Mutuhasa kunenganyana muze umwe sepa lietu anayiji yikola ya mu manyonga. Alioze, mutuhasa kusolola ngwo twakulihulumba hali iye ha kumukwasa hanga amone chize mahasa kukumba yikola yacho. Kuchi mutuhasa kukwasa?

“Mutu ni mutu alipupwise kwivwa.”—TIANGU 1:19.

Mutapu upema wakukwashilamo sepa lie uli kumupanjika kanawa muze iye anahanjika. Kanda ulivwa ngwe yena watamba kukumbulula yeswe yize iye anambe. Eseka kulisa mu chihela chenyi, kanda umukumika. Pwako ni nyonga lialita, ehuka kumupatwila ni kawashi. Euluka ngwe, iye mahasa kwamba hanji kulinga yuma yize te kazangile kwamba ni kulinga.—Yombi 6:2, 3.

“Kolesenu akwa kulela.”—1 A-TESALONIKA 5:14.

Sepa lie kota kanalipikala, hanji kanalinyongo mwene ngwo keshi ni ulemu. Ha kumulweza ngwo yena wakulihulumba hali iye, chino muchimutakamisa chinji ni kumulembejeka, chipwe ngwe kuwanyingikine yize muhanjika.

“Sepa lia mutu kakuzanga matangwa eswe.”—YISHIMA 17:17.

Linga yimwe hanga ukwase. Shimbu uhanjike wika ngwe unanyingika chize mukwasa, muhule yize muhasa kulinga. Nyi sepa lie kali ni kapinda wa kukulweza yize anafupu, eseka kumulweza yize munuhasa  kulinga hamuwika, ngwe kwenda nenyi. Hanji muhasa kulihana hanga umutwale ni kulanda yuma, kululieka zuwo hanji yuma yikwo nawa.—A-Ngalashia 6:2.

“Lihumikizenu.”—1 A-TESALONIKA 5:14.

Ha mashimbu amwe hanji sepa lie kechi kuhanjika ni yena. Lweza sepa lie ngwe muze mazanga kuhanjika, yena mumupanjika. Mumu lia yikola yenyi, sepa lie mahasa kwamba yimwe hanji kulinga yuma yize muyikuvwisa yikola ku mbunge. Iye mahasa kwecha kulinga yuma ni yena hanji kupihilila ni yena. Lihumikize, pwako mutu mwashi muze unahana ukwaso uze iye anafupu.— Yishima 18:24.

“Yami nakusa shindakenyo ngwami nguli sepa yoze iye mahasa kujikijila. Chipwe ngwe chishi kuhasa kuhwisa kapinda wenyi, nakusa tachi hanga ngwivwe yize iye anazange kwamba. Kanji-kanji yuma yize yinafupiwa, yili kumupanjika hanga alivwe kanawa.”—Farrah, a yoze ukwete sepa wakupinda ha kulia nawa ni yikola mu manyonga.

“Umwe sepa liami kali chimbovu nawa kakungutakamisa. Iye yangusanyika ku zuwo lienyi hanga ngulie nenyi hamuwika. Iye yangusolwela zango linji ni vumbi, chino changukwashile hanga nguhanjike ha kapinda wami. Kwamba pundu, chino changutakamishine!”—Ha-eun, wakupinda ni yikola ya mu manyonga.

“Kulihumikiza chili chilemu chinji. Muze mukwetu pwo akulinga yuma yize yakungupinjisa, nakwiwuluka ngwami, kakuyilinga mumu lia yikola yenyi, yuma yacho kuyishi kukatuka mu mbunge yenyi. Chino chakungukwasa hanga ngulihulumbe ni iye ni kwehuka kumuvwila uli.”—Jacob, yoze mukwo-pwo wakupinda ni yikola ya mu manyonga.

“Mukwetu-pwo kakungukwasa chinji ni kungutakamisa. Muze nakuhonga mumu lia yipikalo yami, iye keshi kungushinjila hanga ngulinge yuma yize kuchazangile kulinga. Ha mashimbu amwe chino chinalumbunuka ngwo iye keshi kulinga chuma chize yami chishi kuzanga kulinga. Nakumuzanga chinji mumu lia yitanga yenyi yipema.”—Enrico, yoze wakupinda ni yikola ya mu manyonga.