MUTWE WA KULILONGESA 23
MWASO 28 Kupwa Sepa lia Yehova
Yehova Kanatusanyika Hanga Tutwame mu Zuwo Lienyi
“Zuwo liami lisandu mulikatwama hamwe no; mba mungukapwa Zambi yo.”—EZE. 37:27.
YIZE MUTULILONGESA
Mutumona chize mutwokesa usakwililo wetu kuli Yehova ha kutusanyika hanga tutwame mu zuwo lienyi ni chize iye akutufunga.
1-2. Kukamba chika Yehova analingi hali tuvumbi twenyi ashishika?
NYI UMWE makuhula ngwenyi, kuli yena, ‘Yehova iya? Kuchi mukumbulula? Hanji mwamba ngwe, iye kali Tata, Zambi yami; nawa Sepa liami.’ Kuli nawa yisanyiko ni maliji akwo waze mutuhasa kutalikisa hali Yehova. Alioze, shina hiunanyongo kama nawa ngwe Yehova kakututambula ku zuwo lienyi?
2 Muze ahanjikile ha usepa wenyi ni Yehova, Ndawichi yatesa Yehova ni mutu yoze wakutambula akwo ku zuwo lienyi, tuvumbi twenyi yatesa ni ngeji waze iye akutambula. Ndawichi yahula ngwenyi: “Yehova, iya matwama mu mbalaka ye? Iya matunga ha mulundu we usandu?” (Samu 15:1) Kulita ni chisoneko chino, yetu tunanyingika ngwetu, mutuhasa kupwa ngeji ku zuwo lia Yehova hanji ngwetu, mutuhasa kupwa masepa jenyi. Uno uli uhenya unene!
YEHOVA KANAZANGE HANGA TUPWE NGEJI JENYI
3. Ngeji mutangu wa Yehova iya, usepa wa mutapu uka apwile nawo?
3 Muze te kanda achiputuka kutanga yuma yeswe, Yehova kapwile ukawenyi. Mba muze aputukile kulinga yuma, chitangu yatanga, Mwanenyi. Chino chapwile ngwe Yehova kali mukwa-kuzumbula ngeji yoze watambwile ngeji mutangu mu zuwo lienyi; mba yawahilila chinji ha kuchilinga. Mbimbiliya yakwamba ngwo, Mwana wa Yehova ‘kapwile uwahililo wenyi.’ Mu maliji akwo, mutuhasa kwamba ngwetu, Mwanenyi kapwile ni “kuwahilila kumeso jenyi matangwa eswe.”—Yishi. 8:30.
4. Aya nawa Yehova asanyikine mu mbalaka yenyi?
4 Kusulaho, Yehova yalinga angelo waze no apwile ngeji jenyi. Angelo kakwavuluka ngwo: “Ana a Zambi.” Kashika Mbimbiliya yakwasolola ngwo, kakuwahilila chinji ha kupwa hamuwika ni Yehova. (Yombi 38:7; Danie. 7:10) Ha kupalika cha miaka yinji, ngeji a Yehova kapwile wika waze apwile no mu malilu. Alioze, Yehova yatohwesa mbalaka yenyi hanga asemo nawa atu hano hashi apwe ngeji jenyi. Amwe a kuli ngeji jacho kapwile, Enoke, Noa, Apalahama ni Yombi. Mbimbiliya yakwamba ngwo, malunga wano kapwile masepa ja Zambi mumu kapwile ni kumwononokena, nawa ‘kendele ni Zambi.’—Uputu. 5:24; 6:9; Yombi 29:4; Iza. 41:8.
5. Yika mutuhasa kulilongesa ha uprofeto uli ha Ezekiele 37:26, 27?
5 Ha kupalika cha miaka yinji, Yehova yanunga ni kusanyika masepa jenyi hanga apwe ngeji mu zuwo lienyi. (Tanga Ezekiele 37:26, 27.) Ngwe chilweza, mu uprofeto wa Ezekiele twakulilongesamo ngwetu, Yehova kanazange hanga tuvumbi twenyi apwe ni usepa ukolo ni iye. Kanalakenya kukolesa no “usendo wa sambukila.” Uprofeto uno, unahanjika ha shimbu lize tuvumbi twa Yehova waze ali ni kutalatala cha kutwama mu malilu, ni waze ali ni kutalatala cha kutwama hano hashi, te mapwa mu mbalaka yimuwika ngwe mu “chendo chimuwika.” (Yoa. 10:16) Uprofeto uno unamanunuka musono!
