Shina Zambi Kakwivwa Yilemba ye?
Shina hiunalihula kama nyi Zambi kakwiwva yilemba ye? Nyi chenacho kuushi ukawe. Atu anji kakulemba kuli Zambi hakutwala ku yipikalo yo, alioze nihindu kuyishi kuhwa. Shina chino chinalumbunuka ngwo Zambi kakulengulula yilemba yetu? Ka! Mbimbiliya yakwamba ngwo, Zambi kakutwivwa nyi mutulemba kulita ni upale wenyi. Tutalenu yize Mbimbiliya yakwamba.
ZAMBI KAKUTWIVWA.
“Yena wakwivwa kulemba, kuli yena akwa musunya eswe meza.”—Samu 65:2.
Atu anji kakulemba mumu kakumona ngwo, chino chakwahuzulula chipwe ngwe keshi kutayiza ngwo kakwapanjika. Alioze kutwatambile kulemba wika hanga tuhuzuluke mba tuhase kukumba yipikalo yetu. Mbimbiliya yinambe ngwo: “Yehova * hakamwihi ali ni waze eswe akutambika kuli iye; waze eswe akutambika kuli iye mu umwenemwene. . . . Kumakevwa muteto wo nawa, kumakaalamwina.”—Samu 145:18, 19.
Mutuhasa kufuliela ngwetu Yehova Zambi kakwivwa yilemba ya tuvumbi twenyi. Iye kanambe ngwenyi: “Munutambika kuli yami, nikwiza ni kulemba kuli yami mba mungunwivwa.”—Jeremia 29:12.
ZAMBI KANAZANGE HANGA ULEMBE KULI IYE.
“Likolezenu mu kulemba chenu.”—A-Roma 12:12.
Mbimbiliya yinatukolweza hanga ‘tununge ni kulemba’ ni kwamba nawa ngwo, “lembenu matangwa eswe.” Kwamba pundu, Yehova Zambi kanazange hanga tulembe kuli iye.—Mateu 26:41; A-Efwesu 6:18.
Mumu liaka Zambi anazange tulembe kuli iye? Tuchinyongenu ha chilweza chino: Tata kakuwahilila muze mwanenyi akumwita ukwaso. Kwamba pundu, tata mahasa kunyingika yize mwanenyi anafupiwa ni chize anevu, alioze muze mwana mamwita ukwaso muchisolola ngwo, kakumufuliela nawa kanazange kukundama kuli iye. Chizechene nawa muze twakulemba kuli Yehova Zambi, twakusolola ngwetu twakumufuliela, nawa tunazange kukundama kuli iye.—Yishima 15:8; Tiangu 4:8.
SHINA ZAMBI KAKUKUFUNGA?
“Kunjikenu yipikalo yenu yeswe kuli iye, mumu iye kakunufunga.”—1 Petulu 5:7.
Zambi kanazange hanga tulembe kuli iye mumu kakutuzanga ni kutufunga. Iye kananyingika kanawa yize tunafupiwa, chize twakwivwa nawa kanazange kutukwasa.
Ndawichi ku mwono wenyi weswe, yalemba kuli Zambi hanga amukwase ni kumulweza chize apwile ni kunyonga ni chize te akwivwa. (Samu 23:1-6) Kuchi Zambi apwile ni kwivwa hali Ndawichi? Zambi te kakumuzanga nawa kapwile ni kwivwa yilemba yenyi. (Yilinga 13:22) Chizechene nawa, Zambi kakwivwa yilemba yetu mumu kakutufunga.
“NAZANGA YEHOVA MUMU HANAPANJIKA LIJI LIAMI”
Wano kali maliji a umwe wa kuli waze asonekene mukanda wa Samu. Iye kapwile ni shindakenyo ngwenyi, Zambi te kakwivwa yilemba yenyi ni kumukwasa. Iye kakundamine kuli Zambi ni kupwa ni utakamiso, hachino, yahasa kukumba kapinda wenyi.—Samu 116:1-9.
Nyi mutupwa ni shindakenyo ngwetu Zambi kakwivwa yilemba yetu, mutununga ni kulemba kuli iye. Tutalenu chilweza cha Petulu yoze watwama ku Espanha. Iye kafwishile mwana wa miaka 19 ku ponde ya mashinyi. Muze te ananenganyana, Petulu yalemba ni kuliumba kuli Zambi hanga amutakamise ni kumukwasa. Mba yika yinakalingiwa? “Petulu yamba ngwenyi, Yehova kakumbulwile yilemba yami kupalikila mu utakamiso ni ukwaso uze mandumbu atuhele.”
Kanji-kanji Zambi kakukumbulula yilemba yetu kupalikila mu utakamiso ni ukwaso uze akutwaha kuli masepa jetu waze akutuzanga
Chipwe ngwe yilemba kuyakahindwishile mwanenyi, nihindu yakwashile chinji Petulu hamwe ni usoko wenyi. Mukwo-pwo Maria Carmen yamba ngwenyi, “yilemba yangukwashile hanga ngunyongonone mu lamba liami. Yami te ngunanyika ngwami, Yehova kanevu yilemba yami, mumu muze napwile ni kulemba te nakulivwa kanawa.”
Mbimbiliya ni yakulitakana nayo yakusolola ngwo, Zambi kakwivwa yilemba. Chipwe chocho, Zambi keshi kukumbulula yilemba yimwe. Mumu liaka Zambi akukumbulula yilemba yimwe yikwo ka?
^ kax. 5 Yehova lie jina lia Zambi—Samu 83:18.
