MUTWE WA KULILONGESA 20
MWASO 67 “Ambujola”
Nungenu ni Kwambujola Mumu lia Zango!
“Sango jipema katamba kulianga kujambujola ku mavungu eswe.”—MARKU 13:10.
YIZE MUTULILONGESA
Mutumona chize zango lia kutukwasa kwambujola sango jipema ni mbunge yeswe.
1. Yika twevwile ha kukunguluka cha ha mwaka cha 2023?
HA KUKUNGULUKA a cha ha mwaka 2023, twevwile ulumbunwiso waha wa yize twafuliela ni mitambi yalipwila hakutwala ku mulimo wa kwambujola. Ngwe chilweza, twevwile ngwetu, atu amwe hanji makaputuka kulingila Yehova, chipwe hanyima lia kunongesa Babilonia Yinene; nawa ngwetu, kukatuka ha Novembro ya 2023, mukupwa kwalumuka ha chize akwa-kwambujola mapwa ni kuhana lusango wa mulimo wo wa kwambujola. Shina kwalumuka chino chinalumbunuka ngwo, mulimo wetu wa kwambujola kuushi nawa ni ulemu? Ka, hi chocho ko!
2. Mumu liaka twatamba kwambujola ni kawashi ha kupalika cha tangwa ni tangwa? (Marku 13:10)
2 Mulimo wetu wa kwambujola, twatamba kuulinga kawashi-washi ha kupalika cha tangwa ni tangwa. Mumu liaka? Mumu mashimbu kanayi ni kutepuluka. Tutalenu yize Yesu ambile hakutwala ku mulimo wa kwambujola ha matangwa wano a kusula. (Tanga Marku 13:10.) Mu mukanda wa Mateu, Yesu yamba ngwenyi, sango jipema te majambujola hashi heswe mba “songo” muliza. (Mateu 24:14) Maliji songo, kanatale ha kunongesa cha chifuchi chino chize anayulu kuli Satana. Yehova hanatese “tangwa ni ola” yize makaneha songo liacho. (Mateu 24:36; 25:13; Yili. 1:7) Ha kupalika cha tangwa ni tangwa, tunayi ni kukundama ku songo lia hano hashi hapi. (Roma 13:11) Kashika, twatamba kununga ni kwambujola ndo haze tangwa liacho mulihetela.
3. Mumu liaka twakwambujola sango jipema?
3 Amu tunanyongo ha mulimo wa kwambujola, twatamba kulihula chihula chino chilemu, ngwetu: Mumu liaka twakwambujola sango jipema? Mu maliji akehe, twakwambujola mumu lia zango. Muze twakwambujola, twakuchilinga mumu twakuzanga sango jipema; chahiana ulemu, mumu twakuzanga Yehova ni jina lienyi. Haliapwila tuhengwolenu yikuma yacho.
TWAKWAMBUJOLA MUMU TWAKUZANGA SANGO JIPEMA
4. Kuchi twakwivwa nyi twatambula lusango mupema?
4 Shina uneuluka tangwa lize watambwile lusango mupema, ngwe wa kusemuka cha umwe mwana mu usoko, hanji muze wawanyine mulimo uze te unafupu? Kwamba umwenemwene, kota wawahililile chinji, chocho yiuzanga kulweza lusango wacho kuli asoko ni kuli masepa je. Shina yuma ya mutapu au yalingiwile kuli yena muze wevwile sango jipema jize jinahiane sango jeswe, chekwamba, sango jipema ja Wanangana wa Zambi?
5. Kuchi wevwile muze walilongesele umwenemwene wa mu Mbimbiliya ha chisuho chitangu? (Tala nawa yizulie.)
5 Uneuluka chize wevwile muze wanyingikine umwenemwene wa mu Mbimbiliya ha chisuho chitangu? Walilongesele ngwe Tatenu wa mu malilu, kakukuzanga chinji; nawa kanazange hanga ulinge chihanda mu usoko uze wakumuwayila. Walilongesele nawa ngwe, iye kanalakenya kuhwisa lamba lieswe lia atu; nawa ngwo, mu chifuchi chaha mukamona cheka atu wazanga waze hanafu muze makaahindwisa. Yino yili wika yimwe ya ku yuma yize walilongesele. (Marku 10:29, 30; Yoa. 5:28, 29; Roma 8:38, 39; Uso. 21:3, 4) Unakawahilila chinji muze walilongesele umwenemwene uno. (Luka 24:32) Wazangile chinji yize yeswe walilongesele, chocho yiuzanga kulweza atu akwo umwenemwene wacho.—Tala nawa Jeremia 20:9.
