1-2. Yika amwe akwamba hakutwala ku usendo?

 USENDO muuhasa kupwa mashimbu apema chinji ku mwono wa lunga ni pwo. Nyi nunalingi usendo, kwamba pundu nunazange hanga yuma yeswe yende kanawa. Yino ye yakulingiwa kuli mandumbu anji. Tsion, a umwe ndumbu wa pwo mu Etiópia, yamba ngwenyi: “Mashimbu amwe a uwahililo ku mwono wetu, kapwile mashimbu a usendo wetu. Twapwile ni kuhanjika ha yuma yilemu, alioze kapwile nawa mashimbu a kulivwisa kuwaha ni kusehejela. Ngunakawahilila chinji ha kunyingika ngwami, nawanyine mutu yoze te nakuzanga ni neye wakunguzanga.”

² Alioze Alessio, umwe ndumbu ku Holanda, yamba ngwenyi: “Chinakapema chinji kunyingika mukwetu-pwo muze te tunalingi usendo, alioze mu usendo wetu nemo mwapwile umwe kapinda.” Ha mutwe uno, mutumona kapinda yoze mahasa kusoloka mu usendo, ni shimbi ja mu Mbimbiliya jize mujikwasa mandumbu jacho hanga alinge usendo uze muuhalisa Yehova. Mutumona nawa chize mandumbu akwo mu chikungulwila mahasa kukwasa waze alingi usendo.

CHIKUMA CHIZE AKULINGILA USENDO

3. Yika akulingila usendo? (Yishima 20:25)

³ Chipwe ngwe mashimbu a usendo kakuneha uwahililo unji, alioze kali nawa mashimbu alemu waze mahasa kukwasa tusendo hanga alimbate. Ha tangwa lia umbachiso, waze analimbate, kakulinga chilakenyo kumeso ja Yehova ngwo, malizanga ni kulivumbika umwe ni mukwo ku mwono wo weswe. Shimbu kanda tuchilinga chimwe chilakenyo, chitangu twatamba kunyonga kanawa. (Tanga Yishima 20:25.) Chino chinatale nawa ha chilakenyo cha ulo. Chikuma akulingila usendo chili  ngwo, waze anaulingi alinyingike kanawa, mba akwate chiyulo chipema. Ha mashimbu amwe, chiyulo chakupwa kulimbata, alioze ha mashimbu akwo, chiyulo muchihasa kupwa cha kuhwisa usendo. Nyi waze analingi usendo mazanga kuuhwisa, chino kuchalumbunukine ngwo usendo wo kuwendele kanawa. Alioze chinalumbunuka ngwo, usendo wakwasa kukwata chiyulo chipema.

4. Mumu liaka yetu eswe twatamba kupwa ni nyonga lialita hakutwala ku usendo?

⁴ Mumu liaka chili chilemu kunyingika yize akulingila usendo? Ndumbu wa pwo hanji wa lunga twamishi yoze uli ni nyonga lialita, kechi kuhasa kuputuka usendo ni mutu yoze keshi ni nyonga lia kulimbata nenyi. Alioze hi twamishi wika ko atamba kupwa ni nyonga lino, yetu eswe twatamba kwiwuluka yize akulingila usendo. Ngwe chilweza, amwe hanji mahasa kunyonga ngwo, nyi ndumbu wa lunga ni wa pwo kanalingi usendo katamba lume kulimbata. Mba kuchi chino chakukwata hali mandumbu waze achili twamishi? Melissa, umwe ndumbu wa pwo mu Estados Unidos yamba ngwenyi: “Muze ndumbu wa pwo ni wa lunga analingi usendo, mandumbu akwo mu chikungulwila kakushimbwila hanga ayo alimbate lume. Hachino, mandumbu waze analingi usendo, kakwecha kuhwisa usendo wo chipwe ngwe kuushi kwenda kanawa. Chino chakutwala mandumbu akwo waze achili twamishi, ahone kuputuka usendo. Yuma ya mutapu au muyihasa kusakalalisa chinji mandumbu.”

