ACHINYONGA HA CHINO: Yena uli mu museu muze munazala too ni yikwata yikulu. Yeswe hiyapwa-pwa ni yituwa, nawa hayilia kuli yiswa. Yikwata yikwo hiyapalwoka. Alioze chimuwika chinapeme, chili ngwe chaha. Mba yena muuhula yoze unakusongwela ngwe, shina chikwata chino chili chaha kuhiana yikwo? Iye makukumbulula ngwenyi, “ka, chino chili chikulu chinji kuhiana yikwo, nawa kanda achichilulieka.” Muuhula nawa ngwe, “shina kakuchisweka hanga chihone kupihia?” Iye makukumbulula nawa ngwenyi, ka, “chipwe ngwe kwakupwa funji yinji ni vula nihindu chikwata chino kuchishi kupihia.” Yena hanji mukomoka ni kulihula ngwe, ‘Chikwata chacho neka achilingile?’

Chizechene nawa, ni Mbimbiliya yili ngwe chikwata chacho. Mbimbiliya yili mukanda ukulu chinji kuhiana mikanda yikwo. Chochene, kuli mikanda yikwo yikulu. Alioze, ngwe yikwata yikulu yize hiyapihia, chizechene nawa mikanda yinji yikulu kuyakupihia ha kupalika chamashimbu. Chakutalilaho, sango jamo hakutwala ku yuma ya ciencia, kakujihamika ha mukunda wa yinyingi yaha, yize anawana haliapwila. Kanji-kanji yiyulo yamo hakutwala ku uukiso keshi kuyijikijila, nawa kakuyimona ngwe ponde. Nawa yisoneko yinji ya mikanda yacho hiyinatoko; yihanda yikwo hiyinachanuka.

Alioze, Mbimbiliya yalisa chinji ni mikanda yikwo. Yisoneko yamo yitangu kaputukile kuyisoneka ha sekulu 35 kunyima, chipwe chocho nihindu Mbimbiliya yili yamuundu. Chipwe ngwe, ha miaka yinji atu amwe kalimikine nayo, kayochele, ni kuyilengulula—nihindu sango jamo jikwete ulemu. Chipwe ngwe kakuyamba ngwo yili yikulu ha mukunda wa yinyingi yaha ya musono, alioze Mbimbiliya  yinambe yuma yinji hi wika ko yuma ya kulutwe lia matangwa.—Tala kasha unambe ngwo, “Shina Mbimbiliya Yili Yikulu Nyi Yichili ni Ulemu Musono?”

Hanji yena muhasa kulihula ngwe, ‘Shina malongeso a Mbimbiliya kali ni ulemu musono?’ Mba uwane kumbululo, lihule ngwe: ‘Yipikalo yika atu akupinda nayo musono? Nawa yili yakupinjisa chinji atu musono?’ Yena hanji muhasa kunyonga ha jita, kupihia cha hashi, ungulungulu, ni kalimbalimba. Haliapwila tushimutwinenu jimwe shimbi jize Mbimbiliya yinalongesa. Muze mujikaula, lihule ngwe, ‘Nyi atu te makaula shimbi jino, shina hashi te muhapema?

KUZANGA SAMBUKILA

“Kawaha yitakanyishi, mumu kumakaavuluka ngwo, Ana a Zambi.” (Mateu 5:9) “Nyi kachi muchihasa kupwa nikulita ni tachi jenu, pwenu ni sambukila kuli atu eswe.”—A-Roma 12:18.

KEKE NI UKONEKENO

“Kawaha akwa kwiwa keke, mumu kumakawana keke.” (Mateu 5:7) “Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo. Chizechene ngwe [Yeova] * hananukonekena, chocho ni yenu nawa likonekenenu.”—A-Kolosu 3:13.

KULINUNGA CHA MINYACHI

Zambi “ku manyinga amuwika watangile mavungu eswe ja atu mukutwama ha kuzazuluka cheswe cha hashi.” (Yilinga 17:26) “Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.”—Yilinga 10:34, 35.

KULEMESA HASHI

“Mba Yehova Zambi yatwala mwe mutu, yamusa mu munda wa Endene mukuulima nikuufunga.” (Uputukilo 2:15) Zambi makanongesa “waze akwonona hashi.”—Usolwelo 11:18.

