Twatamba kupwa ni ufulielo mba tuvwise Yehova kuwana. Alioze, Mbimbiliya yakwamba ngwo, “hi atu eswe ko akufuliela.” (2 Tesa. 3:2) Muze postolo Paulu ambile maliji wano, iye te kanahanjika hali “atu api ni yingulungulu,” hanji ngwetu, atu waze apwile ni kumuhungumiona. Alioze, yize ambile hakutwala ku ufulielo, yinakwate nawa hali atu akwo. Atu amwe keshi kutayiza ngwo, kuli Zambi yoze watangile yuma yeswe. (Roma 1:20) Akwo kakwamba ngwo, kakufuliela ha chimwe hanji muli umwe yoze ukwete ndundo jinji. Alioze, mutu kechi kuvwisa Yehova kuwaha ha kulinga wika yuma yino, mumu uno hi ufulielo wamwenemwene ko.

Yetu twatamba kupwa ni shindakenyo ngwetu, Yehova kwali, nawa ngwetu, kakuwahisa waze akufuliela muli iye ni mbunge yeswe. (Hepre. 11:6) Ufulielo uli chitanga cha muhuko wa spiritu yisandu. Mba tutambule spiritu yisandu, twatamba kulemba kuli Yehova hanga atweheyo. (Luka 11:9, 10, 13) Mutapu ukwo uze twakutambwilamo spiritu yisandu, uli ha kutanga Mbimbiliya. Chili nawa chilemu kupukuna ha yize tunatange ni kuyikaula ku mwono wetu. Nyi twachilinga, spiritu yisandu muyisongwela mwono wetu ni kutukwasa kupwa ni ufulielo uze muuvwisa Yehova kuwaha.