Yihula ya Waze Akutanga Mikanda Yetu
Maliji “kumukaafunga” ali ha Samu 12:7, kanatale hali ‘akwa-luyinda’ (versu 5) nyi hanji ha “Maliji a Yehova” (versu 6)?
Chinasoloka ngwe versu yino yinahanjika hali atu.
Ha Samu 12:1-4, twakutangaho ngwetu: “Atu amwenemwene kanahu hakachi ka ana ja atu.” Haliapwila tutalenu chize versu ja Samu 12:5-7 jinahanjika hakutwala ku chikuma chino.
“Yehova kanambe ngwenyi,
Mumu ha lamba lia mukwa luyinda,
Ha mikuma ya chiswale mungukatuka
Haliapwila
Maliji a Yehova maliji apema.
Ngwe prata yize ya kweseka mu lutengo wa mavu, yakupemesa yisuho shimbiali.
Yena Yehova kumukaala;
kumukaafunga chize ku chisemuko chino ndo ku miaka ya mutolo.”
Versu 5 yinasolola yize Yehova anambe hali akwa-luyinda. Iye kumakaalamwina.
Versu 6 yinanungu ngwo, “maliji a Yehova maliji apema,” kali ngwe prata. Akwa-Kristu amwenemwene kakutayiza nyonga lino chakuhona kuyambashana.—Samu 18:30; 119:140.
Haliapwila tutalenu versu yinahateho Samu 12:7, yinambe ngwo: “Yena Yehova kumukaala; kumukaafunga chize ku chisemuko chino ndo ku miaka ya mutolo.” Shina maliji wano kanatale hali “iye”?
Amu versu 7 yinahanjika hakutwala ku “maliji a Yehova” amwe mahasa kunyonga ngwo, chino chinalumbunuka ngwo Zambi ‘kakufunga’ maliji jenyi. Chochene tunanyingika ngwetu Zambi kafungile Mbimbiliya chipwe ngwe akwa-kole kasele tachi jinji hanga ayikanjise ni kuyinongesa. —Iza. 40:8; 1 Petu. 1:25.
Nihindu yize anahanjika ha 5 yili yamwenemwene. Yehova manunga ni kukwasa ni kulamwina ‘akwa-luyinda’ ni waze anamono “lamba.”—Yombi 36:15; Samu 6:4; 31:1, 2; 54:7; 145:20.
Hachino, maliji ‘ayo’ ha versu 7 ha yika anatale?
Sango jili ha Samu yino jinasolola ngwo maliji ‘ayo’ kanatale hali atu.
Ku uputukilo wa Samu 12:1, Ndawichi kanahanjika hakutwala kuli tuvumbi ashishika a Yehova waze ongele kuli atu api. Ha versu yinahateho twakutanga ngwetu, Yehova makakatukila waze akuhanjika yuma yino yipi. Samu yino yakutukolweza ngwo mutuhasa kufuliela ngwetu Zambi makalinga yuma hanga akalile atu jenyi mumu maliji jenyi kali apema.
Kashika muze versu 7 yinambe ngwo Yehova ‘makafunga,’ yinahanjika hali waze akumwesa lamba kuli yingulungulu.
Maliji, ‘yetu’ kaazachishile kaali keswe ha versu yino mu yisoneko yitangu ya Hepreu ni kwasa nawa mu yisoneko ya Ngregu. Kuli tuvumbi ashishika waze akwamwesa lamba, versu 7 yinambe ngwo: Hita kavumbi washishika, “Kumukaafunga” “ku chisemuko chino,” cha atu waze akuneha lamba. (Samu 12:7, 8) Ha yimwe yisoneko ya Hepreu mu limi lia Aramaiku Versu 7 yinambe ngwo: ‘Mwene . . yena kumukaafunga akwa-ululi ku chisemuko chino ku miaka yeswe ya mutolo. Yingulungulu kanapalika sali ni sali ngwe zambo yoze wakukoka manyinga ja ana ja atu.’ Chino chinakolesa shindakenyo yetu ngwetu Samu 12:7 kuyishi kutala ha maliji ja Zambi.
Hachino, versu yino yakuhana kutalatala kuli “Atu amwenemwene” ngwo, Zambi makaalamwina.
