Kulitanda cha Yikola Ya mu Manyonga Hashi Heswe
“Yami nakupinda ni manyonga api, chipwe muze nguli ukawami.”
“Muze ngunalivwu kanawa, susumuku nakulipikala chinji. Ku mbunge ngunanyingika ngwami ha mashimbu akehe munguputuka kwivwa uli, chipwe ngwe kwalingiwile nichimwe.”
“Yami nakweseka kukumba yipikalo ya hita tangwa, alioze, kanji-kanji nakunyonga ha yipikalo yinji ha tangwa limuwika.”
Wano kali maliji ja atu waze anapinji ni yikola ya mu manyonga. Shina yena hanji umwe yoze wanyingika, kanapalika mu yuma ngwe yino?
Nyingika ngwe kuushi ukawe. Musono, atu anji kanayiji yikola ya mu manyonga chipwe waze ayo akuzanga.
Kwamba umwenemwene, tuli ha “miaka yikalu” yize yinaneha lamba. (2 Timoteu 3:1) Kuhengwola chimwe chasolwele ngwo hashi heswe hakachi ka atu nake umwe mahasa kupwa ni yikola ya mu manyonga. Ha mwaka 2020, ha musongo wa COVID-19, atu kuheta ha tununu 78 kakwachikile yikola ya mu manyonga.
Alioze, kupwa kanawa ku manyonga kuchatalile ha yize akwa-kuhengwola akuwana. Chinatale ha chize yena ni asoko je nwakulivwa ni chize mwono wenu wapwa.
Kupwa kanawa ku manyonga yika?
Kupwa kanawa ku manyonga chinalumbunuka kulivwa kanawa muze wongo unakalakala. Muhasa kukumba kapinda wa mu manyonga, kulinga kanawa mulimo we hamwe ni kuwahilila ku mwono.
Kupinda ku manyonga . . .
-
KUCHISHI kwiza mumu lia ulelu wa musunya.
-
YILI yimwe yikola yize yakuneha lamba linji ni kupinjisa manyonga, ni kwalumuna uhashi wa chize mutu akunyonga anji akulivwa.
-
Kanji-kanji uhashi uze mutu ali nawo wa kuhanjika ni akwo muhasa kupiha ni kupihisa kulihumikiza chenyi mu yuma yize yakulingiwa hita tangwa.
-
Muyihasa kukwata hali mutu mweswawo, chako cheswacho, chikowa, munyachi, uwayilo, kuli yoze walilongesele chinji hanji ka, pichi hanji chiswale.
Yize muyikukwasa kukumba yikola ya mu manyonga
Nyi yena hanji umwe mu usoko we maputuka kwalumuna yimwe ku mwono wenyi, kuhona kupomba tulo, kulia, kwivwa yikola ya ku mbunge, kunenganyana ha mashimbu anji, muchisolola ngwo, watamba kufupa ukwaso wa ndotolo hanga ulivwe kanawa. Mba kulihi muhasa kuwana ukwaso?
Mukwa mana yoze wapwile hano hashi, Yesu Kristu, kambile ngwenyi: “Atu ahinduka keshi kufupa mbuki, alioze waze ayiza e akumufupa.” (Mateu 9:12) Waze akupinda ni misongo ni kutambula uukiso wa terapia ni uukiso ukwo walita hanga atepulule yikola, mahasa kutambula ukwaso hanga atwame kanawa ku mwono ni kuwahilila. Muchipwa chipema kuli waze akutambula uukiso nyi kalalukile kufupa uukiso muze malivwa chipi hanji muze yikola muyinunga lume. a
Chipwe ngwe Mbimbiliya hi mukanda wa uukiso ko, nihindu muuhasa kutukwasa kupwa kanawa ku manyonga. Tunakwichi hanga uhengwole yikuma yize yakusolola chize Mbimbiliya muyihasa kukukwasa kukumba yikola ya mu manyonga.
a Kaposhi yono keshi kuhanjika ha yize hita mutu atamba kulinga. Mutu mweswe katamba kuhengwola kanawa yuma hanga akwate chiyulo chenyi mwene.
Kota Muzanga Chinji Yuma Yize Mumona
ESSENTIAL BIBLE TEACHINGS
Mumu Liaka Zambi Akwecha Lamba?
MAtu anji kakuhula ngwo mumu liaka atu akulivwila kole chichize ni kumona lama lipwahaha. Mbimbiliya yikwete kumbululo lipema lize mulitulembejeka.
KANYAMENU!
Musongo wa Manyonga Kuli Akweze Unoko Chinji—Yika Mbimbiliya Yakulongesa?
The Bible offers practical help for teens facing mental distress.
SANGO JA YETU
Eta Umwe Eze ni Kukumeneka
Kushimutwina chimwe chihula cha mu Mbimbiliya, kunyingika yuma yinji hakutwala kuli Yela ja Yehova.
