ACHINYONGA ngwe unende mu jila hakachi ka ufuku. Chipwe ngwe hikwalaa, uchikwivwa woma ngwe muutoka, mumu uli ni mwenda ku kwoko. Muze muminyika mu jila, mumona kanawa yize yili kulutwe. Nawa muze muminyika kulutwe muhasa kumona yize yili kusuku.

Chizechene nawa, ni Mbimbiliya yili ngwe mwenda wacho. Ngwe chize twamona ha chikuma twahichika, Liji lia Zambi mulihasa kutukwasa kukumba yipikalo yize muyiza kulutwe, ngwe yize twakumona matangwa eswe hano hashi hapi. Alioze Mbimbiliya kuyishi kuhanjika wika ha yino. Yinalumbununa nawa yize muyiza kulutwe lia matangwa, ni kutukwasa kwenda mu jila yize yakuneha uwahililo ni chiseke cha mutolo. (Samu 119:105) Kuchi muyitukwasa?

Tutalenu jila jaali jize Mbimbiliya yakutwaha kutalatala chingunu cha kulutwe lia matangwa: 1 Yakutukwasa kunyingika ulemu wa mwono, 2 Yakutulongesa chize mutuhasa kupwa ni usepa upema ni Sakatanga wetu.

Mbimbiliya yili ni yiyulo yipema yize muyihasa kutukwasa kukumba milonga yetu, yili mukanda ulemu chinji kuhiana mikanda yikwo. Mbimbiliya kuyishi kutukolweza hanga tulihulikile ha milonga yetu, alioze yakutulongesa kuhulikila meso jetu kulutwe lia matangwa. Yino wika ye yakuhana ulemu ku mwono.

Tutalenu chilweza cha shimbi yino ya mu Mbimbiliya: “Chinawaha kutambula alioze shinaho kuhana.” (Yilinga 20:35) Yena unewuluka mashimbu waze wakwashile umwe mutu yoze te unahono? Kota wasele mashimbu je hanga upanjike yize te yinamupinjisa. Kuwakevwile chiseke ha kumukwasa?

Twakuwahilila chinji hakukwasa akwetu chakuhona kushimbwila fweto. Umwe mukwa kusoneka kambile ngwenyi: “Chili chikalu kuhana chakuhona kushimbwila kutambula limwe fweto,  alioze muhasa kuchilinga nyi kuushi ni nyonga liacho.” Nyi twalihana ni mbunge yeswe hanga tukwase—chipi-chipi waze keshi ni uhashi wakutwaha chimwe chuma—mutukatambula fweto. Chino muchitukwasa kuhulikila manyonga jetu kulutwe lia matangwa. Nyi twalinga yino yuma mutusolola ngwetu, tunakalakala hamuwika ni Sakatanga wetu, nawa iye kakumona upeme uze twakusolwela akwetu ngwe iye tunausolwela. (Yishima 19:17) Iye kakulemesa chinji yize twakulingila waze anahono, nawa kanalakenya kutwaha mwono wa mutolo mu paraisu hano hashi—chino chili kutalatala chingunu cha kulutwe lia matangwa!—Samu 37:29; Luka 14:12-14. *

Kuhiana yuma yeswe, Mbimbiliya yinatulongesa ngwo, mutuhasa kupwa ni mwono ungunu ha kuwayila Yehova, Zambi wamwenemwene. Liji lienyi liakutukolweza hanga tumuhalise, tumulemese, ni kumwononokena. (Chilumbununyi 12:13; Usolwelo 4:11) Nyi twachilinga, mutuvwisa Yehova kuwaha: Mumu yitanga yetu yakukwata Sakatanga wetu. Nawa, iye kanatukolweza ngwenyi: “Pwako ni mana ukawahise mbunge yami.” (Yishima 27:11) Achinyonga kama—nyi twakwata yiyulo ya mana kulita ni shimbi ja mu Mbimbiliya, mutuvwisa kuwaha Tata yetu wa zango. Mumu liaka? Mumu iye kakutufunga nawa kanazange hanga tuyuke ha kukaula usongwelo wenyi. (Izaia 48:17, 18) Kwamba pundu, kukushi chuma chize chakuhana ulemu ku mwono, kuhiana kuwayila Sakatanga wa malilu ni hashi ni kulinga yuma yize muyimuvwisa chiseke.

Mbimbiliya nawa yakutulongesa kulinga usepa ni Sakatanga wetu. Mbimbiliya yinambe ngwo: “Kundamenu kuli Zambi, mba iye kumakundama kuli yenu.” (Tiangu 4:8) Ha mashimbu amwe mutuhasa kumona ngwe, hichashiko kupwa masepa ja Sakatanga Mukwa-Ndundo-Jeswe. Alioze Mbimbiliya yinatulweze ngwo, nyi ‘twafupa Zambi, mutumuwana,’ iye “katwamine kusuku ni yetu eswe.” (Yilinga 17:27) Chiyulo cha Mbimbiliya cha chize mutuhasa kupwa masepa ja Zambi, chili chilemu ku mwono wetu wa kulutwe liamatangwa. Mumu liaka?

Nyonga hachino: Niumwe wa kuli yetu mahasa kuchina mukwa kole wetu wakasula—kufwa, wakwihi. (1 A-Korindu 15:26) Alioze, Zambi kali wa mutolo. Iye kechi keza kafwa, nawa iye kanazange hanga masepa jenyi atwame ku miaka yeswe. Maliji wano ashi nawa apema a mu Mbimbiliya, kanasolola yize Yehova anazange hali waze akumufupa, ‘Kumaakayuka ndoo ku miaka ya mutolo.’—Samu 22:26.

Kuchi yena muhasa kulinga usepa wacho ni Zambi? Nunga ni kulilongesa hakutwala kuli iye mu Liji lienyi, Mbimbiliya. (Yoano 17:3; 2 Timoteu 3:16) Eta ukwaso wenyi hanga unyingike Yisoneko. Mbimbiliya yinatukolweza ngwo, nyi twanunga ni ‘kwita mana kuli Zambi,’ iye kumatwaha. * (Tiangu 1:5) Chikwo nawa, nyi wasa tachi hanga ukaule yize unalilongesa mu Mbimbwiliya, Liji lia Zambi mulipwa ngwe yuma yino yaali ku mwono we, “ndeya ku yiliato [ye]” nawa “lutemo ku jila [ye]”—haliapwila ni ku miaka yeswe.—Samu 119:105.