Yami nasemukine mu Paddington, mu chimwe chihunda cha atu anji mu Londres, Inglaterra. Te natwama ni mama hamwe ni mapangi jami amakulwana atatu. Tata te kakwiza ni kututala ha mashimbu amwe, ha mashimbu akwo ka, mumu lia uzengi wenyi wa walwa.

Muze napwile kanuke, mama kangulongesele hanga ngupwe ni kulemba ufuku weswe. Napwile ni Mbimbiliya yikehe muze mwapwile wika mukanda wa Samu, nawa nalingile yimwe miaso hanga nguhase kuyimba. Ngunewuluka chize napwile ni kutanga amwe maliji mu mukanda wa ku shikola waze angukwachile ku mbunge, akwamba ngwo: “Tangwa limwe mutukeza kafwa.” Maliji wano kangwehele mwongo yinguputuka kukasumuka ufuku weswe ni kunyonga hakutwala kulutwe. Yingunyingika ngwami, ‘pundu lume mwono kuuli ni yuma yinji. Mba mumu liaka nguli hano?’ Ami chakazangile kufwa!

Te nakuzanga chinji kunyingika yuma ya yipupu. Chocho, yingweseka kuhanjika ni afu, yinguya kumafuka ni masepa jami aku shikola, nawa twapwile ni kutala yinema ya woma. Yapwile ni kutuvwisa kuwaha hamwe ni woma.

Naputukile kupwa chihulia muze napwile wika ni miaka kumi. Yinguputuka kushipa makanya, nawa yingwijilila ni mianda yacho. Kulutwe, yinguputuka kushipa nawa liamba. Muze napwile ni miaka 11, yinguputuka kunwa walwa. Chipwe ngwe te chishi kuzanga walwa, alioze napwile ni kuunwa mumu te nakuzanga kuzengewa. Nawa te nakuzanga chinji kwivwa miaso ni kukina. Napwile ni kuya chinji ku yiwanyino ni ku ma diskoteka ha shimbu lieswalio munguzanga. Napwile ni kukatuka ku zuwo ha ufuku kuhilukako ha mandemba. Ha chimene, te nakuhinduka ni yikatalo yinji kanji-kanji te chishi kuya ku shikola. Chipwe muze te nakuyako, kanji-kanji te nakunwa walwa mukachi ka kalasa.

Ku songo lia mwaka wa shikola natuhukile ni nota jikehe chinji. Mumu lia yitanga yami ya uhulia, chocho, mama yevwa chinyengo hamwe ni uli. Yituzwela, hachino, yingukatuka ku zuwo. Yinguya ni kutwama ni kasendo kami, Tony, yoze te Rasta. Iye kapwile chilianyi, kapwile ni kulanjisa droga nawa kapwile ni lufuma mupi mumu te mukwa-mbwanja. Ha mashimbu akehe, yingupwa kafumba, muze napwile wika ni miaka 16, yingusema mwanetu wa lunga.

Nanyingikine Yela ja Yehova muze napwile ni kutwama ku zuwo lia mapwo waze keshi ku malo hamwe ni ana jo. Atu waze te akufunga zuwo liacho yangwahako chimwe chipatulo. Yela ja Yehova aali a mapwo kapwile ni kwiza mashimbu eswe hanga ameneke amama a akweze waze apwileko. Limwe tangwa yinguzanga kuhanjika no. Nesekele wika kusolola uhenge wo. Chipwe chocho, ayo yakumbulula yihula yami yeswe ni uhumikizo weswe ni kuzachisa kanawa Mbimbiliya. Ayo kapwile atu apema nawa a zango, chino yinguchizanga chinji. Chocho, yingutayiza kulilongesa no Mbimbiliya.

Ha mashimbu akehe yingulilongesa chimwe chuma chize chalumwine mwono wami. Chize kuwanuke wami te nakwivwa woma wa kufwa. Alioze haliapwila yingunyingika ngwami Yesu kalongesele hakutwala ku uhindukilo! (Yoano 5:​28, 29) Yingulilongesa nawa ngwo, kumana Zambi kakufunga mwono wami. (1 Petulu 5:⁠7) Nawa maliji angukwachile chinji ku mbunge kali mu mukanda wa Jeremia 29:​11, waze akwamba ngwo: “Ngunanyingika manyonga aze nguli no hali yenu; manyonga akunuwahisa hi akunupinjisa ko. Manyonga akunwaha kutalatala ku yuma ya kulutwe.” Chocho yinguputuka kufuliela ngwami kumana munguhasa kupwa ni kutalatala cha kutwama mu Paraisu kulutwe lia matangwa.​—Samu 37:⁠29.