Muze twevwile sango jipema ha chisuho chitangu, kutwakaswekele umwenemwene uno ulemu! (Tala paragrafu 5)
6. Yika walilongesa ha chilweza cha Ernest ni Rose?
6 Tutalenu chimwe chilweza. Ndumbu Ernest b kafwishile tato muze apwile ni miaka kumi. Yamba ngwenyi, “Napwile ni kulihula ngwami: ‘Shina tata, kaya mu malilu? Shina tangwa limwe, mungukamumona cheka?’ Te nakwivwila chipululu twanuke waze ali ni atato.” Ernest te kakuya mashimbu eswe ku mafuka, mafukama ha fuka lia tato ni kuputuka kulemba ngwenyi: “Zambi ngunaliumbu, lisesa ngunafupu kunyingika kuze tata ali.” Ha kupalika cha miaka 17 chize haze afwile tato, Ernest yamwambulwila sango jipema, chocho yatayiza kulilongesa Mbimbiliya. Iye kakomokene chinji muze alilongesele ngwo, afu kanyingikine nichimwe; nawa ngwo, Mbimbiliya yinalakenya uhindukilo wa afu. (Chilu. 9:5, 10; Yili. 24:15) Hachino, iye yawana makumbululo a yihula yize apwile nayo. Ernest yazanga chinji umwenemwene wa mu Mbimbiliya uze apwile ni kulilongesa. Mukwo-pwo Rose, yaputuka kulilongesa Mbimbiliya neye yazanga sango ja Wanangana. Ha mwaka 1978, yaapapachisa. Hazehene, yaputuka kuhanjika ni asoko, masepa ni atu akwo nawa hakutwala ku umwenemwene uze alilongesele. Ernest ni Rose kakwashile atu kuhiana 70 kulilongesa umwenemwene ni kwapapachisa.
7. Yika yakulingiwa nyi twazanga umwenemwene wa mu Mbimbiliya? (Luka 6:45)
7 Muze twakuzanga umwenemwene wa mu Mbimbiliya, kutushi kuusweka, twakuulweza nawa kuli akwetu. (Tanga Luka 6:45.) Twakwivwa ngwe chize evwile tumbaji twa Yesu waze ambile ngwo: “Kutwahashile kulitwamina kwambujola yuma yize twamwene ni yize twevwile.” (Yili. 4:20) Amu twakuzanga chinji umwenemwene, twakusa tachi hanga tulweze atu anji umwenemwene wacho.
TWAKWAMBUJOLA MUMU TWAKUZANGA ATU
8. Mumu liaka twakwambujola sango jipema kuli atu? (Tala mushete, “ Zangenu Atu—Mba Nwapwise Tumbaji.”) (Tala nawa chizulie.)
8 Chizechene ngwe Yehova ni Mwanenyi, ni yetu twakuzanga chinji atu. (Yishi. 8:31; Yoa. 3:16) Yetu twakuvwila keke atu waze ‘kanyingikine Zambi,’ nawa keshi ni “kutalatala.” (Efwe. 2:12) Mumu lia milonga yize ali nayo, atu jacho kali ngwe kaholokela mu wina usuku muze keshi kuhasa kutuhuka ukawo. Alioze, yetu tuli ni uhashi wa kwatuhwisamo ha kwambulwila sango jipema. Zango ni keke yakututwala tulinge yize mutuhasa hanga twambujole sango jipema kuli atu jacho. Muze atu akwivwa sango jino, chakwakwasa kupwa ni kutalatala cha kulutwe lia matangwa, kupwa ni uwahililo haliapwila ni kushimbwila mwono wamwenemwene hanji ngwetu, “mwono wa mutolo” mu chifuchi chaha.—1 Timo. 6:19.