KULINYINGIKA KANAWA UMWE NI MUKWO

5-6. Yika waze analingi usendo atamba kuhanjika mu usendo wo? (1 Petulu 3:4)

⁵ Nyi nunalingi usendo, yika muyinukwasa kunyingika nyi munulimbata nyi ka? Chuma muchinukwasa chili kulinyingika kanawa umwe ni mukwo. Muchihasa kupwa ngwe hiwanyingika yimwe yuma hali mutu yoze unambe kulinga nenyi usendo shimbu kanda nuchiuputuka. Haliapwila, yena uli ni uhashi wa kunyingika ‘mutu wa muchima mu mbunge.’ (Tanga 1 Petulu 3:4.) Nyi unalingi usendo, muhasa kunyingika kanawa usepa wa mutu wacho ni Yehova, utu wenyi ni yize akunyonga chinji. Ha kupalika cha mashimbu, muhasa kukumbulula yihula yino: ‘Shina mutu yoze ngunalingi nenyi usendo, mahasa kupwa lunga hanji pwo mupema kuli yami?’ (Yishi. 31:26, 27, 30; Efwe. 5:33; 1 Timo. 5:8) ‘Shina munguhasa kununga ni kuzanga mutu wacho ni kulinga yeswayo iye mafupa? Shina neye mahasa kungusolwela yuma yacho? Shina muchipwa chashi kuli yami kwijilila ni tupalia twenyi?’ b (Roma 3:23) Mba nulinyingike kanawa, iwulukenu ngwenu, chuma chilemu hi ko kupwa atu waze alifwa, alioze chili tachi jize munusa hanga nwijilile ni kalisa yoze nuli nenyi umwe ni mukwo.

 ⁶ Yuma yikwo yika yize munuhasa kusa shindakenyo muze nunalingi usendo? Shimbu kanda uchizanga chinji ndumbu wacho, hanji muchilita kuhanjika ha yimwe yuma yilemu, ngwe hakutwala ku yuma yize ndumbu wacho anatese kulinga kulutwe. Mba yika mutwamba ha yuma yize yinatale hali mutu mwene, ngwe hakutwala ku misongo, mbongo ni yuma yipi yalingiwile mu mwono wa mutu, yize yinakwate ha yitanga yenyi? Kuchishi ni ulemu kuputuka kuhanjika yuma yeswe ku uputukilo wa usendo. (Tala nawa Yoano 16:12.) Nyi mumona ngwe kanda kuchipalika mashimbu anji a kukumbulula yihula yimwe mu usendo wenu, solola chikuma chacho zwalala kuli mukwenu. Chipwe chocho, ha kupalika cha mashimbu, mutu yoze unalingi nenyi usendo mafupiwa kunyingika yuma yacho hanga akwate chiyulo chipema. Kashika, mukuheta amwe mashimbu waze muhanjika yuma yacho ni umwenemwene weswe.

7. Kuchi waze analingi usendo mahasa kulinyingika kanawa? (Tala nawa mushete, “ Kulinga Usendo ni Mutu Yoze Uli Kusuku.”) (Tala nawa yizulie.)

⁷ Mba kuchi muhasa kunyingika kanawa mutu yoze unalingi nenyi usendo? Jila yipema ya kuchilingila yili kuhula mutu wacho, ni kupanjika kanawa makumbululo jenyi. (Yishi. 20:5; Tia. 1:19) Mba nuchilinge, hanji munuhasa kulinga yimwe hamuwika yize muyinukwasa hanga nuhanjike, ngwe kulia hamuwika, kuya ni kwolola molu ku chihela kuze kuli atu anji, hanji kwambujola hamuwika. Yenu nawa munuhasa kulinyingika kanawa ha kupalikisa mashimbu hamuwika ni asoko ni masepa jenu. Chikwo nawa, linga yuma yize muyihana uhashi kuli mutu yoze unambe kulimbata nenyi, hanga asolole yitanga yenyi mu majila alisa ni kuli atu alisa. Talenu yize alingile Aschwin, yoze watwama ku Holanda, iye kanasolola yize alingile mu usendo wo ni Alicia: “Twasakwile kulinga milimo yimwe hamuwika hanga yitukwase kulinyingika kanawa. Ha mashimbu amwe, yapwile yuma yikehe-yihehe, ngwe kuteleka hamuwika hanji milimo yikwo ya ku zuwo. Kulinga chino, chatukwashile kumona yitanga yipema ni tupalia a umwe ni mukwo.”

