Umwe kanuke wapwo wa miaka 4 mamona mwishi unatuhuka ku yimwe fabrica muupwa ngwe lelwa. Aye manyonga ngwenyi: “Ayino yili fabrica ya malelwa!” Kuhona kunyingika cha kanuke yono muchihasa kusehesesa atu. Alioze kuli nawa kuhona kunyingika chinene chize muchihasa kupihisa mwono wetu. Chakutalilaho, nyi muvulama kutanga kanawa jina lia yitumbo, yize mulanda muyihasa kukunehena weji unji ku mwono.

Kuhona kunyingika kanawa yimwe yize Mbimbiliya yakulongesa muchihasa kuneha ponde yinene ku mwono we. Chakutalilaho, atu amwe keshi kunyingika kanawa malongeso ja Yesu. (Yoano 6:​48-68) Alioze, shimbu alilongese chinji hanga ahwise kuyambashana cho, ayo kakwehuka malongeso ja Yesu. Chino chakwaahonesa yuma yinji!

Shina ena wakutanga Mbimbiliya ni nyonga lia kuwana usongwelo? Kulinga chocho chili chipema chinji. Alioze shina yena ha mashimbu amwe kuushi kunyingika kanawa yisoneko yimwe ya Mbimbiliya? Chino chakulingiwa kuli atu anji. Tala yilweza yitatu yakuhona kunyingika kanawa yuma yize tunatange mu Mbimbiliya.

• Atu amwe keshi kunyingika kanawa shimbi yakwamba ngwo, “vwila woma Zambi.” Ayo kakunyonga ngwo Zambi kakushinjila atu hanga amuvwile woma hanji mwongo. (Chilumbununyi 12:13) Alioze Zambi keshi kuzanga hanga atu amuwayile ni woma. Kwamba pundu, iye kanambe ngwenyi: “Kanda wivwa woma, nguli hamwe ni yena, kanda ulishimwoka, nguli Zambi ye. Kumungukutakamisa, kumungukukwasa.” (Izaia 41:10) Kuvwila Zambi woma kanji-kanji chinalumbunuka ngwo twatamba kumushimwoka ni kumuvumbika chinji.

• Atu amwe muze akutanga Mbimbiliya, keshi kunyingika ulumbunwiso wa maliji wano ngwo: “Chuma cheswe chili ni kangonde kacho, . . . tangwa lia kusemuka, ni tangwa lia kufwa.” Ayo kakwamba ngwo, Zambi hanatese pundu tangwa lize mutu ni mutu mafwa. (Chilumbununyi 3:​1, 2) Alioze, chisoneko chino chakuhanjika ha chize mwono wapwa, ngwo yetweswe mutwiza kafwa limwe tangwa. Nawa Liji lia Zambi liakutulongesa ngwo, yiyulo yetu muyihasa kutukwasa tutwame matangwa anji ku mwono hanji ka. Chakutalilaho, twakutanga ngwetu: “Woma wa Yehova wakwokesa matangwa a mutu.” (Yishima 10:27; Samu 90:10; Izaia 55:⁠3) Yika chino chinalumbunuka? Chinalumunuka ngwo, nyi mutuvumbika Liji lia Zambi mutwehuka kulinga yuma yize muyipihisa mujimba wetu, ngwe kuzengewa, ni yuma ya utanji.​​—⁠1 A-Korindu 6:​9, 10.

• Atu amwe kanyingikine kanawa ulumbunwiso wa yize Mbimbiliya yakwamba ngwo, malilu ni hashi “hanayitulikila kahia,” hachino, ayo kakwamba ngwo Zambi makanongnesa hano hashi. (2 Petulu 3:⁠7) Alioze Zambi hanalakenya ngwenyi, kechi keza kanongesa hano hashi twatwama. Iye “hanase fundamentu ya hashi hanga kuyichi kanyika ndo ku miaka ya mutulo.” (Samu 104:5; Izaia 45:18) Kwamba umwenemwe, Zambi makanongesa yuma yipi ya hano hashi ha kalimbalimba. Yuma yacho makayinongesa liakulu ngwe kuyocha ha kahia. Hakutwala ku malilu, liji malilu mulihasa kulumbunuka mwilu muze muli tutongonoshi hanji mu chihela muze atwama Zambi. Yino yeswe twatongwola kechi kayinongesa.

Ngwe chize twamona ha yilweza yize twapalika, atu anji keshi kunyingika kanawa yimwe yisoneko ya Mbimbiliya. Mba mumu liaka Zambi akwecha hanga yino yilingiwe? Amwe hanji manyonga chino: “Nyi Zambi kakwete malinjekela ni yinyingi yinji, iye kachi katwehele mukanda washi kunyingika hanga atu eswe aunyingike kanawa chakuhona kusa tachi. Mumu liaka aye kakalingile chocho? Tala yimwe yilweza yize yakutwala atu ahone kupwa ni manyonga alita hakutwala ku Mbimbiliya.

