Jina Lia Zambi Iya? Mwene Zambi kanambe ngwenyi: “Yami Yehova. Lie jina liami lienalio.” (Izaia 42:8) Jina lia Zambi liakusoloka mu Mbimbiliya yisuho 7,000. Alioze, akwa-kulumbununa Mbimbiliya anji yachiza jina liacho mu Mbimbiliya ni kusamo chisanyiko chino ngwo, “Mwene.” Zambi kanazange upwe sepa lienyi, kashika kanakukolweza hanga umuvuluke “ha jina lienyi.”—Samu 105:1.

Yisanyiko ya Yehova. Mbimbiliya yakuvuluka Yehova ha yisanyiko yino, ngwo, “Zambi,” “Mukwa-Ndundo-Jeswe,” “Sakatanga,” “Tata,” ni “Mwene.” Mu Mbimbiliya muli yilemba yinji yize anavuluka Zambi ha yisanyiko yino ni ha jina lienyi, Yehova.—Daniele 9:4.

 Chize Zambi Apwa. Zambi kali spiritu, keshi kumoneka. (Yoano 4:24) Mbimbiliya yinambe ngwo, “niumwe kanda achimona Zambi nilimwe tangwa.” (Yoano 1:18) Chipwe chocho, Mbimbiliya yakusolola chize Iye akwivwa. Yuma yize atu akulinga, muyihasa kumuvwisa yinyengo, hanji ‘kuwaha.’—Yishima 11:20; Masamu 78:40, 41.

Yitanga Yipema ya Zambi. Zambi keshi katonde, iye kakutayiza atu a ku mavungu eswe ni minyachi yeswe. (Yilinga 10:34, 35) Iye nawa kali “mukwa keke, mukwa vumbi, makoke kutenuka, wakulumbama ni utu wa zango ni umwenemwene.” (Kutuhuka 34:6, 7) Alioze, kuli yitanga yiwana ya Zambi yize yakusoloka chinji.

Ndundo. Yehova kali “Zambi Muka-Ndundo-Jeswe,” kali ni ndundo ja kumanununa yilakenyo yeswe yize akulakenya.—Uputukilo 17:1.

Mana. Zambi kanahiane atu eswe ku mana. Kashika Mbimbiliya yakwamba ngwo, iye “mwe Zambi umuwika wa mana.”—A-Roma 16:25.

Ululi. Zambi nihindu kakulinga yuma ya ululi. “Yitanga yenyi yingunu,” nawa iye “keshi uhenge.”—Shimbi Yamuchiali 32:4.

Zango. Mbimbiliya yinambe ngwo, “Zambi iye zango.” (1 Yoano 4:8) Zambi keshi kusolola wika zango, alioze iye mwe chishina cha zango. Zango lienyi linatale ha yuma yeswe yize akulinga, chino chakutuyukisa chinji.

Usepa wa Zambi ni Atu. Zambi kali tata yetu wa zango yoze uli mu malilu. (Mateu 6:9) Nyi mutufuliela muli iye, mutuhasa kupwa masepa jenyi. (Samu 25:14) Kwamba pundu, Zambi kanazange hanga tukundame kuli iye kupalikila mu yilemba ni kukunjika yipikalo yetu yeswe kuli iye, mumu iye kakutufunga.—1 Petulu 5:7; Tiangu 4:8.

Yesu hi Zambi ko. Yesu kali mutu mulemu chinji. Iye wika mwe Zambi atangile ukawenyi hanji ku kwoko lienyi mwene. Kashika Mbimbiliya yakuvuluka Yesu ngwo, Mwana wa Zambi. (Yoano 1:14) Muze Yehova atangile mwanenyi mutangu Yesu, yamusa “ngwe chilangaji” hanga atange atu ni yuma yikwo yeswe.—Yishima 8:30, 31; A-Kolosu 1:15, 16.

 Nilimwe tangwa Yesu ambile ngwenyi kali Zambi liakwihi. Alioze kambile ngwenyi: “Kuli iye [Zambi] ngunakatuka; iye wangutumine.” (Yoano 7:29) Muze te anahanjika ni umwe wa kuli tumbaji twenyi, Yesu yavuluka Yehova ngwenyi, “Tata kanda Tatenu, ni Zambi yami kanda Zambi yenu.” (Yoano 20:17) Muze Yesu afwile, Yehova yamuhindwisa, yaya mu malilu ni kumunangamisa ku kwoko lienyi lia chindume.—Mateu 28:18; Yilinga 2:32, 33.

Yesu Kristu Mahasa Kukukwasa Ukundame Kuli Zambi

Yesu kejile hano hashi hanga atulongesa hakutwala kuli Tato. Yehova kambile hali Yesu ngwenyi: “Yono mwe Mwanami ngunamuzange chikolo; mwivwenu iye.” (Marku 9:7) Yesu kananyingika kanawa Zambi kuhiana atu eswe. Kambile ngwenyi: “Niumwe manyingika . . . chize apwa Tata shina mwe Mwana, ni kuli mweswawo yoze mwe Mwana mapala kumusolola.”—Luka 10:22.

Yesu te kakwimbulula kanawa yitanga ya Zambi. Yesu kembulwile kanawa yitanga ya Tato, kashika ambile ngwenyi: “Yoze wangumona, hamona mwe Tata.” (Yoano 14:9) Ha kwimbulula zango lia Tato mu yitanga ni maliji, Yesu yakwasa atu kukundama kuli Zambi. Iye yamba ngwenyi: “Ye jila yami, ni we umwenemwene, ni we mwono. Niumwe meza kuli Tata shina ni yami.” (Yoano 14:6) Yamba nawa ngwenyi: “Akwa kuwayila amwenemwene makawayila Tata mu uspiritu ni mu umwenemwene: mumu mwe Tata kakufupa atu ngwe wano apwe akwa kumuwayila.” (Yoano 4:23) Nyonga ha chino! Yehova kanafupu atu ngwe yena, waze anazange kunyingika umwenemwene.