YEHOVA KAKUTUFUNGA KU CHIHELA KWESWAKO TULI
6. Kuchi mutu akupwa ngeji mu mbalaka ya Yehova, mba mbalaka ya Yehova kulihi yili?
6 Ku mashimbu a kunyima, mbalaka yapwile chihela chize mutu te mahasa kuhwima ni kulifunga ku chishika ni mwalwa. Ngeji yoze te akutambula mu yimwe mbalaka, te mahasa kutwamamo kanawa ni uhumikizo. Muze twakulihana kuli Yehova, yetu twakupwa ngeji mu mbalaka yenyi ya chijimbikilo. (Samu 61:4) Mu mbalaka yacho, yetu tuli ni kulia cheswe cha ku ufulielo chize chakutukwasa hanga tununge ni kupwa masepa ja Yehova, hamwe ni mandumbu akwo waze no ali ngeji ja Yehova. Kashika, chipwe ngwe twatwama ku chihela cheswacho, yetu eswe mutuhasa kupwa ngeji mu mbalaka ya Yehova. Ngwe chilweza, hanji hiunayi wenyi mu chifuchi chikwo hanga utale kukunguluka cha mambonge chalipwila; mba yiunyingika nawa mandumbu akwo waze no akuwahilila ha kupwa mu mbalaka ya Yehova. Mbalaka ya Yehova yili ku yihela yeswe hano hashi muze muli tuvumbi twenyi.—Uso. 21:3.
7. Mumu liaka mutuhasa kwamba ngwetu, tuvumbi twa Yehova waze hanafu nihindu achili mu mbalaka yenyi? (Tala nawa chizulie.)
7 Mba yika mutwamba hali tuvumbi twa Yehova waze hanafu? Shina mutuhasa kwamba ngwetu, no kali ngeji mu mbalaka ya Yehova? Ewa! Mumu liaka mutuhasa kwamba chocho? Mumu kuli Yehova atu jacho achili ni mwono. Yesu kalumbunwine ngwenyi: “Ha chikuma cha uhindukilo wa afu chipwe Mose kachisolwele ha lusango wa ku chiputa cha mungonga, muze avulukile Yehova ngwenyi, ‘Zambi ya Apalahama, Zambi ya Izake, Zambi ya Yakomba.’ Iye kali Zambi, hi wa afu ko, alioze wa waze ali ni mwono, mumu kuli iye, ayo eswe kali ni mwono.”—Luka 20:37, 38.
Chipwe tuvumbi twa Yehova ashishika waze hanafu no mahasa kupwa ngeji mu mbalaka yenyi (Tala paragrafu 7)
YIZE TWAKUYUKA HA YITELI YIZE TUKWETE
8. Ngeji ja Yehova yika akuyuka?
8 Ngwe chizechene mbalaka yize atu akulinga yapwa chihela cha uhwimino ni ufunge, ni mbalaka ya Yehova neyo yakufunga ngeji waze akutambulamo ku ponde ya ku ufulielo ni kwaha kutalatala cha kulutwe lia matangwa. Muze tuli hakamwihi ni Yehova, Satana kechi kutulinga chuma nichimwe chize muchitupinjisa ku miaka yeswe. (Samu 31:23; 1 Yoa. 3:8) Mba mu chifuchi chaha, Yehova makanunga ni kufunga masepa jenyi ashishika hi wika ko ku ponde ya ku ufulielo, alioze ni ku kufwa.—Uso. 21:4.
