Yesu kalumbunwine chize mutunyingika ngwo, “Wanangana wa Zambi uli hakamwihi.” (Luka 21:31) Iye kambile ngwenyi, te mukupwa jita, minyiko yinene, tupunga ni misongo. Yino ye yinalingiwa musono.—Luka 21:10-17.

Mbimbiliya yinasolola nawa ngwo, yitanga yipi ya atu te muyisolola ngwo, tuli ha “matangwa a kusula” a kuyula cha mianangana a hano hashi. Muhasa kutanga maliji wano mu mukanda 2 Timoteu 3:1-5. Muze wakumona ndako jipi ja atu musono, wakupwa ni shindakenyo ngwo, uprofeto uno wa mu Mbimbiliya unamanunuka mu yimako.

Yika yino yinalumbunuka? Yinalumbunuka ngwo, kwasala hakehe hanga Wanangana wa Zambi upemese hano hashi ni kuneha mwono upema hali atu. (Luka 21:36) Mu Mbimbiliya, Zambi kanalakenya yuma yinji yipema yize muyikalingiwa hano hashi ni kuli atu waze makatwamaho. Tuchitalenu yimwe yilweza.

Yamwaha [Yesu] chiyulo, ni uhenya, ni wanangana, hanga akwa mavungu eswe ni minyachi yeswe, ni malimi eswe akamulingile. Chiyulo chenyi chiyulo cha mutolo, kuchichi kahwa. Wanangana wenyi uze kuuchi kanonga.”—DANIELE 7:14.

Yika yino yinalumbunuka: Muhasa kuyuka mu Wanangana wa Zambi uze anasongwela kuli Yesu ngwe Mwanangana, uze muukayula hashi heswe.

“Niumwe watungako mamba ngwenyi, Ngunayiji.”—IZAIA 33:24.

Yika yino yinalumbunuka: Uchi kayiza nawa nilimwe tangwa hanji kupwa chilema, mukapwa ni mwono wa mutolo.

“Hamanununa jita ndo ku songo lia hashi.”—SAMU 46:9.

Yika yino yinalumbunuka: Kukuchi kapwa nawa jita, atu kechi kamona nawa lamba ha mukunda wa jita.

“Kwasala hakehe mba yingulungulu hi akuhi . . . “Alioze yimbovu kumakahinga chifuchi.”—SAMU 37:10, 11.

Yika yino yinalumbunuka: Atu api kechi kapwako nawa, alioze mukukapwa wika atu waze akwononokena Zambi.

“Kumakatunga mazuwo ni kutwamamo; kumakatumba minda ya uva ni kulia ye mihuko yamo.”—IZAIA 65:21, 22.

Yika yino yinalumbunuka: Hashi heswe muhakapema chinji. Zambi makakumbulula yilemba yetu hanga upale wenyi ulingiwe hano “hashi.”—Mateu 6:10.