8. Mumu liaka chili chilemu waze analingi usendo kulilongesa Mbimbiliya hamuwika?

⁸ Yenu nawa munulinyingika kanawa nyi munulilongesa Mbimbiliya hamuwika. Mba nyi nwalimbata, muchilita kusakula tangwa limwe hanga nulinge uwayilo wa mu usoko, mumu Zambi katamba kupwa ni chihela chilemu mu ulo wenu. (Chilu. 4:12) Kashika, muchilita nulinge katalilo wa kulilongesa hamuwika haliapwila muze nunalingi usendo. Amu atu waze analingi usendo kanda achitunga usoko, ndumbu wa lunga keshi mutwe wa ndumbu wa pwo. Chipwe chocho, nyi mashimbu eswe nwalilongesa hamuwika,  munuhasa kunyingika yize hita mutu akunyonga hali Yehova. Max ni Laysa, lunga ni pwo waze atwama mu Estados Unidos, kamwene chiwape chikwo. Max yamba ngwenyi: “Chize ku uputukilo wa usendo wetu, twalilongesele mikanda yize te yakuhanjika hakutwala ku usendo, ulo ni mwono wa mu usoko. Kulilongesa yuma yino, chatukwashile kuhanjika ha yikuma yilemu yize kanji-kanji hi yashi ko kuhanjika.”

YUMA YIKWO YIZE MUNUHASA KUSHIMUTWINA

9. Yika waze analingi usendo atamba kunyingika hakutwala kuli waze malweza usendo wo?

⁹ Iya nwatamba kulweza usendo wenu? Chino chili chiyulo cha yenu aali. Ku uputukilo wa usendo, hanji munutesa kulweza wika atu akehe. (Yishi. 17:27) Kulinga chino, muchikwasa hanga atu ahone kunuhula chinji hakutwala ku usendo wenu, ni kunushinjila nulimbate ni kawashi. Alioze, nyi kunwalwezele mutu niumwe, muchihasa kunutwala hanga nupwe chinji ukawenu mumu lia kwivwa woma ngwo, atu akwo manyingika usendo wenu, chino muchihasa kupwa ponde. Kashika, chili chilemu kulweza atu waze mahasa kunukwasa ha yize munufupiwa ku musunya ni kunwaha yiyulo. (Yishi. 15:22) Ngwe chilweza, munuhasa kulweza asoko jenu, masepa waze ajama hanji makulwana a mu chikungulwila.

10. Kuchi waze anambe kulimbata malinga usendo uze muuhalisa Yehova? (Yishima 22:3)

¹⁰ Kuchi munuhasa kulinga usendo uze muuhalisa Yehova? Ha kupalika cha mashimbu, yize nwakwivwa hali umwe ni mukwo, muyikola chinji. Kuchi munuhasa kwehuka yuma yize muyivwisa Yehova chinyengo? (1 Kori. 6:18) Kanda nuhanjika ha yuma ya luchisa, kanda nupwa-pwa chinji ukawenu ku chihela kuze kushi atu, nawa ehukenu kunwa walwa unji. (Efwe. 5:3) Yuma yino, muyihasa kwokesa usolo wa kulisumbakenya mba muchipwa chikalu kulinga yize muyivwisa Yehova kuwaha. Munusolola mana ha kuhanjika mashimbu eswe yuma yize munulinga hanga nulivumbike umwe ni mukwo ni kuvumbika shimbi ja Yehova. (Tanga Yishima 22:3.) Talenu yize yakwashile Dawit ni Almaz waze atwama mu Etiópia. Yamba ngwo: “Twapwile ni kupalikisa mashimbu anji hamuwika mu yihela muze te mwakupwa atu anji, hanji hamwe ni masepa jetu. Kutwakapwile ni kutwama ukawetu mu mashinyi hanji mu zuwo. Chino chatukwashile kwehuka kulisa mu ponde.”

