yize Yehova hanatwehe. Achinyonga chize mwono we te muupwa nyi ngwe kuushi kulingila Yehova. Kwiuluka yuma ya mutapu au, muchitukwasa hanga tununge ni kushishika kuli iye. Hachino, mutwamba ngwe chize ambile mukwa-kwimba masamu ngwenyi: “Chipema kuli yami kukundama kuli Zambi.”—Samu 73:28.
18. Mumu liaka kutushi kwivwa woma wa yize muyilingiwa kulutwe?
18 Yetu mutuhasa kukumba kapinda mweswawo masoloka ku mwono wetu ha matangwa wano a kusula, mumu tuli “ndungo ja Zambi ya mwono, kanda wamwenemwene.” (1 Tesa. 1:9) Yehova kali Mutu wamwenemwene, nawa mashimbu eswe kali hakamwihi ni yetu hanga atukwase. Kunyima, iye kakwashile tuvumbi twenyi, ni musono che malinga hali yetu. Kwasala hakehe, mutupalika mu luyinda munene. Alioze ha mashimbu jacho, kutuchi kapwa ukawetu, Yehova makapwa hakamwihi ni yetu. (Iza. 41:10) Kashika, yetu eswe mutuhasa kupwa ni hamu ni kwamba ngwetu: “Yehova iye chikwashi chami, chichi kwivwa woma.”—Hepre. 13:5, 6.
MWASO 3 Tachi Jetu, Ufulielo Wetu, Ujikijilo Wetu