Yela ja Yehova yangusolwela zango lingunu. Muze nayile ha tangwa litangu ku kukunguluka cho, kangutambwile kanawa, ayo eswe kapwile ngwe masepa jami! (Yoano 13:34, 35) Chino chalisele chinji ni chize te akungutambula mu yingeleja yize te nakuya. Yela ja Yehova kangutambwile kanawa chipwe ngwe napwile ni mwono walisa. Ayo te kakungwaha shimbu, kunguzanga, ni kulihulumba hali yami, hanga angukwase ha yize mungufupa. Yingunyingika ngwami nguli mukachi ka usoko unene wa zango.

Ha longeso liami lia Mbimbiliya, Iyingunyingika ngwami kuma munguhasa kwalumuna mwono wami ha kukaula shimbi jilemu ja Zambi. Chocho, yichipwa chashi kwecha kushipa makanya. Ha shimbu lioliene, yingunyingika nawa ngwami, miaso yimwe te nakupanjika te yakungwaha usona wa kushipa liamba, hachino, yingumbila miaso yacho. Amu nazangile kupwa ni mwono walita, yingulitwamina kuya-ya ku yiwanyino ni ku ma diskoteka, kuze te munguhasa kuputuka nawa kuzengewa. Nawa yingufupa masepa aha a yitanga yipema waze te mangukwasa kupwa ni mwono upema.​—⁠Yishima 13:⁠20.

Ha shimbu liacho, Tony neye kapwile ni kulilongesa Mbimbiliya ni Yela ja Yehova. Muze Yela ja Yehova apwile ni kukumbulula yihula yenyi kupalikila mu Mbimbiliya, iye yatayiza ngwenyi yize apwile ni kulilongesa yili yamwenemwene. Iye yalumuna mwono wenyi: ha kwecha kulikata ni masepa api, yecha yitanga yenyi ya ulianyi, nawa yecha kushipa liamba. Ha kuzanga kuvwisa Yehova kuwaha, yetweswe hitufupiwa kwalumuna yitanga yetu ya upangala ni kulilulieka hanga tulele kanawa mwanetu. Mba yitulimbata ha mwaka 1982.

Ngunewuluka chize napwile ni kufupa yikuma ya Kaposhi wa Kutalila ni Despertai! * yize yakuhanjika hakutwala kuli atu waze ahashile kwalumuna mwono wo ngwe chize yami nazangile kulinga. Yilweza yo yangukolwezele chinji! Yingupwa ni tachi jakununga kulinga yuma yize yalita. Napwile ni kulemba kuli Yehova hanga achine kungwecha. Yami ni Tony yatupapachisa ha kakweji wa Julho wa mwaka 1982, yitupwa Yela ja Yehova.

Kukolesa usepa wami ni Yehova Zambichalamwina mwono wami. Nawa, ami ni Tony twakupwa ni ukwaso wa Yehova ha mashimbu akalu. Twakulilongesa kufuliela muli Zambi ha mashimbu akalu, nawa kakutukwasa mashimbu eswe ni kufunga usoko wetu.​​—⁠Samu 55:⁠22.

Nakuzanga chinji kukwasa ana jetu hanga anyingike Yehova ngwe chize ami nakulinga. Haliapwila nakwivwa chiseke chochene hakumona ajikulu jetu kanakolo mu ufulielo.

Yami chishi kukasumuka nawa ha ufuku mumu lia woma wa kufwa hanji kunyonga kulutwe lia matangwa. Ami ni Tony tuli mu mulimo wakuya ni kumeneka yikungulwila yalisa ya Yela ja Yehova ha poso jeswe hanga tutakamise mandumbu. Twakulichinga no ha kulongesa akwetu ngwetu, nyi mafuliela muli Yesu, no mahasa kuzuka mwono wa mutolo.