Kuzanga atu ni kweevwila keke yakututwala tulinge yeswayo mutuhasa hanga twambulwile sango jipema (Tala paragrafu 8)
9. Utowezo uka twakulweza atu hakutwala ku matangwa a kulutwe, mumu liaka twakwalweza wo? (Ezekiele 33:7, 8)
9 Zango lize tukwete hali atu, lia kututwala hanga twalweze ngwetu, songo lia hano hashi linakundama. (Tanga Ezekiele 33:7, 8.) Twakwivwila atu eswe keke, kuchingako asoko jetu waze keshi kuwayila Yehova. Atu anji kakulihulikila wika ku milimo yo ya tangwa ha tangwa, chakuhona kunyingika ngwo kwasala hakehe kulingiwe “luyinda munene, yoze kanda alingiwa kama chize ku uputukilo wa hano hashi ndo musono, ka, kechi keza kalingiwa nawa nilimwe tangwa.” (Mateu 24:21) Yetu tunazange hanga atu anyingike yize muyikalingiwa ha mashimbu jacho a upatwilo. Uwayilo weswe wa mahuza makawonwona, mba kulutwe manongesa yuma yeswe ya hano hashi ha Satana ha jita ya Armagedone. (Uso. 16:14, 16; 17:16, 17; 19:11, 19, 20) Tunalembe hanga atu anji atayize sango jipema ni kusa tachi awayile Yehova hamuwika ni yetu. Mba yika mutwamba hali atu waze keshi kutupanjika, kuchingako asoko jetu?
10. Mumu liaka chili chilemu kutoweza atu ha yize kwasala hakehe hanga yilingiwe?
10 Ngwe chize twamonanga ha mutwe wapalika, muchihasa kupwa ngwe Yehova makalamwina atu waze makalumuna yitanga yo hanyima lia kumona unongeso wa Babilonia Yinene. Nyi yino ye muyikalingiwa, chili chilemu ha mashimbu wano kutoweza atu ha yize muyikalingiwa kulutwe. Nyingikenu chikuma chino: Atu makahasa wika kwiwuluka yuma yize tunaalweze haliapwila. (Tala nawa Ezekiele 33:33.) O hanji makewuluka utowezo uze twalwezele, hachino mazanga kuwayila Yehova hamuwika ni yetu muze kuchili shimbu. Ngwe chizechene alingile kalayi wa zuwo lia ususu mu mbonge ya Fwilipu, yoze wafulielele ha sango jipema hanyima lia munyiko unene, atu amwe waze keshi kutayiza sango jipema musono, hanji makalumuna yitanga yo muze makamona kunongesa cha Babilonia Yinene chize muchikalingiwa susumuku.—Yili. 16:25-34.
TWAKWAMBUJOLA MUMU TWAKUZANGA YEHOVA NI JINA LIENYI
11. Kuchi twakuhana kuli Yehova uhenya, ulemu ni ndundo? (Usolwelo 4:11) (Tala nawa yizulie.)
11 Chikuma chilemu chize twakwambulwila sango jipema, chili mumu twakuzanga Yehova ni jina lienyi lisandu. Mulimo wa kwambujola uli jila yize twakuwayilamo Zambi yoze twazanga. (Tanga Usolwelo 4:11.) Twakutayiza pundu ngwetu, Yehova “Zambi yetu, katela kutambula uhenya ni ulemu ni ndundo” kuli waze eswe akumuwayila ni ushishiko. Twakuhalisa Yehova ni kumulemesa muze twakulianyina ni atu yuma yize yinasolola pundu ngwo, iye mwe watangile yuma yeswe; nawa ngwo, tuli ni mwono mumu iye mwe watuhelewo. Twakuhana ndundo jetu kuli Yehova muze twakusa mashimbu, tachi ni yikumba yetu hanga twambujole sango jipema kulita ni uhashi uze tuli nawo. (Mateu 6:33; Luka 13:24; Kolo. 3:23) Mu maliji akehe, twakuzanga kuhanjika hakutwala kuli Zambi yoze twazanga. Yetu nawa tunazange kulweza akwetu hakutwala ku jina lia Yehova ni utu wenyi. Mumu liaka?
Twakuhana ndundo jetu kuli Yehova muze twakusa mashimbu, tachi ni yikumba yetu hanga twambujole sango jipema kulita ni uhashi uze tuli nawo (Tala paragrafu 11)
12. Mu mutapu uka twakuhalisa jina lia Yehova mu mulimo wa kwambujola?
12 Kuzanga Yehova chakututwala kuhalisa jina lienyi. (Mateu 6:9) Maliji wano kanalumbunuka ngwo, tunazange kulweza atu ngwetu yuma yeswe yize Satana ambile hali Yehova yili ya mahuza. (Uputu. 3:1-5; Yombi 2:4; Yoa. 8:44) Muze twakwambujola, twakuzanga chinji kulweza atu eswe waze matupanjika hanga anyingike Yehova ni utu wenyi. Twakuzanga nawa atu eswe anyingike ngwo, chitanga chenyi chilemu chili zango; kuyula chenyi chapwa cha ululi. Chikwo nawa ngwo, kwasala hakehe Wanangana wenyi muhwisa lamba lieswe lia atu ni kuneha sambukila ni uwahililo kuli eswe. (Samu 37:10, 11, 29; 1 Yoa. 4:8) Muze twakuhanjika umwenemwene hakutwala kuli Yehova, acho twakuhalisa jina lienyi. Chikwo nawa, twakuwahilila ha kunyingika ngwetu, tunalingi yize yetu Yela ja Yehova twatamba kulinga. Mumu liaka tunambe chocho?
