Mbimbiliya Yili Chishina Cha Umwenemwene
Atu a ku mavungu anji kakufuliela ngwo, Mbimbiliya yili chishina cha umwenemwene. Musono, atu anji kakukaula malongeso a Mbimbiliya. Alioze, atu akwo kakwamba ngwo, Mbimbiliya kuyishi ulemu, nawa ngwo yili wika mukanda wa yishima yakutomba. Mba yena mukwetu, yika wakunyonga? Shina muhasa kuwana umwenemwene mu Mbimbiliya?
MUMU LIAKA MUHASA KUJIKIJILA MU MBIMBILIYA?
Yika muyihasa kukukwasa hanga ujikijile mu Mbibliliya? Nyonga ha chino: Nyi ukwete umwe sepa yoze wakukulweza umwenemwene mashimbu eswe, yena muhasa kufuliela ha yeswe yize akukulweza. Shina Mbimbiliya yili ngwe yono sepa, yoze wakukulweza umwenemwene mashimbu eswe? Tala yimwe yilweza.
Akwa-kusoneka Ashishika
Atu waze asonekene Mbimbiliya te kashishika, ayo kasonekene uhenge wo ni tupalia. Chakutalilaho, profeta Yona, kasonekene uhenge wenyi muze akolemene Zambi. (Yona 1:1-3) Ku songo lia mukanda wenyi, Yona kanasolola lamba lize Zambi anehene hali iye hamukunda wa kukolema chenyi, alioze kakasolwele chize alumwine yitanga yenyi. (Yona 4:1, 4, 10, 11) Kushishika cha akwa-kusoneka Mbimbiliya chinasolola ngwo, ayo te kakuzanga kuhanjika umwenemwene.
Umwenemwene Wakukwasa
Shina mu Mbimbiliya muli umwenemwene uze wakukwasa atu? Ewa muuli. Tala yize Mbimbiliya yinambe ha chize mutuhasa kulivwashana ni akwetu, yinambe ngwo: “Yuma yeswe kashika nunazange atu alinge hali yenu, lingenu chizechene hali ayo.” (Mateu 7:12) “Kumbululo lia vumbi kuliakuchinda ufwatulo; alioze liji lisasu kuliakusangumuna utenu.” (Yishima 15:1) Chochene, umwenemwene wa mu Mbimbiliya wakukwasa chinji atu musono, ngwe chize wakwashile atu muze ayisonekene.
Sango ja Mwenemwene
Akwa-kushikulula yuma yikulu, hanawane majina ja atu, yihela ni sango jize akutongola mu Mbimbiliya. Tala chimwe chilweza. Mbimbiliya yinambe ngwo, ha mashimbu ja Nehemia, A-Teru, waze te atwama mu Yerusaleme kapwile “ni kuneha yishi ni yuma” yeka ni yeka yakulanjisa.—Nehemia 13:16.
Shina lusango yono kali wamwenemwene? Ewa. Akwa-kushikulula yuma yikulu, hanawane yikumba ya A-Teru mu Izalele, yino yinasolola ngwo, hakachi ka mavungo wano aali hapwile usepa upema. Chikwo nawa, muze ashikulwile mu Yerusaleme yawana yifwaha ya yishi a mu kalunga-lwiji wa Mediterrâneo. Akwa-kushikulula yuma yikulu, kakutayiza ngwo, yishi jacho kaatwalilemo kuli akwa-kulanjisa waze apwile ni kuya mu Yerusaleme. Muze umwe mukwa-kuhengwola yisoneko ahengwile yikumba yize ashikulwile, yamba ngwenyi: “Yino yeswe yinasolola ngwo, lusango wakulanjisa yishi mu Yerusaleme yoze uli ha mukanda wa Nehemia 13:16, kali wamwenemwene.”
Umwenemwene Hakutwala ku Ciência
Mbimbiliya uli mukanda wa uwayilo ni sango. Alioze muze yakuhanjika yuma yinatala ha ciência, yakwamba umwenemwene. Tala chimwe chilweza.
Ha miaka 3,500 kunyima, Mbimbiliya te hiyinambe kulu mu mukanda wa Yombi ngwo: “Kakuzezeleka hashi mu tetela.” (Yombi 26:7) Lusango yono kalisa ni lusango wa saki yoze atu te akutayiza ngwo, hashi hanatekenga helu lia meya, hanji ngwo, hashi hali hakutumbika helu lia mbachi munene. Muze te hikwapalika miaka 1,100 kukatuka haze asonekene mukanda wa Yombi, atu te machinunga ni kukakajana ngwo, hashi kuhatambile kuzezala mu tetela, alioze ngwo kuhatwama helu lia yimwe. Alioze, ha mwaka wa 1687, Isaac Newton, yasolola mulimo wenyi wakuhengwola unahanjika ha tachi jize jakukoka yuma hashi, avuluka ngwo, (força da gravidade) ni kulumbununa ngwo hashi kuhazezala mu tetela. Mulimo wenyi, unashindakenya yize Mbimbiliya hiyinambe ha 3,000 a miaka kunyima.
Uprofeto Wamo Wamwenemwene
Shina uprofeto watwama mu Mbimbiliya uli wa mwenemwene? Tala chimwe chilweza: Uprofeto wa Izaia uze unahanjika ha kunongesa cha Babilonia.
Uprofeto: Ha sekulu nake K.M.J., profeta Izaia kambile hali Babilonia, yize ha mashimbu jacho yapwile mbonge ya wanangana wa ndundo ja hashi heswe, ngwo, muyipwa kunongesa, nawa ngwo, ha chihela chacho kechi keza katungaho cheka. (Izaia 13:17-20) Izaia yatongola nawa jina lia lunga yoze te mamanununa uprofeto wacho ngwo, Siru. Yalumbununa nawa yize te Siru malinga ngwenyi, momisa “njiji.” Yamba nawa ngwenyi, mapito a mbonge yacho, te makaahichika awashi.—Izaia 44:27–45:1.
Umanunuko: Muze te hikwapalika 200 a miaka, chize haze uprofeto wa Izaia wambile sango ja unongeso wacho, mwanangana Ka-Persia yapupa Babilonia. Mwanangana wacho jina lienyi te iya? Siru. Chapwile chikalu kunjila mu Babilonia mumu lia yikalakala yisuku ni lwiji Ufrateze, yoze te unajingilika mbonge. Chocho, Siru ni maswalale jenyi yafula kapila hanga atepulule meya. Meya yatepuluka chinji. Kota kwalingiwile yimwe kashika A-Babilonia ahichikile yajilo yawashi! Ha chino, Siriu ni maswalale jenyi yanjila mu mbonge ya Babilonia ni kuyikumba.
Alioze, uprofeto umwe te kanda uchimanunuka: Shina mu Babilonia mwasalile lume mwa hululu? Chipwe muze te hayinongesa mwasalile amwe atu waze atwaminemo miaka yinji. Alioze musono, yikulu ya Babilonia, yize yili hakamwihi ni Bagdá mu chifuchi cha Iraque, yinahana shindakenyo ngwo, uprofweto weswe uze Izaia ambile, wamanunukine pundu. Ewa, Mbimbiliya yakuhanjika umwenemwene, chipwe muze yakuhanji ha yuma yize muyikalingiwa kulutwe lia matangwa.