9. Yitanga yika Yehova akushimbwila hali ngeji jenyi?
9 Tunanyingika ngwetu, chili uhenya unene kupwa ngeji mu mbalaka ya Yehova ni kupwa ni usepa ukolo ni iye, uze muununga ku miaka yeswe. Mba nyi twapwa ngeji ja Yehova, yitanga yika twatamba kusolola? Nyi makusanyika ku zuwo lia umwe, muzanga kunyingika yize mutu wacho mashimbwila hanga yena ulinge. Ngwe chilweza, mwenya-zuwo hanji mazanga uchize sapato muze munjila mu zuwo, hachino yena mutayiza kuchilinga. Chizechene nawa, ni yetu tunazange kunyingika yize Yehova anafupu hanga ngeji jenyi alinge mu mbalaka yenyi. Zango lietu hali Yehova, liakututwala tulinge yize mutuhasa hanga ‘tumuvwise kuwaha.’ (Kolo. 1:10) Yehova kali ngwe sepa lietu, alioze twatamba nawa kunyingika ngwetu, iye kali Zambi yetu, Tata, kashika muchilita kumuvumbika. (Samu 25:14) Hachino, tunazange hanga tulemese Yehova ni kusa tachi tuhone kuvulama chize iye apwa. Kulinga chino, muchitukwasa twehuke chuma cheswacho chize muchihasa kumuvwisa yikola ku mbunge. Chochene, tunazange ‘kwenda ni mbunge yitoma’ kumeso ja Zambi yetu!—Mika 6:8.
YEHOVA KAKASOLWELE KATONDE HALI A-IZALELE
10-11. Kuchi mutapu uze Yehova atwamine ni A-Izalele mu puya ya Sinai unasolola ngwo kuli iye atu eswe kapwa chimuwika?
10 Yehova keshi kusolola katonde hali ngeji waze akutambula mu mbalaka yenyi. (Roma 2:11) Yetu mutuhasa kunyingika kanawa ngwetu Yehova keshi katonde, ha chize apwile ni kutwama ni A-Izalele mu puya ya Sinai.
11 Hanyima lia kutusula A-Izalele mu undungo ku Engitu, Yehova yasakula asasendote hanga akalakale mu tabernakulu. A-Levi kaasakwile hanga alinge milimo yeka ni yeka mu chihela chacho chisandu. Shina waze te akukalakala mu tabernakulu, hanji waze apwile ni kutwama hakamwihi nayo kapwile ni kutambula ufunge walipwila kuli Yehova? Ka! Kuli Yehova, atu eswe kapwa chimuwika; kukushi yoze unahiane mukwo.
12. Kuchi mutapu uze Yehova atwamine ni A-Izalele mu puya unasolola ngwo iye keshi katonde? (Kutuhuka 40:38) (Tala nawa chizulie.)
12 Chipwe ngwe mbalaka yo yapwile kusuku ni tabernakulu hanji ka, Yehova kazangile hanga vungu lieswe limone nguji lia lelwa ni nguji lia kahia lize te liakupwa helu lia tabernakulu. (Tanga Kutuhuka 40:38.) Muze lelwa liapwile ni kututuluka ni kuya sali lieka, chipwe waze apwile kusuku ni tabernakulu te kakuhasa kulimona. Chino chapwile ni kukwasa asoko akase yuma ni kusokola mambalaka jo hanga vungu lieswe liendele hamuwika. (Kwa. 9:15-23) Chikwo nawa, atu eswe te kakuhasa kwivwa kwimba cha yitavwi yaali ya prata chize te chakwakwasa hanga akase yikwata yo ni kukatuka. (Kwa. 10:2) Mu maliji akwo, kutwama hakamwihi ni tabernakulu kuchakapwile ni kulumbunuka ngwo, mutu wacho kali ni usepa ukolo ni Yehova kuhiana waze te atwama kusuku. Alioze, atu eswe mu vungu lize te lialihana kuli Yehova, te mahasa kupwa ngeji jenyi ni kutambula usongwelo ni ufunge wenyi. Chizechene nawa musono, chipwe ngwe twatwama mu chifuchi cheswacho, yetu eswe mutuhasa kumona zango lia Yehova ha chize akutufunga ni kutukwasa.
