Delfina, yoze twavulukanga mu mutwe utangu, kamwene ngwenyi, yipikalo yenyi te yakumutwala ku kunwa walwa unji. Kashika, Mbimbiliya kuyishi kukanjisa kunwa dambu ya walwa, alioze yinambe ngwo: ‘Kanda ulikata ni akwa-kuzengewa.’ (Yishima 23:20) Kunwa walwa unji chakuneha yikola, chakushihisa malo nawa chakushiha atu anji ha hita mwaka. Atu nyi te kakukaula yiyulo ya mu Mbimbiliya, kachi te kakuhasa kukumba yipikalo yino.

Delfina yamba nawa ngwenyi: “Yingumona ngwami walwa te kuushi kuhwisa yipikalo yami. Yingukaula maliji ali mu mukanda wa A-Fwilipu 4:6, 7, anambe ngwo: “Kanda nukalipikala ha chikuma nichimwe; . . . alioze kwita chenu akachinyingike kuli Zambi.” Ha hita ufuku muze te nakumona ngwami, manyonga api ni yipikalo yami yinangupinjisa, te nakwita ukwaso wa Yehova. Nawa nakumulweza yuma yeswe yize nakwivwa ngwe, ufwatulo, upi ni yinyengo yami, nawa te nakumwita hanga angukwase kupwa ni manyonga alita. Muze te nakuhinduka chimene, nakwivwa ngwami, pundu, kuchichi kunyonga nawa ha yuma yacho. Kulemba kuli Yehova te chakungukwasa kupwa ni manyonga alita ni kunyonga ha yuma yize nguli nayo, hi ha yize kuchishi nayo ko. Ha chino, yingwecha lume kunwa walwa. Mumu sambukila yize nawanyine te yilemu chinji kuli yami, kashika te kuchazangile kuyitokesa nawa.”

Milonga yimwe yakukoka lamba linji ni uswale. Alioze, shimbi ja mu Mbimbiliya mujihasa kutukwasa kwehuka milonga yino, ha kutulweza yuma yize yakukoka milonga yacho—ngwe chakutalilaho, kutenya-tenya mutu yoze kuwalibachile nenyi, ni kutala pornografia. Mukweze Samuele yamba ngwenyi, “Te chakupwa chashi kutenya-tenya mutu yoze kuwalibachile nenyi. Chipwe ngwe te kuchishi kuzanga umwe mutu, alioze munguhasa kumutenya-tenya ni kumwamba ngwami, nakukuzanga, mumu chino che te chakunguvwisa kuwaha.” Samuele te kakumulamikiza ngwo, kakutenya-tenya mapwo—chipwe muze te keshi ni nyonga liacho—ha chino, yakwata chiyulo cha kununga lume ni kutenya-tenya. Alioze, ndako yino yiyiputuka kumupinjisa. Yamba nawa ngwenyi, “Te chipi, mumu te yakuneha manyonga anji api.”

Samuele yatanga yikuma yakweze ha site jw.org. Nawa yapukuna ha mukanda wa Yishima 20:11, unambe ngwo: “Chipwe mwana [hanji mukweze] kakulisolola ku yitanga yenyi, nyi yilinga yenyi yapwa yitoma hanji ya ululi.” Kuchi wamukwashile? Samuele yamona ngwenyi, ndako yenyi te yipi. Iye haliapwila kakwamba ngwenyi: “Nalilongesele ngwami, akweze waze akutenya-tenya kakupwa ni ndako jipi, nawa ndako jacho jakwapinjisa muze akumbata. Ha chino yinguputuka kunyonga ha chize te mutu yoze mungumbata mevwa, nyi te mangumona ngunatenya-tenya mapwo akwo. Chino changukwashile nawa kumona ngwami, ndako yino te yipi lume. Te hi chashiko kwecha ndako yino.” Alioze, Samuele yecha ndako yacho. Nawa kwecha kutenya-tenya, chamukwashile kwehuka utanji.

Antonio kapwile mu ponde yinene chinji ya kulinga utanji: Iye te kakutala chinji pornografia. Chipwe ngwe kambachile pwo yoze te akuzanga chinji, nihindu yaputuka nawa yitanga yenyi yakutala pornografia. Iye yamba ngwenyi, kunyonga ha mukanda 1 Petulu 5:8 wamukwashile chinji. Unambe ngwo: “Keyelenu, lenu; mumu mukwa kole yenu Ndiapu, ngwe ndumba wa kuhanjika ni lundunjila kakwendangana nikufupa yoze mahasa kuumbula.” Antonio ngwenyi: “Pornografia hanji yizulie ya sonyi yili sali lieswe, muyihasa kupihisa manyonga jetu. Versu yino yangukwashile kunyingika kuze kwakukatuka cheseko chacho. Te natamba kunyingika ngwami, yizulie yino ya sonyi chishina chayo kali Ndiapu. Haliapwila ngunanyingika ngwami Yehova wika mwe mahasa kungukwasa kukeya ni kukanyama, hanga nguhase kwehuka manyonga api ni kukaula mbunge yami, ni kukolesa umbachiso wami.” Antonio, katambwile ukwaso uze te anafupu, nawa yecha ndoko yenyi yipi. Chino chamukwashile kwehuka yipikalo yinji.

Kwamba pundu, mu Mbimbiliya muli yiyulo yipema yize muyihasa kutukwasa kwehuka milonga yinji. Mba yika mutulinga nyi yipikalo yacho kuyishi kuhwa? Tutalenu chize Liji lia Zambi mulihasa kutukwasa kukumba yipikalo yamutapu au.