Rosa yamba ngwenyi, “Napwile ni kunyonga chipi ha yimwe yipikalo yize kanda yichilingiwa, ngwe muyilingiwa kuli yami.” Versu jika ja mu Mbimbiliya jamukwashile? Yimwe yili ha Mateu 6:34 ngwo: “Kanda nulipikala kashika ha tangwa lia hamene. Mumu tangwa lia hamene ni yipikalo yalio, yipi ya tangwa lieswe muyilita ni lie tangwa.” Rosa, haliapwila kakwamba ngwenyi, maliji wano a Yesu kamukwashile kulitwamina kulipikala ha yize muyihasa kulingiwa hamene. Yamba nawa ngwenyi, “yami te ngukwete milonga yinji, kulipikala ha yuma yize kuyichi kulingiwa, chili ngwe ngunaliwezela milonga yikwo.”

Yasmine neye te kakulipikala chinji. “Matangwa amwe ha poso jeswe te nakulila chinji, nawa ha ufuku umwe te kuchishi kuhasa kupomba. Nawa yingwivwa ngwami, manyonga wano kanangupinjisa chinji.” Versu yika yamukwashile? Iye yamba ngwenyi, mukanda 1 Petulu 5:7: unambe ngwo: “Kunjikenu yipikalo yenu yeswe kuli [Zambi], mumu iye kakunufunga.” Mba yamba nawa ngwenyi: “Ha kupalika cha mashimbu, yingununga ni kulemba kuli Yehova, nawa iye yakumbulula yilemba yami. Kashika, yingwivwa ngwe kanguchiza yilemu ha yipaya. Ha mashimbu amwe manyonga wano api te kakufuna, alioze haliapwila ngunanyingika chize nguhasa kwaakumba.”

Umwe mwana-pwo anavuluka ngwo, Izabele kambile ngwenyi: “lwelia nguli nenyi ha kulinga yuma kali wa mu chisemuko, mumu tata neye kali nenyi. Ami te nakwecha kulinga yuma yilemu hanga—ngutwame wika hanji ngutale TV. Yino yili ndako yipi, mumu yakwokesa yipikalo ni kusa mutu mu uswale.” Kupukuna ha mukanda wa 2 Timoteu 2:15, chakungukwasa chinji, mukanda uno unambe ngwo: “Sako mbunge kulitumbikila ngwe umwe hanamusela shindakenyo yipema kuli Zambi, mukwa milimo yoze keshi nichimwe cha kumwivwisa sonyi.” Izabele kambile nawa ngwenyi, “Te kuchazangile hanga Yehova evwile sonyi mulimo wami, ha mukunda wa lwelia.” Haliapwila kakulikolweza hanga alinge milimo.

Kelisia neye kambile ngwenyi: “Nguli ni umwe mulimo uze te natamba kusa kulutwe, alioze nakuusa kunyima. Te nakulila chinji, te chishi kuya tulo, nawa te nakulipikala chinij. Chino changupinjishile chinji. Kelisia kawanyine ukwaso ha Yishima 13:16, unambe ngwo: “Chikanyame mweswe kakulinga ni chinyingi; alioze chihepuke kakusolola uhepuke.” Iye yamba ngwenyi, yuma ngunakapukuna ha chisoneko chino yinakangulongesa ngwo: “Chili mana kulianga kululieka yuma ni kuyilinga. Haliapwila nguli ni katalilo wa milimo yize mungulinga, chino chakungukwasa kulilulieka, ni kwehuka kuhichika milimo hanga ngukayilinge ha maola eka.”

Cristina kambile ngwenyi, “Lunga liami kangwechele nawa kanguhichikile ni ana awana. Chisoneko chika chamukwashile? Yishima 17:17 unambe ngwo: “Sepa lia mutu kakuzanga matangwa eswe; alioze ha tangwa lia lamba he hakusemukina uyaya.” Ha chino, Cristina yafupa ukwaso wa mandumbu mu chikungulwila. Yika mandumbu alingile? Iye yamba ngwenyi, “masepa jami kangukwashile mu majila alisa! Amwe te kakungulanjila yuma ni yilongo hanga angunehene. Katatu keswe amwe mandumbu kakwaashile ana jami ni yami muze twalukile hanga tuye ku zuwo likwo. Ndumbu mukwo yangukwasa kuwana mulimo. Masepa jami kapwile ni kungukwasa mashimbu eswe.”

Delfina yoze twatongolanga ha mutwe utangu, te kakulivwa ngwe kali ukawenyi. Kanewuluka muze atokesele yuma ngwenyi: “Te nakwivwa chinyengo ha kumona akwetu kali ni yuma yo. Te nakwivwa ngwe nguli ukawami.” Mukanda wangukwashile uli wa Samu 68:6 unambe ngwo: “Waze atwama ukawo Zambi kakuatwamisa mu majiko ni akwo. Yamba ngwenyi: “Ngunanyingika ngwami versu yino kuyishi kuhanjika ha mazuwo waze tuli no. Alioze yingunyingika ngwami, Zambi kakutwaha zuwo lia ku spiritu, chihela cha ufunge ungunu chize chili ni sambukila yamwenemwene hakachi ka akwetu waze akuzanga Yehova. Alioze, yingunyingika ngwami, mba ngupwe ni usepa upema ni akwetu chitangu natamba kukundama kuli Yehova. Kashika mukanda wa Samu 37:4 wangukwashile ni maliji wano ngwo: “Wahilila nawa muli Yehova, iye kumakwaha cheswe unazange mu mbunge ye.”

Delfina yahwisa ngwenyi: “Yingunyingika ngwami, natamba kupwa ni usepa ukolo ni Yehova. Iye kali mupema wahiana. Kashika, yingulinga umwe katalilo wa yuma yize te munguhasa kulinga chimuwika ni akwetu, hanga te nguhase kulikata kanawa ni atu waze akuzanga Yehova. Yingulilongesa kumona upeme wa akwetu ni kwaasolwela zango nawa ni kwaamona ngwe asoko jami.”

Kwamba pundu, masepa waze akulingila Zambi ni no yihenge. Chizechene ngwe atu eswe, Yela ja Yehova ni no kakupinda ni yipikalo ku mwono. Alioze Mbimbiliya yakwaakolweza hanga akwase akwo. Chili chipema kupwa masepa jo. Chikwo nawa, shina shimbi ja mu Mbimbiliya mujihasa kutukwasa kukumba yipikalo yize kuyishi kuhwa ngwe, misongo yize kuyishi kuya?