Tabernakulu yapwile ni kusolola ngwo Yehova keshi katonde (Tala paragrafu 12)
CHIZE YEHOVA AKUSOLOLA MUSONO NGWENYI KESHI KATONDE
13. Kuchi Yehova akusolola musono ngwenyi, keshi katonde?
13 Amwe tuvumbi twa Yehova musono, katwama hakamwihi ni chishina chinene hanji hakamwihi ni yimwe Mbetele. Akwo, katwama mu yihela yacho. Hachino, ayo mahasa kulinga milimo yeka ni yeka yize yakulingiwa mu yihela yacho ni kutwama hamuwika ni mandumbu waze akusongwela ululikiso wa Yehova. Eka kakukalakala ngwe tulayi a mbonge, hanji mu milimo yikwo ya yalipwila ya shimbu lieswe. Nyi yena kuushi mu umwe wa ku milimo yacho, pwako ni shindakenyo ngwe Yehova yoze wakututambula mu zuwo lienyi, kakutuzanga yetu eswe, kuchingako ni yena. Kashika, makwaha yuma yeswe yize unafupu. (1 Petu. 5:7) Atu eswe waze analingi chihanda mu ululikiso wa Yehova, kakutambula kulia cha ku ufulielo, usongwelo ni ufunge uze anafupu.
14. Yika yinasolola musono ngwo, Yehova keshi katonde?
14 Chikuma chikwo chize chakusolola pundu ngwo, Yehova keshi katonde ha kutambula atu mu zuwo lienyi chili ngwo, iye kakusa tachi hanga Mbimbiliya yihete kuli atu a hashi heswe. Mbimbiliya kayisonekene mu malimi atatu, Hepreu, Aramaiku ni Ngregu. Shina atu waze akuhasa kutanga malimi jacho e ali ni usepa ukolo ni Yehova kuhiana waze kanyingikine malimi jacho? Ka, hi chocho ko.—Mateu 11:25.
15. Yuma yika yize yinasolola ngwo, Yehova keshi katonde? (Tala nawa chizulie.)
15 Mba tupwe masepa ja Yehova, kutwafupiwile kulilongesa chinji hanji kunyingika kuhanjika kanawa malimi anji. Shimbu Yehova ahane mana jenyi kuli atu waze alilongesele chinji, iye kakwahana kuli atu a hashi heswe chipwe waze kalilongesele. Liji lia Zambi hiliapwa kulumbununa mu malimi anji. Hachino, atu a hashi heswe mahasa kumona upeme wa kwononokena malongeso jenyi ni kusa tachi hanga apwe masepa jenyi.—2 Timo. 3:16, 17.
Mumu liaka kulumbununa Mbimbiliya mu malimi anji chinasolola ngwo, kuli Yehova atu eswe kali chimuwika? (Tala paragrafu 15)
NUNGA NI KUPWA NGEJI WA YEHOVA
16. Kulita ni Yilinga 10:34, 35; yika twatamba kulinga mba tununge mu mbalaka ya Yehova?
16 Chili chiwape chinene kutusanyika kuli Yehova hanga tupwe ngeji mu mbalaka yenyi. Yehova kali mukwa-kuzumbula ngeji mupema, mukwa-zango nawa wakufunga kanawa ngeji jenyi. Chikwo nawa, kuli iye, atu eswe kali chimuwika. Iye kakusanyika atu eswe chipwe ngwe katwama kweswako, kakolele mu usoko hanji mutapu weswawo, kalilongesele chinji hanji ka, kali a chikowa cheka, minyachi yalisa, miaka yalisa, malunga hanji mapwo. Alioze, hakachi ka atu wano, waze manunga ni kwononokena Yehova, e iye matayiza hanga atwame mu mbalaka yenyi.—Tanga Yilinga 10:34, 35.
17. Kulihi mutuhasa kuwana sango jinji jize mujitukwasa kupwa ngeji mu mbalaka ya Yehova?
17 Ha Samu 15:1, Ndawichi yahula ngwenyi: “Yehova, iya matwama mu mbalaka ye? Iya matunga ha mulundu we usandu?” Mba Yehova yecha Ndawichi mwene hanga akumbulule yihula yino. Kashika, ha mutwe uze muuhataho, mutumona shimbi jize twatamba kukaula mba tununge ni kupwa ngeji mu mbalaka ya Yehova.
MWASO 32 Pwenu Sali lia Yehova!
