Nyi unazange kunyingika kanawa umwe mutu, chili chilemu chinji kunyingika yize akulinga ni yipikalo yize hanapalika. Chizechene nawa, nyi tunazange kunyingika Zambi, chili chilemu kunyingika yize hanalingi. Nyi wachilinga, chino muchikukwasa kunyingika yuma yize Zambi hanalingi ni yize makalinga kulutwe lia matangwa.

Yehova Zambi kali Sakatanga Munene, nawa “yuma ya uzambi wenyi ni tachi jenyi ja mutolo yize kuyishi kumoneka, yinasoloka pundu mu yuma yize hanatange.” (A-Roma 1:20) “Iye watangile hashi ni ndundo jenyi, wakolesele muno-muze ni mana jenyi, wazazulwile malilu ni yinyingi yenyi.” (Jeremia 10:12) Yuma yize Zambi atangile, yinasolola nawa ngwo, iye kakutuzanga.

Tala chize Yehova alingile kanawa mujimba wetu ha kutanga atu “mu chano chenyi.” (Uputukilo 1:27) Chino chinalumbunuka ngwo, iye katutangile ni uhashi wa kwimbulula yitanga yenyi. Iye yatutanga ni nyonga lia kupwa ni uhashi wa kulia ku spiritu, hanji uhashi wa kumunyingika ni kukaula shimbi jenyi. Nyi twasa tachi hanga tutwame kulita ni shimbi jenyi, mutuwahilila chinji nawa mwono wetu muupema. Kuhiana yeswe ayi, iye kakutwaha uhashi wa kupwa masepa jenyi.

Yuma yize Zambi atangile hano hashi yakusolola chize iye akwivwa hali yetu. Postolo Paulu kambile ngwenyi, Zambi “kalihichikile iye mwene keshi chela, walingile yipema, wanuhele vula wa mwilu ni tukweji a kwima mihuko, nikuzalisa mbunge jenu ni kulia ni chiseke.” (Yilinga 14:17) Zambi keshi kutwaha wika kulia hanga tupwe ni mwono. Iye kakutwaha yuma yinji, nawa yamutapu weka ni weka hanga tuwahilile ku mwono. Yino yeswe yinasolola ngwo, Zambi kanazange kutulingila yuma yinji kuhiana.

Yehova katangile hashi hanga atu atwameho ku miaka yeswe. Mbimbiliya yinambe ngwo: “Hashi wahahanyine kuli ana ja atu,” nawa ngwo,  iye “katangileho hahululu, watangileho hanga atu akatwameho.” (Samu 115:16; Izaia 45:18) Atu a mutapu uka te matwamaho, nawa ha mashimbu angahi? “Akwa ululi kumakazuka chifuchi; kumakatwamamo ku miaka ya mutolo.”—Samu 37:29.

Yehova katangile lunga ni pwo mutangu Alama ni Eva, yaasa mu paraisu hano hashi, hanji mu munda “mukuulima nikuufunga.” (Uputukilo 2:8, 15) Zambi kaahele mulimo ulemu ha kwaalweza ngwenyi: “Semenu nukaliokese, nukazalise hashi, ni kuyulaho.” (Uputukilo 1:28) Kashika, Alama ni Eva te kali ni uhashi wa kuwahilila ni mwono wa mutolo hano hashi. Alioze, ayo yalituna kwononokena Zambi, hachino, yatokesa uhashi wo wa kupwa mukachi ka “akwa ululi” waze ‘makazuka chifuchi.’ Chipwe chocho, yitanga yo yakalumwine upale wa Zambi hakutwala kuli atu, chipwe hano hashi. Chitangu, tutalenu chuma chikwo chize Zambi alingile.

Tunanyingika ngwetu, Mbimbiliya yili Liji lia Zambi. Mumu liaka Yehova atwehele Mbimbiliya? Iye katwehele Mbimbiliya hanga tuhasa kulilongesa hakutwala kuli iye. (Yishima 2:1-5) Kwamba pundu, Mbimbiliya kuyishi kukumbulula yihula yeswe hakutwala kuli Zambi, nawa kukushi mukanda ukwo uze wakuyikumbulula. (Chilumbununyi 3:11) Chipwe chocho, mu Mbimbiliya muli sango jize mujitukwasa kunyingika Zambi, chize iye apwa ni chize akufunga atu, nawa ni yuma yize akuzanga ni yize keshi kuzanga. (Samu 15:1-5) Mutuhasa kunyingika nawa yize iye akunyonga hakutwala ku uwayilo, utanji ni upite. Mbimbiliya yakutukwasa nawa kunyingika utu wa Yehova, kupalikila mu yitanga ni maliji a Mwanenyi, Yesu Kristu.—Yoano 14:9.

