Nyi uli mu kapinda, kwamba pundu wakuzanga hanga sepa lie mupema akulingile chimwe chuma ni kukukwasa. Ha kunyonga chino, atu amwe kakwamba ngwo, Zambi hi sepa ko, mumu ngwo Zambi keshi kulinga ni chimwe hanga aakwase. Kwamba pundu, Zambi keshi kutulingila wika yuma yinji hanga tuyuke, alioze iye nawa kakutukwasa muze twakupwa mu kapinda ni lamba. Yika Zambi makalinga?

Zambi makahwisa ungulungulu weswe muze makanongesa chishina cha ungulungulu wacho. Mbimbiliya yinasolola kuze kwakukatuka ungulungulu ha kwamba ngwo: “Hashi heswe lukombo kuhakupomba mu chiyulo cha mwe chingulungulu.” (1 Yoano 5:19) “Chingulungulu” wacho, Yesu kamuvulukile ngwo, “yoze wayula hashi,” Satana Ndiapu. (Yoano 12:31) Hano hashi hali lamba linji mumu atu kakwayula kuli Satana. Yika Zambi makalinga?

Kwasala hakehe Yehova Zambi atume Yesu hanga “akapupe yoze uli ni tachi ja kufwa, iye Ndiapu.” (A-Hepreu 2:14; 1 Yoano 3:8) Kwamba pundu, Mbimbiliya yinasolola ngwo, Ndiapu kananyingika ngwenyi, “mwaka ukepe wika ali nawo” shimbu kanda achimunongesa. (Usolwelo 12:12) Zambi nawa mahwisa ungulungulu weswe ni waze akuulinga.—Samu 37:9; Yishima 2:22.

Muze makahwisa ungulungulu weswe hano hashi, Sakatanga wetu makamanununa upale wenyi hali atu ni hashi. Yika mutuhasa kushimbwila kulutwe lia matangwa?

Ukulungunga ni kutwama kanawa. “Alioze yimbovu kumakahinga chifuchi. Kumakawahilila mu kulumbama cha sambukila.”—Samu 37:11.

Kulumbama cha kulia chipema. “Kumukukapwa kulumbama cha mbuto mu mavu helu lia milundu.”—Samu 72:16.

Mazuwo apema ni milimo. “Kumakatunga mazuwo ni kutwamamo; kumakatumba minda ya uva ni kulia ye mihuko yamo. . . . waze natongwele makawahilila ni milimo ya moko jo.”—Izaia 65:21, 22.

Shina unamono ngwe yuma yacho yinashimbula chinji? Yuma yacho kwasala hakehe yilingiwe hano hashi.

Yetu eswe twakuyiza nawa twakufwa, alioze kwasala hakehe yuma yino yihwe. Kwasala hakehe Zambi maneha yiwape ya chitapo cha ukuule wa Yesu “hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Kuchi yino muyikalingiwa?

Yikola muyikahwa. “Niumwe watungako mamba ngwenyi, Ngunayiji. Waze atungako maakonekena uhenge wo.”—Izaia 33:24.

Kufwa kuchichi kupinjisa nawa atu. “Kumakakumba che kufwa ndo ku miaka ya mutolo mba Mwene Yehova makusumuna masoji ku meso eswe.”—Izaia 25:8.

Atu makatwama ku miaka yeswe. “Chawana cha vumbi lia Zambi, mwono wa mutolo muli Kristu Yesu Mwene wetu.”— A-Roma 6:23.

Waze hanafu kumakaahindwisa. “Kumukukapwa uhindukilo wa akwa ululi ni wa yihenge.” (Yilinga 24:15) Ayo makayuka ha chawana cha Zambi cha ukuule.

Kuchi Zambi makalinga yuma yeswayi?

Zambi makamanununa upale wenyi hali atu ni hashi kupalikila mu wanangana wenyi wa mu malilu, uze Yesu Kristu anayulu ngwe Mwananga. (Samu 110:1, 2) Uno uli unguvulu, hanji wanangana uze Yesu alongesele tumbaji jenyi hanga alembe ngwo: “Tata nuli mu malilu, . . . Wanangana wenu wize.”—Mateu 6:9, 10.

Wanangana wa Zambi muukayula hashi nawa muukahwisa yikola ni yuma yeswe yize yakutumwesa lamba. Wanangana uno uli unguvulu upema uze atu atamba kupwa nawo! Kashika Yesu te akulikolweza hanga ambujole “sango lipema lia wanangana” muze apwile hano hashi, nawa kakolwezele tumbaji jenyi hanga alinge mulimo wacho.—Mateu 4:23; 24:14.

Ha mukunda wa zango lize ali nalio hali atu, Yehova Zambi kanalakenya kulinga yuma yino yeswe yipema hali ayo. Shina chino kuchichi kukukolweza hanga umunyingike kanawa? Nyi mufupa kumunyingika, shina muyuka? Mutwe muusulaho muukumbulula chihula chino.