Ha yikuma ya Kaposhi wa Kutalila yono, twanyingika kumbululo lia chihula chinambe ngwo, Zambi Iya? Twamona mu Mbimbiliya ngwo, jina lienyi Yehova nawa ngwo ndako yenyi yilemu chinji yili zango. Twamona nawa yize akulinga ni yize makalinga hanga ayukise atu. Chipwe ngwe kuli yuma yinji yize mutuhasa kulilongesa hakutwala kuli Zambi, hanji yena muhasa kulihula ngwe, yuma yize iye analinge yika muyihasa kulumbunuka kuli yami.

Yehova kanalakenya ngwenyi, “nyi mumufupa mumuwana.” (1  Sango ja Mianangana 28:9) Achinyonga kama ha chawana chilemu chize mukatambula, nyi munyingika Zambi—nawa muupwa ni “usepa wa Yehova”! (Samu 25:14.) Mba usepa wacho yika muuhasa kulumbunuka kuli yena?

Uwahililo wamwenemwene. Yehova kanamusolola ngwo, kali “Zambi wa uwahililo.” (1 Timoteu 1: 11 NW) Muze mukundama kuli iye ni kwimbulula ndako jenyi, muupwa ni uwahililo wamwenemwene, uze muukuyukisa ku mbunge, mu manyonga ni kumusunya. (Samu 33:12) Yena nawa muupwa ni mwono upema ha kwehuka yitanga yipi, muupwa ni ndako jipema, nawa mutwama kanawa ni akwenu. Yena mutayiza yize mukwa-kwimba masamu ambile ngwenyi: “Alioze chipema kuli yami kukundama kuli Zambi.”—Samu 73:28.

Kukufunga ni kukupanjika. Yehova kanalakenya tuvumbi jenyi ngwenyi: “Mungukwaha mana nikukutala ni liso liami.” (Samu 32:8) Chino chinalumbunuka ngwo, Yehova kakulipikala hali hita kavumbi kenyi ni kwaaha yuma yeswe yize anafupu. (Samu 139:1, 2) Nyi wapwa ni usepa upema ni Yehova, muumona ngwo iye kali hakamwihi ni yena.

Mwono upema kulutwe lia matangwa. Chikwo nawa, Yehova Zambi keshi kukukwasa wika hanga uwahilile ku mwono haliapwila, alioze, iye kanakwehe kutalatala cha kupwa ni mwono upema kulutwe lia matangwa. (Izaia 48:17, 18) Mbimbiliya yinambe ngwo: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.” (Yoano 17:3) Ha mashimbu wano akalu, kutalatala chize Zambi akutwaha muchihasa kupwa ngwe ankora hanji kwachijili yize yakutukwasa ‘kujikiza [ni] kukola.’—A-Hepreu 6:19.

Yuma yize twalilongesa yili yimwe yikuma yilemu yinasolola ulemu wakunyingika Zambi, ni kupwa ni usepa ukolo ni iye. Yena muhasa kuhanjika ni umwe Chela cha Yehova hanji kunjila ha site jw.org hanga unyingike nawa sango jikwo.