4 | Mbimbiliya Yakuhana Yiyulo Yipema
MBIMBILIYA YINAMBE NGWO: “Yisoneko yeswe . . . kuyakufumbuka.”—2 TIMOTEU 3:16.
Yika Chino Chinalumbunuka
Chipwe ngwe Mbimbiliya hi mukanda ko wa uukiso, alioze yakuhana yiyulo yipema yize yakutuyukisa. Yiyulo yacho muyihasa kukwasa mutu yoze unapinji ni musongo wa mu manyonga. Tutalenu yimwe yilweza.
Chize Yino Muyihasa Kukukwasa
“Angunu keshi kufupa mbuki, alioze waze ayiza.”—MATEU 9:12.
Mbimbiliya yakusolola ngwo ha mashimbu amwe twatamba kufupa uukiso wa mandotolo. Atu anji kalivwile kanawa ha kunyingika yize atamba kulinga ha musongo wo wa mu manyonga ni ha kutambula ukwaso walita kuli mandotolo.
“Mumu kulifumba cha mujimba chinawaha hakepe.”—1 TIMOTEU 4:8.
Kusa mashimbu ni tachi hanga upwe ni yitanga yipema muchikukwasa kukumba yikola ye ya mu manyonga. Yitanga yacho, yili kununga ni kufumba mujimba, kulia kanawa ni kupomba ha mashimbu alita.
“Mbunge ya chiseke yapwa yitumbo yipema; alioze spiritu yize yamakuka kuyakuumisa yifwaha.”—YISHIMA 17:22.
Kutanga sango ja mu Mbimbiliya ja utakamiso ni kujitesa ni yize mulinga muchihasa kukukwasa hanga uwahilile. Kupwa ni manyonga apema hamwe ni kutalatala muchikukwasa kupwa ni nyonga lialita ni kukumba kapinda we wa mu manyonga.
“Mana katwama ni akwa kulikehesa.”—YISHIMA 11:2.
Yena hanji kuuchi kuhasa kulinga ukawe yuma yize unazange, kashika tayiza ukwaso uze makwaha kuli masepa je ni usoko. Masepa ni asoko je hanji kanazange kukukwasa, alioze keshi kumona chize makukwasa. Kashika alweze chize mahasa kukukwasa. Kanda ushimbwila ngwo ayo makukwasa ku yuma yeswe, chikwo nawa sakwilila ha ukwaso weswawo makwaha.
Chize Yiyulo Yipema ya mu Mbimbiliya Yakukwasa Waze Anayiji
“Nalivwile ngwami chishi kanawa, kashika nafupile ukwaso wa ndotolo. Iye yanyingika yikola yami ni kungulwezayo. Chino changukwashile kutayiza chize napwa ni kulilongesa majila akwo a uwukiso uze natamba kulinga hanga ngupwe kanawa ku mujimba.”—Nicole, a yoze unapinda ni yikola ya mu manyonga.
“Nahasa kumona ngwami kutanga Mbimbiliya hamwe ni mukwetu-pwo chakungukwasa kuputuka kanawa hita tangwa ni manyonga apema waze akungutakamisa. Ha mashimbu anji, muze nakupinda ni manyonga api, versu yimwe ya mu Mbimbiliya yakungukwata ku mbunge.”—Peter, yoze wakupinda ni yikola ya mu manyonga.
“Chapwile chikalu kulweza akwetu kapinda wami mumu te nakwivwa sonyi jinji. Alioze umwe sepa liami kapwile ni kungupanjika kanawa ni kusa tachi hanga anyingike chize ngunevu. Kwamba pundu, iye kangukwashile hanga ngulivwe kanawa ni kunyingika ngwami te chishi ukawami.”—Ji-yoo, yoze wakupinda ni yikola ya kulia.
“Mbimbiliya yangukwashile kupwa ni nyonga lialita hakutwala ku mulimo ni kuhwima. Malinjekela jamo kangukwashile ha kapinda wa musongo wami wa mu manyonga.”—Timóteo, yoze wakupinda ni yikola ya obsessivo-compulsivo.
a Majina amwe twalumuna.