11. Yika waze analingi usendo atamba kunyonga hakutwala ku chize malisolwela zango?

¹¹ Mba yika mutwamba ha kulisolwela zango mu yuma yimwe? Muze zango lienu muliya ni kwoka, hanji yenu ene munutesa kulisolwela zango liacho mu jila yalita. Alioze nyi usolo wa kulisumbakenya muwoka chinji, muchihasa kupwa chikalu kunyonga kanawa ni kukwata chiyulo cha mana. (Mwaso 1:2; 2:6) Kulisolwela zango mu jila yino, muchihasa kunutwala hanga nuhone kunyonga kanawa ni kulinga chuma chize muchivwisa Yehova yikola ku mbunge. (Yishi. 6:27) Kashika ku uputukilo wa usendo wenu, yenu munuhasa kutesa yize munulinga ni yize kunuchi kulinga, kulita ni shimbi ja Yehova. c (1 Tesa. 4:3-7) Yenu waze nunalingi usendo munuhasa kulihula ngwenu: ‘Kuze twatwama mutapu uka atu waze analingi usendo akulisolwela zango? Shina yize mutulinga muyihasa kwokesa usolo wa kulisumbakenya?’

12. Nyi mandumbu waze analingi usendo mahona kulivwashana chinji, yika atamba kwiwuluka?

¹² Muze mukusoloka kapinda ni kuhona kulivwashana, kuchi munuhasa kuyihwisa? Nyi ha mashimbu amwe munuhona kulivwashana, shina chino chinalumbunuka ngwo, usendo wenu kuushi kanawa? Kanji-kanji hi chocho ko; mumu atu eswe waze alimbata, keshi kulivwashana ha  yuma yeswe. Ulo ukolo kakuulinga kuli atu aali waze akulivumbika ni kusa tachi hanga ejilile ha yize mukwo akuzanga. Mutapu uze nwakuhwishilamo kapinda haliapwila, muusolola nyi ulo wenu muwenda kanawa nyi ka. Lihulenu ngwenu: Shina twakuhasa kuhanjika ha yimwe yikuma ni vumbi hamwe ni kulihumikiza? Twakutayiza tupalia twetu ni kusa tachi hanga tuhone kwafunyina? Shina twakusa tachi hanga tuhone kulikwachilila ha manyonga jetu, kwita ukonekeno, ni kulikonekena? (Efwe. 4:31, 32) Alioze, nyi nwakuzwela chinji hanji kuhona kulivwashana matangwa eswe, chino muchihasa kusolola ngwo muze munulimbata yuma kuyichi kupema. Kashika, nyi umwe wa kuli yenu mamona ngwenyi mukwo kalitele kulimbata nenyi, chiyulo chipema chize yenu aali munukwata chili, kuhwisa usendo wenu. d

13. Yika muyikwasa mandumbu ali tusendo amone mashimbu waze usendo wo muuhasa kumbata?

¹³ Usendo wenu watamba kumbata mashimbu angahi? Kanji-kanji, nyi kutwasele mashimbu anji muze tunambe kukwata chiyulo, yuma kuyishi kwenda kanawa. (Yishi. 21:5) Kashika usendo wenu, watamba kumbata amwe mashimbu waze manukwasa kulinyingika kanawa. Alioze, kunwatambile kulinga usendo uze muumbata mashimbu anji kuhiana waze atela. Mbimbiliya yakwamba nawa ngwo: “Kutalatala chize kuchishi kumoneka kuchakuhongesa mbunge.” (Yishi. 13:12) Chikwo nawa, nyi munupalikisa mashimbu anji hamuwika muchipwa chikalu kukumba usolo wa kulisumbakenya. (1 Kori. 7:9) Shimbu nulihulikile ha unji wa mashimbu waze munulinga usendo, muchilita kulihula ngwo: ‘Yika mungufupiwa kunyingika hali kasendo kami yize muyingukwasa kukwata chiyulo chipema?’

KUCHI MANDUMBU AKWO MAHASA KUKWASA WAZE ANALINGI USENDO?