1. Mbimbiliya kayisonekene hanga ayinyingike kuli atu alikehesa nawa waze anazange kulilongesa. Yesu kambile kuli Tato ngwenyi: “Ngunakuchichimieka  Tata, Mwenya lilu ni hashi, wahengekele yino yuma kuli akwa mana ni akwa malinjekela, hiwayisolola kuli ana-akemba.” (Luka 10:21) Mbimbiliya kayisonekene hanga yikwase wika atu waze ali ni manyonga alita, waze akuzanga kunyingika kanawa sango jamo. Atu alizata ngwe chize apwa ‘akwa mana ni akwa malinjekela,’ ayo mahasa kupwa ni manyonga waze kalitela hakutwala ku Mbimbiliya. Alioze waze apwa ngwe ana-kemba hanji akwa-kulikehesa nawa akuzanga kulilongesa, kakunyingika kanawa sango ja Mbimbiliya. Yehova kasolwele mana anji mu mutapu uze asonekenenemo Mbimbiliya!

2. Mbimbiliya kayisonekenene atu waze akufupa ni ungunu weswe ukwaso wa Zambi hanga ayinyingike kanawa. Yesu kasolwele ngwenyi atu te mafupiwa ukwaso mba anyingike kanawa yuma yize te akulongesa. Ukwaso wacho kuchi te maahawo? Yesu yalumbununa ngwenyi: “Chikwashi, iye mwe spiritu musandu, yoze Tata makatuma mu jina liami, iye kumakanulongesa yuma yeswe.” (Yoano 14:26) Hachino, Zambi kakuhana spiritu yenyi yisandu, yize yapwa tachi jenyi jikolo hanga yikwase atu kunyingika kanawa Mbimbiliya. Alioze Zambi keshi kuhana spiritu yenyi kuli atu waze keshi kuzanga kufupa ukwaso wenyi. Kuli atu jacho, sango ja Mbimbiliya mujihasa kusoloka ngwe jikalu chinji kujinyingika. Nawa spiritu yisandu yakusongwela akwa-Kristu waze ali ni chinyingi cha Liji lia Zambi hanga aye ni kukwasa atu waze anazange kulilongesa Mbimbiliya.​​—⁠Yilinga 8:​26-35.

3. Yihanda yimwe ya Mbimbiliya atu mahasa kuyinyingika kanawa ha shimbu lize Zambi mwene mazanga. Chakutalilaho, profeta Daniele kamusongwele hanga asoneke jimwe sango jize te mujimanunuka kulutwe lia matangwa. Umwe mungelo yamulweza ngwenyi: “Daniele, yika maliji wano, jika we mukanda, ndo ku mwaka wa ku songo.” Ha sekulu jinji atu anji te kakutanga mukanda wa Daniele alioze te keshi kuunyingika kanawa. Kwamba umwenemwene, chipwe Daniele mwene kakanyingikine kanawa yuma yize asonekene. Ni kulikehesa cheswe yatayiza ngwenyi: “Ami nevwile, hindu kuchangulumbunukine.” Hakupalika cha mashimbu, atu te maputuka kunyingika kanawa uprofeto uze Zambi atumine Daniele kusoneka. Alioze chino chakulingiwa wika ha shimbu lize Zambi mwene hanasakula. Mungelo yalumbununa ngwenyi: “Daniele, yako kwe, mumu wano maliji a kuyika ndo ku mwaka wa ku songo.” Iya mahasa kunyingika kanawa sango ja Zambi? Mbimbiliya yinambe ngwo: Nyi umwe ‘chingulungulu makajinyingika wakuhi; alioze mujikalumbunuka kuli waze ali ni mana.’ (Daniele 12:​4, 8-10) Kashika, Zambi kakusolola ulumbunwiso wa yimwe yisoneko ya Mbimbiliya muze mukuheta shimbu liayo.

Shina Yela ja Yehova hanahona kunyingika kanawa ulumbunwiso wa yimwe yisoneko ya Mbimbiliya mumu te kanda achiheta ha shimbu lialita? Mba. Alioze muze kwaheta shimbu lize Zambi azangile kusolola ulumbunwiso, Yela ja Yehova yalulieka kawashi-washi unyingikiso wo. Ayo kakutayiza ngwo, kulinga chocho, kanembulula apostolo ja Kristu, waze ni kulikehesa cheswe yalulieka kunyonga cho muze Yesu aakwashile.​​—⁠Yilinga 1:​6, 7.

Kunyonga cha kanuke yoze wapwo, hakutwala ku malelwa muchihasa kupwa wika kuhona kunyingika kanawa. Alioze kunyingika yize Mbimbiliya yakulongesa chili ni ulemu unji kuli yena. Sango ja Mbimbililya jikwete ulemu unji kashika mutu mweswawo katambile kunyonga ngwo majinyingika ukawenyi. Hachino, fupa ukwaso hanga unyingike yize unatange. Fupa ukwaso wa waze akulilongesa Mbimbiliya ni kulikehesa cheswe, waze akufupa ukwaso wa spiritu yisandu ya Zambi nawa waze ali ni shindakenyo ngwo kali ha mashimbu waze Zambi anazange hanga atu eswe anyingike umwenemwene. Hanjika ni Yela ja Yehova nawa tanga yikuma yize akulilongesa muze anahengwola. Yikuma yacho yili mu site jw.org. Mbimbiliya yinalakenya ngwo: “Nyi unasanyika yinyingi . . . , muwana chinyingi cha Zambi.”​—Yishima 2:3-5.