13. Mumu liaka chili uhenya unene kutuvuluka ngwo, Yela ja Yehova? (Izaia 43:10-12)
13 Yehova hanatusakula hanga tupwe “yela jenyi.” (Tanga Izaia 43:10-12.) Ha yimwe miaka kunyima, mukanda umwe wa Chizavu cha Tusongo wambile ngwo: “Uhenya uze hita umwe wa kuli yetu mahasa kupwa nawo uli kumuvuluka ngwo, Chela cha Yehova.” c Mumu liaka tunambe chocho? Achinyonga ha chino. Nyi ngwe mufupa kusakula umwe hanga apwe chela che mu chota cha usopelo, pundu lume musakula mutu ukwete yitanga yipema yoze wakujikijila. Yino ye Yehova alingile. Muze atusakwile hanga tupwe yela jenyi, iye kasolwele ngwenyi kanatunyingika kanawa; nawa ngwenyi, mutulweza atu akwo ngwetu, iye kali Zambi wamwenemwene umuwika. Kuli yetu, chili uhenya unene kupwa Yela ja Zambi yetu. Kashika, tunazange kusa tachi hanga tulweze atu akwo hakutwala ku jina lia Yehova ni kusolola pundu ngwetu, yuma yeswe yipi yize akwamba hali iye yili ya mahuza. Kulinga chino, muchisolola kuli atu eswe ngwo, tuli Yela ja Yehova.—Samu 83:18; Roma 10:13-15.
TUNUNGENU NI KWAMBUJOLA NDO KU SONGO
14. Yuma yika tunashimbwila yize yakutuvwisa kuwaha?
14 Kunyonga ha yize muyikalingiwa kulutwe, chakutuvwisa chinji kuwaha. Nyi ukwaso wa Yehova, tunashimbwila hanga atu anji atayize umwenemwene muze luyinda munene kanda aputuka. Yetu nawa tunawahilila ha kunyingika ngwetu, chipwe ha luyinda munene, mashimbu waze makapwa akalu chinji, atu anji makasa tachi ahichike hashi ha Satana ni kulichinga ni yetu hanga tuwayile Yehova.—Yili. 13:48.
15-16. Yika twatamba kulinga, nawa mutuyilinga ndo ha shimbu lika?
15 Shimbu yuma yino yeswe kanda yilingiwa, tuli ni milimo yinji ya kulinga. Tuli ni uhashi wa kulinga mulimo uze kuuchi keza kalingiwa nawa—kwambujola sango jipema ja Wanangana wa Zambi hashi heswe. Muze tunalingi mulimo wacho, twatamba nawa kutoweza atu hanga anyingike ngwo, songo lia hano hashi hapi kwasala hakehe hanga lize. Muze mashimbu jacho a upatwilo makaheta, ayo makanyingika ngwo sango jize twapwile ni kwambujola jakatukile kuli Yehova.—Eze. 38:23.
16 Mba yika yetu eswe twatamba kulinga? Mumu lia kuzanga sango jipema, kuzanga atu, chahiana ulemu kuzanga Yehova Zambi ni jina lienyi, yino yeswe yatamba kutukwasa tununge ni kwambujola sango jipema ndo haze Yehova mambila ngwenyi: “Hikwahwa!”
MWASO 54 “Ye Jila, Yino”
a Kukunguluka cha ha mwaka chalingiwile ha 7 ya Outubro, 2023, mu chihela cha kukunguluka cha mbonge cha Yela ja Yehova mu Newburgh, Nova York, EUA. Kukunguluka chacho cheswe kachisele ha JW Broadcasting®—Chihanda 1 ha Novembro 2023, Chihanda 2 ha Janeiro 2024.
b Tala mutwe unambe ngwo, Mbimbiliya Yakwalumuna Mwono Wa Atu—“Ngunakawahilila chinji ha ungunu wa Mbimbiliya ni kumbululo liamo,” ha Kaposhi wa Kutalila 1 Fevereiro 2015.