14. Kuchi mandumbu akwo mahasa kukwasa waze analingi usendo? (Tala nawa chizulie.)

¹⁴ Nyi unanyingika mandumbu waze analingi usendo, kuchi muhasa kwakwasa? Jila yipema ya kuchilingila yili, kwasanyika eze ku zuwo lienu hanga nulie hamuwika, kupwa no ha uwayilo wenu wa mu usoko, hanji ha mashimbu akwo nawa. (Roma 12:13) Ayo mahasa kuzachisa mashimbu jacho hanga alinyingike kanawa. Mutuhasa nawa kwakwasa ha kupalikisa no mashimbu hamuwika hanga ahone kupwa ukawo, kwakwasa nyi tuli ni mashinyi, hanji kwasanyika ku zuwo lietu hanga ashimutwine ha chihela chize anaamono kuli atu akwo. (Ngala. 6:10) Alicia yoze hitwatongola, kanewuluka ukwaso uze iye ni Aschwin atambwile kuli mandumbu. Yamba ngwenyi: “Tunakawahilila chinji ha chize mandumbu  amwe atutambwile ku mazuwo jo muze te twakufupa kupwa wika yetu aali hanga tushimutwine, chipwe chocho, te twakupwa ha chihela chize atu akwo anatumono.” Nyi mandumbu waze analingi usendo makwita hanga wakaule muze o mapwa hamuwika, chino muchaakwasa chinji. Alioze, watamba kukeya hanga uhone kwahichika ukawo, chipwe chocho, watamba nawa kwaha mashimbu hanga ahanjike ha yize anazange.—Fwili. 2:4.

15. Yika mutuhasa nawa kulinga hanga tukwase mandumbu waze analingi usendo? (Yishima 12:18)

¹⁵ Mutuhasa kukwasa mandumbu waze analingi usendo ha yize mutuhanjika ni ha yize kutuchi kuhanjika. Ha mashimbu amwe, muchilita kukwata limi lietu. (Tanga Yishima 12:18.) Ngwe chilweza, mutuhasa kupwa ni kalusu-lusu wa kulweza atu akwo ngwo, nganji kanalingi usendo. Kumana mandumbu waze analingi usendo kanazange hanga ene alweze akwo. Kutwatambile kuyenga-yenga mandumbu waze analingi usendo, hanji kwamba yuma yipi ha yiyulo yize ene anakwate. (Yishi. 20:19; Roma 14:10; 1 Tesa. 4:11) Chikwo nawa, kutwatambile kuhula hanji kulinga yuma yize muyitwala mandumbu waze analingi usendo alivwe ngwo katamba kulimbata. Ndumbu Elise ni mukwo-lunga, yamba ngwo: “Twakomokene muze atu akwo apwile ni kutulweza hakutwala ku usendo wetu ni yize twatamba kulinga mba tulimbate, yetu kutwakalwezele mandumbu jacho chuma nichimwe.”

16. Yika twatamba kulinga nyi mandumbu waze analingi usendo mahwisa usendo wo?

¹⁶ Mba nyi waze analingi usendo, matesa kuhwisa usendo wo? Kuchichi kulita kwahula yuma yize kuyalitele hanji kufupa kunyingika yoze uli ni kapalia. (1 Petu. 4:15) Umwe ndumbu wa pwo avuluka ngwo Lea, yamba ngwenyi: “Namwene ngwami, atu akwo kafupile kunyingika mumu liaka yami ni umwe ndumbu twahwishile usendo wetu. Nevwile yikola yinji ku mbunge.” Ngwe chize hitwamba kulu, nyi waze analingi usendo matesa kuhwisa usendo wo, chino kuchalumbunukine ngwo, yimwe kuyendele kanawa. Kwamba pundu, muchihasa kulumbunuka ngwo, kakwata chiyulo chipema ha usendo wo. Chipwe chocho, kukwata chiyulo chacho hi chashi ko, muchihasa kuneha chinyengo hali ayo eswe aali ni kwatwala alivwe ukawo. Kashika, chili chilemu yetu kusa tachi hanga twakwase.—Yishi. 17:17.

17. Yika waze analingi usendo atamba kulinga?

¹⁷ Ngwe chize twamona, usendo ukwete kapinda kawo. Alioze mashimbu a usendo, mahasa kupwa mashimbu a uwahililo ku mwono wa lunga ni pwo. Jessica, yamba ngwenyi: “Kwamba umwenemwene, kulinga usendo chili mulimo unene. Alioze, chapemene chinji kusa mashimbu ni tachi hanga tulinyingike kanawa.” Nyi nunalingi usendo, senu tachi hanga nulinyingike kanawa umwe ni mukwo. Nyi nwachilinga, munupwa ni usendo uze muunukwasa kukwata yiyulo ya mana.