KUVWILA LWAJI KUZO NI UTANJI

“Lifungenu ku kuzo yeswe; mumu mutu keshi kuwana mwono ku kulumbama cha upite wenyi.” (Luka 12:15) “Alioze utanji, ni luchisa mweswe, chipwe kuzo, kanda ayivuluka hakachi kenu nichimwe, ngwe chinatela asandu.”—A-Efwesu 5:3.

MBUNGE YIPEMA, NI KUKILIKITA

“Tunazange kwenda kanawa ha kutwala ku yuma yeswe.” (A-Hepreu 13:18) “Yoze wapwile nikwiya kanda akeya nawa; alioze shinaho akakilikite.”—A-Efwesu 4:28.

ULEMU WA KUKWASA WAZE ANAHONO

“Sangulwisenu akwa kulela, lihumikizenu ni eswe.” (1 A-Tesalonika 5:14) “Kunangisa ana-ashiwa ni twamishi a mapwo mu luyinda wo.”—Tiangu 1:27.

Mbimbiliya, kuyishi kusolola wika shimbi jino. Alioze, yakutukwasa kulemesa shimbi jino ni kujikaula ku mwono wetu hita tangwa. Nyi atu eswe te kakukaula shimbi jino twatongola, kachi hano hashi kuheshi milonga yinji yize yakupinjisa atu. Kwamba pundu, yino yinasolola ngwo shimbi ja mu Mbimbiliya jili ni ulemu unji. Mba kuchi malongeso a mu Mbimbiliya mahasa kukukwasa?

Umwe lunga wa mana kambile ngwenyi: “Hindu mana hanasambe.” (Mateu 11:19) Shina kambile umwenemwene? Mutu kakupwa ni mana nyi makaula yize analilongesa. Kashika uli ni chitela chakulihula ngwe: ‘Nyi Mbimbiliya yili ni ulemu, shina muyihasa kungukwasa ku mwono wami? Kuchi muyihasa kungukwasa kukumba yipikalo yize nguli nayo?’ Tutalenu chilweza chino.

Delfina, * kapwile ni milimo yinji nawa mwono wenyi te upema. Hi susumuku, yuma ku mwono weyi yiyalumuka. Mwanenyi wa pwo yafwa. Nawa ulo wenyi yiufwa. Upite wenyi weswe yiwuhwa. Iye yamba ngwenyi: “Te kuchanyingine chize mwono wami muupwa, ha kutokesa mwanami, lunga ni zuwo. Nawa te nakwivwa ngwe kuchishi ni ulemu, kuchishi tachi, ni kutalatala cha kulutwe lia matangwa.”

Kwamba pundu Delfina te kanda achimona ulemu wa maliji wano anambe ngwo: “Miaka yetu yapwa makumi shimbiali a miaka, hanji mumu ha tachi muyipwa makumi nake. Hindu kulenga chayo chinapu kuhondangana ni chinyengo wika, mumu yakuhwa kawashi ni yetu mutuhumuka.”—Samu 90:10.

 Delfina kawanyine utakamiso mu Mbimbiliya ha mashimbu jenyi akalu. Yize iye awanyine mu Mbimbiliya yamukwashile chinji. Ngwe chize mutumona ha mitwe yitatu muyisulaho, atu anji kakumona chize Mbimbiliya yakwakwasa ha kukaula usongwelo wamo hanga akumbe yipikalo yo. Ayo kakumona nawa ngwo, pundu Mbimbiliya yili ngwe chikwata chize twatongwola ku uuputukilo. Yinalise chinji ni mikanda yikwo yize yakupwa yikulu ni kupihia. Mumu liaka Mbimbiliya yalisa ni mikanda yikwo? Shina mumu yili ni manyonga ja Zambi, hi ja atu ko?—1 A-Tesalonika 2:13.

Kota ni yena wakumona ngwe, mwono uli wa mashimbu akehe nawa unazala too ni milonga. Nyi unapinda ni yipikalo, kulihi muhasa kuwana utakamiso ni ukwaso upema?

Tushimutwinenu yikuma yitatu yize muyihasa kusolola ngwo, Mbimbiliya yili ni ulemu unji ku mwono we. Ni chize muyihasa kukukwasa.

1. kwehuka milonga nyi muchilita.

2. kusopa yipikalo nyi yasoloka.

3. kunyongonona ha yipikalo yize kuushi kuhasa kuhwisa

Mitwe yize muyisulaho muyishimutwina yikuma yino yitatu.