Ha miaka yinji kunyima, niumwe te wanyingika kumbululo lia chihula chino wakwihi. Ha mukunda wa kuhona kumbululo liacho, atu anji te kakufwa ni misongo yeka ni yeka. Kulutwe akwa mana yawana kumbululo, yanyingika ngwo, misongo yakukatuka kuli amwe tututu akehe-akehe waze tuchi kuhasa kumona ni meso jetu. Kumbululo lia chihula chacho, liakukwasa atu anyingike chize atamba kulifunga ni kuuka misongo yeka ni yeka, ni kutwama ni mwono mashimbu anji.

Kuli nawa yihula yikwo yilemu, kuwana kumbululo lia yihula yino muchihasa kukukwasa ku mwono we, yihula yacho yili yino:

• Zambi iya?

• Yesu Kristu iya?

• Wanangana wa Zambi yika?

• Yika muyikalingiwa kulutwe lia matangwa?

Tununu twa atu hanawane kumbululo lia yihula yino, chino chakwakwasa kupwa ni mwono upema. Ni yena muhasa kuyuka hakuwana kumbululo.

Muhasa kulihula ngwe: ‘Shina munguhasa kuwana umwenemwene?’ Musono, kunyingika umwenemwene wa yuma yinji chinakaliwa chinji. Mumu liaka?

Atu anji keshi kujikijila ha sango ja manguvulu, akwa-mingoso, hanji ja mu yisaji. Chino chakulingiwa, mumu yuma yize atu jacho akwamba keshi kuyilinga, nawa sango ja mahuza kakujisolola ngwe ja mwenemwene. Kulivunjilila chino, chakupinjisa atu kunyingika sango ja mwenemwene ni sango ja mahuza.

Chipwe chocho, yena muhasa kuwana kumbululo lia yihula yilemu. Kuchi muhasa kuliwana? Hakulikolweza ni kufupa matangwa eswe kumbululo.

Matangwa eswe, yena wakufupa umwenemwene. Tala yize yalingiwile kuli Jessica. Yamba ngwenyi, “Mwanami wa pwo, kapwile ni yimbulu ha mujimba weswe, ha mukunda wa kulia tetela, chipwe muze te akulia ndambu yiheke, yimbulu yacho te yakwoka chinji. Kashika, Jessica yanyingika ngwenyi, katamba kukeya ha kulanda kulia hanga chihone kulinga upi hali mwanenyi. Yamba nawa ngwenyi: “Muze nakulanda kulia chakutelaka kulu, nakufupa kunyika milungo yize asako. Nakuhengwola hanga ngunyike nyi kulia chacho chichi kulinga upi hali mwanami, nawa nakuhula kuze akululieka kulia chacho hanga ngupwe ni shindakenyo ngwami, chichi kulinga upi hali mwanami. Nawa nakutanga sango jikwo jize jakuhanjika ha chishina kuze akululiekela kulia chacho.”

Kufupa che ha umwenemwene hanji chili chilemu kuhiana cha Jessica, alioze muhasa kukaula chilweza chenyi hanga uwane kumbululo lia yihula yize ukwete:

• Fupa umwenemwene.

• Hengwola chinji.

• Nyingika kanawa kuze kunakatuka sango jacho.

Kulinga chino, muchihasa kukukwasa kuwana kumbululo lia yihula yilemu ya ku mwono. Kuchi muhasa kuchilinga?

Muze Jessica afupile kunyingika umwenemwene wa mu Mbimbiliya, kapwile ni kulinga ngwe chize alingile muze te akufupa kulia chize muchilita ni mwanenyi. Iye yamba ngwenyi: “Kutanga ni kuhengwola chinji changukwashile kuwana umwenemwene wa mu Mbimbiliya.” Chizechene ngwe Jessica, atu anji hananyingika kumbululo lia Mbimbiliya ha yihula yino:

• Mumu liaka atutangile?

• Nyi mutu hafwa kulihi akuya?

• Mumu liaka kuli lamba lipwahaha?

• Yika Zambi makalinga hanga ahwise lamba lieswe?

• Kuchi mutuhasa kupwa ni uwahililo mu usoko?

Muhasa kuwana kumbululo liamwenemwene lia yihula yino ni yihula yikwo ha kutanga Mbimbiliya, ni kuhengwola sango jikwo ha site jw.org.