Chitela chikwo cha mumu liaka Yehova atuhele Mbimbiliya, chili ngwo, hanga tunyingike chize mutuhasa kuwahilila ni kupwa ni mwono upema. Mu Mbimbiliya, Yehova kakutulweza chize mutuhasa kuwahilila mu usoko, chize mutuhasa kupwa ni mwono washi, ni kukumba yipikalo. Ngwe chize twamona ha Kaposhi wa Kutalila yono, Mbimbiliya yili ni kumbululo lia yihula yilemu ya ku mwono, ngwe yino: Mumu liaka twakumona lamba lipwahaha? Yika muyikalingiwa kulutwe lia matangwa? Mbimbiliya nawa yinalumbununa yize Zambi hanalingi hanga amanunune upale wenyi.

Mbimbiliya yili mukanda ulemu chinji—yakukwasa nawa mu mutapu ukwo. Ha kuyisoneka yambachile miaka kuhiana 1.600, nawa kayisonekene kuli 40 a malunga, yili ni chikuma chilemu, mumu Mwenyayo kali Zambi. (2 Timoteu 3:16) Kulisa ni mikanda yikwo yikulu, Mbimbiliya kayifungile kanawa ha mashimbu anji, ngwe chize akusolola mu yisoneko yinji yikulu ya Mbimbiliya. Chikwo nawa, Mbimbiliya nihindu yinanungu, chipwe ngwe ha mashimbu amwe kapwile ni kuyikanjisa ahone kuyihana kuli atu, kuyilumbununa, hanji kuyitanga. Alioze, musono Mbimbiliya kakuyilumbununa, nawa yili mukanda uze akuhana chinji kuli atu. Kununga cha Mbimbiliya chinasolola ngwo, “liji lia Zambi yetu kumulikakola lia mutolo.”—Izaia 40:8.

Chuma chikwo chize chinasolola yize Zambi hanalingi, chili chilakenyo cha kumanununa upale wenyi hali yetu. Ngwe chize twamona ku uputukilo, Zambi te kanakazanga hanga atu atwame ku miaka yeswe. Alioze, muze Alama asakwile kwehuka Zambi nawa avulumwine, iye yatokesa uhashi wenyi wa mwono wa miaka yeswe, hi wika ko wa iye, alioze ni wa ana jenyi nawa. “Kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe, mumu te eswe hanavulumuna.” (A-Roma 5:12) Uhulia wa Alama wasolwele ngwe upale wa Zambi te kuuchi kulingiwa. Yika Yehova te malinga?

Yuma yize Yehova alingile te yinalite ni ndako jenyi. Iye kafwetesele Alama ni Eva kulita ni uhenge wo, alioze ha mukunda wa zango lienyi, iye yalinga yimwe hanga ahane nawa kutalatala kuli ana jo. Ha mana jenyi Yehova yatesa yize te malinga hanga akumbe kapinda wacho, kashika, hazehene yahana chimwe kutalatala. (Uputukilo 3:15) Mba  ahwise shili ni kufwa, Yehova te matuma Mwananyi, Yesu Kristu. Kuchi te machilinga?

Yehova yatuma Yesu hano hashi hanga akuule atu ku shili ya Alama, ni kwaalongesa chize atamba kutwama nawa “nikuhana mwono wenyi ndando ya ukuule hali anji.” a (Mateu 20:28; Yoano 14:6) Yesu te mahasa kuhana ukuule mumu iye te mutu mungunu ngwe chize apwile Alama. Alioze, kuhiana Alama, Yesu yanunga ni kwononokena Yehova, chipwe ngwe te mafwa. Yesu kakalingile chuma chize te muchimunehena kufwa, kashika, Yehova yamuhindwisa cheka ni mwono. Hachino, Yesu te malinga yize Alama kakahashile kulinga, kuhana kuli atu waze akwononokena Yehova uhashi wa kupwa ni mwono wa miaka yeswe. “Mumu chizechene ngwe ku uhulia wa mutu muwika anji aapwishile yivulumunyi, chocho nawa ku kwononoka cha mutu umuwika anji kumakaapwisa akwa ululi.” (A-Roma 5:19) Ha mukunda wa ukuule wa chitapo cha Yesu, Zambi makamanununa yilakenyo yenyi hanga atu akatwame miaka yeswe hano hashi.

Twalilongesa yuma yinji kuli Yehova hakutwala ku yize alingile ha mukunda wa uhulia wa Alama. Twamona ngwetu, kukushi nichimwe chuma chize muchihasa kukinda Yehova kumanununa upale wenyi; liji lienyi kumulikamanunuka pundu. (Izaia 55:11) Twatamba nawa kusakwilila ha zango lize Yehova akutusolwela. “Muno hanasolola zango lia Zambi hakutwala kuli yetu, se Zambi hanatumu Mwanenyi wa wika hano hashi, hanga tukapwe a mwono muli iye. Muno muli zango, kuchapwile ngwe yetu twazangile Zambi ka, alioze iye watuzangile yetu, watumine Mwanenyi kupwa kuka ha milonga yetu.”—1 Yoano 4:9, 10.

Zambi “kavwilile keke Mwanenyi mwene, alioze wamukunjikile hali yetu eswe,” yino yinasolola ngwo, Zambi makatwaha “yuma yeswe chawana” yize iye analakenya. (A-Roma 8:32) Yika Zambi analakenya kulinga hali yetu? Kumbululo lili ha mutwe muusulaho.